ផ្តើមពីមុខម្ហូបប្រពៃណីមួយផ្សារភ្ជាប់ជាមួយនឹងវប្បធម៌ភោជនាហាររបស់ប្រជាជនភាគខាងត្បូង របរធ្វើនំអន្សមនៅទីនេះបានបង្កើតការងារធ្វើលំនឹងសម្រាប់រាប់រយគ្រួសារ រួមចំណែកដល់ការអភិវឌ្ឍសេដ្ឋកិច្ចជនបទប្រកបដោយស្ថិរភាព។
ការបង្កើតការងាររកស៊ី
ភូមិសិប្បកម្មធ្វើនំអន្សម ត្រាកួន ត្រូវបានបង្កើតឡើងផ្តើមពីតម្រូវការធ្វើនំសម្រាប់បម្រើក្នុងឱកាសបុណ្យទាន បុណ្យចូលឆ្នាំថ្មី និងពិធីមង្គលការរបស់ប្រជាជនក្នុងមូលដ្ឋាន។ ឆ្នាំ ២០១១ ភូមិសិប្បកម្មត្រូវបានទទួលស្គាល់ជាផ្លូវការដោយគណៈកម្មាធិការប្រជាជនខេត្ត ត្រាវិញ (ខេត្តចាស់) យោងតាមសេចក្តីសម្រេចចិត្តលេខ 2085/QĐ-UBND បើកទិសដៅថ្មីសម្រាប់ផលិតផលពិសេសប្រចាំតំបន់មួយ។
ជាក្រុមគ្រួសារតួយ៉ាងមួយក្នុងចំណោមក្រុមគ្រួសារតួយ៉ាងក្នុងភូមិសិប្បកម្មគឺគ្រួសាររបស់អ្នកស្រី ម៉ាយ ធីហ្វាងឡន នៅភូមិ ត្រាកួន ដោយមានពាណិជ្ជសញ្ញានំអន្សម បាឡន។ ចាប់ផ្តើមធ្វើអាជីវកម្មតាំងពីឆ្នាំ ២០០៧ ខណៈនោះអ្នកស្រី ឡន គ្រាន់តែវេចនំអន្សមខ្ទង់ ២០ ទៅ ៣០ ដើមក្នុងមួយថ្ងៃទេ ចម្បងគឺនំប្រពៃណី មានពណ៌តែមួយ។ យូរៗទៅ តាមពេលវេលា ដោយចាប់បានរសជាតិ និងចំណូលចិត្តរបស់អតិថិជនកាន់តែច្រើនបែបច្រើនយ៉ាងនោះ អ្នកស្រីចាប់ផ្តើមកែលម្អផលិតផល ច្នៃបង្កើតបន្ថែមនូវប្រភេទនំដែលមានស្នូលគ្រប់មុខ ចម្រុះពណ៌។ ឆ្នាំ ២០១១ អ្នកស្រីជាអ្នកដំបូងគេនៅក្នុងភូមិសិប្បកម្មដែលល្បងពិសោធវេចនំអន្សមបីពណ៌ និងនំអន្សមដោយប្រើអង្ករដំណើបត្រាំស្លឹកកណ្តៀរ ហើយផលិតផលនេះក៏ត្រូវបានទីផ្សារទទួលយកយ៉ាងឆាប់រហ័ស។
មកទល់ពេលនេះ សិប្បកម្មរបស់អ្នកស្រីផ្គត់ផ្គង់នំអន្សមសម្រាប់ទីផ្សារចាប់ពី ៥០ ទៅ ៨០ នំជារៀងរាល់ថ្ងៃ បង្កើតការងាររកស៊ីជូនពលករជាប្រចាំចំនួន ៤ នាក់។ ក្នុងរដូវបុណ្យចូលឆ្នាំថ្មី បរិមាណផលរបស់សិប្បកម្មកើនឡើងដល់ ២.០០០ នំក្នុងមួយថ្ងៃ អ្នកស្រីត្រូវកៀរគរពលករជាង ៣០ នាក់មកធ្វើការតាមរដូវកាលដើម្បីធ្វើនំ។
ដូចគ្នាដែរ សិប្បកម្មធ្វើនំអន្សម អាញ់ធឺ របស់លោក ង្វៀន ង៉ុកថាវ ក៏ចាប់ផ្តើមតាំងពីឆ្នាំ ២០០៧ ដែរ ដោយគ្រាន់តែធ្វើនំប្រហែល ២០ ដើមសម្រាប់លក់ក្នុងរយៈពេល ២ ទៅ ៣ ថ្ងៃប៉ុននោះ។ មកដល់ពេលនេះ គ្រួសារលោកធ្វើនំចាប់ពី ៦០ ទៅ ៧០ នំក្នុងមួយថ្ងៃ ហើយក៏មានផលិតបន្ថែមតាមការបញ្ជាទិញរបស់អតិថិជនផងដែរ។ ជាពិសេសក្នុងរដូវបុណ្យចូលឆ្នាំថ្មី រៀងរាល់ថ្ងៃសិប្បកម្មរបស់លោកត្រូវគៀរគរពលករជាង ៣០ នាក់ដើម្បីផលិតនំទើបផ្គត់ផ្គង់ទីផ្សារបានគ្រប់គ្រាន់។
នំអន្សមរបស់សិប្បកម្ម អាញ់ធឺ និង បាឡន ត្រូវបានទទួលស្គាល់ជាផលិតផល OCOP លំដាប់ផ្កាយ ៣ (កម្មវិធីឃុំមួយផលិតផលមួយ) តាំងពីឆ្នាំ ២០១៩ ហើយទទួលបានជំនួយចំនួន ៥០ លានដុងក្នុងមួយសិប្បកម្មសម្រាប់បង្កើតហាងដាក់តាំងបង្ហាញផលិតផល។
យោងតាមអ្នកធ្វើនំយូរឆ្នាំនៅទីនេះ រូបមន្តនៃឱជារសពិសេសដាច់ដោយឡែករបស់នំអន្សម ត្រាកួន គឺនៅដំណាក់កាលជ្រើសរើសអង្ករដំណើប ទន់ល្មួត ស្នូលសាច់ជ្រូកបីជាន់ផ្អាប់រសជាតិដិត ពងទាប្រៃមានរសជាតិម្លាន់។ ជាពិសេស នំប្រើវត្ថុធាតុដើមបង្កើតពណ៌បែបធម្មជាតិដូចជា ស្លឹកកណ្តៀរ ស្លឹកងប់ ផ្លែហ្វាក់ខាវ... សុទ្ធសាធមិនមានប្រើផលិតផលពណ៌ឧស្សាហកម្មឡើយ ហើយធានាអនាម័យម្ហូបអាហារ។ នំត្រូវបានចម្អិនក្នុងរយៈពេលពី ៩ ទៅ ១០ ម៉ោងដោយប្រើអុស ឬឡភ្លើងអគ្គិសនី ដើម្បីរក្សាភាពទន់ល្មួត និងឱជារសពិសេសដាច់ដោយឡែក។ បច្ចប្បន្ននេះ សិប្បកម្មធ្វើនំអន្សមទាំងឡាយនៅ ត្រាកួន យកចិត្តទុកដាក់យ៉ាងខ្លាំងចំពោះគំរូម៉ូដផលិតផល ការវិនិយោគម៉ាស៊ីនបឺតខ្យល់ ការបិទស្លាកសញ្ញាយ៉ាងទាក់ទាញ។
ភាពល្អិតល្អន់ក្នុងដំណាក់កាលផលិតកម្មនីមួយៗ បានរួមចំណែកបង្កើត្យឲ្យពាណិជ្ជសញ្ញានំអន្សមពិសេសប្រចាំ ត្រាកួន ត្រូវបានអតិថិជនជាច្រើនក្នុងនិងក្រៅខេត្តនិយមចូលចិត្ត។ ឆ្នាំ ២០២៤ ជាង ៧៥% នៃបរិមាណនំត្រូវបានលក់ទៅក្រៅខេត្ត ក្នុងនោះ ច្រើនបង្អស់គឺទីផ្សារទីក្រុង ហូ ជីមិញ។
បច្ចុប្បន្នភូមិសិប្បកម្ម ត្រាកួន មានសិប្បកម្មធ្វើនំអន្សមចំនួន ៧ រៀងរាល់ឆ្នាំផ្គត់ផ្គង់នំអន្សមសម្រាប់ទីផ្សារខ្ទង់ ២៥៥.៥០០ នំ។ ដោយមានតម្លៃលក់ត្រឹមពី ៥០.០០០ ទៅ ១០០.០០០ ដុងមួយនំអាស្រ័យតាមប្រភេទនំ ប្រាក់ចំណូលជាមធ្យមរបស់សិប្បកម្មនីមួយៗ ទទួលបានប្រហែល ១,៦ ពាន់លានដុងមួយឆ្នាំ។ ភូមិសិប្បកម្មបង្កើតការងារធ្វើទៀងទាត់សម្រាប់ពលករក្នុងស្រុកជិត ១០០ នាក់ ដោយមានប្រាក់ចំណូលមធ្យមខ្ទង់ ៥,៩ លានដុងក្នុងមួយខែ។ អំឡុងពេលញឹកញាប់បំផុតគឺនៅរដូវបុណ្យចូលឆ្នាំថ្មី ចំនួនពលករតាមរដូវកាលកើនឡើងខ្លាំង។
លើកកម្ពស់ជំហរផលិតផលពិសេសប្រចាំតំបន់
បន្ទាប់ពីអស់រយៈពេល ៦ ឆ្នាំដាក់ដំណើរការ កម្មវិធី OCOP បានពង្រឹងពង្រីកដោយប្រសិទ្ធភាពច្បាស់លាស់។ ជាច្រើនផលិតផលពិសេសប្រចាំតំបន់ត្រូវបានលើកកម្ពស់តម្លៃកាន់តែខ្លាំងឡើង ហើយទីផ្សារប្រើប្រាស់កាន់តែស្ថិរភាព។ ឆ្លងតាមរយៈនោះ ជួយដោះស្រាយការងារធ្វើ លុបបំបាត់ភាពអត់ឃ្លានកាត់បន្ថយភាពក្រីក្រ បង្កើនប្រាក់ចំណូលជូនប្រជាជននៅជនបទ រួមចំណែកអនុវត្តដោយជោគជ័យកម្មវិធីកសាងជនបទថ្មីនៅតាមមូលដ្ឋានទាំងឡាយនៅក្នុងខេត្ត។
រហូតមកដល់បច្ចុប្បន្ន ខេត្ត វិញឡុង មានផលិតផលចំនួន ១.០៨៣ ដែលត្រូវបានទទួលស្គាល់សម្រេច OCOP លំដាប់ផ្កាយ ៣ ឡើងទៅ ពីកម្មវត្ថុចំនួន ៦២៥។ រយៈពេលកន្លង ទន្ទឹមនឹងការបែងចែកថវិកាប្រចាំឆ្នាំ មូលដ្ឋានទាំងឡាយក៏បានកៀរគរប្រភពកម្លាំងជាច្រើន ឆ្លៀតទាញយកផលប្រយោជន៍ពីកម្មវិធី គម្រោងការដែលបានដាក់ដំណើរការក្នុងភូមិសាស្រ្ត ដើម្បីជួយសហគ្រាស ក្រុមគ្រួសារធ្វើអាជីវកម្ម សហករណ៍វិនិយោគពង្រីកទូលំទូលាយទ្រង់ទ្រាយផលិតកម្ម លើកកម្ពស់គុណភាពផលិតផល ស្វែងរកបណ្តាញចែកចាយទាំងឡាយ ពង្រីកទីផ្សារទាំងក្នុងស្រុកនិងក្រៅប្រទេស។
សិប្បកម្មដែលចូលរួមក្នុងកម្មវិធី OCOP ត្រូវបានផ្តល់លក្ខខណ្ឌងាយស្រួលក្នុងការទទួលគោលនយោបាយផ្សេងៗ ដូចជា៖ ការឧបត្ថម្ភថវិកាសម្រាប់ការរចនាវេចខ្ចប់ ស្លាកសញ្ញាផលិតផល និងការបង្កើតសាច់រឿងផលិតផល ជួលឬសាងសង់ហាងថ្មីដើម្បីលក់ផលិតផល OCOP ការទិញគ្រឿងម៉ាស៊ីន និងគ្រឿងសម្ភារ ខ្សែចង្វាក់ផលិតកម្ម ជំនួយបំពេញបែបបទ និងថវិកាសម្រាប់កម្មវត្ថុដំឡើងចំណាត់ថ្នាក់ផ្កាយ។ល។ ព្រមទាំងបានចូលរួមក្នុងវគ្គបណ្តុះបណ្តាល ហ្វឹកហាត់អំពីសកម្មភាពផ្សព្វផ្សាយផលិតផលនៅក្នុងផ្សារណាត់តាំងពិព័រណ៍ដែលត្រូវបានរៀបចំឡើងដោយក្រសួង ផ្នែកមជ្ឈិម និងខេត្តទាំងឡាយទូទាំងប្រទេស។
លោក ចៀវ ថាញ់ផុង អនុប្រធានគណៈកម្មាធិការឃុំ វិញគីម មានប្រសាសន៍ថា រហូតមកដល់បច្ចុប្បន្ន ភូមិសិប្បកម្មធ្វើនំអន្សម ត្រាកួន មានផលិតផលចំនួន ១១ ត្រូវបានទទួលស្គាល់ OCOP ក្នុងនោះមានផលិតផលចំនួន ៣ សម្រេចស្តង់ដារលំដាប់ផ្កាយ ៤ នៅសេសសល់គឺលំដាប់ផ្កាយ ៣។ ផលិតផលឧបត្ថម្ភជាច្រើនត្រូវបានបិទលេខកូដ QR សម្រាប់ការបញ្ជាក់ប្រភពដើម ការវិនិយោគក្នុងការវេចខ្ចប់ ការចូលទៅជិតប្រព័ន្ធផ្សារទំនើប និងទីផ្សារអន្តរជាតិបន្តិចម្តងៗ។ នំគ្រប់ប្រភេទក៏ត្រូវបានធ្វើពិពិធកម្មតបទៅតាមតម្រូវការចំណង់ចំណូលចិត្តរបស់អតិថិជនផងដែរ ដូចជាស្លឹកងប់ស្នូលខ្លាញ់ នំអន្សមចេក នំអន្សម ទឺគ្វី (ឬនំអន្សមបួនរដូវ) នំអន្សម ៣ ពណ៌ស្នូលគ្រប់មុខ។ល។
បន្ទាប់ពីសម្រេចស្តង់ដារ OCOP ប្រជាប្រិយភាពរបស់ភូមិសិប្បកម្មត្រូវបានលើកកម្ពស់យ៉ាងច្បាស់ក្រឡែត។ ផលិតផលត្រូវបានអតិថិជនជឿជាក់ អាទិភាពជ្រើសទិញសម្រាប់ពិសា ឬធ្វើជាអំណោយ។ អាស្រ័យហេតុនេះ នំអន្សម ត្រាកួន កំពុងពង្រីកទីផ្សាររបស់ខ្លួនកាន់តែខ្លាំងឡើងពីមួយថ្ងៃទៅមួយថ្ងៃ។
លោក ចៀវ ថាញ់ផុង ចែករំលែកថា ថ្វីត្បិតតែនំអន្សម ត្រាកួន មានកេរ្តិ៍ឈ្មោះល្បីល្បាញយ៉ាងខ្លាំង ត្រូវបានអតិថិជនក្នុងនិងក្រៅខេត្តទទួលស្គាល់ជាផលិផលពិសេសប្រចាំតំបន់ក៏ដោយ ក៏ប៉ុន្តែនាបច្ចុប្បន្ននេះ នៅមិនទាន់មានស្លាកសញ្ញាបញ្ជាក់ផ្លូវការទាក់ទងនឹងការបញ្ជាក់ប្រភពដើមនៅឡើយទេ។ កត្តានេះធ្វើឲ្យស្ថានភាពក្លែងបន្លំ និងការបន្លំពាណិជ្ជសញ្ញាកើតឡើងញឹកញាប់ ប៉ះពាល់មិនតិចទេដល់កេរ្តិ៍ឈ្មោះ ប្រជាប្រិយភាព និងតម្លៃពិតប្រាកដរបស់ភូមិសិប្បកម្ម។
ប្រឈមមុខនឹងស្ថានភាពនោះ មូលដ្ឋានបានចុះឈ្មោះស្លាកសញ្ញាទទួលស្គាល់ "ត្រាកួន" សម្រាប់ផលិតផលនំអន្សម។ ឯកសារត្រូវបានអនុម័តដោយនាយកដ្ឋានកម្មសិទ្ធិបញ្ញា។ លោក ផុង បានស្នើឱ្យអាជ្ញាធរមានសមត្ថកិច្ចឆាប់ជួយសម្រេចរួចរាល់បែបបទផ្តល់វិញ្ញាបនបត្រ ព្រមទាំងបង្កើតលក្ខខណ្ឌសម្រាប់មូលដ្ឋាននានាក្នុងការទទួលបានទុនគោលនយោបាយអនុគ្រោះ បច្ចេកវិទ្យា និងការផ្សព្វផ្សាយជំរុញពាណិជ្ជកម្ម។
លោក ផុង ក៏បានស្នើឱ្យបង្កើនការវិនិយោគទៅលើគ្រឿងបរិក្ខារដូចជា ឡអគ្គិសនីចំហុយនំ ម៉ាស៊ីនបឺតខ្យល់ ឃ្លាំងស្តុកទំនិញត្រជាក់ជាដើម ដើម្បីបង្កើនសមត្ថភាពផលិត ធានាសុវត្ថិភាពអាហារ និងការពារបរិស្ថាន។ លើសពីនេះ ជួយសិប្បកម្មផលិតដំឡើងកម្រិតផលិតផលពី OCOP ផ្កាយ ៣ ឡើងទៅជាផ្កាយ ៤ បង្កើតឲ្យមានភាពខ្លាំងសម្រាប់ការប្រកួតប្រជែង និងការបញ្ជាក់ពាណិជ្ជសញ្ញាកាន់តែជាក់ច្បាស់នៅលើទីផ្សារ។
ដោយមានការរួមដំណើរពីអាជ្ញាធរមូលដ្ឋាន ការលះបង់អស់ពីចិត្តអស់ពីថ្លើមរបស់ប្រជាជនក្នុងភូមិសិប្បកម្ម នំអន្សម ត្រាកួន ដែលជាមុខម្ហូបថែរក្សា "ព្រលឹងជនបទ" របស់ប្រជាជននៅភាគខាងត្បូងកំពុងតែ "ឆ្លងកាត់" ជួររបងឫស្សីរបស់ភូមិបន្តិចម្តងៗ ឈានទៅមុខក្នុងដំណើរក្លាយជាពាណិជ្ជសញ្ញាផលិតផលពិសេសប្រចាំតំបន់មានប្រជាប្រិយភាពមិនត្រឹមតែសម្រាប់ វិញឡុង ប៉ុននោះទេ ថែមទាំងជារបស់តំបន់វាលទំនាបទន្លេ គឺវឡុង ទៀតផង៕
ផលិត៖ ថាញ់ហ្វា
ប្រែសម្រួល និង បញ្ចូលទិន្នន័យ៖ អៀងថាន់
