ខាញ់ហ្វា មានកេរដំណែលជាតិពិសេសចំនួន ៣ គឺប្រាសាទ បា ពោណាហ្គារ ប្រាសាទ ប៉ូក្លងហ្គារ៉ាយ និងប្រាសាទ ហ្វាឡាយ រួមជាមួយនិងរតនៈវត្ថុជាតិចំនួន ៥ រួមមាន៖ ប្រមូលផ្តុំឈុតចាប៉ីថ្ម ខាញ់សឺន ផ្ទាំងសិលា ហ្វាឡាយ រូបចម្លាក់លៀននៃស្តេចចាម្ប៍ព្រះនាម ប៉ូ រមេ ផ្ទាំងសិលា ភឿកធៀន បដិមាស្តេច ប៉ូក្លងហ្គរ៉ាយ។ ក្រៅពីនេះទៀត ខេត្តក៏ជាម្ចាស់កម្មសិទ្ធិកេរដំណែលប្រវត្តិសាស្ត្រវប្បធម៌ និងរមណីយដ្ឋានចាត់ក្នុងចំណាត់ថ្នាក់ជាតិចំនួន ៣៣ ផងដែរ។ សំណង់ស្ថាបត្យកម្ម វិចិត្រសិល្បៈទាំងនេះឆ្លុះបញ្ចាំងយ៉ាងស៊ីជម្រៅពីប្រវត្តិសាស្ត្រ ស្រទាប់តម្លៃវប្បធម៌ គោលដៅទាក់ទាញភ្ញៀវទេសចរក្នុងស្រុក និងបរទេស។
តួយ៉ាងដូចជាប្រាសាទ បាប៉ូ ណាហ្គារ មានទីតាំងស្ថិតនៅក្បែរច្រាំងទន្លេ កាយ និងឈូងសមុទ្រ ញ៉ាត្រាង។ នៅខែ កក្កដា ឆ្នាំ ២០២៥ ខេត្ត ខាញ់ហ្វា រៀបចំពិធីទទួលវិញ្ញាបនបត្រចាត់ចំណាត់ថ្នាក់កេរដំណែលជាតិពិសេសសម្រាប់កេរដំណែលនេះ។ នេះមិនត្រឹមតែជាការទទួលស្គាល់ បញ្ជាក់ពីតម្លៃស្ថាបត្យកម្ម វិចិត្រសិល្បៈនៃខឿនវប្បធម៌ ចាម បរមបុរាណដ៏ល្អឯក ផ្សារភ្ជាប់នឹងជម្រៅនៃជីវភាពខាងស្មារតីរបស់សហគមន៍បណ្តាជនជាតិជាបងប្អូនរស់នៅតំបន់ភាគខាងត្បូងនៃភូមិភាគកណ្តាលប៉ុននោះទេ ថែមទាំងឧទ្ទេសនាម ផ្សព្វផ្សាយរាល់តម្លៃរបស់ប្រាសាទ បា ហើយទាក់ទាញភ្ញៀវទេសចរមករុករកដើម្បីគយគន់ ទស្សនាទៀតផង។
បងស្រី ប៊ូយ ធីធូហៀន ភ្ញៀវទេសចរអញ្ជើញមកពីខេត្ត ភូ ថ ចែករំលែកថា៖ "នេះជាលើកទីបីហើយដែលខ្ញុំត្រឡប់មក ញ៉ាត្រាង ព្រោះចូលចិត្តទេសភាព មនុស្សម្នាដ៏ស្និទ្ធស្នាលនៅទីនេះ។ មកទស្សនាលើកណាក៏ខ្ញុំឆៀងចូលប្រាសាទ បា ដែរព្រោះស្ថាបត្យកម្មនៅទីនេះពិតជាពិសេសខ្លាំងណាស់។ ប្រាសាទបរមបុរាណ ចាម ទាំងនេះបានឋិតឋេររាប់រយឆ្នាំមកហើយ ប៉ុន្តែនៅតែរក្សាសណ្ឋាន ពណ៌សម្បុរស្ទើរតែនៅដូចដើមដដែល ធ្វើឱ្យខ្ញុំចាប់អារម្មណ៍ណាស់"!
លោកស្រី ង្វៀន ធីធ្វីហាំង ប្រធានគណៈគ្រប់គ្រងកេរដំណែលប្រាសាទ បាពោ ណាហ្គារ មានប្រសាសន៍ថា កេរដំណែលជាតិពិសេសប្រាសាទ បា ពោណាហ្គារ ជាកន្លែងទាក់ទាញភ្ញៀវទេសចរក្នុងស្រុក និងអន្តរជាតិយ៉ាងច្រើនកុះករអញ្ជើញមកទស្សនានៅពេលមក ខាញ់ហ្វា។ គណៈគ្រប់គ្រងកេរដំណែលតែងតែផ្តោតលើការវិនិយោគក្នុងការសម្តែងសិល្បៈប្រពៃណីបង្ហាញឡើងវិញនូវរាល់ពិធីកិច្ចរបស់ជនជាតិ ចាម និងជនជាតិ គិញ។ នេះគឺជាវិធីកាន់តែល្អប្រសើរសម្រាប់ការឆ្លងកាត់ពិសោធន៍ចំពោះភ្ញៀវទេសចរ ព្រមទាំងចូលរួមចំណែកក្នុងការផ្សព្វផ្សាយបេតិកភណ្ឌវប្បធម៌នៃប្រជាជាតិ វៀតណាម នៅលើពិភពលោក។
មិនត្រឹមតែមានប្រព័ន្ធកេរដំណែលសម្បូរបែបនោះទេ ខាញ់ហ្វា នៅជាដែនដីនៃបេតិកភណ្ឌវប្បធម៌អរូបីវិសេសវិសាលជាច្រើនទៀតផងដែរ។ ពិធីបុណ្យនិងវិជ្ជាជីវៈបែបប្រពៃណីជាច្រើនត្រូវបានទទួលស្គាល់ជាបេតិកភណ្ឌវប្បធម៌អរូបីជាតិដូចជា៖ ពិធីបុណ្យ បា ពោណាហ្គារ ពិធីរំសាយផ្នូររបស់ជនជាតិ រ៉ាក់ឡៃ ពិធីបុណ្យសុំភោគផលសមុទ្រ ពិធីបុណ្យ កាតេ។ល។ ពិធីបុណ្យទាំងនេះត្រូវបានខេត្តរៀបចំជាប្រចាំ ទ្រង់ទ្រាយធំ ក្លាយជាព្រឹត្តិការណ៍វប្បធម៌ - ទេសចរណ៍ទាក់ទាញសហគមន៍ និងភ្ញៀវទេសចរយ៉ាងច្រើនកុះករមកចូលរួម។
ខេត្ត ខាញ់ហ្វា កំណត់ការអភិវឌ្ឍទេសចរណ៍វប្បធម៌ជាទិសដៅសំខាន់មួយក្នុងយុទ្ធសាស្ត្រអភិវឌ្ឍន៍ប្រកបដោយស្ថិរភាព។ សេចក្តីសម្រេចលេខ 01-NQ/TU ចុះថ្ងៃទី ១៤ ខែ កក្កដា ឆ្នាំ ២០២៥ របស់គណៈកម្មាធិការបក្សខេត្ត ខាញ់ហ្វា ស្តីពីកំណើនសេដ្ឋកិច្ចកើនឡើងពីរខ្ទង់ក្នុងដំណាក់កាលឆ្នាំ ២០២៥ - ២០៣០ កំណត់វិស័យទេសចរណ៍ - សេវាកម្មជាសសរស្តម្ភអភិវឌ្ឍន៍សំខាន់មួយក្នុងចំណោមសសរស្តម្ភសំខាន់ទាំងបួន។ ខេត្តដាក់គោលដៅ រហូតដល់ឆ្នាំ ២០៣០ ទទួលស្វាគមន៍ភ្ញៀវទេសចរចំនួន ២០,៥ លានលើកនាក់ រួមទាំងចំនួនភ្ញៀវអន្តរជាតិចំនួន ១០,៥ លានលើកនាក់ វិស័យទេសចរណ៍រួមចំណែក GRDP ១៥% និងចំណូលថវិកាក្នុងស្រុកសរុប ២០%។ ខេត្តកំពុងផ្តោតការយកចិត្តទុកដាក់លើការកសាងដើម្បីបញ្ចប់រួចរាល់ការអនុម័ត ដាក់ដំណើរការយុទ្ធសាស្ត្រអភិវឌ្ឍន៍ទេសចរណ៍ខេត្ត ខាញ់ហ្វា ដំណាក់កាល ២០២៥ - ២០៣០ ចក្ខុវិស័យដល់ឆ្នាំ ២០៤៥។
ចាប់ពីពេលនេះរហូតដល់ដំណាច់ឆ្នាំ ២០២៥ មន្ទីរនឹងបន្តសហការជាមួយនឹងមន្ទីរ ផ្នែក មូលដ្ឋានផ្តោតលើការអនុវត្តផែនការ កម្មវិធីសំខាន់ៗ របស់ខេត្ត អំពីការលើកតម្កើងតម្លៃបេតិកភណ្ឌវប្បធម៌ផ្សារភ្ជាប់ជាមួយនឹងអភិវឌ្ឍន៍ទេសចរណ៍ អភិរក្ស និងលើកតម្កើងតម្លៃកេរដំណែលកំពែងបុរាណ យៀនខាញ់ បំពេញឯកសារបេតិកភណ្ឌវប្បធម៌អរូបី "ប្រតិបត្តិជំនឿគោរពបូជាព្រះម៉ែ ធៀនអ៊ី អាណា" ដាក់ជូនអង្គការ យូណេស្កូ ដាក់បញ្ចូលជាបេតិកភណ្ឌវប្បធម៌អរូបីតំណាងមនុស្សជាតិ។ ខេត្តក៏បានរៀបចំសិក្ខាសាលាវិទ្យាសាស្ត្រអន្តរជាតិស្តីអំពីការថែរក្សា និងពង្រីកបេតិកភណ្ឌវប្បធម៌ផ្សារភ្ជាប់ជាមួយនឹងវិស័យទេសចរណ៍ប្រកបដោយស្ថិរភាព។
ដោយមានសក្ដានុពលបេតិកភណ្ឌវប្បធម៌សម្បូរបែបរួមជាមួយនឹងការតម្រង់ទិសដៅអភិវឌ្ឍន៍ច្បាស់លាស់ ខាញ់ហ្វា កំពុងអះអាងបញ្ជាក់ពីគោលជំហរបណ្តើរៗ គឺជាគោលដៅទេសចរណ៍វប្បធម៌ - ប្រវត្តិសាស្ត្រដ៏លេចធ្លោ រួមចំណែកធ្វើឱ្យក្លាយជាការពិតជាក់ស្តែងនូវគោលដៅអភិវឌ្ឍន៍ទេសចរណ៍ - សេវាកម្ម ក្លាយជាកម្លាំងចលករជំរុញកំណើនសំខាន់របស់មូលដ្ឋានក្នុងដំណាក់កាលថ្មី៕
អត្ថបទ និង រូបថត៖ ង្វៀន ថាញ់
ប្រែសម្រួល និង បញ្ចូលទិន្នន័យ៖ អៀនថាញ់
