រូបភាពនៃដំបូលផ្ទះទទេត្រូវបានបំផ្លិចបំផ្លាញ ផ្ទាំងស័ង្កសីជាប់នៅលើដើមឈើបាក់បែក ផ្ទះបេតុងដួលរលំបាក់ចុះ ឬទ្រុងមាន់គរមាន់ងាប់បន្ទាប់ពីព្យុះ... បានធ្វើឱ្យមនុស្សជាច្រើនទប់ទឹកភ្នែកមិនជាប់។ ព្រោះតែមួយភ្លែត មនុស្សជាច្រើនគ្មានសល់អ្វី ហើយអាចនឹងធ្លាក់ក្នុងជំពាក់បំណុលគេទៀតផង។
ដូច្នោះ ខ្យល់ព្យុះនេះបានកើតឡើងប៉ុន្មាននាទីនៅតាមប្របមាត់សមុទ្រក្នុងភូមិ ១០ (ឃុំ ក្វីញ៉ឹត និញប៊ិញ) ប៉ុន្តែបានឆក់យកជីវិតមនុស្ស ៤ នាក់ ធ្វើអោយរងរបួសជាច្រើននាក់ និងបណ្តាលឱ្យផ្ទះបាត់បង់ដំបូល ២៧ ខ្នងជាច្រើនខ្នងទៀតដួលរលំទាំងស្រុង ...
ខ្យល់ព្យុះបានបណ្តាលឱ្យសត្វមាន់រាប់ម៉ឺនក្បាលនៅក្នុងកសិដ្ឋានក្នុងខេត្ត ងេអាន លង់ទឹកដោយសារតែកម្ពស់ទឹកកើនឡើងភ្លាមៗ។ នៅពេលដែលទឹកបានជន់លិច កន្លែងចិញ្ចឹមបង្កង និងត្រីរាប់ម៉ឺនក្បាលក្នុងទ្រុងក៏រងការខូចខាតយ៉ាងធ្ងន់ធ្ងរផងដែរ បណ្តាលឱ្យមានការខាតបង់ទាំងស្រុង។
ចំណែកនៅខេត្ត ថាញ់ហ្វា ទឹកជំនន់ភ្លាមៗបានហូរចូលឃុំ ទ្រុងហា បណ្តាលអោយភូមិជាច្រើនបង្កការខូចខាតយ៉ាងធ្ងន់ធ្ងរ ផ្ទះសម្បែង ដំណាំ ទ្រព្យសម្បត្តិរបស់ប្រជាជន ...
បើទោះជាមានការព្យាករណ៍ពីមុន និងផែនការបង្ការព្យុះក៏ដោយ បើតាមស្ថិតិបឋមគិតត្រឹមរសៀលថ្ងៃទី ៣០ ខែកញ្ញា ព្យុះលេខ ១០ និងទឹកជំនន់ ខ្យល់កំបុតត្បូង បាក់ដីបានសម្លាប់មនុស្ស ២៧ នាក់ បាត់ខ្លួន ២១ នាក់ បាត់ទំនាក់ទំនង ៨ នាក់ និងរបួសជាង ១១០ នាក់។ ខ្យល់ព្យុះក៏បណ្តាលឱ្យផ្ទះចំនួន ៩០ ដួលរលំ ផ្ទះជិត ១៤៥.០០០ បានប៉ើងដំបូល ឬខូចខាត។ ផ្ទះប្រហែល ១៤.០០០ ត្រូវបានជន់លិច។ ស្រូវ និងដំណាំជិត ២៦.៦០០ ហិកតាត្រូវបានជន់លិច និងខូចខាត។ ផលិតផលជលផលជាង ៧.២០០ ហិកតាត្រូវបានខូចខាត។ សត្វពាហនៈ និងបសុបក្សីរាប់រយរាប់ពាន់ក្បាលបានស្លាប់។ បាកទំនប់ ច្រាំងទន្លេ និងឆ្នេរសមុទ្រត្រូវបានបំផ្លាញជិត ១៩.៥០០ ម៉ែត្រ បង្គោលអគ្គិសនីជាង ៦.២០០ ត្រូវបានបាក់ និងដួលរលំបណ្តាលឱ្យមានការដាច់ចរន្តអគ្គិសនីយ៉ាងទូលំទូលាយនៅក្នុងខេត្ត ថាញ់ហ្វា ងេអាន ហាទិញ និង ក្វាងទ្រី ។
មិនត្រឹមតែបង្កការខូចខាតនៅពេលឆ្លងកាត់ខេត្តដូចជា ហាទិញ ងេអាន ថាញហ្វា ក្វាងទ្រី ខ្យល់ព្យុះបោកបក់ជាមួយនឹងភ្លៀងធ្លាក់ខ្លាំងក៏បានបង្កជាទឹកជំនន់រីករាលដាល ជន់លិចជ្រៅ ផ្តាច់តំបន់ជាច្រើនក្នុងខេត្ត ឡាវកាយ ទ្វៀនក្វាង ថាយង្វៀន ហាណូយ ...
ទាំងនេះគ្រាន់តែជាការខូចខាតអំពីមនុស្ស និងទ្រព្យសម្បត្តិជាបណ្តោះអាសន្នអាចធ្វើស្ថិតិបាន នៅតែមានការខូចខាត បាត់បង់ និងឈឺចាប់ជាច្រើនដែលពិបាកនឹងរាប់បាន។
ឆ្លងកាត់ការឈឺចាប់ ការបាត់បង់ ភ្លាមៗបន្ទាប់ពីខ្យល់ព្យុះបានកន្លងផុតទៅ មូលដ្ឋានដែលរងផលប៉ះពាល់ដោយខ្យល់ព្យុះបានយ៉ាងលឿនបានចល័តកម្លាំងមូលដ្ឋានដើម្បីត្រួតពិនិត្យការខូចខាត។ ធ្វើស្ថិតិរៀបចំផែនការជួសជុលបន្ទាន់ សាងសង់ផ្ទះឡើងវិញ ប្រកដំបូលឡើងវិញ សម្អាតឈើដួលរលំ សម្អាតផ្លូវចរាចរណ៍ជាមូលដ្ឋាន...
ទន្ទឹមនឹងនោះ អាជ្ញាធរមូលដ្ឋានបានសម្របសម្រួលជាមួយរណសិរ្សមាតុភូមិ អង្គការ សមាគមនារី និងយុវជន កងកម្លាំងយោធា រៀបចំអំណោយ និងដឹកជញ្ជូនសម្ភារៈប្រើប្រាស់ អង្ករ មី ទឹកពិសារ ភួយ ជាដើម ដើម្បីផ្គត់ផ្គង់ដល់គ្រួសាររងផលប៉ះពាល់ដោយការខូចខាត ឬតំបន់ដាច់ស្រយាលដោយទឹកជំនន់។
យ៉ាងឆាប់រហ័ស នាយករដ្ឋមន្ត្រី ផាម មិញជិញ បានបញ្ជាកម្មាភិបាល ផ្នែក និងមូលដ្ឋានប្រមូលផ្តុំធនធាន ដោះស្រាយឱ្យបានឆាប់រហ័សនូវផលវិបាកនៃការខូចខាត។ ឧបត្ថម្ភសម្ភារៈ គីមី ពូជរុក្ខជាតិ... ជួយប្រជាជនក្រោយព្យុះ និងទឹកជំនន់។
អាស្រ័យហេតុនេះ លោកនាយករដ្ឋមន្ត្រីនៃរដ្ឋាភិបាលបានបង្គាប់អោយប្រធានគណៈកម្មាធិការប្រជាជនខេត្ត ក្រុងត្រូវយកចិត្តទុកដាក់ជម្នះជាបន្ទាន់នូវសម្ភារៈសិក្សា និងសុខាភិបាលខូចខាតដោយសារខ្យល់ព្យុះ និងទឹកជំនន់ (ត្រូវបញ្ចប់ឲ្យបានមុនថ្ងៃទី០៥ ខែតុលា ឆ្នាំ២០២៥) មិនឱ្យសិស្សានុសិស្សខ្វះខាតសាលារៀន ថ្នាក់រៀន គ្រូបង្រៀន អាហារ សម្លៀកបំពាក់ សៀវភៅ និងសម្ភារៈសិក្សា កុំឱ្យប្រជាជនខ្វះខាតកន្លែងសម្រាកព្យាបាលជំងឺពេលមានជម្ងឺ។
ទន្ទឹមនឹងនោះ លោកនាយករដ្ឋមន្ត្រីក៏បានបង្គាប់ការដល់មូលដ្ឋានត្រូវពិនិត្យ ធ្វើស្ថិតិឲ្យបានពេញលេញនូវការខូចខាតដោយសារខ្យល់ព្យុះ និងទឹកជំនន់ ត្រូវប្រើប្រាស់ថវិកាបម្រុង និងធនធានក្នុងមូលដ្ឋានឱ្យបានទាន់ពេលវេលា ដើម្បីអនុវត្តគោលនយោបាយឧបត្ថម្ភប្រជាជនរងផលប៉ះពាល់ ជាពិសេសគ្រួសារក្រីក្រ និងជួបការលំបាក គ្រួសារគោលនយោបាយ និងក្រុមងាយរងគ្រោះ ស្របតាមបទប្បញ្ញត្តិ មិនទុកអោយកើតមានហើយទប់ស្កាត់ការបាត់រវាត់ ខ្ជះខ្អាយ អំពើពុករលួយ និងអវិជ្ជមាន។
លោកនាយករដ្ឋមន្រ្តីស្នើឱ្យប្រធានគណៈកម្មាធិការប្រជាជនខេត្ត-ក្រុង ប្រមូលផ្តុំកម្លាំងចាំបាច់ និងមធ្យោបាយដើម្បីចូលទៅកាន់តំបន់នៅដាច់ឆ្ងាយពីតំបន់គ្រោះធម្មជាតិឱ្យបានឆាប់រហ័ស។ ដំណើរការជំនះលើផលវិបាកនៃព្យុះលេខ១០ និងទឹកជំនន់ទៅតាមតួនាទី ភារកិច្ច និងសមត្ថកិច្ច។
ទន្ទឹមនឹងនោះ ខេត្ត ក្រុងបានជួយដល់ប្រជាជនក្នុងការជួសជុល ផ្ទះសម្បែងបានប៉ើងដំបូល ឬខូចខាតដោយសារខ្យល់ព្យុះ និងទឹកជំនន់។ រៀបចំកន្លែងស្នាក់នៅបណ្ដោះអាសន្ន ផ្គត់ផ្គង់អាហារ ទឹកស្អាត និងសម្ភារៈចាំបាច់សម្រាប់គ្រួសារបាត់បង់ផ្ទះសម្បែង ហើយមិនអនុញ្ញាតឱ្យប្រជាជនណាម្នាក់ឃ្លាន ត្រជាក់ ស្រេកទឹក គ្មានផ្ទះសម្បែង ឬខ្វះសម្លៀកបំពាក់ឡើយ។
លោកនាយករដ្ឋមន្ត្រីនៃរដ្ឋាភិបាលក៏បានចាត់ឲ្យរដ្ឋមន្ត្រីក្រសួងកសិកម្ម និងបរិស្ថាន ដឹកនាំ និងណែនាំដល់មូលដ្ឋាន អនុវត្តនូវវិធានការដោះស្រាយផលវិបាក និងស្តារផលិតកម្មកសិកម្មឡើងវិញឲ្យស្របៗគ្នា។ ពិនិត្យ សំយោគ និងសម្របសម្រួលភ្លាមៗជាមួយក្រសួង ស្ថាប័នពាក់ព័ន្ធ ដើម្បីដោះស្រាយតាមសមត្ថកិច្ច ឬរាយការណ៍ទៅអាជ្ញាធរមានសមត្ថកិច្ច ដើម្បីដោះស្រាយសំណើសុំជំនួយក្នុងមូលដ្ឋាន ដោយប្រើសម្ភារៈ សារធាតុគីមី ពូជរុក្ខជាតិ និងបសុសត្វ ដើម្បីស្តារផលិតកម្មឡើងវិញ បន្ទាប់ពីព្យុះ និងទឹកជំនន់។
ទន្ទឹមនឹងការណែនាំរបស់នាយករដ្ឋមន្ត្រី រូបភាពប្រជាជននៅតំបន់មានខ្យល់ព្យុះ និងជំនន់ទឹកភ្លៀង ខ្យល់កន្ត្រាក់ សាងសង់ផ្ទះឡើងវិញ ប្រជាជនមកពីខេត្តឆ្ងាយផ្ញើអង្ករ និងភួយជូនបងប្អូនជនរួមជាតិ ឬរូបភាពកងកម្លាំងជួយសង្គ្រោះឆ្លងទឹកលិចទឹកពេញមួយយប់ ដើម្បីផ្គត់ផ្គង់ស្បៀង និងរៀបចំជម្លៀសប្រជាជនចេញពីតំបន់គ្រោះថ្នាក់… មិនត្រឹមតែជាទង្វើមនុស្សធម៌ប៉ុណ្ណោះទេ ថែមទាំងជាភ័ស្តុតាងនៃការរស់នៅ” នៃប្រពៃណីជាតិ” និងការជួយគ្នាទៅវិញទៅមក។
អាចបញ្ជាក់បានថា អន្តរាគមន៍ភ្លាមៗរបស់រដ្ឋាភិបាល និងប្រជាជនបានរួមចំណែកពង្រឹងទំនុកចិត្តរបស់ប្រជាជនលើការដឹកនាំរបស់បក្ស រដ្ឋាភិបាល និងអង្គការមហាជន។ ទន្ទឹមនឹងនោះ បង្កើតឱ្យមានសាមគ្គីភាពក្នុងសហគមន៍ ផ្សព្វផ្សាយស្មារតីនៃសេចក្តីស្រឡាញ់គ្នាទៅវិញទៅមក និងលើកទឹកចិត្តប្រជាជនទូទាំងប្រទេសឱ្យងាកមករកគ្នាទៅវិញទៅមកក្នុងគ្រាមានអាសន្ន។
ដោយស្មារតីសាមគ្គីភាព “អាហារមួយមាត់ពេលឃ្លាន មានតម្លៃស្មើមួយកញ្ចប់ពេលឆ្អែត” បានរីករាលដាលយ៉ាងទូលំទូលាយ គ្រប់មូលដ្ឋាន សហជីព អង្គការ និងបុគ្គលនានាទូទាំងប្រទេស បាននឹងកំពុងរៀបចំយុទ្ធនាការ អំណោយ និងថែមទាំងចុះទៅផ្ទាល់ដល់តំបន់រងគ្រោះដោយទឹកជំនន់ ដើម្បីចូលរួមចំណែកធនធានមនុស្ស និងសម្ភារៈជួយដល់ប្រជាជនក្នុងការជម្នះផលវិបាកនៃការខូចខាត។ សកម្មភាពនេះគឺជាធនធានដ៏មានតម្លៃ មិនត្រឹមតែជួយប្រជាពលរដ្ឋនៅតំបន់រងគ្រោះដោយទឹកជំនន់ប៉ុណ្ណោះទេ ថែមទាំងជួយលើកទឹកចិត្តប្រជាជនដើម្បីប្រជាជនមានអារម្មណ៍ថាមិនត្រូវបោះបង់ចោលឡើយ។
ថ្មីៗនេះ តារាចម្រៀង ឌឹកភុក បានចែករំលែកនៅលើបណ្តាញសង្គមថា លោកបានបរិច្ចាគថវិកាចំនួន ១ ពាន់លានដុង ដល់គណៈកម្មាធិការរណសិរ្សមាតុភូមិវៀតណាម ដើម្បី "រួមចំណែកក្នុងកិច្ចខិតខំប្រឹងប្រែងតូចតាច ដើម្បីចែករំលែកការលំបាករបស់បងប្អូនជនរួមជាតិ រងគ្រោះដោយផ្ទាល់ និងរងការខូចខាតយ៉ាងធ្ងន់ធ្ងរដោយសារព្យុះ Bualoi"។ មុននេះ តារាចម្រៀង ទុងយឿង មានប្រសាសន៍ថា លោក និងមិត្តជិតដិតមួយក្រុមបានរួមគ្នារៃអង្គាសប្រាក់ចំនួន ១ ពាន់លានដុង ដើម្បីជួយដល់ប្រជាជននៅ ងេអាន ហាទិញ ក្វាងទ្រី ហ្វេ និង ថាញហ្វា កំពុងរងការខូចខាតយ៉ាងធ្ងន់ធ្ងរដោយសារព្យុះលេខ ១០។
បន្ទាប់មក តារាចម្រៀង យ្វីម៉ាញ បិចភឿង ថាម ហ្វិញអាញ់ ក្វក់ធៀន... ក៏បានបរិច្ចាគប្រាក់រាប់រយលានដុងដើម្បីជួយប្រជាជនជំនះព្យុះ និងទឹកជំនន់ តាមរយៈមូលនិធិបង្ការទឹកជំនន់នៃរណសិរ្សមាតុភូមិវៀតណាម។
មិនត្រឹមតែសិល្បករប៉ុណ្ណោះទេ បុគ្គល អាជីវករ និងសហគ្រាសជាច្រើន បាននិងកំពុងបរិច្ចាគ និងជួយដល់ប្រជាជនបានរងការខាតបង់យ៉ាងធ្ងន់ធ្ងរ ដោយសារព្យុះ និងទឹកជំនន់។ "ការរួមគ្នាជំនះព្យុះ និងទឹកជំនន់" ក៏ជាការអំពាវនាវឱ្យមានសាមគ្គីភាព និងការជួយគ្នាទៅវិញទៅមកក្នុងសហគមន៍ ដើម្បីជំនះផលវិបាកនៃព្យុះ និងទឹកជំនន់ ដែលកំពុងត្រូវបានឆ្លើយតប ចែករំលែក និងផ្សព្វផ្សាយដោយមនុស្សជាច្រើន ជាពិសេសសហគមន៍អនឡាញ។
អាចនិយាយបានថា រាល់ការរួមចំណែក និងការគាំទ្រនាពេលនេះ សម្រាប់ប្រជាពលរដ្ឋនៅតំបន់រងគ្រោះដោយទឹកជំនន់ មិនថាតិច ឬច្រើន មិនថាសម្ភារៈ ឬកម្លាំងចិត្ត គឺពិតជាមានតម្លៃណាស់!
ព្យុះលេខ ១០ បណ្តាលឱ្យមានការខាតបង់យ៉ាងធំធេងទាំងអាយុជីវិតមនុស្ស និងទ្រព្យសម្បត្តិ ធ្វើឱ្យមនុស្សស្ថិតក្នុងស្ថានភាពលំបាកមួយភ្លែត ប៉ុន្តែសំខាន់ជាងនេះទៅទៀត គឺនៅក្នុងគ្រាទាំងនេះយើងឃើញភាពស្រស់ស្អាតនៃសាមគ្គីភាព មនុស្សធម៌ និងការចែករំលែក។
ថ្វីត្បិតដឹងថា ផ្លូវឆ្ពោះទៅរកការស្តារឡើងវិញនៅវែងឆ្ងាយ ប៉ុន្តែតំបន់រងផលប៉ះពាល់ត្រូវប្រឈមមុខនឹងការកសាងផ្ទះឡើងវិញ ស្ថិរភាពជីវភាពរស់នៅ ការស្តារផលិតកម្មឡើងវិញ ការប្រយុទ្ធប្រឆាំងនឹងជំងឺរាតត្បាតបន្ទាប់ពីទឹកជំនន់... ប៉ុន្តែដោយស្មារតីរួបរួម យើងមានហេតុផលជឿថា តំបន់រងផលប៉ះពាល់ដោយទឹកជំនន់នឹងរស់រានឡើងវិញក្នុងពេលឆាប់ៗនេះ។
ហើយមនោសញ្ចេតនា ឧបត្ថម្ភរបស់ប្រជាជនទូទាំងប្រទេស គឺជាភស្តុតាងបញ្ជាក់ថា ទោះស្ថិតក្នុងកាលៈទេសៈណាក៏ដោយ ស្មារតីសហគមន៍ និងប្រពៃណីរបស់មនុស្សជាតិ តែងតែជា “ខែល” ដ៏រឹងមាំ ដើម្បីជួយប្រទេសជាតិឲ្យឆ្លងផុតគ្រោះមហន្តរាយធម្មជាតិ ឆ្ពោះទៅរកអនាគតដ៏មានស្ថិរភាព និងអភិវឌ្ឍន៍៕
អត្ថបទ៖ មិញធ្វៀត
ប្រែសម្រួល៖ សឺនហេង
