លុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោម៖

មនោសញ្ចេតនាប្រជាជាតិ បដិការគុណបងប្អូនជនជាតិ

ស៊ន់កឿង - ទីភ្នាក់ងារព័ត៌មានវៀតណាម

03/06/2025 15:38

ក្រសួងនគរបាលប្រគល់ជូនផ្ទះមហាសាមគ្គីជូនប្រជាជននៅស្រុក ត្រាគូ (ខេត្ត ត្រាវិញ)

ចលនាប្រលងប្រណាំង “លុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោម” បាននិងកំពុងត្រូវបានដាក់ដំណើរការនៅទូទាំងប្រទេសដោយមានដំណោះស្រាយបត់បែន មានប្រសិទ្ធភាពជាច្រើន។ ចលនាឆ្ពោះទៅរកគោលដៅនឹងសម្រេចរួចរាល់នៅថ្ងៃទី ៣១ ខែ តុលា ឆ្នាំ ២០២៥។

ពីផ្ទះស្បូវទទ្រេតទទ្រោតទៅជាកន្លែងតាំងទីលំនៅស្ថិរភាពរឹងមាំ

ជាង ២០ ឆ្នាំមកនេះ គ្រួសារលោក ចាង បួថាវ ជនជាតិ ម៉ុង នៅភូមិ លុងគុង ឃុំ ណឹម ក ស្រុក មូកាងចាយ (ខេត្ត អៀនបាយ) ត្រូវនៅក្នុងផ្ទះបណ្ដោះអាសន្ន ជីវភាពជួបប្រទះការលំបាកលំបិនជាច្រើន។ ឆ្នាំ ២០២៥ គ្រួសារលោក ថាវ ត្រូវបានស្រុកឧបត្ថម្ភចំនួន ៦០ លានដុង លោកប្រមូលប្រាក់បន្ថែមជិត ១០០ លានដុងដើម្បីសង់ផ្ទះ។ មានកន្លែងលំនៅថ្មី គ្រួសារលោកស្ងប់ចិត្តអភិវឌ្ឍផលិតកម្ម កែលម្អជីវភាពរស់នៅ។

លោកនាយករដ្ឋមន្ត្រី ផាម មិញជិញ ជាមួយតំណាងអង្គការ សហគ្រាសឧបត្ថម្ភថវិកាលុបបំបាត់ផ្ទះបណ្ដោះអាសន្ន ផ្ទះធ្លុះធ្លាយទ្រុឌទ្រោមនៅកម្មវិធី

ស្រដៀងគ្នានឹងគ្រួសារលោក ថាវ គឺគ្រួសារលោកស្រី ថាច់ ធីហ្វា ជនជាតិ ខ្មែរ នៅឃុំ ង្វៀតហ្វា ស្រុក ចូវថាញ់ (ខេត្ត ត្រាវិញ)។ ផ្ទះរបស់លោកស្រីគឺជាផ្ទះមួយក្នុងចំណោមផ្ទះចំនួន ១.៣០០ ខ្នងត្រូវបានសាងសង់ពីប្រភពឧបត្ថម្ភរបស់ក្រសួងនគរបាល (ផ្ទះមួយខ្នងចំនួន ៥០ លានដុង) និងថវិកាខេត្ត (ផ្ទះមួយខ្នងចំនួន ១៥ លានដុង)។ ក្រោយដំណើរការសាងសង់រយៈពេលជិត ៤ ខែ ទាំងអស់សុទ្ធតែសាងសង់រួចរាល់ត្រឹមត្រូវតាមកាល បរិច្ឆេទនិងត្រូវបានដាក់ឱ្យប្រើប្រាស់។ លោកស្រី ហ្វា រៀបរាប់ថា៖ "រដូវវស្សាឆ្នាំនេះ ខ្ញុំនឹងលែងនៅព្រួយបារម្ភដូចពេលមុនទៀតហើយ។ បើមិនបានអាជ្ញាធរឧបត្ថម្ភទេ សន្សែសន្សំអស់មួយជីវិតខ្ញុំក៏មិនមានលុយគ្រប់គ្រាន់ដើម្បីសង់ផ្ទះថ្មី..."។

នាយប់នៃថ្ងៃទី ៥ ខែ តុលា ឆ្នាំ ២០២៤ នៅ ហាណូយ លោកនាយករដ្ឋមន្ត្រី ផាម មិញជិញ ប្រធានក្រុមប្រឹក្សាប្រលងប្រណាំង - លើកសរសើរមជ្ឈិមអញ្ជើញចូលរួមកម្មវិធីបំផុសការឧបត្ថម្ភលុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោមលើវិសាលភាពទូទាំងប្រទេសដោយប្រធានបទ៖ "ជម្រកដ៏សែនកក់ក្តៅសម្រាប់បងប្អូនជនរួមជាតិខ្ញុំ"

រឿងរបស់គ្រួសារលោក ថាវ និងលោកស្រី ហ្វា គឺជាឧទាហរណ៍តួយ៉ាង សម្រាប់កម្មវិធីលុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោមបានពាំនាំមកនូវក្តីសុភមង្គលអោយក្រុមគ្រួសារក្រីក្រជាច្រើននៅគ្រប់តំបន់ ភូមិភាគក្នុងប្រទេសទាំងមូល។ នៅខេត្ត អៀនបាយ ឆ្នាំ ២០២៥ ខេត្តមានផែនការលុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោម ចំនួន ២.២០៨ ខ្នងជូនក្រុមគ្រួសារក្រីក្រ ជិតខ្សែបន្ទាត់នៃភាពក្រីក្រ អ្នកមានគុណបំណាច់ ហើយបានបើកការសាងសង់ជាង ៩៩% ចំនួនផ្ទះបណ្តោះអាសន្ន ផ្ទះធ្លុះធ្លាយ ទ្រុឌទ្រោម ខិតខំសាងសង់រួច ១០០% ក្នុងខែ មិថុនា ឆ្នាំ ២០២៥។ នៅទីក្រុង ឡាងសឺន ខេត្តប្រញាប់ប្រញាល់អនុវត្តកម្មវិធីលុបបំបាត់ផ្ទះបណ្ដោះអាសន្ននិងបានសម្រេចរួចរាល់ជាង ១.០០០ ខ្នង។ រីឯនៅខេត្ត ត្រាវិញ ដល់ខែ មេសា ឆ្នាំ ២០២៥ ខេត្តបានសាងសង់ផ្ទះថ្មីជាង ៣.៥០០ ខ្នងសម្រាប់ក្រុមគ្រួសារក្រីក្រ ក្នុងនោះជាង ១/៣ នៃចំនួនផ្ទះត្រូវបានឧបត្ថម្ភពីក្រសួងនគរបាល។ នៅតាមស្រុកនានា៖ តៀវកឹន ត្រាគូ កូវង៉ាង។ល។ ផ្ទះថ្មីរាប់រយខ្នងត្រូវបានសាងសង់ឡើងពីខឿនផ្ទះចាស់ កន្លែងដែលធ្លាប់ជាខ្ទមប្រក់ស្បូវទទ្រេតទទ្រោតបច្ចុប្បន្នក្លាយជាកន្លែងតាំងទីលំនៅស្ថិរភាពរឹងមាំ។

ការប្តេជ្ញាចិត្តសម្រេចគោលដៅ

ដំណើរការអនុវត្តគម្រោងលុបបំបាត់ផ្ទះបណ្តោះអាសន្ន ផ្ទះធ្លុះធ្លាយ ទ្រុឌទ្រោមនៅតាមមូលដ្ឋានបានកើតការលំបាកលំបិនថី្មៗ ទៀត ក៏ប៉ុន្តែ សុទ្ធតែត្រូវបានគ្រប់មូលដ្ឋាននិងគ្រប់ផ្នែក គ្រប់លំដាប់ថ្នាក់ជម្នះ។

សមាជិកសម្ព័ន្ធយុវជនខេត្ត អៀនបាយ ឧបត្ថម្ភប្រជាជនរុះរើផ្ទះនិងសាងសង់ផ្ទះថ្មី

លោកស្រី វូ ធីហៀនហាញ់ អនុប្រធានគណៈកម្មាធិការ ប្រជាជនខេត្ត អៀនបាយ បានឲ្យដឹងថា៖ សណ្ឋានដីស្មុគស្មាញនៃខេត្ត តំបន់ភ្នំបណ្តាលឱ្យកើតថ្លៃចំណាយថ្មីក្នុងការដឹកជញ្ជូនវត្ថុធាតុដើម។ ម៉្យាងវិញទៀត គ្រួសារបងប្អូនជនជាតិរស់នៅជាមួយគ្នាជាច្រើនជំនាន់ស្រាប់បានជានៅពេលកូនចៅរើចេញទៅរស់នៅដោយខ្លួនឯងនាំឱ្យក្រុមគ្រួសារទាំងឡាយមានផ្ទះលំនៅទ្រុឌទ្រោម ធ្លុះធ្លាយកើតឡើងថ្មីបន្ថែមទៀត។

*ការសាងសង់ផ្ទះសម្រាប់ក្រុមគ្រួសារនៅតំបន់ភ្នំ មូកាងចាយ*

ខេត្ត អៀនបាយ បានរួមបញ្ចូលប្រភពកម្លាំងទាំងឡាយ ដើម្បីចាត់ចែងអោយបណ្តាមូលដ្ឋានទាន់ពេលវេលា។ ខេត្តក៏បានកៀរគរឱ្យមានការចូលរួមពីប្រព័ន្ធនយោបាយទាំងមូល សហគមន៍ប្រជាជន ស្របពេនោះដែរ ចលនាប្រជាជនគាំទ្រនិងចាប់ផ្តើមដំណើរការសាងសង់។ រហូតមកដល់ពេលនេះ គម្រោងបានឈានមុនកាលបរិច្ឆេទបើធៀបនឹងផែនការ។

"ដោយសារការគាំទ្រ ឧបត្ថម្ភរបស់សហគមន៍ ផ្ទះមួយខ្នងៗ បន្ទាប់ពីសាងសង់សម្រេចរួចរាល់បានមានគុណភាពល្អ តម្លៃខ្ពស់ជាងយ៉ាងច្រើនបើធៀបនឹងកម្រិតឧបត្ថម្ភពីថវិការដ្ឋជាមធ្យមផ្ទះសង់ថ្មីមួយខ្នងចំនួន ១២០ លានដុង ផ្ទះជួសជុលមួយខ្នងចំនួន ៤០ លានដុង" - លោកស្រី វូ ធីហៀនហាញ់ អនុប្រធានគណៈកម្មាធិការប្រជាជនខេត្ត អៀនបាយ។

លោកស្រី ថាវ ធីកួ ភូមិ ត្រុងតុង ឃុំ ចេគូញ៉ា ស្រុក មូកាងចាយ សុភមង្គលនៅក្បែរកូនចៅពេលមានផ្ទះថ្មីដើម្បីស្នាក់នៅ

លោក ហ្វាង អាញ់ទន់ អនុប្រធានគណៈកម្មាធិការ រណសិរ្សមាតុភូមិខេត្ត ឡាងសឺន បានឲ្យដឹងថា៖ ចំនួនផ្ទះត្រូវការឧបត្ថម្ភច្រើនបានជាត្រូវការប្រភពកម្លាំងដ៏ច្រើនទាំងអំពីថវិកាទាំងកម្លាំងមនុស្សផង។ ឃុំតំបន់ ៣ លំបាកលំបិនជាច្រើនអំពីគមនាគមន៍ ប៉ះពាល់ដល់ការដឹកជញ្ជូន សម្ភារសំណង់។ ក្រុមគ្រួសារខ្លះមិនទាន់មានប័ណ្ណកម្មសិទ្ធិប្រើប្រាស់ដីធ្លីឬឯកសារផ្លូវច្បាប់នៅមិនទាន់បានបំពេញគ្រប់គ្រាន់ បណ្តាលឱ្យដំណើរការអនុវត្តត្រូវអូសបន្លាយ។ "ក្រោយពេលរាយការណ៍ជូនមជ្ឈិម ខេត្តបានបន្តទទួលបានការឧបត្ថម្ភពីសហគ្រាស សម្ពន្ធនិងសហគមន៍។ ជារៀងរាល់សប្តាហ៍ គណៈកម្មាធិការដឹកនាំលុបបំបាត់ ផ្ទះបណ្តោះអាសន្នប្រជុំប្រគល់ការងារនិងចាត់ចែងកិច្ចការខុសត្រូវជាក់ស្តែងដល់មន្ទីរ ផ្នែក មូលដ្ឋានបានជាកាលបរិច្ឆេទដំណើរការបានលឿនជាងមុន។ ខេត្តមានគោលបំណងចង់មជ្ឈិមសិក្សាដំឡើងកម្រិតឧបត្ថម្ភ សង់ផ្ទះចំពោះ មូលដ្ឋានតំបន់ភ្នំ តំបន់ជ្រៅ តំបន់ឆ្ងាយមានលក្ខខណ្ឌធ្វើដំណើរទៅមកលំបាកលំបិន កម្រិតឧបត្ថម្ភគួរតែខ្ពស់ជាងបើធៀបនឹងខេត្តតំបន់វាលទំនាប"។ លោក ហ្វាង អាញ់ទន់ បានស្នើ។

គិតដល់ថ្ងៃទី ១១ ខែ ឧសភា ឆ្នាំ ២០២៥ ទូទាំងប្រទេសបានលុបបំបាត់បានផ្ទះជិត ២០៩.០០០ ខ្នង (ក្នុងនោះសម្ពោធនិងប្រគល់ជូនផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោមចំនួន ១១១. ០០០ ខ្នង ផ្តើមសាងសង់ផ្ទះចំនួន ៩៨.០០០ ខ្នង) សម្រេចបានប្រហែល ៧៧% នៃចំនួនតម្រូវការសរុប។ ចលនា "រួមដៃគ្នាលុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោម" មិនត្រឹមតែជាភារកិច្ចសុខុមាលភាពសង្គមប៉ុណ្ណោះទេ ថែមទាំងជាសកម្មភាពដ៏មានអត្ថន័យ រួមចំណែកលើកកម្ពស់គុណភាពជីវភាពរស់នៅ របស់ប្រជាជន ជាពិសេសគ្រួសារគោលនយោបាយ ក្រុមគ្រួសារក្រីក្រនិងជិតខ្សែបន្ទាត់នៃភាពក្រីក្រ។

ការអនុវត្តគម្រោងឧបត្ថម្ភលំនៅឋានសម្រាប់ក្រុមគ្រួសារក្រីក្រដំណាក់កាល ២០២៣ - ២០២៥ ខេត្ត អៀនបាយ សាងសង់ផ្ទះរាប់ពាន់ខ្នង ជួយបណ្តាក្រុមគ្រួសារក្រីក្រលំបាកលំបិនអំពីលំនៅឋានរក្សាលំនឹងជីវភាពរស់នៅ ស្ងប់ចិត្តធ្វើការងារនិងឆ្ពោះទៅរកការរួចផុតភាពក្រីក្រប្រកបដោយចីរភាព

លោកស្រី តូ ធីប៊ិចចូវ អនុប្រធានគណៈកម្មាធិការមជ្ឈិមរណសិរ្សមាតុភូមិ វៀតណាម បានមានប្រសាសន៍ថា៖ "មូលដ្ឋាននានាកំពុងចូលរួមយ៉ាងប្តូរផ្តាច់និងបត់បែន។ ចំឱកាសទិវាបុណ្យជាតិថ្ងៃទី ២ ខែ កញ្ញា ឆ្នាំ ២០២៥ និងអបអរសាទរមហាសន្និបាតបក្ស មូលដ្ឋានទាំងឡាយ នឹងមានជម្រកដ៏សែនកក់ក្តៅធំទូលាយស្អាតបាត រឹងមាំជាច្រើនបន្ថែមទៀតសម្រាប់ប្រជាជន"៕

អត្ថបទ៖ ស៊ន់កឿង
រូបថត៖ ទីភ្នាក់ងារព័ត៌មានវៀតណាម
បញ្ចូលទិន្នន័យ៖ យ័ញលើយ