តាំងពីព្រឹកព្រលឹម ប្រជាជននិងអ្នកទេសចរដ៏ច្រើនកុះករតក់ក្រហល់ចូលរួមបណ្តាវិញ្ញាសាប្រកួតប្រជែងប្រជាប្រិយដូចជា ទាញព្រ័ត្រ រុញដំបង លោតបាវក្រចៅ រត់អត្តពលកម្ម ។ល។ បរិយាកាសអ៊ូអរសប្បាយរីករាយសាភាយពាសពេញបរិយាកាសបេតិកភណ្ឌប្រវត្តិសាស្ត្រ - វប្បធម៌លំដាប់ថ្នាក់ជាតិនេះ។
បងប្រុស គីម ង៉ុករិញ ឃុំ ត្រាគូ បានចែករំលែកថា ជាង ១០ ឆ្នាំកន្លងទៅ ឆ្នាំណាបងក៏វិលត្រឡប់មកលេងអាវបាអម (ស្រះគូ) សប្បាយនឹងពិធីបុណ្យអកអំបុក។ មានវត្តមានតាំងពីម៉ោង ៦ ព្រឹកថ្ងៃទី ៥ ខែ វិច្ឆិកា បងចុះឈ្មោះចូលលេងស្ទើតែគ្រប់មុខវិញ្ញាសាកីឡា ល្បែងប្រជាប្រិយ។ បង រិញ បានមានប្រសាសន៍ថា “ឈ្នះចាញ់ចំពោះខ្ញុំមិនសំខាន់ ខ្ញុំនិងបងប្អូនជនជាតិ ខ្មែរ នៅមូលដ្ឋានចង់បានថែរក្សា សាយភាយលក្ខណៈវប្បធម៌ដ៏ល្អពិសេស របស់ជនជាតិខ្លួនទៅកាន់ភ្ញៀវទេសចរជិតឆ្ងាយជាមួយគ្នា”។
យោងតាមលោក ឡឹម ហ៊ឺវភុក នាយករងមន្ទីរវប្បធម៌ កីឡា និងទេសចរណ៍ខេត្ត វិញឡុង សកម្មភាពកីឡា ល្បែងប្រជាប្រិយគឺជាផ្នែកមួយដែលមិនអាចខ្វះបានក្នុងពិធីបុណ្យនេះ រួមចំណែកដល់ការអភិរក្ស និងលើកស្ទួយតម្លៃបេតិកភណ្ឌវប្បធម៌អរូបីជាតិពិធីបុណ្យអកអំបុករបស់បងប្អូនជនជាតិ ខ្មែរ។ ការរួមបញ្ចូលសកម្មភាពទាំងនេះទៅក្នុងខ្សែព្រឹត្តិការណ៍អំណរពិធីបុណ្យក្នុងគោលបំណងបង្កើតបរិយាកាសលេងសប្បាយ ការកម្សាន្តសម្រាប់មាមីងបងប្អូន ជួយផ្សារភ្ជាប់សហគមន៍ ផ្សព្វផ្សាយរូបភាព មនុស្សម្នាខេត្ត វិញឡុង នាំយកវប្បធម៌ដ៏ល្អពិសេស របស់បងប្អូនជនជាតិ ខ្មែរ ទៅកាន់ភ្ញៀវទេសចរ។
អ្នកទេសចរ កាវ ហុងភឿងហា (ខេត្ត ដុងថាប) បានឲ្យដឹងថា លោកស្រីបានមកលេង វិញឡុង ច្រើនដងមកហើយ ប៉ុន្តែនេះជាលើកដំបូងបានសម្របខ្លួនចូលទៅក្នុងបរិយាកាសពិធីបុណ្យអកអំបុក។ លោកស្រីហាបានចែករំលែកថា “ខ្ញុំចាប់អារម្មណ៍យ៉ាងខ្លាំងជាមួយនឹងបរិយាកាសសប្បាយរីករាយ អ៊ូអរនេះ។ មនុស្សម្នានៅទីនេះ ស្និទ្ធស្នាល ស្រឡាញ់រាប់អានភ្ញៀវ ម្ហូបអាហារសម្បូរបែប ទាក់ទាញអារម្មណ៍។ ខ្ញុំយល់បានស្មារតីសាមគ្គីភាព និងផ្សារភ្ជាប់គ្នាស្អិតល្មួតយ៉ាងច្បាស់រវាងបណ្តាជនជាតិនៅក្នុងមូលដ្ឋានឆ្លងតាមរយៈការលេងល្បែង ចង្វាក់រាំនីមួយៗ”។
សិល្បករឆ្នើម សាង សេត ប្រធានសាខាសមាគមសិល្បៈ ខ្មែរ (សមាគមអក្សរសាស្ត្រ សិល្បៈបណ្តាជនជាតិភាគតិច វៀតណាម) បានមានប្រសាសន៍ថា ពិធីបុណ្យអកអំបុក ឬហៅថាពិធីថ្វាយព្រះខែប្រព្រឹត្តឡើងនៅថ្ងៃពេញបូណ៌មីនៃខែ កត្តិក ជារៀងរាល់ឆ្នាំ។ នៅពេលរដូវកាលប្រមូលផលត្រូវបានបញ្ចប់ បងប្អូនជនជាតិ ខ្មែរ ថ្វាយភោគផលដើមរដូវកាលដល់ព្រះចន្ទ - ព្រះសម្រួលធាតុអាកាសធ្វើឱ្យភ្លៀងខ្យល់អំណោយផល ជួយឱ្យរដូវកាលផ្តល់ផលទ្វេដង។
ជារៀងរាល់ឆ្នាំ ក្នុងឱកាសពិធីបុណ្យអកអំបុក គណៈកម្មាធិការបក្សខេត្ត គណៈកម្មាធិការប្រជាជនខេត្តសុទ្ធតែរៀបចំខ្សែសកម្មភាពអបអរសាទរដោយមានកម្មវិធីវប្បធម៌ សិល្បៈ កីឡាដ៏ល្អពិសេសជាច្រើន។ ឆ្នាំនេះ ពិធីបុណ្យត្រូវបានផ្សារភ្ជាប់ជាមួយនឹងសប្តាហ៍វប្បធម៌ កីឡា និងទេសចរណ៍ដោយមានជាច្រើនសកម្មភាពដ៏សម្បូរបែប ទាក់ទាញអារម្មណ៍ ចាប់ពីថ្ងៃទី ៣០ ខែ តុលា ដល់ថ្ងៃទី ៥ ខែ វិច្ឆិកា។
ពិធីថ្វាយព្រះខែ (អកអំបុក) និងកម្មវិធីបណ្ដែតប្រទីបនៅលើ អាវបាអម (ស្រះគូ) នៅយប់នៃថ្ងៃទី ៥ ខែ វិច្ឆិកា នឹងបិទសប្តាហ៍វប្បធម៌ កីឡា ទេសចរណ៍អកអំបុក ឆ្នាំ ២០២៥។
អនុប្រធានគណៈកម្មាធិការប្រជាជនខេត្ត វិញឡុង ង្វៀន គ្វិញធៀន ប្រធានគណៈកម្មការរៀបចំសប្តាហ៍នេះ បានមានប្រសាសន៍ថា ព្រឹត្តិការណ៍ប្រព្រឹត្តឡើងក្នុងបរិយាកាសសោមនស្សរីករាយ សាមគ្គីភាពរបស់បងប្អូនបណ្តាជនជាតិក្នុងមូលដ្ឋាន គូសកាលប្រវត្តិដ៏សំខាន់បន្ទាប់ពីភាពជោគជ័យនៃមហាសន្និបាតតំណាងនៃបក្ខភាគខេត្ត វិញឡុង លើកទី ១ អាណត្តិ ២០២៥ - ២០៣០ បើកចេញកំណាត់ផ្លូវអភិវឌ្ឍន៍ថ្មីដោយមានបំណងប្រាថ្នាដ៏ក្លៀវក្លាកសាងខេត្តឲ្យកាន់តែសម្បូររុងរឿង ស៊ីវិល័យ ប្រកបដោយចីរភាព ក្នុងនោះវប្បធម៌ត្រូវបានកំណត់ថាជាមូលដ្ឋានគ្រឹះស្មារតីរបស់សង្គម ទាំងជាគោលដៅ និងជាកម្លាំងជំរុញសម្រាប់ការអភិវឌ្ឍ។
ពិធីបុណ្យអកអំបុក គឺជាសក្ខីភាពយ៉ាងរស់រវើកសម្រាប់អត្តសញ្ញាណវប្បធម៌ ខ្មែរ - ជាផ្នែកមួយដែលមិនអាចកាត់ផ្តាច់បាន រួមចំណែកដល់ការបង្កើនភាពសម្បូរបែបនៃរូបរាងវប្បធម៌ វិញឡុង ដែនដីភាគខាងត្បូង ក៏ដូចជាវប្បធម៌បណ្តាជនជាតិ វៀតណាម ផងដែរ៕
អត្ថបទ៖ ថាញ់ហ្វា
ប្រែសម្រួលនិងបញ្ចូលទិន្នន័យ៖ យ័ញលើយ
