បន្ទាប់ពីរួមបញ្ចូលផ្នែករដ្ឋបាល អាជ្ញាធរមូលដ្ឋានបានខិតខំពង្រីកឲ្យទូលាយតម្លៃទាំងនោះ ឱ្យក្លាយជាចំណុចលេចធ្លោក្នុងចរន្តលំហូរវប្បធម៌មូលដ្ឋាន ដោយបង្កើតការងារធ្វើថ្មីៗ បន្ថែមទៀត ដើម្បីបង្កើនប្រាក់ចំណូលសម្រាប់ជនជាតិ អេដេ តាមរយៈបណ្តាគម្រោងអភិវឌ្ឍន៍ទេសចរណ៍សហគមន៍។
ការពង្រីកឲ្យទូលាយតម្លៃវប្បធម៌ជនជាតិដើម
បច្ចុប្បន្ន នៅបណ្តាឃុំ៖ សុងហ៊ិញ ឌឹកប៊ិញ អៀលី អៀបា (ខេត្ត ដាក់ឡាក់) បងប្អូនជនជាតិ អេដេ មានចំនួនជាង ១០.០០០ នាក់រស់នៅ និងធ្វើការរកស៊ីចិញ្ចឹមជីវិត សាមគ្គីសម្របខ្លួនក្នុងសហគមន៍បណ្តាជនជាតិភាគតិចដទៃទៀតដូចជា៖ បាណា តៃ នុង ថាយ យ៉ាវ ចាម្ប៍ មឿង។ល។ ទោះបីជាផ្នែករដ្ឋបាលកម្រិតឃុំបានប្តូរ ឬក៏នាមមូលដ្ឋានបានប្តូរថ្មីក៏ដោយ បងប្អូនជនជាតិ អេដេ នៅទីនេះនៅតែខិតខំថែរក្សា និងពង្រីកឲ្យទូលាយតម្លៃវប្បធម៌ប្រពៃណីដ៏វិសសេសវិសេសរបស់ជនជាតិខ្លួន។
ឆ្នាំ ២០១៨ ពិធីកោរជុករបស់ជនជាតិ អេដេ (ស្រុក សុងហ៊ិញ អតីតខេត្ត ភូអៀន) ត្រូវបានក្រសួងវប្បធម៌ កីឡា និងទេសចរណ៍ទទួលស្គាល់ជាបេតិកភណ្ឌវប្បធម៌អរូបីជាតិ។ អស់រយៈពេលជាច្រើនឆ្នាំកន្លង បេតិកភណ្ឌវប្បធម៌នេះត្រូវបានអាជ្ញាធរមូលដ្ឋាន និងបណ្តាស្ថាប័នពាក់ព័ន្ធរួមជាមួយសហគមន៍ អេដេ នៅទីនេះខំប្រឹងថែរក្សា និងផ្សព្វផ្សាយ។ ពេលវេលាធ្វើពិធីសែននេះក៏ត្រូវបានបងប្អូនជនជាតិកាត់បន្ថយផងដែរ ដើម្បជៀសវាងការខ្ជះខ្ជាយ ប៉ះពាល់ដល់ការងាររបស់សាច់ញាតិ និងសមាជិកគ្រួសារ។
ក្រៅពីនេះ មានលក្ខណៈវប្បធម៌វិសេសវិសាលជាច្រើនរបស់ជនជាតិ អេដេ ក៏កំពុងបានថែរក្សាផងដែរមានដូចជា៖ ពិធីសែនកំពង់ទឹក ការសម្តែងគងឃ្មោះ ម្ហូបអាហារ សម្លៀកបំពាក់។ល។
តាមរយៈពិធីកោរជុក និងពិធីសែនផ្សេងៗ ទៀត ជនជាតិ អេដេ បួងសួងសុំទទួលការបញ្ជូនកម្លាំងប្រពៃណីរបស់កុលសម្ព័ន្ធ ស្របពេលនោះបញ្ញើជំនឿ និងក្តីសង្ឃឹមអំពីកម្លាំងពលំដើម្បីជួយការពារ និងកសាងភូមិនិគមឱ្យរីកចម្រើន។ ពិធីកិច្ចខាងជំនឿទាំងនេះមានតាំងពីបរមបុរាណមកហើយ ហើយបានផ្ទេរបន្តវេនពីមួយជំនាន់ទៅមួយជំនាន់ទៀត ជ្រួតជ្រាបយ៉ាងជ្រាលជ្រៅក្នុងគំនិត និងការរស់នៅប្រជុំជីវភាពប្រចាំថ្ងៃរបស់បងប្អូនជនជាតិ។ ពិធីកោរជុកនាំមកសេចក្តីរីករាយ និងមោទកភាពក្នុងសហគមន៍ អេដេ នៅទីនេះ។
យោងតាមលោក ង្វៀន ជីហៀន ប្រធានគណៈកម្មាធិការប្រជាជនឃុំ សុងហ៊ិញ ពិធីកោរជុករបស់ជនជាតិ អេដេ មិនត្រឹមតែបង្ហាញអត្តសញ្ញាណវប្បធម៌តួយ៉ាងរបស់បងប្អូនជនជាតិភាគតិចក្នុងមូលដ្ឋានប៉ុននោះទេ ថែមទាំងមានតម្លៃសម្រាប់វប្បធម៌សហគមន៍ និងប្រជាជន វៀតណាម ទៀតផង។ ក្នុងអំឡុងពេលរស់នៅរយៈពេលជាយូរលង់នៅអតីតខេត្ត ភូអៀន ជាមួយនឹងការច្នៃប្រតិដ្ឋវប្បធម៌ឥតឈប់ឈរនោះ បងប្អូនជនជាតិ អេដេ មានលក្ខណៈវប្បធម៌ដាច់ដោយឡែក ដែលបានបង្ហាញតាមរយៈទំនៀមទម្លាប់ ជំនឿ និងពិធីបុណ្យ។
ទេសចរណ៍សហគមន៍ និងការអភិរក្សតម្លៃវប្បធម៌
ខែ មេសា ឆ្នាំ ២០២៥ គណៈកម្មាធិការប្រជាជនស្រុក សុងហ៊ិញ (អតីតខេត្ត ភូអៀន) បានអនុម័តជាផ្លូវការគម្រោង "អភិវឌ្ឍទេសចរណ៍វប្បធម៌សហគមន៍និគម ឡេយៀម"។ គម្រោងនេះមានគោលបំណងកសាងនិគម ឡេយៀម (សព្វថ្ងៃចំណុះឃុំ សុងហ៊ិញ ខេត្ត ដាក់ឡាក់) ពីមួយជំហានទៅមួយជំហានក្លាយជាគោលដៅទេសចរណ៍ទាក់ទាញផ្សារភ្ជាប់ជាមួយនឹងការអភិរក្ស និងការពង្រីកឲ្យទូលាយអត្តសញ្ញាណវប្បធម៌ដាច់ដោយឡែករបស់បងប្អូនជនជាតិ អេដេ។
បច្ចុប្បន្ន និគម ឡេយៀម មានប្រជាជនប្រហែល ១៦០ ក្រុមគ្រួសារ ភាគច្រើនជាជនជាតិ អេដេ រស់នៅ។ នៅទីនេះមានតម្លៃវប្បធម៌ប្រពៃណីវិសេសវិសាលជាច្រើនដូចជា៖ ផ្ទះវែង របាំប្រជាប្រិយ គងឃ្មោះ ម្ហូបជនជាតិដើម (រួមមានត្រីទឹកជ្រោះ បន្លែព្រៃជាដើម) របរត្បាញសំពត់សង្កិម ត្បាញរវៃ ផលិតស្រាប្រពៃណី។ល។ តម្លៃវប្បធម៌ទាំងនេះត្រូវបានវាយតម្លៃថាមានសក្តានុភាពយ៉ាងខ្លាំងក្នុងការអភិវឌ្ឍទេសចរណ៍វប្បធម៌សហគមន៍។ ក៏ប៉ុន្តែរហូតមកដល់ពេលនេះ សកម្មភាពទេសចរណ៍ទាំងឡាយនៅនិគមនៅខ្នាតតូចតាច កើតឯង ខ្វះការរៀបចំផែនការ និងមិនទាន់មានការវិនិយោគត្រឹមត្រូវ។
គម្រោង "ការអភិវឌ្ឍទេសចរណ៍វប្បធម៌សហគមន៍និគម ឡេយៀម" ស្នើដំណោះស្រាយជាក់ស្តែងជាច្រើនដូចជា៖ ការកសាងគំរូគ្រប់គ្រងទេសចរណ៍សហគមន៍ ការវិនិយោគលើហេដ្ឋារចនាសម្ព័ន្ធ - ទេសភាពបម្រើទេសចរណ៍ ការនាំយកវប្បធម៌ អេដេ និងមុខរបរប្រពៃណីចូលទៅក្នុងផលិតផលទេសចរណ៍ ការបណ្តុះបណ្តាលធនធានមនុស្សក្នុងស្រុក ការបង្កើនការផ្សព្វផ្សាយរូបភាព និងលើកកម្ពស់ពាណិជ្ជសញ្ញានិគម ឡេយៀម។ ដើមទុនវិនិយោគសរុបគ្រោងថានឹងទទួលបានប្រហែល ៣០ ពាន់លានដុង ដែលកៀរគរបានដោយការអំពាវនាវវិនិយោគ និងប្រភពដើមទុនស្របច្បាប់ផ្សេងៗ ទៀត។
បងស្រី ក្សរ ហើអៀន (នៅភូមិ ឡេយៀម ឃុំ សុងហ៊ិញ) ពោលថា ដោយមានការលើកទឹកចិត្តពីអាជ្ញាធរមូលដ្ឋាន បងស្រីសាងសង់បានផ្ទះថ្មីមួយខ្នងតាមស្ថាបត្យកម្មប្រពៃណីរបស់ជនជាតិ អេដេ។ ផ្ទះរបស់បងស្រីធានាទាំងការប្រជុំជីវភាពគ្រួសារផង និងជាកន្លែងស្នាក់នៅសម្រាប់បម្រើភ្ញៀវទេសចរផង។ បងស្រីក៏បានចូលរួមក្នុងថ្នាក់បណ្តុះបណ្តាលដើម្បីបង្កើនផ្នែកជំនាញធ្វើទេសចរណ៍សហគមន៍ រួមចំណែកដល់ការអភិវឌ្ឍសេដ្ឋកិច្ច - សង្គមនៅមូលដ្ឋាន។ ផ្នត់គំនិត លក្ខណៈវប្បធម៌ដ៏យូរលង់មកហើយក៏ត្រូវបានបងស្រីនិងក្រុមគ្រួសារជាច្រើននៅក្នុងនិគមខំថែរក្សាដើម្បីផ្សព្វផ្សាយជូនភ្ញៀវទេសចរក្នុង និងក្រៅខេត្ត។
យោងតាមលោក ង្វៀន ជីហៀន ប្រធានគណៈកម្មាធិការប្រជាជនឃុំ សុងហ៊ិញ មានប្រសាសន៍ថា បច្ចុប្បន្នក្នុងមូលដ្ឋានមានក្រុមជនជាតិភាគតិចចំនួន ២០ ក្រុមរស់នៅជាមួយគ្នាទើបមានលក្ខណៈវប្បធម៌ល្អឯកជាច្រើន វិសេសវិសាល។ នាពេលខាងមុខ ឃុំនឹងផ្តោតលើការជំរុញសកម្មភាពឃោសនា អប់រំ រួមចំណែកបង្កើនការយល់ដឹងអំពីតួនាទី សារៈសំខាន់នៃការអភិរក្ស និងលើកតម្កើងអត្តសញ្ញាណវប្បធម៌ និងការទទួលខុសត្រូវនៃប្រព័ន្ធនយោបាយទាំងមូលសម្រាប់កិច្ចការអភិរក្ស លើកតម្កើងតម្លៃវប្បធម៌បណ្តាជនជាតិភាគតិច។
មូលដ្ឋានកៀរគរធនធានវិនិយោគហេដ្ឋារចនាសម្ពន្ធ និងបង្កើតកម្មវិធី សកម្មភាពនានាស្របតាមគម្រោងនិគមវប្បធម៌ ទេសចរណ៍ ឡេយៀម ផ្សារភ្ជាប់ជាមួយនឹងការផ្តល់អាទិភាពការស្តារឡើងវិញនូវលម្ហភូមិនិគមប្រពៃណី លម្ហព្រៃឈើ និងលម្ហកំពង់ទឹក បង្កើតជាលម្ហវប្បធម៌ល្អផូរផង់ និងអភិវឌ្ឍន៍ ជាពិសេសបេតិកភណ្ឌ "លម្ហវប្បធម៌គងឃ្មោះ"៕
អត្ថបទ និងរូបថត៖ តឿងគ្វឹន
ប្រែសម្រួល៖ អៀងថាន់
