ក្នុងកិច្ចប្រជុំ អ្នកមានកិត្យានុភាព មេភូមិ និងគំរូឆ្នើមទាំង ៦០ រូបមានសមិទ្ធិផលលេចធ្លោក្នុងការងារឃោសនា ចលនាប្រជាជន ប្រឡងប្រណាំងរៀនសូត្រ ធ្វើពលកម្ម អភិវឌ្ឍសេដ្ឋកិច្ចសង្គម រក្សាសន្តិសុខ សណ្តាប់ធ្នាប់សង្គមក្នុងតំបន់បងប្អូនជនជាតិភាគតិចនៅមូលដ្ឋាន ដំណាក់កាលឆ្នាំ ២០២៣ - ២០២៤ ទទួលបាន ប័ណ្ណសរសើរពីប្រធានគណៈកម្មាធិការប្រជាជនខេត្ត បាក់កាន។
អនុលេខាអចិន្ត្រៃយ៍គណៈកម្មាធិការបក្សខេត្ត ប្រធានក្រុមប្រឹក្សាប្រជាជនខេត្ត បាក់កាន លោកស្រី ភឿង ធីថាញ់ បានវាយតម្លៃខ្ពស់ចំពោះការរួមចំណែកដ៏ធំធេង វិជ្ជមានរបស់កងជួរអ្នកមានកិត្យានុភាព មេភូមិ គំរូឆ្នើមតំបន់បងប្អូនជនជាតិភាគតិចនៅមូលដ្ឋាន ពិសេសគឺគណៈប្រតិភូឆ្នើមទាំង ៦០ រូបដែលចូលរួមកិច្ចប្រជុំនេះ។
អនុលេខាអចិន្ត្រៃយ៍គណៈកម្មាធិការបក្សខេត្ត បាក់កាន ស្នើឱ្យកងជួរអ្នកមានកិត្យានុភាព មេភូមិ គំរូឆ្នើមតំបន់បងប្អូនជនជាតិភាគតិចនៅមូលដ្ឋានខេត្តលើកកម្ពស់ស្មារតីទទួលខុសត្រូវចំពោះសហគមន៍ និងអភិវឌ្ឍន៍មូលដ្ឋាន រួមជាមួយនឹងគ្រប់លំដាប់ថ្នាក់ គ្រប់ផ្នែកអនុវត្តឱ្យបានល្អនូវគោលការណ៍របស់បក្ស គោលនយោបាយ ច្បាប់របស់រដ្ឋ និងធ្វើជាគំរូនាំមុខសាយភាយស្មារតីទទួលខុសត្រូវ បង្កើតការស្រុះចិត្តស្រុះគំនិត សាមគ្គី ឯកភាពក្នុងសហគមន៍ បំពេញភារកិច្ចរួមរបស់មូលដ្ឋាន ធ្វើការងារឃោសនាឲ្យបានល្អប្រសើរ ពន្លឿនការរុះរើផ្ទះបណ្ដោះអាសន្ន ចាស់ទ្រុឌទ្រោម។
តំបន់បងប្អូនជនជាតិភាគតិចបាននិងកំពុងទទួលបានការយកចិត្តទុកដាក់ពិសេសពីបក្ស រដ្ឋក្នុងការវិនិយោគ ឧបត្ថម្ភរាល់កម្មវិធី គោលនយោបាយអភិវឌ្ឍន៍សេដ្ឋកិច្ច - សង្គមតំបន់ភ្នំ បំបាត់ភាពអត់ឃ្លាននិងកាត់បន្ថយភាពក្រីក្រប្រកបដោយស្ថិរភាព។ គ្រប់កម្មវិធី គម្រោងត្រូវបានប្រជាជនគាំទ្រ រួមទាំងផ្នែកមួយនៃការរួមចំណែក សហការយ៉ាងស្អិតល្មួតរបស់កងជួរអ្នកមានកិត្យានុភាពក្នុងតំបន់បងប្អូនជនជាតិភាគតិចក្នុងមូលដ្ឋាន។
ក្នុងឱកាសនេះ គណៈកម្មាធិការបក្សខេត្ត បាក់កាន បានស្នើឲ្យមជ្ឈឹមពិចារណា បង្កើនកម្រិតឧបត្ថម្ភរាល់របប គោលនយោបាយជូនអ្នកមានកិត្យានុភាព ឬឧបត្ថម្ភជាប្រាក់ឧបត្ថម្ភប្រចាំខែដូចជាកម្មាភិបាលទទួលបន្ទុកជំនាញតាមភូមិនិគមដើម្បីឲ្យអ្នកមានកិត្យានុភាពអាចបំពេញការងារកាន់តែល្អប្រសើរ៕
ផលិត៖ សឺន ហាយ
ប្រែសម្រួលនិងបញ្ចូលទិន្នន័យ៖ អៀនថាញ់
