ប្រព័ន្ធ​ផ្សព្វផ្សាយ​កម្ពុជា​លើក​ឡើង​ពី​ការ​ផ្លាស់​ប្តូរ​ជា​វិជ្ជមាន​ក្នុង​ជីវភាពរស់នៅរបស់​ជន​ជាតិ​​ខ្មែរនៅ ​​វៀតណាម

ទីភ្នាក់ងារសារព័ត៌មានកម្ពុជាដ៏មានប្រជាប្រិយភាពនានាដូចជាទីភ្នាក់ងារសារព័ត៌មានកម្ពុជា (AKP) កោះសន្តិភាព និងមជ្ឈមណ្ឌលព័ត៌មានដើមអម្ពិល (DAP-News) កាលពីថ្ងៃទី ០៣ ខែមិថុនា បានចុះផ្សាយអត្ថបទនានាអមដោយរូបភាពជាច្រើនបង្ហាញពីការផ្លាស់ប្តូរក្នុងជីវភាពរស់នៅខាងសម្ភារៈនិងស្មារតី ក៏ដូចជាការអភិរក្ស និងលើកតម្កើងវប្បធម៌ប្រពៃណីរបស់បងប្អូនជនជាតិខ្មែរនៅ វៀតណាម។

រូបថតអេក្រងអត្ថបទដែលផ្សាយលើគេហ៍ទំព៌រនៃភ្នាក់ងារសារព័ត៌មានកម្ពុជា (AKP)

ក្រោមចំណងជើងថា រដ្ឋាភិបាលវៀតណាម ជួយជំរុញជីវភាពរស់នៅ អភិរក្ស និងលើកតម្កើងអត្តសញ្ញាណវប្បធម៌ប្រពៃណីរបស់ជនជាតិខ្មែរដែលកំពុងរស់នៅក្នុងប្រទេសវៀតណាម អត្ថបទដែលផ្សាយលើគេហ៍ទំព័ររបស់ AKP បានអោយដឹងថា៖  នៅតំបន់ភាគខាងត្បូងនៃប្រទេស វៀតណាម នាពេលបច្ចុប្បន្ននេះមានបងប្អូនជនជាតិខ្មែរជាង ១,៣ លាននាក់ ដែលភាគច្រើនរស់នៅតាមបណ្ដាខេត្ត ទីក្រុងនៅតំបន់វាលទំនាបទន្លេមេគង្គ។ ក្នុងប៉ុន្មានឆ្នាំកន្លងមកនេះ បក្សនិងរដ្ឋវៀតណាមបានដាក់ចេញគោលនយោបាយជាច្រើនដែលផ្តល់អាទិភាពដល់ការអភិវឌ្ឍសេដ្ឋកិច្ចសង្គមនៅតំបន់ជនជាតិខ្មែរតាមបណ្ដាខេត្ត ក្រុងនៅភូមិភាគខាងត្បូង។ ឆ្លងតាមរយៈនោះ ជីវភាពរស់នៅខាងសម្ភារ និងស្មារតីរបស់បងប្អូនជនជាតិខ្មែរត្រូវបានជួយលើកកម្ពស់ និងបង្កើនជីវភាពរស់នៅឥតឈប់ឈរដោយមានជំហានអភិវឌ្ឍន៍គួរឱ្យកត់សម្គាល់ជាច្រើន ។

មិនត្រឹមតែលើកឡើងពីទិដ្ឋភាពទូទៅបណ្ណោះទេ ទីភ្នាក់ងារសារព័ត៌មានជាតិនៃប្រទេស កម្ពុជា ថាំងទាំងបានបង្ហាញតួលខជាក់ស្ដែងដែលភ្ជាប់ជាមួយនឹងការវិនិយោគអភិវឌ្ឍន៍ក្នុងវិស័យជាច្រើន។ ក្នុងប៉ុន្មានឆ្នាំកន្លងមកនេះ តំបន់ដែលមានបងប្អូនជនជាតិខ្មែររស់នៅច្រើននាភាគខាងត្បូងនៃប្រទេស វៀតណាម ត្រូវបានវិនិយោគទឹកប្រាក់រាប់រយពាន់លានដុងដើម្បីរៀបចំដាក់ដំណើរការគម្រោងកសាងផ្សេងៗ ជួយឧបត្ថម្ភដល់ការអភិវឌ្ឍផលិតកម្ម បណ្តុះបណ្តាលកម្មាភិបាលនិងសហគមន៍សាងសង់លំនៅឋានជាង ៩ ម៉ឺនខ្នងហើយ ជួយឧបត្ថម្ភដីបង្កបង្កើនផលនិងដីលំនៅឋានឱ្យប្រជាជនជាង ៣ ម៉ឺនគ្រួសារជួយឧបត្ថម្ភបណ្តុះបណ្តាល ផ្លាស់ប្តូរមុខរបរ បង្កើតការងារធ្វើជូនកម្មករជាង ២ម៉ឺននាក់។ល។

មកទល់ពេលនេះ អត្រាភាពក្រីក្រនៃបងប្អូនជនជាតិខ្មែរមានត្រឹមតែ ប្រហែលជា ២៥ ភាគរយ ប៉ុណ្ណោះ ធ្លាក់ចុះ ៣ភាគរយ ក្នុងមួយឆ្នាំ។ ក្នុងដំណាក់កាលពីឆ្នាំ ២០០៧ ដល់ឆ្នាំ ២០១៩ កំណើនផលិតផលក្នុងស្រុកសរុប (GDP) ជាមធ្យមនៅតាមបណ្ដាខេត្ត ក្រុងដែលមានប្រជាជនខ្មែររស់នៅច្រើនបានកើនឡើងពី ៩ ភាគរយ ទៅដល់ ១១,៧ ភាគរយក្នុងមួយឆ្នាំ។ វិស័យសេដ្ឋកិច្ចក្នុងតំបន់ជនជាតិខ្មែរមានការអភិវឌ្ឍ ជីវភាពខាងសម្ភារនិងស្មារតីរបស់បងប្អូនជនរួមជាតិបានលើកបង្កើនអោយកាន់តែប្រសើរឡើងពីមួយថ្ងៃទៅមួយថ្ងៃ។

អត្ថបទដែលផ្សាយលើគេហ៍ទំព័ររបស់ AKP  បាននិយាយថា៖ ទន្ទឹមនឹងការយកចិត្តទុកដាក់លើការអភិវឌ្ឍសេដ្ឋកិច្ចនិងជីវភាពរស់នៅរបស់បងប្អូនជនរួមជាតិខ្មែរនេះ រដ្ឋាភិបាលវៀតណាមក៏មានគោលនយោបាយអនុគ្រោះជាច្រើនសម្រាប់សិស្សានុសិស្ស និស្សិតជនជាតិខ្មែរដូចជា ការជ្រើសរើសឱ្យចូលរៀនមហាវិទ្យាល័យបម្រុងដោយមិនឆ្លងកាត់ការប្រឡង ផ្ដល់អាហារូបករណ៍ លើកលែង ឬបញ្ចុះថ្លៃសិក្សាគោលនយោបាយទាក់ទាញសម្រាប់គ្រូបង្រៀននិងកម្មាភិបាលមកធ្វើការក្នុងវិស័យអប់រំនៅតំបន់ឆ្ងាយដាច់ស្រយាលត្រូវបានអនុវត្តន៍ដោយមានប្រសិទ្ធភាព។

ប្រព័ន្ធសាលាចំណេះទូទៅ សាលាអន្តេវាសិកជនជាតិ និងសាលាបង្រៀនវិជ្ជាជីវៈសម្រាប់កូន ក្មួយ បងប្អូនជនជាតិខ្មែរបានពង្រីកដល់ ១០០ ភាគរយ នៃស្រុកដែលមានប្រជាជនខ្មែររស់នៅច្រើន អត្រាកុមារខ្មែរក្នុងវ័យសិក្សាបានចូលសាលាឡើងដល់ជាង ៩០ ភាគរយ។

គិតដល់ដំណាច់ឆ្នាំ ២០១៨ ទូទាំងតំបន់មានសាលាចំណេះទូទៅអន្តេវាសិកជនជាតិចំនួន ៣០ នៅថ្នាក់ស្រុកនិងខេត្ត។ ការបង្រៀនពីរភាសា (វៀតណាម និងខ្មែរ) នៅតាមសាលារៀនក្នុងតំបន់បងប្អូនជនជាតិខ្មែរត្រូវបានពង្រីកពីមួយជំហានទៅមួយជំហាន។ នាពេលបច្ចុប្បន្ននេះ នៅតាមបណ្ដាខេត្តដែលមានបងប្អូនជនជាតិខ្មែររស់នៅច្រើនមានសាលាបង្រៀនពីរភាសា (វៀតណាម និង ខ្មែរ) រាប់រយកន្លែងហើយ។ ដោយឡែកនៅខេត្ត សុកត្រាំង មានសាលារៀនចំនួន១៥៨ ដោយមានមាន ១ ៦៧២ ថ្នាក់និងកូនសិស្សចំនួន៤២ ៩៨៨ នាក់។

យោងតាម AKP បាននិយាយក្នុងអត្ថបទរបស់ខ្លួនថា៖ ការងារគិតគូរថែទាំសុខភាពជូនបងប្អូនជនរួមជាតិខ្មែរ តែងតែត្រូវបានអាជ្ញាធរគ្រប់លំដាប់ថ្នាក់ផ្តោតការយកចិត្តទុកដាក់ជាសំខាន់។ បណ្តាញសុខាភិបាលមូលដ្ឋានត្រូវបានបណ្តាក់ទុននិងពង្រឹងជាប្រចាំ។ គុណភាពនៃការពិនិត្យនិងព្យាបាលជំងឺត្រូវបានកែលម្អពីមួយជំហានទៅមួយជំហាន។ ការងារការពារ ទប់ស្កាត់ជំងឺរាតត្បាតថែទាំសុខភាពត្រូវបានអនុវត្តន៍ដោយព្រមៗគ្នា និងទូលំទូលាយ។ អត្រាកុមារដែលកង្វះអាហារូបត្ថម្ភបានថយចុះមកនៅក្រោម ៣០ភាគរយ ។ ជារៀងរាល់ឆ្នាំ មានប្រជាជនជាង ៧ ម៉ឺននាក់បានទទួលការពិនិត្យនិងព្យាបាលជំងឺដោយឥតគិតថ្លៃ។

រូបថតដែលបានចុះផ្សាយលើគហ៍ទំព៌រនឌសារព័ត៌មានអេឡិចត្រូនិចកោះសន្តិភាពដោយដាក់ចំណងជើងរូបថតថា  "មាន ១០០ % ឃុំក្នុងស្រុកមីស្វៀន ខេត្តសុកត្រាំង (ភាគខាងត្បូង វៀតណាម) សម្រេចលក្ខណៈវិនិច្ឆ័យខាងចរាចរណ៍ក្នុងការកសាងជនបទថ្មី បង្កលក្ខណៈងាយស្រួលសម្រាប់ការធ្វើដំណើរទៅមក និងដឹកជញ្ជូនទំនិញនៃបងប្អូនជនជាតិខ្មែរ ។"

ក្រៅពីនោះ នៅតាមខេត្តក្រុងដែលមានបងប្អូនជនជាតិខ្មែររស់នៅច្រើន បានបង្កើនម៉ោងផ្សាយនៃកម្មវិធីវិទ្យុជាភាសាខ្មែរ បោះពុម្ព និងចែកផ្សាយសារព័ត៌មានជាភាសាខ្មែរនិងជាពីរភាសា វៀតណាម-ខ្មែរ ដូចជាកាសែតជនជាតិ និងភ្នំរបស់ទីភ្នាក់ងារសារព័ត៌មាន វៀតណាម (VNA) ជាដើម។ មានខេត្តខ្លះបានកសាងអគារប្រពៃណីខ្មែរ។ រីឯខេត្ត ត្រាវិញ និង ខេត្ត សុកត្រាំង បានកសាងសារមន្ទីរជនជាតិខ្មែរដោយបានប្រមែប្រមូលនិងដាក់តាំងបង្ហាញវត្ថុតឹកតាងវប្បធម៌រូបីនិងអរូបីដ៏មានតម្លៃផ្សេងៗ។

កេរដំណែលប្រវត្តិសាស្ត្រនិងវប្បធម៌ទាំងឡាយរបស់បងប្អូនជនជាតិខ្មែរ ត្រូវបានផ្ដោតការយកចិត្តទុកដាក់ទៅលើការថែរក្សាជួសជុលឡើងវិញ ធ្វើឱ្យល្អប្រសើរជាងមុន។ បណ្តាញវិទ្យុបានផ្សាយដល់ ១០០ ភាគរយនៃភូមិឋាន អ៊ិនធឺណិតត្រូវបានភ្ជាប់មកដល់ទីកន្លែងជាច្រើន បង្កលក្ខណៈងាយស្រួល ឱ្យបងប្អូនជនរួមជាតិក្នុងការទទួលព័ត៌មានអោយបានកាន់តែច្រើនឡើងៗ។ អត្រាគ្រួសារជនជាតិខ្មែរដែលមានវិទ្យុ ទូរទស្សន៍ កើនឡើងយ៉ាងខ្ពស់ សម្រេចដល់អត្រាជាមធ្យម ៩៨ ភាគរយ ដូចជានៅបណ្ដាខេត្ត សុកត្រាំង ត្រាវិញ វិញឡុង ហើយមានខេត្តជាច្រើនទៀតសម្រេចបានទៅដល់ ១០០ភាគរយ ដូចជា គៀនយ៉ាង និង កឹនធើ។

ទន្ទឹមនឹងនោះ អត្ថបទមួយរបស់ DAP-News បានដកស្រងប្រភពព័ត៌មានពីក្រុមប្រឹក្សាសង្ឃាភិបាលនៃសមាគមព្រះពុទ្ធសាសនា វៀតណាម ថានាពេល បច្ចុប្បន្ននេះ នៅឯបណ្តាខេត្ត ក្រុងនៅភាគខាងត្បូង មានវត្តខ្មែរជាង ៤៦០ វត្ត ដោយមានព្រះសង្ឃប្រហែលជា ១ ម៉ឺនអង្គ ស្មើនឹងមួយភាគបួននៃចំនួនព្រះសង្ឃនិងដូនជីនៃព្រះពុទ្ធសាសនាក្នុងប្រទេស។ ក្នុងចំណោមនោះ មានវត្តចំនួន ១៤ ត្រូវបានទទួលស្គាល់ជាកេរដំណែលប្រវត្តិសាស្ត្រវប្បធម៌ជាតិ វត្តចំនួន ២៩ ត្រូវបានទទួលស្គាល់ជាកេរដំណែលលំដាប់ថ្នាក់ខេត្ត វត្តចំនួន ១៥០ វត្តត្រូវបានទទួលស្គាល់ លើកសរសើរជាវត្តមានគុណបំណាច់ចំពោះបដិវត្តន៍ក្នុងសម័យកាលធ្វើសង្គ្រាមប្រយុទ្ធប្រឆាំងបារាំង អាមេរិក ក៏ដូចជាការកសាងនិងការពារមាតុភូមិ។

រូបថតអេក្រងអត្ថបទដែលផ្សាយលើគេហ៍ទំព៌រនៃសារព័ត៌មានអេឡេចត្រូនិចដើមអម្ពិល 

ក្នុងអត្ថបទដែលមានចំណងជើងថា លើកបង្កើនកែលម្អ ជីវភាពរស់នៅខាងសម្ភារៈនិងស្មារតី អភិរក្សនិងលើកតម្កើង អត្តសញ្ញាណវប្បធម៌ប្រពៃណី នៃជនជាតិខ្មែរនៅ វៀតណាម សារព័ត៌មានអេឡេចត្រូនិចដើមអម្ពិលអោយដឹងថា៖ ជាមួយនឹងគោលនយោបាយសាមគ្គីភាពរវាងសាសនា ជនជាតិទាំងឡាយរបស់បក្សនិងរដ្ឋវៀតណាម ក្នុងរយៈពេលកន្លងមក ព្រះពុទ្ធសាសនាទក្ខិណនិកាយខ្មែរបានបោះជំហានអភិវឌ្ឍន៍ប្រកបដោយស្ថិរភាពក្នុងទិសដៅត្រឹមត្រូវ បង្កើតឱ្យមានជំនឿទុកចិត្តរបស់ព្រះសង្ឃនិងសាសនិកជនចំពោះបក្សនិងរដ្ឋ វៀតណាម។

នាពេលបច្ចុប្បន្ននេះ ព្រះពុទ្ធសាសនាទក្ខិណនិកាយត្រូវបានបង្កលក្ខណៈងាយស្រួលពីសំណាក់អាជ្ញាធរមូលដ្ឋានទាំងឡាយនៅ វៀតណាម ដើម្បីអភិវឌ្ឍគំរូអប់រំក្នុងវត្ត ដោយបើកថ្នាក់បង្រៀនធម៌ទេសនាជាច្រើន ភាសាអង់គ្លេស ព័ត៌មានវិទ្យា បើកសាលាបណ្ដុះបណ្ដាលបាលីកម្រិតបឋមសិក្សា មធ្យមសិក្សានៅតាមខេត្តក្រុងនិងបាលីជាន់ខ្ពស់នៅវិទ្យាស្ថានព្រះពុទ្ធសាសនាទក្ខិណនិកាយខ្មែរ កកើតឡើងប្រព័ន្ធអប់រំព្រះពុទ្ធសាសនាពេញលេញ សុក្រឹតភាពជាបង្គួរ។

ក្នុងអត្ថបទមួយដែលមានប្រធានបទដូចគ្នានោះ សារព័ត៌មានអេឡិចត្រូនិច កោះសន្តិភាពក៏បានដកស្រង់សម្តីលោកអនុបណ្ឌិត យ៉ាញ់មេន សាស្ត្រាចារ្យនៃសាលាមធ្យមសិក្សាបំពេញវិជ្ជាបាលី ណាមបូ មានប្រសាសន៍អោយដឹងថា៖ បើនិយាយដល់ជនជាតិ ខ្មែរ គឺនិយាយដល់ពុទ្ធសាសនាទក្ខិណនិកាយ។ សម្រាប់បងប្អូនជនរួមជាតិខ្មែរនៅភាគខាងត្បូង វត្តអារាមមិនត្រឹមតែជា "បេះដូង" របស់ភូមិស្រុកប៉ុណ្ណោះទេ ថែមទាំងជាមជ្ឈមណ្ឌលវប្បធម៌ សាលារៀន កន្លែងបណ្តុះបណ្តាលវិជ្ជាជីវៈ កន្លែងសប្បុរសធម៌ជួយអ្នករាល់គ្នាដែលជួបការលំបាកលំបិន កុមារកំព្រា។ល។ ក្រៅពីនោះ វត្តអារាមក៏ជាសារមន្ទីរវប្បធម៌ ស្នាដៃស្ថាបត្យកម្ម ទីកន្លែងរក្សាទុករាល់តម្លៃវប្បធម៌ប្រពៃណីដ៏ល្អឯករបស់ជនជាតិខ្មែរ។

លោកអនុបណ្ឌិត ឡឹម ក្វាងវិញ អនុប្រធានដេប៉ាតឺម៉ង់ភាសា វប្បធម៌ វិចិត្រសិល្បៈ ខ្មែរ ណាមបូ (មហាវិទ្យាល័យ ត្រាវិញ)  មានប្រសាសន៍អោយដឹងថា៖ បងប្អូនជនជាតិ ខ្មែរ នៅវៀតណាម មានពិធីបុណ្យបុណ្យទានប្រពៃណីជាច្រើន ស្ទើរតែទាំងអស់ផ្សារភ្ជាប់ ឬក៏មានជាប់ទាក់ទិនដល់ព្រះពុទ្ធសាសនាដូចជា៖ ពិធីបុណ្យចូលឆ្នាំថ្មី សែនដូនតា (ភ្ជុំបិណ្ឌ) អកអំបុក វិសាខបូជា កឋិនទាន ចូលព្រះវស្សា ចេញព្រះវស្សា។ល។ ពិធីបុណ្យទានសាសនានិងប្រពៃណីទាំងអស់របស់ជនជាតិ ខ្មែរ សុទ្ធតែផ្សារភ្ជាប់ជាមួយនឹងវត្តអារាម។ ពិធីបុណ្យ ពុណ្យទានជាប្រពៃណី ទំនៀមទំលាប់ដែលមានគុណតម្លៃវប្បធម៌ល្អផូរផង់ទាំងនេះ តែងតែត្រូវបានបងប្អូនជនជាតិខ្មែរថែរក្សានិងលើកតម្កើងដោយបានរៀបចំឡើងជារៀងរាល់ឆ្នាំមិនដែលអាក់ខានឡើយ។

រូបថតអេក្រងអត្ថបទដែលផ្សាយលើគេហ៍ទំព៌ររបស់សារព័ត៌មានអេឡិចត្រូនិច កោះសន្តិភាព

កាសែតខ្មែរភាគច្រើនបានដកស្រង់សម្តីលោក ឡឹម វ៉ាន់ម៉ឹន សមាជិកគណៈកម្មាធិការមជ្ឈិមបក្ស កុម្មុយនិស្ត វៀតណាម លេខាគណៈកម្មាធិការបក្សខេត្ត សុកត្រាំង ថា៖ "គោលនយោបាយអភិរក្ស លើកតម្កើងអត្តសញ្ញាណវប្បធម៌ជាតិរបស់បក្សនិងរដ្ឋកាន់តែពិពិធភាព ស៊ីជម្រៅ ទូលំទូលាយពីមួយថ្ងៃទៅមួយថ្ងៃ ឆ្លើយតបបានតម្រូវការនៃកម្មាភិបាល ព្រះសង្ឃនិងបងប្អូនជនជាតិខ្មែរនៅភូមិភាគខាងត្បូងនៃ វៀតណាម។ ឆ្លងតាមរយៈគោលនយោបាយទាំងនេះ ប្រព័ន្ធវត្តអារាមត្រូវបានស្ថាបនាអោយល្អប្រសើរជាងមុន សាងសង់វត្តអារាមថ្មីនៅច្រើនកន្លែង ទំនៀមទម្លាប់ ជំនឿទាំងឡាយរបស់បងប្អូនជនជាតិ ខ្មែរ នៅ វៀតណាម ខាងត្បូងត្រូវបានអភិរក្ស លើកតម្កើងនិងអភិវឌ្ឍ"។

 “ដោយមានការយកចិត្តទុកដាក់របស់បក្សនិងរដ្ឋ វៀតណាម សាមគ្គីភាពនិងការខិតខំប្រឹងប្រែងរបស់បងប្អូនជនជាតិខ្មែរ សង្ឃឹមថា នឹងពាំនាំមកការអភិវឌ្ឍន៍កាន់តែលេចធ្លោថែមទៀត រួមចំណែកបន្ថែមពណ៌សម្បុរដ៏ស្រស់ស្អាតចូលក្នុងផ្ទាំងគំនូរវប្បធម៌ពិពិធភាព ចម្រុះពណ៌របស់សហគមន៍ជនជាតិជាបងប្អូនទាំង ៥៤ នៅ វៀតណាម” ទីភ្នាក់ងារសារព័ត៌មានកម្ពុជាបញ្ចប់អត្ថបទរបស់ខ្លួនជាមួយនឹងការដកស្រងប្រសាសន៍របស់លោក ឡឹម វ៉ាន់ម៉ឹន ដែលជាកម្មាភិបាលជនជាតិខ្មែរមួយរូប ជាលេខាគណៈកម្មាធិការបក្សខេត្ត សុកត្រាំង ជាខេត្តមួយដែលមានចំនួនបងប្អូនជនជាតិខ្មែររស់នៅច្រើនជាងគេបំផុតនៅ វៀតណាម។

ការណ៍ដែលទីភ្នាក់ងារសារព័ត៌មានកម្ពុជាជាច្រើនបានរាយការណ៍ផ្សាយព័ត៌មានអំពីជីវភាពរស់នៅខាងសម្ភារៈ វប្បធម៌ ស្មារតី របស់បងប្អូនជនជាតិខ្មែរនៅ វៀតណាម បានរួមចំណែកជួយអោយថ្នាក់ដឹកនាំ ក៏ដូចជាប្រជាជនកម្ពុជា យល់បន្ថែមទៀតអំពីជីវភាពរស់នៅរបស់បងប្អូនជនជាតិខ្មែរនិងបណ្ដាគោលនយោបាយដែលផ្តល់អាទិភាពដល់ការអភិវឌ្ឍន៍របស់វៀតណាម៕

ហ៊្វិញថាវ (អ្នកយកព័ត៌មាននៃទីភ្នាក់ងារសារព័ត៌មាន វៀតណាម ប្រចាំនៅភ្នំពេញ)