ខេត្តដាក់គោលដៅដល់ឆ្នាំ ២០៣០ សម្រេច ១០០% សិស្សដែលជាកូនក្មួយបងប្អូនជនជាតិបានទៅសាលារៀនកម្រិតបឋមសិក្សា និងអនុវិទ្យាល័យ ១០០% ប្អូនៗកុមារជនជាតិនៅក្នុងគ្រឹះស្ថានអប់រំមត្តេយ្យសិក្សាបានបង្កើនការបង្ហាត់បង្រៀនភាសា វៀតណាម មុនពេលចូលរៀនថ្នាក់ទីមួយ។ អត្រាសិស្សជនជាតិចូលរៀននៅវិទ្យាល័យអន្តេវាសិកជនជាតិកើនឡើងជាង ១២% បើប្រៀបធៀបជាមួយនឹងចំនួនសរុបសិស្សជនជាតិនៅក្នុងវ័យសិក្សា។
ទន្ទឹមនឹងនោះ ១០០% គ្រឹះស្ថានអប់រំចំណេះទូទៅក្នុងតំបន់បងប្អូនជនជាតិរៀបចំសកម្មភាពស្វែងយល់អំពីវប្បធម៌បងប្អូនជនជាតិជូនប្អូនៗ សិស្សសាលា បំពេញតម្រូវការរៀនភាសាជនជាតិ ក្នុងនោះមានភាសា ខ្មែរ តាមការកំណត់របស់ក្រសួងអប់រំ និងបណ្តុះបណ្តាល។ ខេត្តក៏បានដាក់គោលដៅសម្រេច ៩៨% បងប្អូនជនជាតិដែលមានអាយុចាប់ពី ១៥ ទៅ ៦០ ឆ្នាំចេះអក្សរ បន្តរក្សាមជ្ឈមណ្ឌលអប់រំអចិន្រ្តៃយ៍បំពេញភារកិច្ចបំប៉នភាសាជនជាតិជូនកម្មាភិបាល ភ្នាក់ងាររដ្ឋការ បុគ្គលិករដ្ឋការស៊ីវិលនិងពលករ។
អំពីកងជួរគ្រូបង្រៀន ខេត្តប្រឹងប្រែងសម្រេច ១០០% គ្រឹះស្ថានអប់រំចំណេះទូទៅមានសិស្សចុះឈ្មោះចូលរៀនភាសាជនជាតិធានាមានគ្រូបង្រៀនគ្រប់គ្រាន់តាមការកំណត់ ១០០% កម្មាភិបាលជាអ្នកគ្រប់គ្រង គ្រូបង្រៀន បុគ្គលិកធ្វើបេសកកម្មនៅតំបន់បងប្អូនជនជាតិបានបណ្តុះបណ្តាលភាសាជនជាតិ និងធ្វើបច្ចុប្បន្នភាពចំណេះដឹងអំពីវប្បធម៌ជនជាតិ។
ស្របពេលនោះ សាលារៀន ថ្នាក់រៀនទាំងអស់នៅក្នុងគ្រឹះស្ថានអប់រំចំណេះទូទៅក្នុងតំបន់បងប្អូនជនជាតិនឹងត្រូវបានពង្រឹងឲ្យរឹងមាំបន្ថែមទៀត។ អត្រាសាលារៀនស្របតាមស្តង់ដារជាតិស្មើនឹងអត្រារួមរបស់ខេត្ត ហើយត្រូវបានរៀបចំសៀវភៅសិក្សាគោល និងឧបករណ៍បង្ហាត់បង្រៀនមុខវិជ្ជាភាសា ខ្មែរ ស្របតាមកម្មវិធីអប់រំចំណេះទូទៅឆ្នាំ ២០១៨។
យោងតាមអនុប្រធានគណៈកម្មាធិការប្រជាជនខេត្ត វិញឡុង លោកស្រី ង្វៀន ធីបែមឿយ ដល់ឆ្នាំ ២០៣០ វិស័យអប់រំជនជាតិនៅក្នុងភូមិសាស្រ្តខេត្តនឹងត្រូវបានកែទម្រង់ជាមូលដ្ឋានឆ្ពោះទៅរកបមាណីយកម្ម ទំនើបកម្ម។ ទន្ទឹមនឹងនោះ រក្សា និងលើកស្ទួយអត្តសញ្ញាណវប្បធម៌បណ្តាជនជាតិ។ ខេត្តធានាថា ប្រជាជនទទួលបានការអប់រំមានគុណភាព ដើម្បីលើកកម្ពស់បញ្ញារបស់ប្រជាជន អភិវឌ្ឍធនធានមនុស្សបំពេញតម្រូវការអភិវឌ្ឍន៍ក្នុងដំណាក់កាលថ្មី ពាំនាំគុណភាពវិស័យអប់រំបណ្តុះបណ្តាលជនជាតិឱ្យកាន់តែខិតជិតនឹងផៃរាបរួមនៃវិស័យអប់រំទូទៅ។
ដើម្បីសម្រេចគោលដៅ ខេត្តនឹងពិនិត្យតាមដាន រៀបចំបណ្តាញគ្រឹះស្ថានអប់រំក្នុងតំបន់បងប្អូនជនជាតិស្របតាមដំណើរការសមស្រប ផ្តោតលើការពង្រឹង និងអភិវឌ្ឍប្រព័ន្ធវិទ្យាល័យអន្តេវាសិកជនជាតិ និងសាលារៀនមានបង្ហាត់បង្រៀនភាសាជនជាតិ។ ស្របពេលនោះ ខេត្តបង្កើនពង្រឹងការបណ្តុះបណ្តាលភាសា និងវប្បធម៌ជនជាតិជូនកងជួរកម្មាភិបាលគ្រប់គ្រង គ្រូបង្រៀន ដើម្បីបង្កើនប្រសិទ្ធភាពបង្ហាត់បង្រៀន និងផ្សារភ្ជាប់ចំណងមិត្តភាពជិតស្និទ្ធជាមួយអាណាព្យាបាលសិស្ស។
ខេត្តក៏កំពុងជំរុញការអប់រំបណ្តុះបណ្តាលវិជ្ជាជីវៈ បែងចែកសិស្សផ្សារភ្ជាប់ជាមួយនឹងតម្រូវការទីផ្សារជាក់ស្តែង ទាក់ទាញការចូលរួមពីគ្រឹះស្ថានបណ្តុះបណ្តាលវិជ្ជាជីវៈ និងសហគ្រាសក្នុងការកសាងកម្មវិធី ឯកសារ និងការវាយតម្លៃលទ្ធផលអប់រំបណ្តុះបណ្តាលវិជ្ជាជីវៈនៅតាមវិទ្យាល័យ និងមជ្ឈមណ្ឌលអប់រំអចិន្រ្តៃយ៍។
ក្រៅពីនេះ ខេត្ត វិញឡុង នឹងផ្តល់អាទិភាពដល់ការកៀរគរធនធានពីកម្មវិធីគោលដៅជាតិស្តីអំពីការកសាងជនបទថ្មី កាត់បន្ថយភាពក្រីក្រប្រកបដោយចីរភាព អភិវឌ្ឍសេដ្ឋកិច្ច - សង្គមនៅតំបន់បងប្អូនជនជាតិនិងតំបន់ភ្នំក្នុងដំណាក់កាលឆ្នាំ ២០២៦ - ២០៣៥ រួមជាមួយនឹងគម្រោងវិនិយោគសាធារណៈ ដើម្បីពង្រឹងហេដ្ឋារចនាសម្ព័ន្ធ សិក្ខូបករណ៍ ជាពិសេសគឺការអភិវឌ្ឍប្រព័ន្ធវិទ្យាល័យអន្តេវាសិកជនជាតិ។
ខេត្តកំណត់ការប្រើប្រាស់ប្រកបដោយប្រសិទ្ធភាពនៃធនធានមនុស្សនៅក្នុងស្រុក ជាពិសេសធនធានពីសហគមន៍បងប្អូនជនជាតិ ជាដំណាក់កាលផ្លោះរំលងមួយសម្រាប់ការអភិវឌ្ឍយ៉ាងលឿន និងប្រកបដោយចីរភាពក្នុងរយៈពេលខាងមុខ៕
អត្ថបទ៖ ផាម មិញទន់
ប្រែសម្រួល៖ អៀងថាន់
