ចាប់តាំងពីដើមឆ្នាំ ២០២៦ មក ប្រធាននគរបាលខេត្ត កាម៉ាវ បានចេញសេចក្តីណែនាំដើម្បីពន្លឿនដំណើរការបរិវត្តកម្មឌីជីថលដូចជា៖ ផែនការដំណើរការអាជ្ញាធរឌីជីថលនៅក្នុងនគរបាលខេត្ត ផែនការកែលម្អ និងបង្កើនសន្ទស្សន៍បរិវត្តកម្មឌីជីថល (DTI) ខេត្ត កាម៉ាវ ផែនការដំណើរការយុទ្ធសាស្ត្រអភិវឌ្ឍន៍ទិន្នន័យ និងគម្រោងប្លង់គោលទូទៅហេដ្ឋារចនាសម្ព័ន្ធមជ្ឈមណ្ឌលទិន្នន័យផ្នែកនគរបាល។ល។
ស្របពេលនោះដែរ សហការសាងសង់ ដំឡើង ប្រតិបត្តិការ និងវាយតម្លៃទទួលស្គាល់ប្រព័ន្ធកិច្ចប្រជុំទូរទស្សន៍តាមប្រព័ន្ធអនឡាញទៅកាន់នគរបាលឃុំ រៀបចំការហ្វឹកហាត់ ណែនាំការប្រើប្រាស់កិច្ចប្រជុំទូរទស្សន៍នគរបាលឃុំ និងប្រើប្រាស់កម្មវិធីគ្រប់គ្រងអត្ថបទឯកសារបម្រើការងារដឹកនាំបញ្ជា ប្រតិបត្តិការ ប្រជុំតាមអនឡាញប្រកបដោយប្រសិទ្ធភាព បំពេញតាមតម្រូវការនៃដំណើរបរិវត្តកម្មឌីជីថលនាបច្ចុប្បន្ន។
នគរបាលខេត្ត កាម៉ាវ ក៏បានដំណើរការគម្រោងវិនិយោគសាងសង់ប្រព័ន្ធកាមេរ៉ាឃ្លាំមើល ដើម្បីបម្រើការងារធានាសុវត្ថិភាពចរាចរណ៍ និងចាត់ការការល្មើសច្បាប់។ ប្រព័ន្ធកាមេរ៉ាឃ្លាំមើលចរាចរណ៍ត្រូវបានប្រើប្រាស់ប្រកបដោយប្រសិទ្ធភាព ដំណើរការ ២៤ ម៉ោងនៅតាមខ្សែផ្លូវ និងតំបន់សំខាន់ៗ។ គិតត្រឹមតែត្រីមាសទី១ ឆ្នាំ២០២៦ ខេត្តទាំងមូងបានកត់ចំណាំករណីបំពានសុវត្ថិភាពចរាចរណ៍ជាង ២.០០០ ករណី ដូចជាការបើកបរលើសល្បឿនកំណត់ មិនគោរពភ្លើងចរាចរណ៍។ ការដំឡើងកាមេរ៉ាឃ្លាំមើលនៅលើដងផ្លូវបានរួមចំណែកបង្កើនការយល់ដឹងរបស់ប្រជាជនអំពីការគោរពច្បាប់ កាត់បន្ថយហានិភ័យគ្រោះថ្នាក់ចរាចរណ៍នៅក្នុងខេត្ត។
ការជំរុញបរិវត្តកម្មឌីជីថលនៅក្នុងការងារបង្កើតចលនាប្រជាជាតិការពារសន្តិសុខជាតិក៏ត្រូវបានយកចិត្តទុកដាក់ហើយអនុវត្តប្រកបដោយប្រសិទ្ធភាពផងដែរ។ មានគំរូជាច្រើនត្រូវបាននគរបាលខេត្តបង្កបង្កើត និងពង្រីកឱ្យទូលំទូលាយយ៉ាងសកម្មរួមមាន៖ "កាមេរ៉ាសន្តិសុខសណ្តាប់ធ្នាប់" "ច្រកទ្វារសន្តិសុខសណ្តាប់ធ្នាប់ឆ្លាតវៃ" "សន្តិសុខផ្សាយសំឡេងឌីជីថល"។ល។ ខេត្តទាំងមូលបន្តរក្សាក្រុមបច្ចេកវិទ្យាឌីជីថលសហគមន៍ភូមិ អនុសង្កាត់ចំនួន ៨៨៣ ក្រុម ដោយមាន ៤.៤២៦ សមាជិកចូលរួម ធានាជួយឧបត្ថម្ភ ពន្យល់ចម្ងល់ទាន់ពេលវេលាជូនកម្មាភិបាល និងប្រជាជនក្នុងមូលដ្ឋានក្នុងការងារបរិវត្តកម្មឌីជីថល។ ឆ្លងតាមរយៈនោះ រួមចំណែកយ៉ាងសំខាន់ដល់ការងារប្រយុទ្ធប្រឆាំងនឹងឧក្រិដ្ឋកម្ម អបាយមុខសង្គម រក្សាសន្តិសុខផ្តើមពីមូលដ្ឋាន។
នគរបាលខេត្ត កាម៉ាវ បន្តដំណើរការរាល់ភារកិច្ចតាមគម្រោង 06/CP ប្រកបដោយប្រសិទ្ធភាព ភ្ជាប់ជាមួយនឹងការងារបរិវត្តកម្មឌីជីថល ត្រួតពិនិត្យ សម្អាតទិន្នន័យប្រជានិវេសន៍ជាប្រចាំ ធានា "ត្រឹមត្រូវ ពេញលេញ ស្អាតបាត រស់រាន"។ល។ យោងតាម
វរសេនីយ៍ឯកបម្រុង លោក ឡេ ទ្រុងងៀ អនុប្រធាននាយកដ្ឋាននគរបាលគ្រប់គ្រងរដ្ឋបាលអំពីសណ្តាប់ធ្នាប់សង្គម នគរបាលខេត្ត កាម៉ាវ កម្លាំងនគរបាលគ្រប់គ្រងរដ្ឋបាលអំពីសណ្តាប់ធ្នាប់សង្គមកំណត់ថា ការអនុវត្តគម្រោង 06/CP ភ្ជាប់នឹងបរិវត្តកម្មឌីជីថលគឺជាភារកិច្ចសំខាន់មួយ បន្តរហូតពេញមួយដំណើរការអនុវត្តភារកិច្ចនយោបាយរបស់អង្គភាព។
ក្នុងនោះ ផ្តោតលើការទាញយក និងប្រើប្រាស់មូលដ្ឋានទិន្នន័យជាតិអំពីប្រជានិវេសន៍ មូលដ្ឋានទិន្នន័យអត្តសញ្ញាណពលរដ្ឋ កំណត់អត្តសញ្ញាណ និងការពិនិត្យផ្ទៀងផ្ទាត់តាមអេឡិចត្រូនិចភ្ជាប់ជាមួយនឹងភារកិច្ចគ្រប់គ្រងរដ្ឋអំពីសន្តិសុខសណ្តាប់ធ្នាប់ ឆ្លងតាមរយៈនោះ បម្រើតម្រូវការ និងផលប្រយោជន៍ស្របច្បាប់របស់ប្រជាជន និងសហគ្រាសបានល្អបំផុត។
នៅក្នុងឃុំ សង្កាត់ ការងារបរិវត្តកម្មឌីជីថលក៏បានដំណើរការព្រមៗគ្នានៅគ្រប់វិស័យ រួមចំណែកសន្សំសំចៃពេលវេលា ថវិកាប្រជាជននិងសហគ្រាស បង្កើនលទ្ធភាពគ្រប់គ្រង ប្រតិបត្តិការរបស់អាជ្ញាធរមូលដ្ឋានពីរថ្នាក់។ តួយ៉ាងដូចជានៅចុងខែមីនា ឆ្នាំ២០២៦ នគរបាលសង្កាត់ ឡាងត្រន សហការជាមួយសម្ពន្ធយុវជនសង្កាត់រៀបចំយុទ្ធនាការផ្សព្វផ្សាយ និងណែនាំប្រជាជនអំពីបែបបទរដ្ឋបាលនៅទីស្នាក់ការរបស់អង្គភាព។
ប្រជាជននៅពេលអញ្ជើញមកធ្វើបែបបទរដ្ឋបាលត្រូវបានកម្មាភិបាល យុទ្ធជនណែនាំដោយផ្ទាល់ អំពីរបៀបរាយការណ៍សេវាសាធារណៈតាមអនឡាញ ការចុះបញ្ជីយានយន្តនៅលើថ្នាលឌីជីថល ជាពិសេសគឺប្រតិបត្តិការនៅលើកម្មវិធី VNeID។ ប្រជាជនទទួលបានការជួយតាំងពីដំណាក់កាលរាយការណ៍ព័ត៌មាន ដាក់បញ្ជូនឯកសាររហូតដល់ការតាមដានលទ្ធផល ឆ្លងតាមរយៈនោះកាត់បន្ថយកំហុសឆ្គង សន្សំសំចៃពេលវេលា និងថវិកា។ នគរបាលសង្កាត់ក៏បានផ្សព្វផ្សាយ ណែនាំប្រជាជនអំពីការដំឡើង ប្រើប្រាស់កម្មវិធីបម្រើដល់ការរស់នៅប្រចាំថ្ងៃ និងការគ្រប់គ្រងរដ្ឋបាល ដូចជា VNeID និង VNeTraffic រួមចំណែកដល់ការបង្កើនសតិសម្បជញ្ញៈ និងជំនាញប្រើប្រាស់បច្ចេកវិទ្យាព័ត៌មានជូនអ្នកប្រើប្រាស់។
យោងតាមថ្នាក់ដឹកនាំនគរបាលខេត្ត កាម៉ាវ ដោយប្រឹងប្រែងដើម្បីបម្រើប្រជាជន និងពង្រីកលទ្ធផលដែលសម្រេចបាននោះ នាពេលខាងមុខ កម្លាំងនគរបាលខេត្តទាំងមូលនឹងបន្តអនុវត្តសមិទ្ធផលវិទ្យាសាស្ត្របច្ចេកវិទ្យាជឿនលឿន ទំនើប អភិវឌ្ឍហេដ្ឋារចនាសម្ព័ន្ធបច្ចេកវិទ្យាព័ត៌មាន ដើម្បីជំរុញបរិវត្តកម្មឌីជីថលបម្រើការងារគ្រប់មុខប្រកបដោយប្រសិទ្ធភាព ជាពិសេសក្នុងការអនុវត្តគម្រោង 06/CP ដើម្បីបម្រើប្រជាជន និងសហគ្រាសឱ្យកាន់តែល្អប្រសើរឡើង។ ផ្តើមពីនោះ បង្កើតសន្ទុះ និងមូលដ្ឋានគ្រឹះដើម្បីជំរុញបរិវត្តកម្មឌីជីថលជាតិ រួមចំណែកកសាងខឿនសេដ្ឋកិច្ចឌីជីថល រដ្ឋាភិបាលឌីជីថល ពលរដ្ឋឌីជីថល លើកកម្ពស់គុណភាព ប្រសិទ្ធភាពការងារគ្រប់គ្រងរដ្ឋ និងអភិវឌ្ឍសេដ្ឋកិច្ច - សង្គមក្នុងមូលដ្ឋាន៕
ផលិត៖ ទ្រុងហៀវ - ត្រុងធឹក
ប្រែសម្រួល៖ អៀងថាន់
