បើកឱកាសប្រវត្តិសាស្ត្រ
ក្រោយពេលរួមបញ្ចូលគ្នា ទីក្រុង ហូ ជីមិញ មានផ្ទៃដ៏ចំនួន ៦.៧៧៣ គីឡូម៉ែត្រការ៉េ ស្មើនឹង ២,០៤% នៃផ្ទៃដីទូទាំងប្រទេស ចំនួនប្រជាជនឈានដល់ជាង ១៣,៦ លាននាក់ ស្មើនឹង ១៣,៤% នៃចំនួនប្រជាជនទូទាំងប្រទេស។ កម្លាំងពលកម្មឈានដល់ ៧,២៨ លាននាក់ ស្មើនឹង ១៤% ទូទាំងប្រទេស ជាមូលដ្ឋានគ្រឹះធនធានមនុស្សដ៏ធំធេងដើម្បីស្ទុះផ្លោះអភិវឌ្ឍ។ ទន្ទឹមនឹងនោះ សេដ្ឋកិច្ចរបស់ទីក្រុង ហូ ជីមិញ ទើបតែកត់សម្គាល់តួលេខគួរឱ្យចាប់អារម្មណ៍៖ GRDP សម្រេចបានចំនួន ២,៩៧ លានពាន់លានដុង (ប្រហាក់ប្រហែល ១២០,៨ ពាន់លានដុល្លារ) ស្មើនឹង ២៣,៦% GRDP ទូទាំងប្រទេស។ ប្រសិនបើមិនរាប់បញ្ចូលប្រេងឧស្ម័ននៅ បារៀ - វុងតៅ តួលេខនេះនៅតែសម្រេចបានចំនួន ២,៨២ លានពាន់លានដុង ស្មើនឹង ២២,៣%។ GRDP ជាមធ្យមសម្រាប់មនុស្សម្នាក់សម្រេចបានចំនួន ៨.២៤៤ ដុល្លារអាមេរិក ខ្ពស់ជាង ១,៧៤ ដងដែលជាមធ្យមទូទាំងប្រទេស។ ចំណូលថវិការបស់ទីក្រុងឈានដល់ ៦៨១.០០០ ពាន់លានដុង ប្រហាក់ប្រហែល ៣៣,៤% ចំណូលថវិកាជាតិសរុប ខណៈពេលចំណាយថវិកាត្រឹមតែចំនួន ១០,៤% ប៉ុននោះ។
មិនត្រឹមតែជា “សសរស្តម្ភ” ឆ្នាំសារពើពន្ធរបស់ប្រទេសទាំងមូលប៉ុននោះទេ ទីក្រុងក៏ជាកម្លាំងជំរុញនៃពាណិជ្ជកម្មកិច្ចការបរទេសដោយមានផលចំណូលពីការនាំចេញនាំសម្រេចបានចំនួន ១៧៩,៣ ពាន់លានដុល្លារអាមេរិក ស្មើនឹងជិត ២៣% នៃប្រទេសទាំងមូល ក្នុងនោះ ការនាំចេញសម្រេចបានចំនួន ៨៩,៤ ពាន់លានដុល្លារ នាំចូលចំនួន ៨៩,៩ ពាន់លានដុល្លារ។ ទុនវិនិយោគសង្គមសរុបសម្រេចបានចំនួន ៦៣១,៨ ពាន់ពាន់លានដុង ស្មើនឹង ១៧% នៃទូទាំងប្រទេស ប្រាក់ចំណូលលក់រាយទំនិញនិងសេវាកម្មសម្រេចបានចំនួន ១,៦៨៣ ពាន់ពាន់លានដុង ស្មើនឹងជាង ២៦%។
ក្នុងពង្រាងរបាយការណ៍នយោបាយលើកនេះ ទីក្រុង ហូ ជីមិញ ក៏បានសង្កត់ធ្ងន់ថា ការរួមបញ្ចូលគ្នាជាមួយ ប៊ិញយឿង និង បារៀ - វុងតៅ គឺជាចំណុចរបត់នៃដំណើរវិវឌ្ឍន៍ប្រវត្តិសាស្ត្រ បើកឱកាសរៀបចំរចនាសម្ព័ន្ធបរិយាកាសអភិវឌ្ឍឡើងវិញ បង្កើតបានជារូបធាតុរដ្ឋបាល - សេដ្ឋកិច្ចពិសេសមួយ មកជួបប្រសព្វគ្រប់សព្វឧត្តមភាពអំពីឧស្សាហកម្ម កំពង់ផែសមុទ្រ ភស្តុភារ សេវាកម្ម ហិរញ្ញវត្ថុ ទេសចរណ៍និងវិទ្យាសាស្ត្របច្ចេកវិទ្យា។ នេះជាបុរេលក្ខណៈដើម្បីទីក្រុងបង្កើតជាគំរូ "ទីក្រុងមេហ្គាអន្តរជាតិ" ពហុមជ្ឈមណ្ឌលដោយមានសសរស្តម្ភចំនួនប្រាំ៖ មជ្ឈមណ្ឌលឧស្សាហកម្ម - ភ័ស្តុភារ មជ្ឈមណ្ឌលហិរញ្ញវត្ថុអន្តរជាតិ មជ្ឈមណ្ឌលទេសចរណ៍និងឧស្សាហកម្មវប្បធម៌ មជ្ឈមណ្ឌលអប់រំ - សុខាភិបាល - វិទ្យាសាស្ត្របច្ចេកវិទ្យានិងតំបន់ពិសេសអភិវឌ្ឍច្នៃប្រតិដ្ឋ។
ក៏ប៉ុន្តែ បណ្តាបញ្ហាប្រឈមចំពោះទីក្រុង ហូ ជីមិញ ក្នុងអាណត្តិថ្មីក៏ត្រូវបានចង្អុលបង្ហាញច្បាស់ផងដែរ៖ ហេដ្ឋារចនាសម្ព័ន្ធមិនទាន់ស៊ីសង្វាក់គ្នា កង្វះធនធានមនុស្សគុណភាពខ្ពស់ កខ្វក់បរិស្ថាន វិសមភាពអ្នកមានអ្នកក្រ សម្ពាធនគរូបនីយកម្មនិងការប្រែប្រួលអាកាសធាតុ។ ក្រៅពីនេះ ដោយមានការប្រកួតប្រជែងយ៉ាងខ្លាំងក្លាក្នុងការទាក់ទាញការវិនិយោគ តម្រូវការធានាសន្តិសុខថាមពល សន្តិសុខតាមអ៊ីនធឺណិតនិងថែរក្សាអត្តសញ្ញាណវប្បធម៌ទាមទារឱ្យទីក្រុង ហូ ជីមិញ ផ្លាស់ប្តូរគំរូកំណើន លើកកម្ពស់លទ្ធភាពប្រកួតប្រជែងនិងអភិវឌ្ឍតាមទិសដៅប្រកបដោយនិរន្តរភាព បរិយាប័ន្ន។
ទីក្រុង ហូ ជីមិញ ក៏ដាក់ចំណុចសំខាន់លើអាណត្តិថ្មីគឺអភិវឌ្ឍន៍សេដ្ឋកិច្ច - សង្គម ការពារបរិស្ថានផ្សារភ្ជាប់ជាមួយនឹងកសាងបក្សស្អាតស្អំ រឹងមាំ។ ជាពិសេស ប្រជាជនក៏ត្រូវបានបញ្ជាក់ជាកត្តាគន្លឹះ ជាមជ្ឈមណ្ឌលនៃរាល់មាគ៌ា គោលនយោបាយថ្មីរបស់បក្ស រដ្ឋនិងរដ្ឋាភិបាល។ សុភមង្គល ការពេញចិត្តរបស់ប្រជាជនគឺជាម៉ែត្រវាស់អភិបាលកិច្ចដ៏ប្រសិទ្ធភាពនៃប្រព័ន្ធនយោបាយ ។ល។
យោងតាមលោក ត្រឹន លឺវក្វាង លេខាគណៈកម្មាធិការបក្សទីក្រុង ហូ ជីមិញ ក្រោយពេលរួមមូលដ្ឋានទាំង ៣ ចូលគ្នា ក្បាលម៉ាស៊ីនថ្មីរបស់ទីក្រុងបានដំណើរការជាជំហានដំបូងនិងកត់សម្គាល់សញ្ញាវិជ្ជមានជាច្រើន ទោះបីជានៅតែមានការលំបាកលំបិនពេលចំនួនគ្រឹះស្ថានធំ កម្មាភិបាលមួយចំនួនមិនទាន់ធ្លាប់របៀបធ្វើការងារថ្មីហើយបុគ្គលិកភាពគ្រប់លំដាប់ថ្នាក់មានការផ្លាស់ប្ដូរក៏ដោយ។ ចំពោះការងារកម្មាភិបាល ទីក្រុងនឹងអនុវត្តការកែសម្រួលសំខាន់ៗ ដោយផ្អែកលើគោលការណ៍ជ្រើសរើសមនុស្សសម្រាប់ការងារ ពង្រីកលទ្ធិប្រជាធិបតេយ្យ ស្តាប់មតិយោបល់សមូហភាពហើយពិសេសដាច់ខាតជៀសវាងអភិរក្សនិយមក្នុងគំនិតភាពជាអ្នកដឹកនាំ។
“ការច្របាច់បញ្ចូលមូលដ្ឋានទាំងបីមិនត្រឹមតែជាព្រឹត្តិការណ៍រដ្ឋបាលតែមួយមុខប៉ុននោះទេ ថែមទាំងបើកឱកាសជាប្រវត្តិសាស្ត្រដើម្បីបង្កើតកម្លាំងឥទ្ធិពលយ៉ាងខ្លាំងក្លាទៀតផង។ ទីក្រុង ហូ ជីមិញ ប៊ិញយឿង និង បារៀ - វុងតៅ នឹងអភិវឌ្ឍជាមួយគ្នាដោយឈរលើមូលដ្ឋានគ្រឹះចែករំលែកប្រភពធនធាន ផ្សារភ្ជាប់ហេដ្ឋារចនាសម្ព័ន្ធ តភ្ជាប់ទីផ្សារនិងពង្រីកឧត្តមភាពប្រៀបធៀប ផ្តើមពីនោះ លើកកម្ពស់លទ្ធភាពប្រកួតប្រជែង បញ្ជាក់ជំហរទីក្រុងមេហ្គាអន្តរជាតិក្នុងតំបន់” លេខាគណៈកម្មាធិការបក្សទីក្រុង លោក ត្រឹន លឺវក្វាង បញ្ជាក់ដូច្នេះ។
ភាពទម្លុះទម្លាយបច្ចេកវិទ្យា យកប្រជាជនធ្វើជាមណ្ឌលកណ្ដាលអភិវឌ្ឍន៍
ចែករំលែកអំពីការតម្រង់ទិសដៅអភិវឌ្ឍន៍សេដ្ឋកិច្ច-សង្គមក្នុងដំណាក់កាលថ្មី លោក ង្វៀន វ៉ាន់ដឿក ប្រធានគណៈកម្មាធិការប្រជាជនទីក្រុង ហូជីមិញ គូសបញ្ជាក់ថា ទីក្រុងនឹងផ្តោតទៅលើភារកិច្ចគន្លឹះសំខាន់ៗ ក្នុងនោះវិទ្យាសាស្ត្រ - បច្ចេកវិទ្យា នវានុវត្តន៍ច្នៃប្រតិដ្ឋ និងធ្វើបរិវត្តកម្មឌីជីថលត្រូវបានចាត់ទុកថាជាកម្លាំងចលករសំខាន់ជំរុញកំណើន។
តាមប្រធានគណៈកម្មាធិការប្រជាជនទីក្រុង ហូជីមិញ រាល់គោលការណ៍ គោលនយោបាយរបស់ទីក្រុងសុទ្ធតែត្រូវកំណត់ច្បាស់នូវតួនាទីស្នូលរបស់ប្រជាជន យកការពេញចិត្ត និងសុភមង្គលរបស់ប្រជាជនធ្វើជាបន្ទាត់វាស់វែង។ ដូច្នេះហើយ ក្បាលម៉ាស៊ីនរដ្ឋាភិបាលពីរថ្នាក់នឹងបន្តសម្រិតសម្រាំង សកម្មភាពមានប្រសិទ្ធភាពជាង តម្រង់ទិសដៅបម្រើល្អតម្រូវការរបស់ប្រជាជន និងអាជីវកម្ម។
យោងតាមលោក ង្វៀន វ៉ាន់ដឿក ដើម្បីក្លាយជាការពិតជាក់ស្តែងគោលដៅ ទីក្រុងត្រូវកសាងយុទ្ធសាស្ត្រវិទ្យាសាស្ត្រ - បច្ចេកវិទ្យាផ្សារភ្ជាប់នឹងជីវភាពរស់នៅ ក្នុងនោះគម្រោងស្រាវជ្រាវនីមួយៗ កម្មវិធីធ្វើបរិវត្តកម្មឌីជីថលនីមួយៗ សុទ្ធតែត្រូវនាំមកនូវអត្ថប្រយោជន៍ជាក់ស្តែងដល់សហគមន៍។
ទីក្រុងនឹងផ្តល់អាទិភាពដំណើរការបណ្តាមជ្ឈមណ្ឌលនវានុវត្តន៍ប្រតិដ្ឋឯកទេស ឧបត្ថម្ភសហគ្រាសខ្នាតតូច និងមធ្យមឱ្យអនុវត្តបច្ចេកវិទ្យា ស្របពេលបើកទូលាយកិច្ចសហប្រតិបត្តិការអន្តរជាតិដើម្បីចូលកៀកបណ្តាប្រភពហិរញ្ញវត្ថុ បច្ចេកវិទ្យាជឿនលឿនទំនើប។ ក្នុងនោះ ទីក្រុង ហូជីមិញ នឹងកសាងប្រព័ន្ធអេកូឡូស៊ីប្រកបដោយការច្នៃប្រតិដ្ឋ ក្នុងនោះមនុស្សជាមជ្ឈមណ្ឌល បច្ចេកវិទ្យាជាឧបករណ៍ នវានុវត្តន៍ច្នៃប្រតិដ្ឋជាកម្លាំងចលករដើម្បីអភិវឌ្ឍន៍ប្រកបដោយចីរភាព។
លោក ឡឹម ឌិញថាំង នាយកដ្ឋានវិទ្យាសាស្ត្រ និងបច្ចេកវិទ្យានៃទីក្រុង ហូជីមិញ ក៏បានឲ្យដឹងថា ទីក្រុងបានមានសក្តានុពលគួរកត់សម្គាល់នឹងប្រព័ន្ធអេកូឡូស៊ីផ្ដើមអាជីពដ៏រស់រវើក និងកងជួរវិទ្យាសាស្ត្រករជាច្រើនកុះករមកពីសាលារៀន វិទ្យាស្ថាននៅតំបន់សេដ្ឋកិច្ចសំខាន់ភាគខាងត្បូង។ ចាប់តាំងពីដើមឆ្នាំ ២០២៥ មក គណៈកម្មាធិការបក្សទីក្រុងហូជីមិញ បានដាក់ចេញកម្មវិធីសកម្មភាពអនុវត្តសេចក្តីសម្រេចចិត្តលេខ 57-NQ/TW ដោយចាត់ទុកវិទ្យាសាស្ត្រ - បច្ចេកវិទ្យា នវានុវត្តន៍ និងធ្វើបរិវត្តកម្មឌីជីថលជាទម្លុះទម្លាយមួយក្នុងចំណោមទម្លុះទម្លាយយុទ្ធសាស្ត្រនាំមុខ។
ទីក្រុងក៏បានសុក្រឹតប្រព័ន្ធគោលនយោបាយអនុគ្រោះស្តីពីពន្ធ ហិរញ្ញវត្ថុ ទាក់ទាញធនធានមនុស្សមានគុណភាពខ្ពស់ ឧបត្ថម្ភចុះបញ្ជីតក្កកម្ម រៀបចំការប្រកួតប្រជែងច្នៃប្រដិត្ឋ។ គោលនយោបាយទាំងនេះឥឡូវនេះត្រូវបានស្នងបន្ត និងពង្រីកទូលាយក្នុងលំហអភិវឌ្ឍន៍ថ្មីបន្ទាប់ពីការច្របាច់បញ្ចូល សន្យាថានឹងបង្កើតកម្លាំងចលករដ៏រឹងមាំសម្រាប់ទីក្រុងក្នុងការផ្លោះទៅមុខក្នុងរយៈកំណាត់ផ្លូវខាងមុខ។
តាមរយៈនោះ ក្នុងអាណត្តិថ្មី ទីក្រុង ហូជីមិញ នឹងកៀរគរធនធានសង្គមយ៉ាងខ្លាំងក្លា ដើម្បីវិនិយោគលើវិស័យវិទ្យាសាស្ត្រ និងបច្ចេកវិទ្យា នវានុវត្តន៍ និងធ្វើបរិវត្តកម្មឌីជីថល។ ដំណោះស្រាយមួយក្នុងចំណោមដំណោះស្រាយសំខាន់គឺការកសាងតំបន់ទីក្រុងប្រកបដោយភាពច្នៃប្រឌិតផ្សារភ្ជាប់នឹងមជ្ឈមណ្ឌលស្រាវជ្រាវ និងបណ្តុះបណ្តាល បង្កើតបរិយាកាសតភ្ជាប់រវាងសាកលវិទ្យាល័យ វិទ្យាស្ថានស្រាវជ្រាវ និងអាជីវកម្ម ដោយហេតុនេះការពន្លឿនការអនុវត្តលទ្ធផលស្រាវជ្រាវក្នុងផលិតកម្ម និងជីវិត។ ទីក្រុងនេះក៏មានគោលបំណងបង្កើតបណ្តាញមន្ទីរពិសោធន៍សំខាន់ៗ មជ្ឈមណ្ឌលទិន្នន័យ និងបើកវេទិកាបញ្ញាសិប្បនិមិត្ត បម្រើតម្រូវការក្នុងការទាញយកទិន្នន័យធំសម្រាប់ការគ្រប់គ្រងទីក្រុង និងសេដ្ឋកិច្ចឌីជីថល។
ទន្ទឹមនឹងនោះ រដ្ឋាភិបាលនឹងពង្រឹងទំនាក់ទំនងក្នុងតំបន់ក្នុងការអភិវឌ្ឍបច្ចេកវិទ្យា ចែករំលែកហេដ្ឋារចនាសម្ព័ន្ធស្រាវជ្រាវជាមួយតំបន់ជិតខាង ដើម្បីបង្កើតកន្លែងច្នៃប្រតិដ្ឋរួមសម្រាប់តំបន់សេដ្ឋកិច្ចសំខាន់ភាគខាងត្បូងទាំងមូល។ យន្តការសាកល្បងគោលនយោបាយ (sandbox) ក្នុងវិស័យ fintech ការថែទាំសុខភាព និងការអប់រំឆ្លាតវៃក៏នឹងត្រូវបានដាក់ដំណើរការផងដែរ ដើម្បីលើកទឹកចិត្តដល់ការចាប់ផ្តើមបច្ចេកវិទ្យា និងពង្រីកទីផ្សារ។ ជាពិសេស ទីក្រុងផ្តោតលើការលើកកម្ពស់សមត្ថភាពឌីជីថលសម្រាប់សហគមន៍ ការពេញនិយមជំនាញព័ត៌មានវិទ្យា និងការចាប់ផ្តើមច្នៃប្រតិដ្ឋសម្រាប់យុវជន ជួយវិទ្យាសាស្ត្រ និងបច្ចេកវិទ្យាពិតជាឧបករណ៍បម្រើប្រជាជន សំដៅកសាងទីក្រុង ហូជីមិញប្រកបដោយភាពស៊ីវិល័យ ទំនើប គួរជាទីរស់នៅ៕
មហាសន្និបាតតំណាងនៃបក្ខភាគទីក្រុងលើកទី១ បានប្រព្រឹត្តទៅក្នុងរយៈពេល៣ ថ្ងៃ
មហាសន្និបាតតំណាងនៃបក្ខភាគទីក្រុងលើកទី១ អាណត្តិ ២០២៥ - ២០៣០ នឹងប្រព្រឹត្តទៅរយៈពេល ៣ ថ្ងៃ ចាប់ពីថ្ងៃទី ១៣ ដល់ ១៥ ខែតុលា ដោយមានសម័យប្រជុំ ត្រៀមបម្រុងនៅថ្ងៃទី ១៣ ខែតុលា សម័យប្រជុំផ្លូវការនៅថ្ងៃទី ១៤ ខែតុលា និងព្រឹកថ្ងៃទី ១៥ ខែតុលា។ មុននោះ ថ្ងៃទី ១១ និង ១២ ខែតុលា ប្រតិភូនឹងចូលរួមក្នុងសកម្មភាពមុនមហាសន្និបាត រួមទាំងការចុះទស្សនាការដ្ឋានសំណង់។
មហាសន្និបាតបានកោះប្រជុំគណៈប្រតិភូចំនួន ៥៥០ នាក់ មកពីបក្ខភាគក្រោមឱវាទចំនួន ១៧៣ ដោយមានទិសស្លោកថា "សាមគ្គីភាព - ប្រជាធិបតេយ្យ - ច្បាប់បញ្ញត្តិ - ទម្លុះទម្លាយ - ការច្នៃប្រតិដ្ឋ" ។ មហាសន្និបាតមានភារកិច្ចពិនិត្យ និងវាយតម្លៃលទ្ធផលអាណត្តិឆ្នាំ ២០២០ - ២០២៥ ហើយទន្ទឹមនឹងនោះ បានដាក់ចេញនូវទិសដៅ គោលដៅ និងដំណោះស្រាយសម្រាប់ដំណាក់កាលឆ្នាំ ២០២៥ - ២០៣០ ដោយសង្កត់ធ្ងន់លើការកសាងទីក្រុង ហូជីមិញ ទៅជាទីក្រុងពហុមជ្ឈិម ទំនើប ឆ្លាតវៃ និងប្រកបដោយចីរភាព។
ដើម្បីធានាសុវត្ថិភាព និងអនុវត្តន៍ជាក់សែ្ដងធ្វើបរិវត្តកម្មឌីជីថលគ្រប់ជ្រុងជ្រោយ មហាសន្និបាតនឹងមិនប្រើប្រាស់ឯកសារក្រដាស (លើកលែងតែឯកសារសម្ងាត់)។ ប្រតិភូនីមួយៗត្រូវបានតម្រូវឱ្យនាំយកឧបករណ៍ Tablet ដើម្បីចូលប្រើព័ត៌មាន និងឯកសារ។ ឯកសារ ឧបករណ៍ និងរបស់របរទាំងអស់ត្រូវបានរក្សាទុកក្នុងកាបូបយួរដៃផ្តល់ដោយគណៈកម្មាធិការរៀបចំ។ គណៈប្រតិភូធ្វើការជាក្រុមជជែកដេញដោលចំនួន ១២ ក្រុម ធ្វើដំណើរតាមរថយន្តក្រុង និងចូលរួមសកម្មភាពនានាដូចជា ការទស្សនាទីបញ្ចុះសពយុទ្ធជនពលី ការថ្វាយបាច់ផ្កានៅវិមានអនុស្សាវរីយ៍ស្តេច ហ៊ុង និងវិមានប្រធានរដ្ឋ ហូជីមិញ ហើយទស្សនាខ្សែរថភ្លើងក្រោមដី metro លេខ ១ ។
អត្ថបទ និងរូបថត៖ ហ្វាងត្វៀត
ប្រែសម្រួលដោយ៖ សឺនហេង - យ័ញលើយ
