* ការប្រើប្រាស់ប្រភពទុនប្រកបដោយប្រសិទ្ធភាព
អំឡុងប៉ុន្មានថ្ងៃនេះ គ្រួសារលោក សឺនសែង នៅភូមិ យ៉ុងយឿអា សង្កាត់ ហៀបថាញ់ ខេត្ត កាម៉ៅ កំពុងតែមមាញឹកជាមួយនឹងការថែទាំដំណាំខ្ទឹមជិតនឹងបានប្រមូលផល។ ទោះបីការងារលំបាកលំបិនយ៉ាងណាក៏គ្រប់គ្នារីករាយដែរ ព្រោះទទួលបានអំណោយផល ហើយលក់បានថ្លៃទៀតផង។ ៣ ឆ្នាំមុន លោក សែង ជាក្រុមគ្រួសារក្រីក្រ មានដីផលិតកម្មប៉ុន្តែខ្វះដើមទុន។ ដោយខ្ចីបានប្រភពទុនឥណទានគោលនយោបាយចំនួន ១៥ លានដុងពីការិយាល័យប្រតិបត្តិការធនាគារគោលនយោបាយសង្គមទីក្រុង បាកលៀវ (ខេត្តចាស់) លោក សែង បានកែលម្អដីស្រែចម្ការមកដាំខ្ទឹមនិងម្ទេសវិញ។ ដោយផលិតប្រកបដោយប្រសិទ្ធភាព លោក សែង បានសងប្រាក់កម្ចីតាមកាលកំណត់។ ក្រោយពីកម្ចីលើកដំបូង គ្រួសារលោក សែង អាចខ្ចីបានច្រើនដងទៀតជាមួយនឹងចំនួនទឹកប្រាក់កម្ចីកាន់តែច្រើនជាងលើកមុនៗ។
ផ្តើមពីប្រភពទុនគោលនយោបាយសង្គមមិនត្រឹមតែជួយគ្រួសាររបស់លោក សែង ផលិតប្រកបដោយប្រសិទ្ធភាព និងរួចផុតពីភាពក្រីក្រប៉ុននោះទេ ថែមទាំងបានប្រមូលទុនសម្រាប់វិនិយោគគ្រឿងយន្ត និងយន្តូបនីយកម្មក្នុងផលិតកម្មទៀតផង។ លោក សែង ក៏ត្រូវបានគេទុកចិត្តឱ្យក្លាយជាប្រធានក្រុមកម្ចីទុន ដែលមានសមាជិកជាង ៥០ នាក់ជាបងប្អូនជនជាតិ ខ្មែរ។ សមាជិករបស់ក្រុមសុទ្ធតែធ្វើផលិតកម្មប្រកបដោយប្រសិទ្ធភាពទាំងអស់ រួចផុតពីភាពក្រីក្រ ហើយឈោងឈានឡើងក្នុងជីវភាព។
មិនត្រឹមតែលោក សែង ទេ មានក្រុមគ្រួសារបងប្អូនជនជាតិ ខ្មែរ ជាច្រើនទៀតក៏បានរួចផុតពីភាពក្រីក្រអាស្រ័យប្រភពទុនឥណទានគោលនយោបាយដែរ។ លោក លីទី នៅភូមិ បៀនដុងអា សង្កាត់ ហៀបថាញ់ ខេត្ត កាម៉ៅ បានឲ្យដឹងថា ឆ្នាំ ២០២០ លោកបានធនាគារគោលនយោបាយសង្គមខេត្ត បាកលៀវ (ខេត្តចាស់) ឧបត្ថម្ភឲ្យខ្ចីប្រាក់ចំនួន ៦០ លានដុងសម្រាប់អភិវឌ្ឍផលិតកម្ម។ ផ្តើមពីប្រភពទុននេះ លោកបានវិនិយោគកែលម្អផ្ទៃដី ដាំដំណាំមៀនជាង ១០០ គុម្ព។
ក្រោយរយៈពេល ២ ឆ្នាំ ដំណាំមៀនផ្តល់ផ្លែ គ្រួសារលោកប្រមូលផលបានចំនួនពីររដូវក្នុងមួយឆ្នាំ កាត់ចំណាយចេញ ប្រាក់ចំណេញទទួលបានជាង ៥០ លានដុងក្នុងមួយឆ្នាំ។ ក្រៅពីដំណាំមៀន លោក ទី ក៏មានដាំបន្លែបង្ការដែរ ជាមធ្យមក្នុងមួយថ្ងៃគ្រួសារមានប្រាក់ចំណូលពី ២០ ម៉ឺន ទៅ ៣០ ម៉ឺនដុង។ ប្រាក់ចំណេញប្រចាំឆ្នាំទទួលបានពីការដាំដំណាំមៀន និងបន្លែបង្ការជាង ១០០ លានដុង មិនត្រឹមតែជួយឱ្យគ្រួសារលោក ទី រួចផុតពីភាពក្រីក្រប៉ុននោះទេ ថែមទាំងមានដើមទុនសម្រាប់ទិញរបស់របរប្រើប្រាស់ផ្សេងៗ ក្នុងផ្ទះទៀតផង។
លោក លីទី ចែករំលែកថា៖ "ប្រភពទុនឥណទានពីធនាគារគោលនយោបាយសង្គមមិនត្រឹមតែពាំនាំមកឱកាសដើម្បីរួចផុតពីភាពក្រីក្រ អភិវឌ្ឍសេដ្ឋកិច្ចសម្រាប់គ្រួសារខ្ញុំប៉ុននោះទេ ថែមទាំងសម្រាប់ក្រុមគ្រួសារ ខ្មែរ ផ្សេងៗ នៅក្នុងភូមិនេះទៀតផង។ ទទួលបានប្រភពទុននេះ មាមីងបងប្អូនមិនបាច់ខ្ចីប្រាក់ពីខាងក្រៅនឹងប្រាក់ការខ្ពស់ឡើយ"។
លោក យឿង ក្វឹកខាយ អនុប្រធានការិយាល័យប្រតិបត្តិការធនាគារគោលនយោបាយសង្គម បាកលៀវ ខេត្ត កាម៉ៅ ឲ្យដឹងថា ក្នុងអំឡុងពេលប៉ុន្មានឆ្នាំកន្លងហើយ ការឧបត្ថម្ភប្រជាជន ជាពិសេស ក្រុមគ្រួសារជនជាតិ ខ្មែរ ទទួលបានប្រាក់កម្ចីអនុគ្រោះត្រូវបានអង្គភាពធ្វើទាន់ពេលវេលា។ រាល់កម្មវិធីខ្ចីទុនទាំងអស់ត្រូវបានប្រគល់សិទ្ធិឲ្យអង្គការសមាគម អង្គការមហាជន និងក្រុមសន្សំសំចៃ។ បច្ចុប្បន្ននេះ ការិយាល័យប្រតិបត្តិការធនាគារគោលនយោបាយសង្គម បាកលៀវ កំពុងគ្រប់គ្រងជាង ១ ម៉ឺនក្រុមគ្រួសារ ក្នុងនោះមានគ្រួសារ ខ្មែរ ជាង ៣.០០០ ក្រុមគ្រួសារ។
វាយតម្លៃអំពីប្រសិទ្ធភាពផ្តើមពីប្រភពទុនកម្ចីអនុគ្រោះគោលនយោបាយសង្គមក្នុងតំបន់បងប្អូនជនជាតិ ខ្មែរ ក្នុងភូមិសាស្រ្ត លោក យឿង ក្វឹកខាយ មានប្រសាសន៍ថា៖ "ប្រភពទុនអនុគ្រោះពីធនាគារគោលនយោបាយសង្គមបានបង្ហាញលទ្ធផលយ៉ាងវិជ្ជមាន រួមចំណែកដល់ការសម្រេចគោលដៅសេដ្ឋកិច្ចនិងសង្គម។ ជាពិសេស ប្រភពទុនកម្ចីអនុគ្រោះបានជួយប្រជាជននិយាយរួម បងប្អូនជនជាតិ ខ្មែរ និយាយដោយឡែកមានគ្រប់លក្ខខណ្ឌសម្រាប់ធ្វើអាជីវកម្ម។ ដោយទទួលបានប្រភពទុនអនុគ្រោះ ក្រុមគ្រួសារជាច្រើនមានថវិកាវិនិយោគទិញពូជដំណាំ សត្វចិញ្ចឹម ព្រមទាំងឧបករណ៍ និងសម្ភារៈសម្រាប់ផលិតកម្ម"។
* ការអនុវត្តគោលនយោបាយប្រកបដោយប្រសិទ្ធភាព
នៅ ហ៊ឹងហូយ ជាឃុំមានប្រជាជន ខ្មែរ ច្រើនជាងគេក្នុងខេត្ត កាម៉ៅ លោក ង្វៀន ហ្វាងអែម អនុប្រធានគណៈកម្មាធិការប្រជាជនឃុំបានចែករំលែកថា ដើម្បីជួយមាមីងបងប្អូនជនជាតិ ខ្មែរ មានលក្ខខណ្ឌអភិវឌ្ឍសេដ្ឋកិច្ចគ្រួសារ គណៈកម្មាធិការបក្ស និងគណៈកម្មាធិការប្រជាជនឃុំបានចង្អុលណែនាំអង្គការមហាជននយោបាយ និងសង្គមរបស់ឃុំរៀបចំផែនការ និងដំណើរការប្រភពទុនអនុគ្រោះចំពោះក្រុមគ្រួសារណាស្ថិតក្នុងក្របខ័ណ្ឌបានទទួលដើម្បីបំពេញឲ្យបានល្អការងារកាត់បន្ថយភាពក្រីក្រ។ បើកាលពីមុន ហ៊ឹងហូយ មានអត្រាក្រុមគ្រួសារក្រីក្រខ្ពស់គួរសម ឥឡូវនេះបានថយចុះមកនៅត្រឹមតែ ១% ប៉ុននោះ។ មានក្រុមគ្រួសារជាច្រើនបានឈានឡើងដល់កម្រិតជីវភាពមធ្យម ឬល្អបង្គួរហើយ។ មានក្រុមគ្រួសារជាច្រើនមានប្រាក់ចំណូលរាប់ពាន់លានដុងរៀងរាល់ឆ្នាំ។
លោក លឿង វ៉ាន់ផ អនុប្រធានមន្ទីរជនជាតិ និងសាសនាខេត្ត កាម៉ៅ មានប្រសាសន៍ ក្នុងអំឡុងប៉ុន្មានឆ្នាំកន្លងហើយ ដោយមានកម្មវិធីសុខុមាលភាពសង្គម ប្រភពទុនឥណទានគោលនយោបាយពីធនាគារគោលនយោបាយសង្គមបានក្លាយជាពំនឹងសំខាន់ក្នុងការជួយក្រុមគ្រួសារក្រីក្រ ក្រុមគ្រួសារជិតបន្ទាត់ក្រីក្រ ជាពិសេសក្រុមគ្រួសារក្នុងតំបន់លំបាកលំបិន និងតំបន់បងប្អូនជនជាតិឱ្យមានលក្ខខណ្ឌសម្រាប់ផលិតកម្ម ធ្វើអាជីវកម្ម អភិវឌ្ឍសេដ្ឋកិច្ចគ្រួសារ លើកកម្ពស់ជីវភាព និងរួចផុតពីភាពក្រីក្រប្រកបដោយស្ថិរភាពពីមួយជំហានទៅមួយជំហាន។
បច្ចុប្បន្ន ក្រុមគ្រួសារក្រីក្រក្នុងតំបន់បងប្អូនជនជាតិ ខ្មែរ នៅខេត្ត កាម៉ៅ បានថយចុះមកជិត ២,៣% នៃចំនួនក្រុមគ្រួសារ ខ្មែរ សរុបក្នុងខេត្ត។ ប្រសិទ្ធភាពនៃការប្រើប្រាស់ប្រភពទុនឥណទានអនុគ្រោះពីក្រុមគ្រួសារ ខ្មែរ ក្រីក្រនៅ កាម៉ៅ ជាសក្ខីកម្មស្តែងឲ្យឃើញពីតួនាទីសំខាន់នៃឥណទានគោលនយោបាយក្នុងការអភិវឌ្ឍសេដ្ឋកិច្ចនិងសង្គម។ ក្នុងអំឡុងឆ្នាំ ២០២៦ - ២០៣០ ខេត្ត កាម៉ៅ ខិតខំកាត់បន្ថយអត្រាក្រុមគ្រួសារក្រីក្រក្នុងតំបន់បងប្អូនជនជាតិ ខ្មែរ ឱ្យចុះក្រោម ១% ហើយតំបន់បងប្អូនជនជាតិលែងជាភូមិសាស្រ្តស្ថិតក្នុងស្ថានភាពលំបាកខ្លាំងទៀត។
ដើម្បីសម្រេចបានគោលដៅនេះ មន្ទីរជនជាតិ និងសាសនានឹងបន្តធ្វើសេនាធិការគណៈកម្មាធិការប្រជាជនខេត្ត កាម៉ៅ ចង្អុលណែនាំ ដំណើរការអនុវត្តរាល់យន្តការគោលនយោបាយស្របតាមបទប្បញ្ញត្តិ និងឯកសារណែនាំ ចង្អុលណែនាំរបស់នាយករដ្ឋមន្ត្រី ក្រសួង ស្ថាប័ន គណៈកម្មការ ផ្នែក ស្ថាប័នមជ្ឈិមអនុវត្តកម្មវិធីគោលដៅជាតិអភិវឌ្ឍសេដ្ឋកិច្ច និងសង្គមតំបន់បងប្អូនជនជាតិនៅក្នុងខេត្ត។
ស្របពេលនោះ មន្ទីរសហការជាមួយនឹងគ្រប់លំដាប់ថ្នាក់ ផ្នែកដើម្បីជំរុញការឃោសនា លើកកម្ពស់ការយល់ដឹង ការទទួលខុសត្រូវរបស់កម្មាភិបាល បក្ខជន បងប្អូនជនជាតិ ខ្មែរ អំពីគោលការណ៍ គោលនយោបាយរបស់បក្ស និងរដ្ឋស្តីពីការងារកាត់បន្ថយភាពក្រីក្រ ការយកចិត្តទុកដាក់បន្ថែមទៀតលើការអភិវឌ្ឍផ្នែកអប់រំ បង្កើនចំណេះដឹង កម្លាំងពលំពលករមាំមួន បណ្តុះបណ្តាលវិជ្ជាជីវៈ ការងារធ្វើ និងការងាររកស៊ីចិញ្ចឹមជីវិតសម្រាប់អ្នកក្រីក្រក្នុងតំបន់បងប្អូនជនជាតិ ខ្មែរ។
ជាពិសេស មន្ទីរសហការជាមួយធនាគារគោលនយោបាយសង្គមអនុវត្តមានប្រសិទ្ធភាពនូវសារាចរលេខ 39-CT/TW ចុះថ្ងៃទី ៣០ ខែ តុលា ឆ្នាំ ២០២៤ របស់គណៈលេខាស្តីពីការលើកកម្ពស់ប្រសិទ្ធភាពនៃសកម្មភាពឥណទានគោលនយោបាយក្នុងដំណាក់កាលថ្មី។ តាមរយៈនោះ អង្គភាពទាំងឡាយបន្តពិនិត្យ និងពិនិត្យសម្រេចសេចក្តីក្រុមគ្រួសារណាដែលមានគ្រប់លក្ខខណ្ឌទទួលបានប្រាក់កម្ចីតាមអនុក្រឹត្យលេខ 28/2022/NĐ-CP របស់រដ្ឋាភិបាល ទូទាត់ទាន់ពេលវេលារាល់ប្រភពទុនដើម្បីវិនិយោគក្នុងអភិវឌ្ឍន៍ផលិតកម្ម។
ប្រភពទុនឥណទានអនុគ្រោះពីធនាគារគោលនយោបាយសង្គមដើរតួនាទីយ៉ាងសំខាន់ រួមចំណែកជួយអ្នកក្រីក្រ និងមុខសញ្ញាគោលនយោបាយទាំងឡាយមានដើមទុនសម្រាប់ប្រកបរបររកស៊ី មានការងារធ្វើ ឈានឡើងផុតពីភាពក្រីក្រ អភិវឌ្ឍសេដ្ឋកិច្ចគ្រួសារ៕
អត្ថបទ៖ ទន់គៀត
ប្រែសម្រួលដោយ៖ សិរីសួស្តី
