* លើកតម្កើងគុណសម្បត្តិកងទ័ពអ៊ំ ហូ
លោក ង្វៀន ឌិញធុយ (អាយុ ៧១ ឆ្នាំ) នៅភូមិ តឹនឡឹប (ឃុំ ភូងៀ) ធ្លាប់ចូលរួមក្នុងសង្រ្គាមតស៊ូប្រយុទ្ធជាមួយនឹងចក្រពត្តិ អាមេរិក សង្គ្រោះជាតិ និងរួមចំណែកកម្លាំងរបស់ខ្លួនក្នុងសង្រ្គាមការពារព្រំដែនភាគនិរតី។ ត្រឡប់មកក្រោយអំឡុងឆ្នាំភ្នក់ភ្លើ់ងសង្គ្រាម លោក ធុយ មិនជ្រើសរើសភាពរស់សុខស្រួលនោះទេ បែរជាបន្តនឹងការប្រយុទ្ធថ្មីនោះគឺជាការប្រយុទ្ធនឹងភាពអត់ឃ្លាននិងភាពក្រីក្រ កសាងជីវភាពដ៏សុខចម្រើនសម្រាប់ខ្លួនឯង និងសហគមន៍។
ក្រោយពីបញ្ចប់ការបំពេញកាតព្វកិច្ចយោធា លោក ធុយ មានគ្រួសារនៅស្រុក ភឿកឡុង ឃុំ ឌឹកហាញ់ (អតីតខេត្ត ប៊ិញភឿក)។ ក្នុងអំឡុងប៉ុន្មានថ្ងៃដំបូង ជីវភាពរបស់ប្តីប្រពន្ធវ័យក្មេងមួយគូនេះជួបការលំបាក ឧបសគ្គរាប់មិនអស់។ ដោយមានអត្តចរិតមោះមុត ឆន្ទៈរឹងប៉ឹងរបស់ទាហាន លោក ធុយ មិនរារង់ថយក្រោយនឹងការលំបាកឡើយ។ លោកប្រឹងប្រែងឥតឈប់ឈរ សន្សំការពិសោធ និងក្លាហានវិនិយោគទៅក្នុងវិស័យកសិកម្ម។
ផ្តើមពីបាតដៃទទេទាំងគូ លោក ធុយ បង្កើតដីដាំដុះជិត ២០ ហិកតា។ ដោយមានចក្ខុវិស័យជាយុទ្ធសាស្ត្រ និងការឧស្សាហ៍ព្យាយាម លោកបានកែលម្អដីទំនេរក្លាយជាចម្ការផ្លែឈើផ្តល់ផ្លែមានសេដ្ឋកិច្ចខ្ពស់។ បច្ចុប្បន្នផ្ទៃដីចំនួន ១៥ ហិកតាររបស់គ្រួសារលោកបានគ្របដណ្តប់ដោយដំណាំកៅស៊ូ ចំណែកដីនៅសេសសល់ដាំដំណាំឧស្សាហកម្មគ្រប់ប្រភេទដែលមានតម្លៃសេដ្ឋកិច្ចខ្ពស់ដូចជា ស្វាយចន្ទី ម្រេច និងទុរេន។ ដោយប្រើប្រាស់វិទ្យាសាស្ត្របច្ចេកទេសក្នុងផលិតកម្ម និងការគ្រប់គ្រងប្រកបដោយប្រសិទ្ធភាពនោះ គំរូសេដ្ឋកិច្ចរបស់លោក ធុយ បាននាំមកប្រាក់ចំណូលខ្ពស់។ ក្នុងមួយឆ្នាំៗ គ្រួសារលោករកចំណូលបានជាង ១ ពាន់លានដុង។
លោក ធុយ មានប្រសាសន៍ថា សង្គ្រាមបានលត់ដំឲ្យលោកនូវឆន្ទៈជម្នះការលំបាក ហើយមិនក្រែងរអែងឡើយ។ ពេលត្រឡប់មកជីវិតស៊ីវិលវិញ លោកតែងតែទន្ទេញហើយទន្ទេញទៀតថាត្រូវធ្វើយ៉ាងណាដើម្បីជួយគ្រួសារឱ្យរួចផុតពីភាពក្រីក្រ មានជីវភាពស្ថិរភាព។ លោកគិតថា បើសិនជាលោកអាចតស៊ូដើម្បីប្រទេសជាតិ លោកក៏អាចក្លាយជាអ្នកមាននៅដេនដីស្រុកកំណើតបានដែរ។
មិនត្រឹមតែធ្វើមានសម្រាប់ខ្លួនឯងទេ លោក ធុយ តែងតែផ្ដោតទៅលើសហគមន៍ផងដែរ។ លោកបានបង្កើតការងារធ្វើស្ថិរភាពជូនកម្មករធ្វើការជាប្រចាំចំនួន ៧ នាក់ដែលជាជនជាតិភាគតិចហើយស្ថិតក្នុងស្ថានភាពលំបាកក្នុងភូមិសាស្រ្ត ដោយទទួលបានប្រាក់ខែប្រហែល ៧ លានដុងមួយខែ ដោយការងារចម្បងគឺ ថែទាំ និងប្រមូលផលកសិផល។ ក្នុងរដូវប្រមូលផលគ្រាប់ស្វាយចន្ទី ម្រេច ចំនួនកម្មករដែលលោក ធុយ ជួលកាន់តែច្រើន ជួយក្រុមគ្រួសារជនជាតិភាគតិចជាច្រើនមានប្រាក់ចំណូល ជីវភាពរស់នៅល្អប្រសើរឡើង។
នៅឃុំ ភូងៀ រឿងរ៉ាវរបស់លោក ដៀវ ថួត (អាយុ ៤៩ ឆ្នាំ) នៅភូមិ ៣ ជាជនជាតិ ស្ទៀង ដែលជាយោធិនចេញពីកងទ័ពនៃសមាគមអតីតយុទ្ធជនឃុំ ភូងៀ ក៏ជាសក្ខីកម្មមួយដ៏រស់រវើកនៃការឈោងឈានឡើង។ ក្នុងអំឡុងប៉ុន្មានឆ្នាំកន្លង ចាប់តាំងពីពេលចូលសមាគមអតីតយុទ្ធជនមក ជីវភាពរបស់គ្រួសារលោក ដៀវ ថួត មានការរីកចម្រើនធូរធារជាច្រើន។
ក្រោយចេញពីកងទ័ពបានរយៈពេល ១ ឆ្នាំ និងមានគ្រួសារនោះ លោក ដៀវ ថួត ត្រូវបានចែកដីផលិតកម្មជិត ១,៣ ហិកតា។ បន្ទាប់មក ១ ហិកតាដីនោះត្រូវបានដាំកៅស៊ូ ហើយកំពុងឲ្យប្រមូលផលជាបន្តបន្ទាប់អំឡុងពេល ៦ ឆ្នាំ។ ក្នុងមួយខែៗ ចម្ការកៅស៊ូបាននាំមកប្រាក់ចំណូលប្រមាណ ១៥ លានដុងសម្រាប់គ្រួសារ។ ផ្ទៃដីដែលនៅសេសសល់ត្រូវបានគ្រួសារលោកដាំដំណាំកាហ្វេវិញ។
លោក ដៀវ ថួត មានប្រសាសន៍ថា៖ "បរិយាកាសកងជួរកងទ័ពបានផ្តល់មេរៀនដ៏មានតម្លៃជាច្រើនដល់ខ្ញុំ។ ក្នុងជីវភាពស៊ីវិល ខ្ញុំខំប្រឹងរកស៊ីចិញ្ជឹមជីវិត រៀនសូត្រពីសមាជិកអតីតយុទ្ធជនដើម្បីជម្នះការលំបាក មានជីវភាពកាន់តែមានស្ថិរភាព"។ ក្រៅពីការងារមើលថែសួនច្បារ លោក ដៀវ ថួត នៅសកម្មទៅស៊ីឈ្នួល ចូលរួមក្នុងក្រុមសន្តិសុខសណ្តាប់ធ្នាប់ក្នុងមូលដ្ឋាន រួមចំណែកថែរក្សាសន្តិភាពក្នុងភូមិនិគមទៀតផង។
* សកម្មចូលរួមកិច្ចការលបុបំបាត់ភាពអត់ឃ្លាន កាត់បន្ថយភាពក្រីក្រ
ជាសក្ខីកម្មមួយក្នុងចំណោមសក្ខីកម្មការជួយពីលោក ង្វៀន ឌិញធុយ គឺជារឿងរ៉ាវរបស់គ្រួសារបង ដៀវ ង៉ុក ជនជាតិ ស្ទៀង នៅភូមិ ប៊ូយ៉ាភុក ២ ឃុំ ភូងៀ។ គ្រួសារបង ដៀវ ង៉ុក មានដីបង្កបង្កើនផលបន្តិចបន្តួច ហើយជីវភាពក៏អស្ថិរភាពទៀត។ បន្ទាប់ពីត្រូវបានលោក ធុយ ជួលឲ្យធ្វើការចៀរជ័រកៅស៊ូ និងធ្វើការងារផ្សេងទៀត ប្តីប្រពន្ធបង ដៀវ ង៉ុក មានប្រាក់ចំណូលស្ថិរភាពចំនួន ៧ លានដុងក្នុងមួយខែ។ ដោយមានប្រភពចំណូលស្ថិរភាពហើយ គ្រួសារបង ដៀវ ង៉ុក បានចូលហ៊ុនរកស៊ីចិញ្ចឹមជ្រូក និងក្លាហានដាំដំណាំស្វាយចន្ទីដែលផ្សាំនៅក្នុងចម្ការមានទំហំ ០,៥ ហិកតា។ លោក ដៀវ ង៉ុក រំភើបប្រាប់៖ "ដោយមានលោក ធុយ ទើបគ្រួសាររបស់ខ្ញុំបានឆ្លងផុតដំណាក់កាលដ៏លំបាកខ្លាំងបំផុត។ ឥឡូវនេះ យើងខ្ញុំមានប្រាក់ចំណូលស្ថិរភាពហើយ កូនៗ បានទៅសាលារៀនទៀងទាត់"។
ក្នុងនាមជាសមាជិកនៃសមាគមអតីតយុទ្ធជនឃុំ ភូងៀ ក្នុងរយៈពេលកន្លងលោក ដៀវ ថួត ផ្សព្វផ្សាយយ៉ាងសកម្មដល់បងប្អូនជនជាតិភាគតិចពីរបៀបធ្វើការងាររកស៊ី វិនិយោគទៅលើចម្ការដំណាំមានទិន្នលកាន់តែខ្ពស់។ លោក ថួត ឱ្យដឹងថា សមាគមអតីតយុទ្ធជនជាកន្លែងប្រមូលផ្តុំសមមិត្ត មិត្តរួមកងជួរ គំរូធ្វើសេដ្ឋកិច្ចពូកែៗ ជាច្រើន ដូច្នេះពួកគាត់បានជួយគ្នាអភិវឌ្ឍសេដ្ឋកិច្ច ជួយសមាជិកក្នុងការរស់នៅ។ ខ្លួនលោកផ្ទាល់តែងតែរៀនសូត្រពីអ្នកជំនាន់មុន ហើយត្រៀមចិត្តជាស្រេចចែករំលែកពិសោធន៍របស់ខ្លួនដើម្បីឲ្យជនជាតិភាគតិចអាចរួចផុតពីភាពក្រីក្រ ឈោងឈានឡើងក្លាយជាអ្នកមាននៅលើដែនដីរបស់ខ្លួន។
បច្ចុប្បន្នក្នុងភូមិសាស្រ្តឃុំ ភូងៀ មានសមាជិកអតីតយុទ្ធជនចំនួន ៤៤៨ នាក់។ បច្ចុប្បន្នឃុំ ភូងៀ មានក្លឹបផលិតកម្មធ្វើអាជីវកម្មពូកែមួយ។ សមាជិកទាំងឡាយត្រូវបានសមាគមអតីតយុទ្ធជនបន្តរក្សា ឧបត្ថម្ភ ទន្ទឹមនេះដែរមានការសាយភាយ និងអភិវឌ្ឍន៍នៃចំនួនក្រុមគ្រួសារផលិតកម្មធ្វើអាជីវកម្មពូកែ។ សមាគមក៏អនុវត្តកម្មវិធីទាំងឡាយដើម្បីពង្រីកឱ្យទូលំទូលាយនូវគំរូឆ្នើមអំពីសកម្មភាពផលិតកម្ម ធ្វើអាជីវកម្ម ដើម្បីនាំមកនូវលទ្ធផលជាក់ស្តែងជូនមាមីងបងប្អូន។
លោក ង្វៀន ឌិញណាម ប្រធានសមាគមអតីតយុទ្ធជនឃុំ ភូងៀ បានឲ្យដឹងថា សមាជិកគំរូនៅឃុំ ភូងៀ បាននិងកំពុងលើកតម្កើងគុណសម្បត្តិរបស់កងទ័ពអ៊ំ ហូ ក្នុងសម័យសន្តិភាព។ ពួកគាត់មិនត្រឹមតែបង្ហាញពីឆន្ទៈដ៏មុតមាំក្នុងការជម្នះការលំបាកលំបិនដើម្បីពង្រឹងសេដ្ឋកិច្ចគ្រួសារប៉ុននោះទេ ថែមទាំងជាអ្នកត្រួសត្រាយក្នុងការជួយអ្នកទន់ខ្សោយឱ្យក្រោកឡើងក្នុងជីវភាពផងដែរ។ បុគ្គលខាងលើទាំងនេះគឺជាគំរូភ្លឺថ្លាសម្រាប់មនុស្សជំនាន់ក្រោយត្រាប់តាម រួមចំណែកកសាងមាតុភូមិកាន់តែសម្បូររុងរឿង ស៊ីវិល័យ។
រឿងរ៉ាវទាំងឡាយរបស់អតីតយុទ្ធជន ង្វៀន ឌិញធុយ សមាជិកសមាគមអតីតយុទ្ធជន ដៀវ ថួត និងសមាជិកសមាគមអតីតយុទ្ធជនផ្សេងជាច្រើនទៀតនៅខេត្ត ដុងណាយ ជាសក្ខីកម្មរស់រវើកសម្រាប់ស្មារតី ការខំប្រឹងប្រែងរបស់ទាហានអ៊ំ ហូ។ ពួកគាត់បានយកឈ្នះការលំបាក ឧបសគ្គទាំងឡាយ ប្រឹងប្រែងឥតឈប់ឈរដើម្បីកសាងការរស់នៅសុខដុមរមនា សុភមង្គល និងរួមវិភាគទានយ៉ាងវិជ្ជមានចំពោះការអភិវឌ្ឍរួមរបស់សហគមន៍៕
អត្ថបទ និង រូបថត៖ កហ្កឿយហ៍
ប្រែសម្រួលដោយ៖ អៀនថាញ់
