ត្រូវបានប្រសិទ្ធនាមថាជា “ក្បាលម៉ាស៊ីនសេដ្ឋកិច្ច” ទូទាំងប្រទេស ទីក្រុង ហូ ជីមិញ មិនត្រឹមតែចូលរួមប្រហែល ២៣% GDP និង ៣០% ចំណូលថវិកាជាតិប៉ុននោះទេ ថែមទាំងជាមជ្ឈមណ្ឌលហិរញ្ញវត្ថុ ពាណិជ្ជកម្ម វិទ្យាសាស្ត្រ - បច្ចេកវិទ្យាដ៏ធំបំផុតនៅ វៀតណាម ទៀតផង។ ក៏ប៉ុន្តែ ដើម្បីឈោងឈានឡើងស្មើទ្រង់ទ្រាយបណ្តាទីក្រុងដ៏ធំសម្បើមក្នុងតំបន់ ទីក្រុងត្រូវការដំណោះស្រាយបុកទម្លុះទាំងឡាយមានលក្ខណៈ "គន្លឹះ" ក្នុងអភិបាលកិច្ច ហេដ្ឋារចនាសម្ព័ន្ធ ធនធានមនុស្សនិងការអភិវឌ្ឍប្រកបដោយចីរភាព។
អភិបាលកិច្ចឆ្លាតវៃ បើកផ្លូវទីក្រុងដ៏ធំសម្បើម
យោងតាមអ្នកជំនាញជាច្រើន ចំណុចរាំងស្ទះដ៏ធំបំផុតបណ្តាលឱ្យទីក្រុង ហូ ជីមិញ មិនទាន់ស្ទុះផ្លោះសក្តិសមនឹងទ្រង់ទ្រាយគឺហេដ្ឋារចនាសម្ព័ន្ធបច្ចេកទេសនិងផ្លូវគមនាគមន៍លើសចំណុះ។ លោក ហា ង៉ុកត្រឿង អនុប្រធានសមាគមស្ពានផ្លូវកំពង់ផែទីក្រុង ហូ ជីមិញ វិភាគថា៖ “ប្រជាជនជាង ១៤ លាននាក់ដោយមានបរិមាណមធ្យោបាយយានជំនិះធ្វើចរាចរប្រហែល ៩ លានគ្រឿងកំពុងបង្កើតសម្ពាធដ៏ធំសម្បើមលើហេដ្ឋារចនាសម្ព័ន្ធ។ ដើម្បីដោះស្រាយ ទីក្រុងត្រូវការជំរុញពន្លឿនដំណើរការខ្សែមេត្រូលេខ ១ លេខ ២ ខ្សែក្រវាត់ ផ្លូវល្បឿនលឿនអន្តរតំបន់និងប្រព័ន្ធកំពង់ផែ អាកាសយានដ្ឋាន។ នេះជាផែនគ្រឹះដើម្បីរំដោះការកកស្ទះ កាត់បន្ថយការបំពុលហើយលើកកម្ពស់សមត្ថភាពប្រកួតប្រជែង”។
ព្រមជាមួយនឹងនោះ អភិបាលកិច្ចទីក្រុងទំនើបក៏ត្រូវបានចាត់ទុកថាជាគន្លឹះកំណត់ផងដែរ។ សាស្ត្រាចារ្យរង បណ្ឌិតលោក ង្វៀន មិញហ្វា (សាកលវិទ្យាល័យវិទ្យាសាស្ត្រសង្គមនិងមនុស្សសាស្ត្រទីក្រុង ហូ ជីមិញ) ចាត់ទុកថា ទីក្រុងដ៏ធំសម្បើមមួយមិនអាចដំណើរការប្រកបដោយប្រសិទ្ធភាពប្រសិនបើខ្វះក្បាលម៉ាស៊ីនអភិបាលកិច្ចដ៏ឆ្លាតវៃ តម្លាភាព។ ទីក្រុងត្រូវការជំរុញខ្លាំងអាជ្ញាធរឌីជីថល ទិន្នន័យធំ បញ្ញាសិប្បនិម្មិតក្នុងប្រតិបត្តិការ ស្របពេលនោះដែរ កំណែទម្រង់បែបបទដើម្បីប្រជាជន សហគ្រាសងាយស្រួលទទួលបានសេវាសាធារណៈ។
ជាក់ស្តែង នាពេលកន្លងទៅថ្មីៗ នេះ ទីក្រុង ហូ ជីមិញ បានអនុវត្តគម្រោងកសាងទីក្រុងឆ្លាតវៃ ជំហានដំបូងបង្កើតមជ្ឈមណ្ឌលទិន្នន័យប្រើប្រាស់រួមនិងប្រព័ន្ធប្រតិបត្តិការទីក្រុងទំនើប។ ក៏ប៉ុន្តែ យោងតាមអ្នកជំនាញជាច្រើន ដើម្បីសម្រេចបានប្រសិទ្ធភាពខ្ពស់ថែមទៀត ចាំបាច់ត្រូវមានការសម្របសម្រួលដ៏ស៊ីចង្វាក់នឹងគ្នារវាងមន្ទីរ ផ្នែក ខណ្ឌស្រុក ព្រមជាមួយនឹងយន្តការហិរញ្ញវត្ថុដ៏រឹងមាំគ្រប់គ្រាន់ដើម្បីវិនិយោគលើបច្ចេកវិទ្យា។
នៅជ្រុងជាប្រជាជន លោក ង្វៀន វ៉ានលើយ ស្នាក់នៅសង្កាត់ ឡុងត្រឿង ចែករំលែកថា យើងខ្ញុំសង្ឃឹមថាគម្រោងហេដ្ឋារចនាសម្ព័ន្ធទាំងឡាយនឹងត្រូវបានបញ្ចប់ក្នុងពេលឆាប់ៗ នេះ ដើម្បីកាត់បន្ថយការកកស្ទះយានជំនិះអូសបន្លាយជាច្រើនម៉ោង។ ប្រសិនបើបែបបទរដ្ឋបាលត្រូវបានបំព្រួញ តម្លាភាពជាងមុន ប្រជាជនប្រាកដជាពេញចិត្តនិងជឿទុកចិត្តលើអាជ្ញាធរកាន់តែខ្លាំងថែមទៀត។
ផ្លាស់ប្តូរថ្មី ចំណេះដឹងដឹកនាំទីក្រុងដ៏ធំសម្បើម
ដើម្បីស្ទុះផ្លោះជំហរទីក្រុងដ៏ធំសម្បើម ហេដ្ឋារចនាសម្ព័ន្ធគ្រាន់តែជាលក្ខខណ្ឌចាំបាច់ប៉ុននោះ រីឯធនធានមនុស្សនិងផ្លាស់ប្តូរថ្មី ច្នៃប្រតិដ្ឋទើបជាលក្ខខណ្ឌគ្រប់គ្រាន់។ អ្នកជំនាញសេដ្ឋកិច្ច បណ្ឌិត ត្រឹន យូលិច សន្និដ្ឋានថា ទីក្រុង ហូ ជីមិញ ត្រូវតែក្លាយជាមជ្ឈមណ្ឌលចំណេះដឹងនិងច្នៃប្រតិដ្ឋ។ ប្រការនោះទាមទារទីក្រុងមានគោលនយោបាយទាក់ទាញអ្នកប្រាជ្ញ បង្កើតបរិយាកាសធ្វើការដ៏ទាក់ទាញសម្រាប់អ្នកជំនាញអន្តរជាតិ ស្របពេលនោះដែរវិនិយោគយ៉ាងខ្លាំងក្លាលើវិស័យអប់រំ ស្រាវជ្រាវវិទ្យាសាស្ត្រនិងចាប់ផ្តើមអាជីវកម្មច្នៃប្រតិដ្ឋ។
បច្ចុប្បន្ននេះ ទីក្រុង ហូ ជីមិញ បានបង្កើតមជ្ឈមណ្ឌលជាច្រើនសម្រាប់ប្រព័ន្ធអេកូឡូស៊ីនផ្លាស់ប្តូរថ្មីច្នៃប្រតិដ្ឋដូចជា៖ តំបន់ទីក្រុងច្នៃប្រតិដ្ឋភាគខាងកើត តំបន់បច្ចេកវិទ្យាខ្ពស់ មជ្ឈមណ្ឌលហិរញ្ញវត្ថុអន្តរជាតិ ធូថៀម និងបរិយាកាសចាប់ផ្តើមអាជីវកម្ម។ ទាំងនេះត្រូវបានរំពឹងថានឹងជំរុញបណ្តាផ្នែកសេដ្ឋកិច្ចពុទ្ធិដូចជា៖ បញ្ញាសិប្បនិម្មិត បច្ចេកវិទ្យាជីវសាស្ត្រ ហ្វីនថិច ពាណិជ្ជកម្មអេឡិចត្រូនិច ភស្តុភារបៃតង។
សាស្ត្រាចារ្យរង បណ្ឌិតលោក ង្វៀន ហុងគ្វិន វិទ្យាធិការវិទ្យាស្ថានស្រាវជ្រាវអភិវឌ្ឍសេដ្ឋកិច្ចស្ដារបង្កើតឡើងវិញ (សកលវិទ្យាល័យជាតិទីក្រុង ហូ ជីមិញ) សង្កត់ធ្ងន់ថា សេដ្ឋកិច្ចស្ដារបង្កើតឡើងវិញនិងសេដ្ឋកិច្ចបៃតងនឹងជាគន្លឹះដើម្បីទីក្រុង ហូ ជីមិញ អភិវឌ្ឍប្រកបដោយចីរភាព។ ទីក្រុងត្រូវការជំរុញយន្តការអនុគ្រោះឥណទានបៃតង លើកទឹកចិត្តឱ្យអាជីវកម្មអនុវត្តផលិតកម្មស្អាតជាងមុន កាត់បន្ថយការបំភាយឧស្ម័ននិងសន្សំសំចៃថាមពលយ៉ាងខ្លាំងក្លា។
ពីជីវិតពិត ប្រជាជនជាច្រើនក៏រំពឹងថាទីក្រុងនេះនឹងក្លាយទៅជាទីក្រុងគួរឲ្យចង់រស់នៅក្នុងពេលឆាប់ៗ នេះ។ អ្នកស្រី ហ្វាង ម៉ាយហ្វា កម្មករនៅមណ្ឌលឧស្សាហកម្ម តឹនប៊ិញ បានរៀបរាប់ថា៖ "និយោជិតចង់មានសួន បរិយាកាសបៃតងបន្ថែមនិងបរិស្ថានមិនសូវមានផ្សែងធូលី។ ប្រសិនបើគុណភាពជីវភាពរស់នៅល្អជាងមុន យើងខ្ញុំនឹងស្ងប់ចិត្តធ្វើការរស់នៅនឹងទីក្រុងបានយូរអង្វែង"។
អ្នកជំនាញអន្តរជាតិក៏បានកត់សម្គាល់ផងដែរថា ដើម្បីថែរក្សាជំហររឹងមាំនៅក្នុងតំបន់ ទីក្រុង ហូ ជីមិញ ត្រូវតែកសាងម៉ាកយីហោទីក្រុងសកល។ ប្រការនេះមិនត្រឹមតែផ្អែកលើល្បឿនកំណើន GRDP ប៉ុននោះទេ ថែមទាំងស្ថិតនៅលើសមត្ថភាពក្នុងការទាក់ទាញអ្នកប្រាជ្ញ ច្នៃប្រតិដ្ឋនិងស្និទ្ធស្នាលបរិស្ថានទៀតផង។
ដើម្បីស្ទុះផ្លោះជំហរទីក្រុងដ៏ធំសម្បើម ទីក្រុង ហូ ជីមិញ ត្រូវការយុទ្ធសាស្ត្រមួយប្រកបដោយបរិយាប័ន្ន ក្នុងនោះ គន្លឹះគឺជាហេដ្ឋារចនាសម្ព័ន្ធទំនើប អភិបាលកិច្ចឆ្លាតវៃ ធនធានមនុស្សគុណភាពខ្ពស់និងការអភិវឌ្ឍបៃតង។ ដោយមានសេចក្តីប្តេជ្ញាចិត្តរបស់អាជ្ញាធរ ការរួមដំណើរនៃសហគមន៍វិទ្យាសាស្ត្រ ធុរកិច្ចនិងប្រជាជន ទីក្រុង ហូ ជីមិញ អាចបញ្ជាក់បានទាំងស្រុងនូវជំហរទីក្រុងដ៏ធំសម្បើមទ្រង់ទ្រាយតំបន់ក្នុងអនាគតឆាប់ៗ នេះ៕
អត្ថបទ៖ ហុងដាត - ទីភ្នាក់ងារព័ត៌មានវៀតណាម
ប្រែសម្រួលនិងបញ្ចូលទិន្នន័យ៖ យ័ញលើយ
