អភិវឌ្ឍន៍ទេសចរណ៍ភ្ជាប់ជាមួយនឹងសហគមន៍
ស្ថិតនៅចម្ងាយពីកណ្តាលទីក្រុងជាង ១០ គីឡូម៉ែត្រ និគម តើងជូ នៅសង្កាត់ អៀកៅ មានប្រជាជនជាង ៤៨០ ក្រុមគ្រួសារ ភាគច្រើនជាបងប្អូនជនជាតិ អេដេ។ ដោយមានការប្រឹងប្រែងរបស់បងប្អូនជនជាតិនៅទីនេះ និងការឧបត្ថម្ភពីអាជ្ញាធរមូលដ្ឋាន និគម តើងជូ កំពុងក្លាយជាគោលដៅទេសចរណ៍ទាក់ទាញភ្ញៀវបន្តិចម្តងៗ អាស្រ័យដោយមានវប្បធម៌ល្អប្រណីត។
បច្ចុប្បន្ន មានគ្រួសារជាច្រើនក្នុងនិគមបានចងសម្ពន្ធគ្នាធ្វើអាជីវកម្មទេសចរណ៍។ នៅទីនេះ មនុស្សម្នាក់ៗ ត្រូវបានបណ្តុះបណ្តាលវិជ្ជាជីវៈ ត្រៀមចំណេះដឹងអំពីវប្បធម៌ប្រពៃណីសម្រាប់បម្រើភ្ញៀវទេសចរ។ អាស្រ័យហេតុនោះហើយ លម្ហវប្បធម៌គងឃ្មោះមានវត្តមាននៅគ្រប់ៗផ្ទះ។ នារីចេះត្បាញសំពត់សង្កិម ចម្អិនម្ហូបប្រពៃណី ឧទ្ទេសនាមមុខម្ហូបក្នុងស្រុក។ សិប្បករបន្តថែរក្សាសិប្បកម្មឆ្លាក់រូបសំណាកប្រជាប្រិយ។ល។ បានឆ្លងកាត់ពិសោធន៍ដូចជា៖ ការធ្វើស្រែចម្ការ ការត្បាញសំពត់ ការលេងគងឃ្មោះ ក្រេបរសជាតិស្រាពាង និងម្ហូបប្រេពៃណីជនជាតិ អេដេ... កាន់តែទាក់ទាញភ្ញៀវទេសចរពីមួយថ្ងៃទៅមួយថ្ងៃ។
អ្នកស្រី ហ្យាម បក្រុង (កើតឆ្នាំ ១៩៦៥ ជាអ្នកត្រួសត្រាយផ្លូវរៀប "ដុំឥដ្ឋ" ដំបូងគេសម្រាប់ទេសចរណ៍សហគមន៍នៅ តើងជូ) ប្រាប់ថា កាលពីមុន ក្នុងភូមិមានផ្ទះវែងជាច្រើន ប៉ុន្តែប្រជាជនបានរុះរើវាចោលដើម្បីសាងសង់ផ្ទះថ្មី។ ដោយខ្លាចថាស្ថាបត្យកម្មពិសេសដាច់ដោយឡែករបស់ជនជាតិ អេដេ នឹងត្រូវសាបរលាបនោះ អ្នកស្រីមានគំនិតជួសជុលផ្ទះវែងឡើងវិញ ដើម្បីបង្កើតជាលម្ហវប្បធម៌សម្រាប់បម្រើភ្ញៀវទេសចរ។ ឆ្នាំ ២០១២ នៅពេលអ្នកស្រីត្រូវបានតែងតាំងជាប្រធាននិគម អ្នកស្រីបានបង្កើតក្រុមគងឃ្មោះវ័យក្មេងនិងព្រឹទ្ធាចារ្យ ក្រុមរាំរបាំប្រជាប្រិយ និងស្តារពិធីកិច្ចប្រពៃណីឡើងវិញ។ បន្ទាប់ពីនោះ អ្នកស្រីបានសាងសង់ homestay (ផ្ទះសំណាក់) ហណហ៍ អៀកៅ ក្លាយជាកន្លែងមូលមីរខ្លឹមវប្បធម៌ អេដេ ដោយមានសកម្មភាពដូចជា ការឆ្លាក់រូបសំណាក ការផលិតស្រា ផ្សារប្រពៃណី ការសម្តែងគងឃ្មោះ ម្ហូបអាហារ ពិធីកិច្ចជាដើម។ បច្ចុប្បន្ន និគម តើងជូ មានប្រជាជនចំនួន ២០ ក្រុមគ្រួសារចូលរួមធ្វើអាជីវកម្មទេសចរណ៍ រួមចំណែកផ្លាស់ប្តូរមុខមាត់របស់ភូមិនិគម។ ឆ្នាំ ២០២៤ និគមត្រូវបានប្រកាសជាគោលដៅទេសចរណ៍សហគមន៍របស់ខេត្ត។
ប្រហាក់ប្រហែលដែរ និគម អាកូថុង នៅសង្កាត់ បួនម៉ាធួត ក៏ជាភូមិនិគមគំរូមួយក្នុងចំណោមភូមិនិគមគំរូដែលនៅរក្សាអត្តសញ្ញាណវប្បធម៌។ ទោះបីជាស្ថិតនៅក្នុងតំបន់មានភាពមមាញឹកក៏ដោយ អាកូថុង នៅតែរក្សាភាពស្ងប់ស្ងាត់ដោយមានផ្ទះវែងប្រពៃណីជាង ៣០ ខ្នងសម្រាប់ទទួលភ្ញៀវ។ នៅទីនេះ គ្រួសារនានារក្សាវត្ថុបុរាណដ៏មានតម្លៃជាច្រើនដូចជា ពាងបុរាណ កៅអីក្ប៉ាន ឃ្មោះ ស្គរ កាផា ឧបករណ៍ពលកម្ម។ល។
យោងតាមលោក អ៊ីប៉ីនប៊ិង (ម្ចាស់ផ្ទះសំណាក់ សាង អេដេ អាម៉ាប៉ីន) ផ្ទះសំណាក់បើកដំណើរការតាំងពីឆ្នាំ ២០២១ រួមមានបន្ទប់ឯកជនចំនួន ៣ និងបន្ទប់សមូហភាពចំនួន ១ ភាគច្រើនសម្រាប់បម្រើភ្ញៀវក្នុងខេត្ត និងភ្ញៀវទេសចរអន្តរជាតិមួយចំនួន។ ផ្ទះសំណាក់នេះភ្ជាប់ជាមួយនឹងសេវាកម្មហូបចុក ការសម្តែងគងឃ្មោះ ច្រៀងរាំដើម្បីបង្កើតលម្ហវប្បធម៌ជូនភ្ញៀវទេសចរ។ ក្នុងរដូវកាហ្វេ ភ្ញៀវទេសចរអាចចូលរួមបេះផ្លែកាហ្វេ ធ្វើស្មៅ ឆ្លងកាត់ពិសោធន៍ការរស់នៅ ការប្រជុំជីវភាព និងផលិតកម្មរបស់ជនជាតិ អេដេ។
អ្នកស្រី ហវីត ប្យឹ ប្រធាននិគម អាកូថុង មានប្រសាសន៍ថា ដោយមានការចូលរួមពីអាជ្ញាធរគ្រប់លំដាប់ថ្នាក់ និគម អាកូថុង មិនត្រឹមតែថែរក្សារបរត្បាញសំពត់សង្កិម ផលិតស្រាពាង លីងនិងកិនកាហ្វេហត្ថកម្មប៉ុននោះទេ ថែមទាំងពង្រីកទូលាយសេវាកម្មទេសចរណ៍ បង្កើតការងារធ្វើជូនប្រជាជនជាច្រើនក្រុមគ្រួសារទៀតផង។ អ្នកស្រីសង្ឃឹមថាខេត្ត ដាក់ឡាក់ និងផ្នែកទេសចរណ៍នឹងបង្កើនការជួយផ្សព្វផ្សាយ ភ្ជាប់ធួរ ខ្សែទេសចរណ៍ទាក់ទាញភ្ញៀវទេសចរអន្តរជាតិអញ្ជើញមកមូលដ្ឋាន។
ការអភិរក្សប្រកបដោយស្ថិរភាពភ្ជាប់ជាមួយនឹងអភិវឌ្ឍន៍ទេសចរណ៍
ដើម្បីទាញយកឧត្តមភាពធម្មជាតិ និងវប្បធម៌ប្រកបដោយប្រសិទ្ធភាព ខេត្តដាក់ឡាក់ បានដំណើរការគោលនយោបាយឧបត្ថម្ភទេសចរណ៍សហគមន៍ជាច្រើន។ ខេត្តបានចេញសេចក្តីសម្រេចស្តីពីការជួយឧបត្ថម្ភអភិវឌ្ឍទេសចរណ៍សហគមន៍នៅក្នុងភូមិនិគមបងប្អូនជនជាតិភាគតិចក្នុងមូលដ្ឋានដំណាក់កាលឆ្នាំ ២០២១ - ២០២៥។ ខេត្តបានជ្រើសរើសនិគមចំនួន ៥ ក្នុងចំណោម ១៧ និគមបំពេញតាមលក្ខខណ្ឌដើម្បីផ្តល់អាទិភាពដល់ការវិនិយោគ អភិវឌ្ឍន៍ទេសចរណ៍សហគមន៍ និងសេវាកម្មផ្ទះសំណាក់។
រហូតមកដល់ពេលនេះ និគម អាកូថុង និគម ទ្រី និងនិគម គួប ត្រូវបានប្រកាសជានិគមទេសចរណ៍សហគមន៍ សកម្មភាពសេវាកម្មទេសចរណ៍ទស្សនកិច្ច ម្ហូបអាហារ និងផ្ទះសំណាក់។ លើសពីនេះទៅទៀត អនុវត្តកម្មវិធីគោលដៅជាតិស្តីពីការអភិវឌ្ឍសេដ្ឋកិច្ច សង្គមតំបន់ជនជាតិភាគតិច និងតំបន់ភ្នំដំណាក់កាលឆ្នាំ ២០២១ - ២០៣០ ដាក់ឡាក់ ឧបត្ថម្ភវិនិយោគក្នុងការសាងសង់គោលដៅទេសចរណ៍គំរូនៅនិគម តើងជូ និងនិគម ជូន (នៅឃុំ លៀនសឺនឡាក់)។ និគមទាំងពីរបានបញ្ចប់ជាស្ថាពរការវិនិយោគ និងការរៀបចំការប្រកាសចាប់ផ្តើមដំណើរការអាជីវកម្មទទួលស្វាគមន៍ និងបម្រើភ្ញៀវទេសចរ។
តាមអ្នកស្រី ហ្លែរ អេបាន អនុលេខាអចិន្ត្រៃយ៍នៃគណៈកម្មាធិការបក្សសង្កាត់ អៀកៅ និគម តើងជូ ត្រូវបានទទួលស្គាល់ជាគោលដៅទេសចរណ៍គំរូ ហើយកំពុងបន្តស្រាវជ្រាវ ឧបត្ថម្ភដើម្បីសាងសង់គម្រោង និងបញ្ចប់រួចរាល់គម្រោងការអភិវឌ្ឍន៍ទេសចរណ៍។ មូលដ្ឋាននឹងខិតខំបង្កើតនិគមវប្បធម៌ទេសចរណ៍សហគមន៍ចំនួន ១ ទៅ ៣ និគមទៀតក្នុងដំណាក់កាលឆ្នាំ ២០២៦ - ២០៣០។ សង្កាត់នឹងសហការជាមួយនឹងមន្ទីរ ផ្នែកនានាដើម្បីនាំសេចក្តីសម្រេចចូលទៅក្នុងការរស់នៅ ជួយប្រជាជនអភិរក្សវប្បធម៌ភ្ជាប់ជាមួយនឹងការអភិវឌ្ឍសេដ្ឋកិច្ច បង្កើតការងារធ្វើ និងកាត់បន្ថយភាពក្រីក្រប្រកបដោយចីរភាព។
លោក ត្រឹន ហុងទៀន នាយកមន្ទីរវប្បធម៌ កីឡា និងទេសចរណ៍ខេត្ត ដាក់ឡាក់ មានប្រសាសន៍៖ ខេត្តមាន បងប្អូនជនជាតិចំនួន ៤៩ ក្រុមរស់នៅបង្កើតបានជាភាពចម្រុះនៃអត្តសញ្ញាណវប្បធម៌។ នេះគឺជាឧត្តមភាព ដ៏ខ្លាំងក្លាសម្រាប់ការអភិវឌ្ឍទេសចរណ៍វប្បធម៌ ទេសចរណ៍សហគមន៍។ តាមរយៈទម្រង់ទេសចរណ៍នេះ ប្រជាជនអាចថែរក្សាវប្បធម៌ បង្កើនប្រាក់ចំណូល និងកែលម្អជីវភាពផងដែរ។ នាពេលខាងមុខ ផ្នែកនេះនឹង បន្តទាញយកធនធានពីការវិនិយោគរបស់រដ្ឋ កម្មវិធីគោលដៅជាតិ ដើម្បីជួយឧបត្ថម្ភនិគមនានាក្នុងការពង្រីកឱ្យ ទូលាយ ថែរក្សាតម្លៃវប្បធម៌ភ្ជាប់នឹងការអភិវឌ្ឍទេសចរណ៍។
ការអភិវឌ្ឍទេសចរណ៍ភ្ជាប់ជាមួយនឹងការអភិរក្សវប្បធម៌កំពុងបើកផ្លូវប្រកបដោស្ថិរភាពសម្រាប់ភូមិនិគមជាច្រើននៅ ដាក់ឡាក់។ នៅពេលអត្តសញ្ញាណវប្បធម៌ត្រូវបានលើកតម្កើង វិស័យទេសចរណ៍មិនត្រឹមតែនាំមកនូវប្រាក់ចំណូលប៉ុននោះទេ ថែមទាំងរួមចំណែកដល់ការថែរក្សាតម្លៃពិសេសដាច់ដោយឡែករបស់បងប្អូនបណ្តាជនជាតិផងដែរ៕
អត្ថបទ និងរូបថត៖ ង្វៀនយុង
ប្រែសម្រួល៖ អៀងថាន់
