"ខ្សែតភ្ជាប់" រវាងជំនឿសាសនា និងការរស់នៅ
បច្ចុប្បន្ននេះ ទីក្រុង ហូ ជីមិញ មានអ្នកមានប្រជាប្រិយភាពជាង ១.៣០០ នាក់ក្នុងចំណោមបងប្អូនបណ្តាជនជាតិភាគតិច។ ក្នុងនោះ សហគមន៍ជនជាតិ ចាម លេចធ្លោដោយមានបណ្តាគំរូឆ្នើមដូចជាលោក M. Mohamed Amine - ប្រធានគណៈកម្មការវិហារ ឥស្លាម Masjid Al Jamia’ (សង្កាត់ ជើលើន) និងលោក Mohamad Zen - ប្រធានគណៈកម្មការវិហារ ឥស្លាម Al Masjid Jamia Alsa Adah (សង្កាត់ ប៊ិញតៀន)។ លោកទាំងពីរកំពុងពង្រីកល្អតួនាទីជា "ខ្សែតភ្ជាប់" រវាងជំនឿសាសនា និងការរស់នៅ រវាងសហគមន៍ជនជាតិ ចាម ជាមួយនឹងអាជ្ញាធរមូលដ្ឋាន។
នៅសង្កាត់ ចើលើន ក្នុងនាមជាប្រធានគណៈកម្មការវិហារ ឥស្លាម (Masjid Al Jamia') និងមានបទពិសោធន៍ជាង ១០ ឆ្នាំផ្សារភ្ជាប់ក្នុងតួនាទីជាអ្នកមានប្រជាប្រិយភាពក្នុងសហគមន៍ជនជាតិ ចាម នៅទីក្រុង ហូ ជីមិញ លោក M. Mohamed Amine តែងតែបង្ហាញពីស្មារតីទទួលខុសត្រូវ និងការលះបង់អស់ពីចិត្តពីថ្លើមក្នុងការងារចលនា និងឃោសនា។ លោកតែងតែសហការជាមួយអាជ្ញាធរមូលដ្ឋានក្នុងការងារផ្សព្វផ្សាយ ណែនាំមាមីងបងប្អូនជនជាតិគោរពតាមគោលការណ៍ មាគ៌ារបស់បក្ស គោលនយោបាយ ច្បាប់របស់រដ្ឋ ព្រមទាំងបង្កើនការឧបត្ថម្ភ ចលនាបណ្តាក្រុមគ្រួសារជនជាតិ ចាម ពង្រីកប្រពៃណីសាមគ្គីភាព ខិតខំឈោងឈានឡើងក្នុងការសិក្សា និងធ្វើពលកម្ម។
លោក Amine ឲ្យដឹងថា រាល់ពេលធ្វើពិធីបួងសួងប្រចាំសប្តាហ៍នៅរាល់ថ្ងៃសុក្រនៅវិហារគឺជាឱកាសល្អសម្រាប់គណៈកម្មការពិភាក្សាជាមួយមាមីងបងប្អូនអំពីគោលនយោបាយថ្មីៗ ជាពិសេសបទប្បញ្ញត្តិទាក់ទងនឹងសាសនា ជំនឿ និងការស់នៅរបស់ប្រជាជន។ លោក M. Mohamed Amine ចែករំលែកថា “ក្រោយធ្វើពិធី ខ្ញុំតែងតែចំណាយពេលប្រហែល ២០ ទៅ ៣០ នាទីដើម្បីពិភាក្សាជាមួយមាមីងបងប្អូន ណែនាំអំពីប្រការចាំបាច់ក្នុងការរស់នៅ ដូច ជាការរក្សាសន្តិសុខសណ្តាប់ធ្នាប់ មិនប្រព្រឹត្តល្មើសច្បាប់ គោរពតាមបទប្បញ្ញត្តិសាសនា និងចូលរួមរាល់ចលនាការពារបរិស្ថានយ៉ាងសកម្ម”។
ក្បែរនោះ គណៈកម្មការវិហារក៏យកចិត្តទុកដាក់ខ្លាំងចំពោះការរៀនសូត្ររបស់ក្មួយៗ ក្នុង សហគមន៍។ លោក Amine រីករាយមានប្រសាសន៍ “រហូតដល់ពេលនេះ ក្នុងសហគមន៍ជន ជាតិ ចាម យើងខ្ញុំមានប្អូនៗ ចំនួន ៤ នាក់បានបញ្ចប់កម្រិតសិក្សាមហាវិទ្យាល័យហើយ និងមានប្អូនៗចំនួន ៤ នាក់ទៀតកំពុងបន្តការសិក្សានៅតាមមហាវិទ្យាល័យនានាក្នុងទីក្រុង”។
ក្នុងការងារធានាសន្តិសុខសណ្តាប់ធ្នាប់ គណៈកម្មការវិហារយកចិត្តទុកដាក់ខ្លាំងចំពោះការអប់រំយុវជនឱ្យជៀសឆ្ងាយពីអំពើអបាយមុខសង្គម។ លោក Amine សង្កត់ធ្ងន់ថា “យើងខ្ញុំតែងតែដាស់តឿនក្រើនរំលឹកកូនក្មួយដាច់ខាតមិនប្រើប្រាស់គ្រឿងញៀន គោរពច្បាប់ចរាចរណ៍ ត្រូវតែមានប័ណ្ណបើកបរទើបអាចបើកបរបាន”។
មិនត្រឹមតែផ្តោតលើការឃោសនាប៉ុននោះទេ លោក Amine រួមជាមួយនឹងគណៈកម្មការវិហារតែងតែកៀរគរសប្បុរសជន សហគ្រាសទាំងឡាយជាប្រចាំឱ្យឧបត្ថម្ភបងប្អូនមាមីងដែលជួបលំបាក ជាពិសេសក្នុងអំឡុងខែ រ៉ាម៉ាដាល និងបណ្តាថ្ងៃបុណ្យធំៗ របស់ ឥស្លាម។
ផ្សារភ្ជាប់ ទទួលខុសត្រូវក្នុងការងារឃោសនា
បច្ចុប្បន្ន សហគមន៍ជនជាតិ ចាម នៅសង្កាត់ ជើលើន មានប្រជាជនប្រមាណ ២០០ នាក់កំពុងរស់នៅ និងធ្វើការ រៀងរាល់សប្តាហ៍មានជនជាតិ ចាម ចាប់ពី ៤០០ ទៅ ៥០០ នាក់មកពីតំបន់ផ្សេងៗ អញ្ជើញមកធ្វើពិធីនៅព្រះវិហារ។ លោក Amine មានប្រសាសន៍ថា “នេះជាលក្ខខណ្ឌងាយស្រួលសម្រាប់យើងខ្ញុំគួបផ្សំការឃោសនា អំពីច្បាប់ ចលនាមាមីងបងប្អូន ឱ្យរួបរួមសាមគ្គីភាព ជីវិតល្អបវរសាសនា”។
យោងតាមលោក M. Mohamed Amine ដើម្បីបំពេញល្អតួនាទីរបស់អ្នកមានកិត្យានុភាពនៅក្នុងសហគមន៍ ត្រូវតែមានចំណេះដឹង ការយោគយល់ និងបង្កើតទំនាក់ទំនងល្អ។ លោក Amine ចែករំលែក “ខ្ញុំតែងតែជួបប្រាស្រ័យទាក់ទង ផ្លាស់ប្តូរបទពិសោធន៍ជាមួយ នឹងអ្នកមានកិត្យានុភាពរបស់សាសនាដទៃទៀតដូចជា៖ ព្រះពុទ្ធសាសនា សាសនាកាតូលិក ឬសហគមន៍ជនជាតិ ចិន ផ្តើមពីនោះអនុវត្តក្នុងការងារនៅក្នុងសហគមន៍ជនជាតិ ចាម។ អាស្រ័យដូច្នេះ មាមីងបងប្អូនកាន់តែយល់ច្បាស់អំពីច្បាប់ ជៀសវាងការត្រូវជនខិលខូចទាញយកប្រយោជន៍នៅលើបណ្តាញសង្គម”។
ចំណែកនៅសង្កាត់ ប៊ិញទៀន ជាច្រើនឆ្នាំកន្លង លោក Mohamad Zen ប្រធានគណៈកម្មការវិហារ ឥស្លាម Al Masjid Jamia Alsa Adah តែងតែជាគំរូភ្លឺថ្លាក្នុងសហគមន៍ជនជាតិ ចាម។ ដោយមានស្មារតីទំនួលខុសត្រូវ និងការលះបង់អស់ពីចិត្តពីថ្លើម លោកបានផ្សព្វផ្សាយ និងចលនាប្រជាជនឱ្យគោរពតាមបទប្បញ្ញត្តិនៃច្បាប់យ៉ាងវិជ្ជមាន ព្រមទាំងគាំទ្រ និងចូលរួមរាល់ការចលនា រាល់សកម្មភាពដែលអាជ្ញាធរមូលដ្ឋានបំផុស។ល។
រៀងរាល់សប្តាហ៍ នៅល្ងាចថ្ងៃព្រហស្បតិ៍ ឬរសៀលថ្ងៃសុក្រ បន្ទាប់ពីធ្វើពិធីរួចរាល់នោះ លោក Zen រួមជាមួយនឹងគណៈកម្មការវិហារអង្គុយពិភាក្សាគ្នា ដើម្បីស្វែងយល់អំពីគំនិត បំណងប្រាថ្នារបស់មាមីងបងប្អូន ពន្យល់អំពីខ្លឹមសារដែលមាមីងបងប្អូនមិនទាន់ច្បាស់ ដើម្បីអនុវត្តបទប្បញ្ញត្តិឲ្យបានត្រឹមត្រូវ ឈ្វេងយល់ជាប្រចាំអំពីជីវភាពរបស់ក្រុមគ្រួសារនីមួយៗ ឆ្លើយតបទាន់ពេលវេលា សហការជាមួយអាជ្ញាធរមូលដ្ឋានដើម្បីឧបត្ថម្ភករណីលំបាកៗ ទាំង ឡាយ។ លោក Zen ឱ្យដឹងថា “យើងខ្ញុំតែងតែចលនាកូនក្មួយខិតខំរៀនសូត្រ មិនឈប់រៀនពាក់កណ្តាលទី។ ប្រសិនបើគ្រួសារណាមួយជួបលំបាក យើងខ្ញុំនឹងទាក់ទងជាមួយនឹងអាជ្ញាធរមូលដ្ឋានដើម្បីឧបត្ថម្ភសៀវភៅសិក្សា សៀវភៅសរសេរ សិក្ខូបករណ៍សម្រាប់ប្អូនៗ”។
ជាពិសេស ជិត ១០ ឆ្នាំកន្លងទៅហើយ លោក Zen នៅតែបន្តរក្សាថ្នាក់រៀនអក្សរ ចាម ដោយឥតគិតថ្លៃនៅពេលល្ងាច ជួយឱ្យប្អូនៗ យល់ច្បាស់អំពីប្រភពដើមរបស់ជនជាតិខ្លួន។ លោក Zen ចែករំលែកថា “ទន្ទឹមនឹងការបង្រៀនអក្សរ ខ្ញុំក៏បានពន្យល់ពាក្យ វៀតណាម ផងដែរ ដើម្បីឱ្យប្អូនៗ យល់កាន់តែជ្រៅជ្រះ ថែមទៀត ផ្តើមពីនោះពូនជ្រំបន្ថែមទៀតឲ្យប្អូនៗ នូវការស្នេហាមាតុភូមិ ប្រទេសជាតិ និងអត្តសញ្ញាណវប្បធម៌ ដាច់ដោយឡែករបស់ក្រុមជនជាតិនីមួយៗ”។
ក្រៅពីនេះ លោក Amine ក៏បានស្នើអាជ្ញាធរទីក្រុង ហូ ជីមិញ គួរពិចារណាឧបត្ថម្ភថ្លៃសិក្សា ជាពិសេសសម្រាប់និស្សិតជនជាតិ ចាម កំពុងសិក្សានៅមហាវិទ្យាល័យ ដើម្បីឲ្យប្អូនៗ មានលក្ខខណ្ឌក្នុងការសិក្សា ឈានឡើង រួមវិភាគទានក្នុងការអភិវឌ្ឍទីក្រុង ហូ ជីមិញ។
យោងតាមលោក Amine “បច្ចុប្បន្ន អ្នកមានកិត្យានុភាពស្ទើរតែទាំងអស់ក្នុងចំណោមបងប្អូនជនជាតិភាគតិចគឺធ្វើការស្ម័គ្រចិត្ត មិនទាន់មានថវិកាឧបត្ថម្ភជាប្រចាំទេ។ ដូច្នេះហើយ ខ្ញុំសូមស្នើអាជ្ញាធរទីក្រុង ហូ ជីមិញ គួរយកចិត្តទុកដាក់បន្ថែមទៀតចំពោះគោលនយោបាយអនុគ្រោះ ការធានារ៉ាប់រងសុខភាព ប្រាក់ឧបត្ថម្ភបំពេញសកម្មភាពប្រចាំខែ ក៏ដូចជារៀបចំការជួបប្រាស្រ័យទាត់ទង ផ្លាស់ប្តូរ និងការចែករំលែកបទពិសោធន៍រវាងអ្នកមានកិត្យានុភាពនៅឯខេត្ត និងទីក្រុងផ្សេងៗ មានលក្ខខណ្ឌ និងការលើកទឹកចិត្តបន្ថែមយើងខ្ញុំនឹងបន្តចូលរួមចំណែកជាច្រើនថែមទៀតសម្រាប់សហគមន៍”៕
អត្ថបទ និងរូបថត៖ អានហៀវ
ប្រែសម្រួល៖ អៀងថាន់
