រដូវវិស្សមកាលឆ្នាំនេះ វត្តអង្គររាជបូរី (អង្គ) (សង្កាត់ង្វៀតហ្វា ខេត្តវិញឡុង) ទទួលសិស្ស ខ្មែរ មករៀនមាតុភាសាជិត ២០០ រូប។ ហើយប្អូនៗ ត្រូវបានបែងចែកជា ៥ ថ្នាក់រៀនទៅតាមកម្រិតចំណេះដឹងដើម្បីងាយស្រួលសម្រាប់ការក្រេបយកចំណេះដឹងរបស់ប្អូនៗ។
ប្អូន ថាច់ ចូវង៉ុក សិស្សថ្នាក់ទី ១១ នៃសាលាមធ្យមសិក្សា បាលី - ខ្មែរ ត្រាវិញ ចែករំលែកថា៖ “ប្អូនចាប់ផ្តើមរៀនអក្សរ ខ្មែរ នៅ វត្តសំរោងឯក តាំងពីអាយុ ១១ ឆ្នាំ។ ហើយនេះជាឆ្នាំទី ២ ប្អូនមករៀននៅវត្ត អង្គររាជបូរី (អង្គ)។ ការរៀនអក្សរ ខ្មែរ ជួយឲ្យប្អូនៗ ចេះអាន ចេះសរសេរមាតុភាសាបានស្ទាត់ និងយល់កាន់តែច្បាស់អំពីទំនៀមទម្លាប់ ប្រពៃណី វប្បធម៌របស់ជនជាតិប្អូន”។
ប្អូន ថាច់ តូ សុវណ្ណតារា (ថ្នាក់ទី ៩) និងប្អូនប្រុស ថាច់ តូ សុវណ្ណខេមរា (ថ្នាក់ទី ៧) ជាសិស្សសាលាអន្តេវាសិកជនជាតិ ចូវថាញ់ រៀនអក្សរ ខ្មែរ បានរយៈពេល ២ ឆ្នាំនៅ វត្តអង្គ ក្នុងរដូវវិស្សមកាល។ ប្អូន តារា ពោលថា៖ “ប្អូនសប្បាយចិត្ត និងមោទកភាពខ្លាំងណាស់ពេលបានរៀនភាសានិយាយ និងអក្សររបស់ជនជាតិប្អូន។ ប្អូនចង់សាយភាយស្មារតីរៀនអក្សរ ខ្មែរ ដល់សហគមន៍។ កាលពីមុន ប្អូនបានរៀនអក្សរ ខ្មែរ នៅវត្ត សំរោងឯក បាន ៥ ឆ្នាំហើយ។ លោកគ្រូៗ បានបង្ហាត់បង្រៀនប្អូនអស់ពីចិត្តអស់ពីថ្លើម ងាយយល់ និងបង្កើតបរិយាកាសជិតស្និទ្ធ រីករាយដល់ប្អូនៗ។ ប្អូននឹងបន្តរៀនទាល់តែអាចប្រាស្រ័យទាក់ទង ចេះសរសេរស្ទាត់អក្សរ ខ្មែរ ឲ្យទាល់តែបាន”។
យោងតាមព្រះតេជគុណ ថាច់ ដូរ៉ា បណ្តាថ្នាក់រៀននៅ វត្តអង្គ បើកពីរពេលរៀងរាល់ថ្ងៃ។ ពេលព្រឹកចាប់ពីម៉ោង ៧ ដល់ម៉ោង ៩ និង ៣០ នាទី ពេលរសៀលចាប់ពីម៉ោង ១៤ ដល់ម៉ោង ១៦។ សិស្សបានសម្រាក ៤ ថ្ងៃក្នុងមួយខែ។ ក្រៅពីការរៀនអាន រៀនសរសេរអក្សរ ខ្មែរ ប្អូនៗ នៅបានរៀនអំពីទំនៀមទម្លាប់ ពិធីកិច្ច សីលធម៌ និងវប្បធម៌ប្រពៃណីរបស់ជនជាតិ ខ្មែរ យើងទៀតផង។
លោកស្រី ថាច់ ធីធូហា នាយិកាមន្ទីរជនជាតិ និង សាសនាខេត្ត វិញឡុង (ឈ្មោះខេត្តថ្មី ក្រោយពីការរួមបញ្ចូលខេត្ត ក្រុង) មានប្រសាសន៍ថា បន្ទាប់ពីការរួមបញ្ចូលផ្នែករដ្ឋបាល បច្ចុប្បន្នក្នុងខេត្តមានវត្តព្រះពុទ្ធសាសនាទក្ខិណនិកាយ ខ្មែរ ចំនួន ១៥៦ វត្ត។
រៀងរាល់ឆ្នាំក្នុងរដូវវិស្សមកាលម្តងៗ វត្តភាគច្រើនសុទ្ធតែមានរៀបចំថ្នាក់រៀនអក្សរ ខ្មែរ ដោយទាក់ទាញសិស្សចូលរួមសិក្សាយ៉ាងច្រើនកុះករ។ ថ្នាក់រៀនទាំងអស់ត្រូវបានបង្ហាត់បង្រៀនដោយព្រះសង្ឃ និងលោកអាចារ្យ លោកគ្រូ អ្នកគ្រូដែលជាគ្រហស្ថ អ្នកមានប្រជាប្រិយភាពក្នុងតំបន់ជនជាតិ ខ្មែរ ដែលស្ទាត់ជំនាញភាសា ខ្មែរ ទទួលបន្ទុកបង្ហត់បង្រៀន។
នេះជាកន្លែងលេងកម្សាន្តមានអត្ថប្រយោជន៍ជួយប្អូនៗ បង្កើត អភិវឌ្ឍបំណិនប្រើភាសារបស់ខ្លួន និងលើកកម្ពស់ការយល់ដឹងអំពីវប្បធម៌ជនជាតិ។ កាលពីមុន នៅខេត្ត ត្រាវិញ (ឈ្មោះខេត្តចាស់) អ្នកបង្រៀនភាសា ខ្មែរ នៅតាមវត្តទទួលបានប្រាក់ឧបត្ថម្ភចំនួន ៣៥.០០០ ដុងក្នុងមួយម៉ោងរៀន យោងតាមសេចក្តីសម្រេចចិត្តលេខ 13/2020/NQ-HDND ចុះថ្ងៃទី ៩ ខែ វិច្ឆិកា ឆ្នាំ ២០២០ របស់ក្រុមប្រឹក្សាប្រជាជនខេត្ត។
បច្ចុប្បន្ននេះ មន្ទីរជនជាតិ និង សាសនាខេត្ត វិញឡុង កំពុងធ្វើសេនាធិការគណៈកម្មាធិការប្រជាជនខេត្តចេញគោលនយោបាយឧបត្ថម្ភដល់អ្នកបង្រៀនភាសា ខ្មែរ តាមវត្តអារាម ដើម្បីទទួលស្គាល់ និងលើកទឹកចិត្តដល់ការរួមវិភាគទានរបស់ព្រះសង្ឃ និងលោកគ្រូអាចារ្យទាំងឡាយក្នុងកិច្ចការអភិរក្សភាសានិយាយ អក្សរសរសេរ និងវប្បធម៌របស់ជនជាតិ ខ្មែរ៕
ព័ត៌មាន និង រូបថត៖ ថាញ់ហ្វា - សហការី
ប្រែសម្រួលនិងបញ្ចូលទិន្នន័យ៖ អៀនថាញ់
