មានវត្តមាននៅទីក្រុង សុកត្រាំង នាពាក់កណ្តាលខែ វិច្ឆិកា ចំថ្ងៃពិធីបុណ្យអកអំបុក - ពិធីប្រណាំងទូក ង សប្តាហ៍វប្បធម៌ កីឡា - ទេសចរណ៍ខេត្ត សុកត្រាំង លើកទី ១ យើងខ្ញុំបានសប្របខ្លួនចូលក្នុងបរិយាកាសដ៏អ៊ឹកធឹក ផុលផុសនិងដិតអត្តសញ្ញាណនៃរាល់សកម្មភាពវប្បធម៌ កីឡា ផ្សព្វផ្សាយ ជំរុញទេសចរណ៍ ពិធីសំពះលោកខែ ពិព័រណ៌ជំរុញពាណិជ្ជកម្ម ម្ហូបអាហារតាមដងផ្លូវជាដើម និងជាពិសេសគឺជាមួយនឹងប្រជាជនខេត្ត សុកត្រាំង មូលដ្ឋានទាំងឡាយរាប់ម៉ឺននាក់ក្នុងតំបន់វាលទំនាបទន្លេ គឺវឡុង និងភ្ញៀវទេសចរចូលរួមពិធីប្រណាំងទូក ង ដ៏ធំបំផុតនៅភាគខាងលិច។
ពិធីបុណ្យអុំទូក ង មានអត្ថន័យថ្លែងអំណរគុណព្រះពិរុណបន្ទាប់ពីបានប្រទានអំណោយផលល្អអស់មួយឆ្នាំ។ ពិធីប្រណាំងទូក ង មានការពេញនិយមយ៉ាងខ្លាំង ហើយបង្ហាញពីការផ្សារភ្ជាប់សហគមន៍ដោយមានការអញ្ជើញចូលរួមពីមនុស្សម្នាជាច្រើនកុះករ។ ពិធីប្រណាំងទូក ង ជាធម្មតាត្រូវបានប្រព្រឹត្តឡើងក្នុងរយៈពេល ៣ ទៅ ៤ ម៉ោង។ ទោះបីជាថ្ងៃក្តៅខ្លាំងយ៉ាងណាក្តី ក៏ប្រជាជននិងភ្ញៀវទេសចរនៅតែប្រមូលផ្តុំគ្នាតាំងពីព្រលឹម ហើយឈរអមតាមបណ្តោយច្រាំងទន្លេ Maspero ទីក្រុង សុកត្រាំង ដើម្បីលើកទឹកចិត្តដល់ក្រុមទូក ង និងទស្សនាការប្រកួតដ៏ផុលផុស មើលក្រុមប្រណាំងបញ្ចេញបច្ចេកទេសអុំទូកដ៏ទាក់ទាញ ក្នុងស្នូរស្រែកហ៊ោកញ្ជ្រៀវ លើកទឹកចិត្តឮសូរខ្ទរខ្ទារ។
យោងតាមលោក ឡឹម ហ្វាងម៉ូវ ប្រធានគណៈកម្មការជនជាតិខេត្ត សុកត្រាំង បានឲ្យដឹងថា ពិធីប្រណាំងទូក ង ឆ្នាំនេះ មាន ៦០ ក្រុមក្នុងនោះខេត្ត សុកត្រាំង មាន ៤៨ ក្រុម (ក្រុមបុរស ៤៥ ក្រុមនិងក្រុមនារី ៣ ក្រុម) ខេត្តជិតៗ (បាកលៀវ កាម៉ៅ កឹនធើ ហូវយ៉ាង កៀនយ៉ាង) មានក្រុមទូក ង ចំនួន ១២ ក្រុម (ក្រុមបុរស ៨ ក្រុមនិងក្រុមនារី ៤ ក្រុម)។ កីឡាករកីឡាការិនី គ្រូបង្វឹកនិងបុគ្គលិកបម្រើជិត ៧.២០០ នាក់អញ្ជើញចូលរួម។
រយៈពេលកន្លង ដោយមានការយកចិត្តទុកដាក់ឧបត្ថម្មភពីអាជ្ញាធរគ្រប់លំដាប់ថ្នាក់ និងប្រភពចលនាកៀរគរពីបណ្តាវត្ត វត្តនានាបានបោះទូក ង ថ្មី រួមចំណែកធ្វើឱ្យកីឡាប្រណាំងទូក ង ប្រពៃណីមានការរីកចម្រើនយ៉ាងទូលំទូលាយពីមួយថ្ងៃទៅមួយថ្ងៃ។ ស្រុក ទីរួមខេត្ត ទីក្រុង នានាក៏បានយកចិត្តទុកដាក់ក្នុងការជួយឧបត្ថម្ភថវិកាដល់វត្តអារាមដើម្បីចូលរួមក្នុងពិធីបុណ្យ។ ប្រការនោះហើយបានផ្តល់កម្លាំងចិត្តជំរុញឲ្យក្រុមទូក ង ខិតខំប្រឹងប្រែងលើទីលានប្រណាំង។
លោក ង្វៀន វ៉ាន់ខើយ អនុប្រធានគណៈកម្មាធិការប្រជាជនខេត្ត សុកត្រាំង បានឲ្យដឹងថា៖ ពិធីបុណ្យប្រពៃណីរបស់បងប្អូនបណ្តាជនជាតិ ជាពិសេសពិធីបុណ្យអុំទូក ង របស់ប្រជាជន ខ្មែរ ត្រូវបានរក្សាជារៀងរាល់ឆ្នាំ ជាឱកាសសម្រាប់បងប្អូនជនជាតិនិយាយរួម និងបងប្អូនជនជាតិ ខ្មែរ នៅភាគខាងលិចនៃភូមិភាគខាងត្បូងនិយាយដោយឡែក បង្ហាញពីជំនឿនិងសេចក្តីស្រឡាញ់របស់ខ្លួនចំពោះបក្ស រដ្ឋ។
ពិធីប្រណាំងទូក ង ត្រូវបានរៀបចំឡើងនឹងរួមចំណែកលើកកម្ពស់ការយល់ដឹងទំនួលខុសត្រូវក្នុងការអភិរក្ស ថែរក្សានិងពង្រីកលើកតម្កើងប្រពៃណីវប្បធម៌ដ៏ល្អផូរផង់ លើកកម្ពស់ជីវភាពរស់នៅខាងស្មារតីរបស់បងប្អូនជនជាតិ ពង្រឹងនិងបង្កើនកម្លាំងធ្លុងមហាសាមគ្គីគ្រប់ជនជាតិ ចិត្តមួយថ្លើមមួយ រួមកម្លាំងគ្នាកសាងមាតុភូមិ ប្រទេសជាតិរីកចម្រើន សុភមង្គលពីមួយថ្ងៃទៅមួយថ្ងៃ៕
អត្ថបទ៖ ធូហឿង រូបថត៖ អានហៀវ
ប្រែសម្រួលនិងបញ្ចូលទិន្នន័យ៖ លឺ ធីអៀនថាញ់
