ភូមិស្រុករីកចម្រើន
ក្នុងរយៈពេលប៉ុន្មានឆ្នាំកន្លង រួមជាមួយនឹងការអភិវឌ្ឍសេដ្ឋកិច្ច សង្គម ខេត្តវិញឡុង តែងតែយកចិត្តទុកដាក់ចំពោះការអនុវត្តគោលនយោបាយជនជាតិប្រកបដោយប្រសិទ្ធភាព ការថែទាំការរស់នៅខាងសម្ភារៈ និងស្មារតីរបស់ប្រជាជនខ្មែរ។ កម្មវិធីជាច្រើនឧបត្ថម្ភផលិតកម្ម ការបណ្តុះបណ្តាលវិជ្ជាជីវៈ ឥណទានអនុគ្រោះជាដើម ត្រូវបានអនុវត្តស្របគ្នា រួមចំណែកដល់ការជួយប្រជាជនមានលក្ខខណ្ឌអភិវឌ្ឍសេដ្ឋកិច្ច ឈានឡើងរួចពីភាពក្រីក្របន្តិចម្តងៗ និងស្ថិរភាពការរស់នៅ។
គ្រួសាររបស់លោក ថាច់ វីឡា នៅឃុំ សុងឡុក គឺជាក្រុមគ្រួសារជនជាតិ ខ្មែរ មួយក្នុងចំណោមក្រុមគ្រួសារជនជាតិ ខ្មែរ មានសេដ្ឋកិច្ចស្ថិរភាពនៅក្នុងមូលដ្ឋាន។ កាលពី ១៥ ឆ្នាំមុន នៅពេលចេញរស់នៅដោយឡែក ប្តីប្រពន្ធគាត់មានដីស្រែត្រឹមតែ ៨.០០០ ម៉ែត្រការ៉េប៉ុននោះដែលឪពុកម្តាយផ្តល់ឱ្យ ប៉ុន្តែជីវភាពនៅតែជួបការលំបាកជាច្រើន ដោយសារតែផលិតកម្មខ្នាតតូច។ អាស្រ័យដោយទទួលបានប្រាក់កម្ចីអនុគ្រោះពីធនាគារគោលនយោបាយសង្គម ដើម្បីវិនិយោគពង្រីកផលិតកម្ម ប្រើប្រាស់បច្ចេកទេសទំនើបៗក្នុងការដាំដុះ អភិវឌ្ឍសត្វចិញ្ចឹម គ្រួសារលោកបានបង្កើនប្រាក់ចំណូល និងលំនឹងជីវភាពពីមួយជំហានទៅមួយជំហាន។
បច្ចុប្បន្ន គ្រួសារលោក វីឡា មានដីស្រែចំនួន ៣ ហិកតា ផ្តល់ប្រាក់ចំណូលជាង ៣០០ លានដុងក្នុងមួយឆ្នាំ។ លើសពីនេះ ហ្វូងគោចិញ្ចឹមជិត ៣០ ក្បាល នាំយកប្រាក់ចំណូលប្រហែល ២០០ លានដុងក្នុងមួយឆ្នាំពីការលក់កូនគោ។ គ្រួសារលោកក៏បានដាំដុះនៅលើផ្ទៃដីទំហំ ៣.០០០ ម៉ែត្រការ៉េ រួមមាន ចម្ការដូងខ្ទិះចំនួន ១.០០០ម៉ែត្រការ៉េ ផ្តល់ប្រាក់ចំណូលបន្ថែមប្រហែល ៥០លានដុងរាល់ឆ្នាំ។
មិនត្រឹមតែប៉ុននោះ លោក ថាច់ វីឡា ក៏បានរៀនជំនាញពេទ្យសត្វដើម្បីបម្រើដល់កសិករនៅក្នុងមូលដ្ឋានដែលមានចិញ្ចឹមសត្វ ប្រាក់ចំណូលកើនឡើងបន្ថែមប្រហែល ៦០០.០០០ ដុងក្នុងមួយថ្ងៃ។ ក្រៅពីនេះ គ្រួសារលោករកចំណូលបានប្រហែល ៥,៥ លានដុងក្នុងមួយខែ ពីការលក់លាមកគោប្រហែល ៥០០ ការុងរៀងរាល់ខែក្នុងតម្លៃ ១១.០០០ដុងមួយការុង។ នៅអំឡុងប៉ុន្មានថ្ងៃជិតបុណ្យចូលឆ្នាំថ្មី ផ្ទះរបស់លោកត្រូវបានតុបតែងយ៉ាងសមរម្យ និងស្អាតបាត។ នំនែក ផ្លែឈើ ផ្កាភ្ញី និងគ្រឿងបូជាត្រូវបានរៀបចំយ៉ាងល្អិតល្អន់ដើម្បីសែនថ្វាយបុព្វបុរស និងយកទៅវត្តដើម្បីបួងសួងសុំសេចក្តីសុខក្នុងឆ្នាំថ្មី។ បរិយាកាសអំណរបុណ្យចូលឆ្នាំថ្មីក្នុងគ្រួសារកាន់តែកក់ក្ដៅ និងរីករាយថែមទៀតខណៈពេលសេដ្ឋកិច្ចរបស់គ្រួសារមានភាពកាន់តែល្អប្រសើរឡើង។
មិនត្រឹមតែគ្រួសាររបស់លោក វីឡា ទេ ក្រុមគ្រួសារ ខ្មែរ ជាច្រើននៅក្នុងឃុំ សុងឡុក ក៏កំពុងស្ថិរភាព និងរីកចម្រើនពីមួយជំហានទៅមួយជំហានផងដែរ។ សុងឡុក គឺជាមូលដ្ឋានមួយដែលមានប្រជាជន ខ្មែរ រស់នៅកុះករ ជាង ៤៨% នៃចំនួនប្រជាជនសរុបនៅក្នុងឃុំ។ អាស្រ័យដោយដំណើរការប្រកបដោយប្រសិទ្ធភាពកម្មវិធីគោលដៅជាតិ ជាពិសេសកម្មវិធីគោលដៅជាតិកាត់បន្ថយភាពក្រីក្រប្រកបដោយស្ថិរភាព និងកសាងជនបទថ្មី រួមជាមួយនឹងគោលនយោបាយឧបត្ថម្ភផលិតកម្ម ឥណទានអនុគ្រោះ និងការផ្ទេរបច្ចេកវិទ្យាបច្ចេកទេស ប្រាក់ចំណូលជាមធ្យមក្នុងមនុស្សម្នាក់ៗរបស់ឃុំនៅចុងឆ្នាំ ២០២៥ ប៉ាន់ប្រមាណសម្រេចបានជាង ៧៨,៦ លានដុងមនុស្សម្នាក់មួយឆ្នាំ។ ចំនួនក្រុមគ្រួសារក្រីក្របានថយចុះយ៉ាងខ្លាំងពីមួយឆ្នាំទៅមួយឆ្នាំ បច្ចុប្បន្ន ឃុំទាំងមូលមានក្រុមគ្រួសារក្រីក្រនៅត្រឹមតែ ៥១ ក្រុមគ្រួសារប៉ុននោះ ០,៥៦% នៃចំនួនក្រុមគ្រួសារ។
យោងតាមលោកស្រី តូ ធីធូហុង លេខាគណៈកម្មាធិការបក្ស ប្រធានក្រុមប្រឹក្សាប្រជាជនឃុំ សុងឡុក ដើម្បីសម្រេចបានលទ្ធផលទាំងនេះ ឃុំបានផ្តោតលើការពិនិត្យ និងបែងចែកជាក្រុមគ្រួសារទៅជាមួយក្រុមៗដើម្បីមានវិធានការជួយឧបត្ថម្ភសមស្រប។ ព្រមទាំងជំរុញការផ្សព្វផ្សាយ ចលនាប្រជាជនឱ្យផ្លាស់ប្តូរផ្នត់គំនិតផលិតកម្ម ហ៊ានប្រើវិទ្យាសាស្ត្របច្ចេកទេសជឿនលឿន ផ្លាស់ប្តូររចនាសម្ព័ន្ធដំណាំដាំដុះ សត្វចិញ្ចឹមតាមទិសដៅបង្កើនគុណតម្លៃ។
ស្របពេលនោះដែរ ឃុំផ្តោតលើការអភិវឌ្ឍគំរូសេដ្ឋកិច្ចប្រកបដោយប្រសិទ្ធភាពដូចជា ការដាំដុះដូងសរីរាង្គ ការដាំដូងខ្ទិះ ការចិញ្ចឹមគោបន្តពូជ ក៏ដូចជាការពង្រីកទូលាយគំរូផលិតកម្មបំពេញតាមស្តង់ដារ VietGAP ភ្ជាប់ជាមួយនឹងការប្រើប្រាស់ និងលក់ផលិតផល។ អាស្រ័យហេតុដូច្នេះហើយ តម្លៃផលិតកម្មកសិកម្មបានកើនឡើងពីមួយជំហានទៅមួយជំហាន រួមចំណែកដល់ការបង្កើនប្រាក់ចំណូល និងបង្កើនគុណភាពការរស់នៅរបស់ប្រជាជន ជាពិសេសគឺបងប្អូនជនជាតិ ខ្មែរ នៅក្នុងមូលដ្ឋាន។
ពាំនាំបុណ្យចូលឆ្នាំថ្មីពោរពេញដោយភាពបរិបូណ៌មកជូនបងប្អូនជនជាតិ ខ្មែរ
ឱកាសបុណ្យចូលឆ្នាំថ្មីប្រពៃណីខ្មែរ ឆ្នាំមមី អដ្ខស័ក ឆ្នាំ២០២៦ ខេត្ត វិញឡុង បានចាត់តាំងពិធីជួបជុំអំណរបុណ្យចូលឆ្នាំថ្មី ដោយមានប្រមាណ ៨០០ ប្រតិភូជាសមណសក្តិ អ្នកមានកិត្យានុភាព កម្មាភិបាល និងមាមីងបងប្អូនជនជាតិខ្មែរគំរូនិមន្ត និងអញ្ជើញចូលរួម។ ទន្ទឹមនោះ ខេត្តបានបង្កើតក្រុមការងារជាច្រើនក្រុមចាត់ឱ្យអញ្ជើញទៅសួរសុខទុក្ខប្រគេននិងជូនពរឆ្នាំថ្មី ប្រគេនទេយ្យទាននិងជូនអំណោយឆ្នាំថ្មីបណ្តាគ្រឹះស្ថានសាសនា អង្គការ និងបុគ្គលគំរូនៅក្នុងមូលដ្ឋាន។
ខេត្តបានចាត់ចែងឱ្យទៅសួរសុខទុក្ខ ប្រគេនទេយ្យទានទៅ ១៥៦ វត្តពុទ្ធសាសនាខ្មែរ នឹងថវិកា ៤ លានដុងមួយវត្ត ១៨០ បុគ្គល គ្រួសារខ្មែរគោលនយោបាយគំរូ ដោយទទួលបានថវិកា ២ លានដុងក្នុងមនុស្សម្នាក់។ លើសពីនេះ មន្ទីរអប់រំ បណ្តុះបណ្តាល និងអង្គភាពសិល្បៈទាំងឡាយបម្រើមាមីងបងប្អូនជនជាតិ ខ្មែរ ក៏បានយកចិត្តទុកដាក់ជួយឧបត្ថម្ភដូចជាវិទ្យាល័យអន្តវាសិកជនជាតិ សាលាមធ្យមសិក្សាភាសាបាលី - ខ្មែរ អង្គភាពបណ្តុះបណ្តាលនិងសិល្បៈ ខ្មែរ ជាដើម ជាមួយនឹងថវិកា ៥ លានដុងក្នុងមួយអង្គភាព។
អាជ្ញាធរមូលដ្ឋាននៅក្នុងខេត្ត និងអង្គការមហាជននៅបានចលនារាល់ប្រភពធនធានសង្គមថែទាំក្រុមគ្រួសារក្រីក្រ និងក្រុមគ្រួសារស្ថិតក្នុងស្ថានភាពលំបាក ដោយធានាថាប្រជាជនគ្រប់ៗផ្ទះអាចទទួលបុណ្យចូលឆ្នាំថ្មីក្នុងបរិយាកាសរីករាយ និងកក់ក្តៅ។ ផ្តើមពីមូលនិធិ "ដើម្បីអ្នកក្រីក្រ" និងប្រភពចលនាពីសង្គមូបនីយកម្មជិត ២,៥ ពាន់លានដុង គណៈកម្មាធិការរណសិរ្សមាតុភូមិវៀតណាមប្រចាំខេត្ត វិញឡុង បានចែកជូនអំណោយជិត ៥.០០០ ចំណែក (តម្លៃ ៥០០.០០០ ដុងមួយចំណែក) ទៅក្រុមគ្រួសារក្រីក្រ ក្រុមគ្រួសារជិតបន្ទាត់ភាពក្រីក្រ និងក្រុមគ្រួសារមានស្ថានភាពលំបាកលំបិននៅក្នុងខេត្ត។
ក្រៅពីការអញ្ជើញទៅសួរសុខទុក្ខ និងជូនអំណោយ ខេត្តក៏បានដំណើរការដោយព្រមៗគ្នាជាច្រើនវិធានការដើម្បីឲ្យប្រជាជន ខ្មែរ ប្រារព្ធពិធីបុណ្យចូលឆ្នាំថ្មីប្រកបដោយភាពសប្បាយរីករាយ និងសុវត្ថិភាព រៀបចំសកម្មភាពវប្បធម៌ សិល្បៈ និងកីឡាសមស្របតាមអត្តសញ្ញាណជនជាតិ ខ្មែរ។ បង្កើនការឃោសនាអំពីការកសាងរបៀបរស់នៅប្រកបដោយលក្ខណៈវប្បធម៌ ការប្រើប្រាស់ភាពជឿនលឿននៃវិទ្យាសាស្ត្របច្ចេកទេសទៅក្នុងផលិតកម្ម និងការផ្លាស់ប្តូរយ៉ាងវិជ្ជមានរបស់ភូមិស្រុកនៅតំបន់បងប្អូនជនជាតិ ខ្មែរ រស់នៅ។
ផ្នែកសមត្ថកិច្ចទាំងឡាយក៏ផ្តោតលើការធានាការថែទាំសុខភាពប្រជាជន រៀបចំការពិនិត្យនិងព្យាបាលជំងឺដោយឥតគិតថ្លៃ ពង្រឹងសន្តិសុខនិងសណ្តាប់ធ្នាប់សង្គម ធានាការផ្គត់ផ្គង់ភ្លើងអគ្គិសនី ទឹកប្រើប្រាស់សម្រាប់ជីវិតប្រចាំថ្ងៃនិងក្នុងផលិតកម្ម ជាពិសេសនៅតំបន់ដែលមានប្រជាជន ខ្មែរ រស់នៅច្រើនកុះករ។ នាពេលខាងមុខ ខេត្តនឹងបន្តយកចិត្តទុកដាក់អនុវត្តគោលនយោបាយជនជាតិប្រកបដោយប្រសិទ្ធភាព បង្កើតលក្ខខណ្ឌសម្រាប់ប្រជាជន ខ្មែរ ក្នុងការអភិវឌ្ឍផលិតកម្ម បង្កើនប្រាក់ចំណូល កាត់បន្ថយភាពក្រីក្រ ព្រមទាំងថែរក្សា និងលើកស្ទួយអត្តសញ្ញាណវប្បធម៌ប្រពៃណីដ៏ល្អប្រពៃ។
ខេត្ត វិញឡុង មានប្រជាជនសរុបជិត ៣,៤ លាននាក់ ក្នុងនោះ បងប្អូនជនជាតិ ខ្មែរ ជាង ១០%។ បុណ្យចូលឆ្នាំថ្មីមិនត្រឹមតែជាឱកាសសម្រាប់ជនរួមជាតិ ខ្មែរ អបអរសាទរពិធីបុណ្យចូលឆ្នាំថ្មីប៉ុននោះទេ ថែមទាំងជាពេលវេលាដើម្បីបង្ហាញពីសាមគ្គីភាព និងការរួបរួមគ្នានៅក្នុងសហគមន៍ ខ្មែរ ផងដែរ។ ការផ្លាស់ប្តូរយ៉ាងវិជ្ជមានក្នុងផ្នែកសេដ្ឋកិច្ចសង្គមបានរួមចំណែកធ្វើឱ្យពិធីបុណ្យចូលឆ្នាំប្រពៃណី ខ្មែរ កាន់តែបរិបូរ រីកចម្រើន បញ្ជាក់ពីការអភិវឌ្ឍប្រកបដោយស្ថិរភាពរបស់សហគមន៍ ខ្មែរ នៅក្នុងខេត្ត៕
អត្ថបទ៖ ថាញ់ហ្វា
ប្រែសម្រួល៖ ចន្ថា
