ឃ្មាតខ្មីជាមួយការងារ
នៅតំបន់ដែនដីចុងខាងជើងមាតុភូមិ លុងគូ គឺជាឃុំមួយក្នុងចំណោម ឃុំតំបន់ភ្នំ ព្រំដែននៃស្រុក ដុងវ៉ាន់ (ខេត្ត ហាយ៉ាង)។ ជីវភាពរស់នៅរបស់ បងប្អូនជនជាតិមួយផ្នែកធំនៅទីនេះនៅលំបាកលំបិន ខ្វះខាតច្រើនអនេក។ ជារៀងរាល់ថ្ងៃ មានទំនាក់ទំនងជាមួយបងប្អូនជនជាតិ អ្នកស្រី វឺ ធីមី យល់ច្បាស់និងចែករំលែកជាមួយការលំបាកលំបិន នឿយហត់ទាំងនោះ ជាពិសេសជាមួយបងប្អូននារីពេលពួកគាត់ត្រូវទៅស្រែចម្ការផង ត្រូវធ្វើការងារផ្ទះនិងថែទាំ ចិញ្ចឹមប្រៀនប្រដៅកូនៗ។
បោះជំហានលើដងផ្លូវតូចទៅដល់ផ្ទះស្ត្រីត្រៀមសម្រាលកូន អ្នកស្រី វឺ ធីមី មានប្រសាសន៍ថា៖ កាលពីមុននេះ បងប្អូននារីស្ទើរតែទាំងអស់នៅបណ្តាភូមិសុទ្ធតែសម្រាលកូននៅនឹងផ្ទះតែម្តង អញ្ជើញបូជាចារ្យ គ្រូសែនប្រារព្ធពិធី សម្រាលកូនតាមធម្មជាតិ។ ព្រោះហេតុដូច្នេះ ហានិភ័យក្នុងដំណើរការសម្រាលកូនគឺមិនអាចជៀសបានឡើយ។ ទោះបីជាដូច្នោះ តាំងពីជាង ១០ ឆ្នាំមកនេះ នៅពេលកម្មវិធីឆ្មបភូមិនិគមមានវត្តមាននៅ លុងគូ បណ្តាករណីសម្រាលកូននៅនឹងផ្ទះតែម្តងសុទ្ធតែត្រូវបានផ្តល់ការពិគ្រោះយោបល់ពិនិត្យសុខភាពគភ៌ហើយថែទាំយ៉ាងល្អ។ ហេតុដូច្នេះ កាត់បន្ថយបានហានិភ័យជាច្រើនអោយស្ត្រីត្រៀមសម្រាលកូននិងទារក។
យោងតាមការគណនារបស់អ្នកស្រី មី ប៉ុន្មានឆ្នាំកន្លងទៅ អ្នកស្រីបានសម្រាលកូននៅនឹងផ្ទះបានជាង ៦០ ករណី ពិនិត្យសុខភាពគភ៌បានជិត ៩០០ ករណី ថែទាំក្រោយពីសម្រាលកូនរួចជូនម្តាយនិងទារករាប់រយនាក់ រកឃើញ បញ្ជូនទៅមន្ទីរពេទ្យភ្លាមៗ ទាន់ពេលករណីលំបាក គ្រោះថ្នាក់ជាច្រើនដូចជាឈឺពោះសម្រាលកូនមិនគ្រប់ខែ ប្រវត្តិជំងឺពិសក្រឡាភ្លើង ឈឺពោះសម្រាលកូនអូសបន្លាយ។ល។
ត្រូវមានគោលនយោបាយឧបត្ថម្ភ
ក្រោយពេលទៅរៀនថ្នាក់ "ឆ្មបភូមិនិគម" ពីឆ្នាំ ២០០៨ ដល់ ឆ្នាំ ២០១០ អ្នកស្រី មី បានត្រឡប់មកធ្វើការនៅកន្លែងខ្លួនរស់នៅតែមិនមានឧបត្ថម្ភឬក៏ចំនួនទឹកប្រាក់តាវកាលិកដទៃណាទាំងអស់។ ប៉ុន្តែអ្នកស្រីនៅតែឃ្មាតខ្មីជាមួយការងារដែលខ្លួនបានបណ្តុះបណ្តាល។
អ្នកស្រីតែងតែផ្សព្វផ្សាយ ចលនាអំពីថែទាំសុខភាពម្តាយនិងកុមារ ពិនិត្យសុខភាពគភ៌ ផ្តល់ការពិគ្រោះយោបល់ថែទាំសុខភាពអ្នកម្តាយពេលមានផ្ទៃពោះនៅនឹងផ្ទះតែម្តង។ល។ អាស្រ័យហេតុដូច្នេះ បណ្តាទំនៀមទម្លាប់អន់ថយត្រូវបានជំនួសអោយដោយចំណេះដឹងបន្តពូជមានឯកទេសបន្តិចម្តងៗ ដែលអ្នកស្រី មី បញ្ជូនដល់ប្រជាជន។
ក្រៅពីតួនាទីជាឆ្មបភូមិនិគម អ្នកស្រី មី ក៏កាន់តំណែងធ្វើជាប្រធានភូមិ ប្រធានសាខាសមាគមនារីភូមិនិងឃោសនា ផ្សព្វផ្សាយច្បាប់ដល់មាមីងបងប្អូនក្នុងភូមិនិគមជាប្រចាំ។ ខ្លួនអ្នកស្រីផ្ទាល់បានសហការជាមួយស្ថានីយ៍សុខភាពឃុំឬឆ្មបភូមិនិគមរបស់ភូមិផ្សេងៗ អនុវត្តសកម្មភាពថែទាំសុខភាពជាច្រើនជូនប្រជាជនលើភូមិសាស្រ្តដូចជាចាក់វ៉ាក់សាំងបើកទូលាយ បង្ការប្រយុទ្ធប្រឆាំងកង្វះអាហារូបត្ថម្ភ រៀបចំយុទ្ធនាការលេបថ្នាំវីតាមីនអាអោយកុមារ។ល។
លោក ង្វៀន វ៉ាន់យ៉ាវ នាយកមន្ទីរសុខាភិបាលខេត្ត ហាយ៉ាង បានឲ្យដឹងថា៖ "គំរូ 'ឆ្មបភូមិនិគម' ត្រូវបានដាក់ដំណើរការលើភូមិសាស្ត្រខេត្តពីឆ្នាំ ២០០៨។ រហូតមកទល់ពេលនេះ គំរូនេះនៅតែដំណើរការប្រកបដោយប្រសិទ្ធភាព។ បច្ចុប្បន្ននេះ បណ្តាឆ្មបតាមភូមិនិគមដូចជា វឺ ធីមី លី ធីទិន ។ល។ នៅមិនទាន់មានឧបត្ថម្ភច្រើននៅឡើយបានជាការរក្សាបានស្ថិរភាពកងកម្លាំងនេះក្នុងអំឡុងពេលខាងមុខកំពុងជួបការលំបាកជាច្រើន។ មន្ទីរបានលើកជាសំណើឡើងទៅលំដាប់ថ្នាក់មជ្ឈិមដើម្បីមានគោលនយោបាយ ប្រភពថវិកាក្នុងគោលបំណងជួយឧបត្ថម្ភដល់ឆ្មបភូមិនិគម ដើម្បីអ្នកធ្វើការងារថែទាំសុខភាពជូនប្រជាជននៅមូលដ្ឋាន ស្ងប់ចិត្តបម្រើការងារ"៕
អត្ថបទ៖ ឌឹក ថ រូបថត៖ មិញគ្វៀត
បញ្ចូលទិន្នន័យពីកាសែតបោះពុម្ពខែ សីហា៖ យ័ញលើយ
