ខេត្ត កាវបាំង ជាមូលដ្ឋានមានបងប្អូនជនជាតិជាច្រើន រស់នៅជាមួយគ្នា ដោយមានចំនួនប្រជាជនជាង ៩៥% ជាជនជាតិភាគតិច។ បណ្តាជនជាតិលើ ភូមិសាស្ត្រខេត្តផ្សារភ្ជាប់ជាមួយគ្នានិងកសាងខឿន វប្បធម៌ពោរពេញទៅដោយ អត្តសញ្ញាណប្រជាជាតិជាយូរលង់ណាស់មកហើយ។ ជាដែនដីមូលមីជនជាតិ ជាច្រើនដូចជា៖ តៃ នុង ម៉ុង យ៉ាវ ឡូឡូ។ល។ ជនជាតិនីមួយៗ សុទ្ធតែមាន បេតិកភណ្ឌវប្បធម៌រៀងៗ ខ្លួន បង្កើតបានជាផ្ទាំងវប្បធម៌ ជនជាតិសម្បូរបែប និងបរិបូណ៌ ក្លាយជាសក្តានុពលទេសចរណ៍ដ៏ធំធេង របស់ខេត្ត។
បច្ចុប្បន្នទូទាំងខេត្តមានកេរដំណែលប្រវត្តិសាស្ត្រវប្បធម៌ និងរមណីយដ្ឋាន ល្បីឈ្មោះចំនួន ២១៤ ក្នុងនោះមានកេរដំណែលត្រូវបាន ចំណាត់ថ្នាក់គ្រប់ លំដាប់ថ្នាក់ចំនួន ៩៨ រួមមានកេរដំណែលជាតិពិសេសចំនួន ៣ កេរដំណែល លំដាប់ជាតិចំនួន ២៥ កេរដំណែលលំដាប់ខេត្តចំនួន ៧០ មានរតនវត្ថុជាតិ ចំនួន ២។ ឆ្នាំ ២០១៨ ឧទ្យានភូគព្ភសាស្រ្តសកលលោក ណននឿកកាវបាំង ត្រូវបានអង្គការ យូណេស្កូ ទទួលស្គាល់ជាឧទ្យានភូគព្ភ សាស្រ្តសកលលោក។ ទន្ទឹមនឹងនោះ ខេត្តក៏មានប្រព័ន្ធបេតិកភណ្ឌវប្បធម៌អរូបីដ៏បរិបូណ៌ សម្បូរបែប ក្រៃលែង រួមមានច្រើនទម្រង់ រាប់តាំងពីពិធីបុណ្យប្រពៃណី សិល្បៈសម្តែង ប្រជាប្រិយ មុខរបរហត្ថកម្មប្រពៃណីរហូតដល់ទំនៀមទម្លាប់សង្គមនិង ជំនឿ ពុទ្ធិប្រជាប្រិយជាដើម។
បច្ចុប្បន្ននេះ ខេត្ត កាវបាំង មានបេតិកភណ្ឌចំនួន ៦ ត្រូវបានដាក់បញ្ចូល ក្នុងបញ្ជីរាយនាមបេតិកភណ្ឌវប្បធម៌អរូបីជាតិរួមមាន៖ ពិធីកិច្ច ថែន របស់ ជនជាតិ តៃ ពិធីបុណ្យ ណាងហាយ ឃុំ ទៀនថាញ់ ស្រុក ក្វាងហ្វា មុខរបរដំដែក ប្រពៃណីរបស់ជនជាតិ នុងអាន ឃុំ ភុកសែន ស្រុក ក្វាងហ្វា ពិធីបុណ្យដណ្ដើម ក្បាលផាវទីរួមស្រុក ក្វាងអ្វៀន ស្រុក ក្វាងហ្វា សិល្បៈរចនាក្បាច់ក្បូរលើ សម្លៀកបំពាក់របស់ជនជាតិ យ៉ាវក្រហម ស្រុក ង្វៀនប៊ិញ ចម្រៀងប្រជាប្រិយ លឿនកយ ជនជាតិ តៃ ស្រុក បាវឡឹម។ ជាពិសេស បេតិកភណ្ឌប្រតិបត្តិជាក់ស្ដែង ថែន តៃ នុង ថៃ នៅ វៀតណាម (ក្នុងនោះមានពិធីកិច្ច ថែន តៃ ខេត្ត កាវបាំង) ត្រូវបាន យូណេស្កូ ដាក់បញ្ចូលក្នុង បញ្ជីរាយនាមបេតិកភណ្ឌវប្បធម៌អរូបីតំណាងរបស់មនុស្សជាតិហើយ។
ដើម្បីទាញយកតម្លៃវប្បធម៌ប្រពៃណីទាំងឡាយ ខេត្ត កាវបាំង បានរៀបចំដាក់ដំណើរការ ឧបត្ថម្ភ ចលនាបងប្អូនជនជាតិអភិវឌ្ឍទេសចរណ៍សហគមន៍។ តួយ៉ាងដូចជាប្រជាជនចំនួន ៧ ក្រុមគ្រួសារនៅភូមិ ហ្វាយខាវ ឃុំ ក្វាងថាញ់ ស្រុក ង្វៀនប៊ិញ។ ចាប់ពីឆ្នាំ ២០២០ រហូតមកទល់ពេលនេះ ក្រុមគ្រួសារទាំងនេះបានវិនិយោគ ធ្វើអាជីវកម្មសេវាកម្ម homestay បម្រើភ្ញៀវទេសចរ។ មាមីង បងប្អូននៅទីនេះមានចំណាប់អារម្មណ៍យ៉ាងខ្លាំងក្នុងការចូលរួមក្នុងសកម្មភាព សម្តែងសិល្បៈ ប្រពៃណី ចម្អិនអាហារ ណែនាំភ្ញៀវទេសចរឆ្លងកាត់ការពិសោធន៍ ប្រជុំជីវភាពពលកម្មផលិតកម្ម។ល។
មិនត្រឹមតែនៅភូមិ ហ្វាយខាវ ប៉ុណ្ណោះទេ គោលដៅទេសចរណ៍សហគមន៍ ជាច្រើនផ្សេងទៀត នៅខេត្ត កាវបាំង ក៏កំពុងដំណើរការប្រកបដោយប្រសិទ្ធភាពដូចជា៖ ភូមិទេសចរណ៍សហគមន៍របស់ ជនជាតិ ឡូឡូ នៅឃុំ គីមគុក ស្រុក បាវឡាក គោលដៅទេសចរណ៍សហគមន៍ ភៀថាប់ នៅឃុំ គ្វឹកយ៉ឹន ស្រុក ក្វាងហ្វា គោលដៅទេសចរណ៍សហគមន៍ ប៉ាករ៉ាំង នៅឃុំ ភុកសែន ស្រុក ក្វាងហ្វា គោលដៅទេសចរណ៍សហគមន៍ លុងនៀក ភូមិថ្ម ខួយគៃ នៅឃុំ ដាមធុយ ស្រុក ទ្រុងខាញ់។ល។
ពង្រីកតម្លៃវប្បធម៌ប្រពៃណីទាំងឡាយ ខេត្ត កាវបាំង កំពុងក្លាយជាគោលដៅទេសចរណ៍ដ៏ ទាក់ទាញជាបណ្តើរៗ របស់ភ្ញៀវទេសចរជាច្រើនមកពីទីជិតឆ្ងាយ រួមចំណែកអភិវឌ្ឍទេសចរណ៍ សហគមន៍ ឧទេ្ទសនាម ផ្សព្វផ្សាយអំពីដែនដី មនុស្សម្នាខេត្ត កាវបាំង ដ៏ស្និទ្ធស្នាល ស្រឡាញ់ រាប់អានភ្ញៀវ៕
អត្ថបទ៖ គ្វឹកដាត រូបថត៖ ញ៉ឹតអាញ់
ប្រែសម្រួលដោយ៖ សឺនហេង
