បច្ចុប្បន្ន ទីក្រុង កឹនធើ ជាកន្លែងរស់នៅរបស់ជាច្រើនបងប្អូនជនជាតិភាគតិច ក្នុងនោះជនជាតិ ខ្មែរ ជាង ៥៤៣.០០០ នាក់ ជាង ១៤% នៃចំនួនប្រជាជនក្នុងទីក្រុង។ ភាគច្រើន បងប្អូនជនជាតិ ខ្មែរ នៅទីនេះកាន់ព្រះពុទ្ធសាសនា ដោយមានវត្ត ខ្មែរ ចំនួន ១២០ នៅក្នុងភូមិសាស្រ្ត។
យោងតាមព្រះឧបជ្ឈាយ៍ ដាវញឺ ប្រធានគណៈអភិបាលនៃសមាគមព្រះពុទ្ធសាសនា វៀតណាម ទីក្រុង កឹនធើ ដោយមានប្រពៃណីដ៏យូរលង់មកហើយ ពុទ្ធបរិស័ទ ខ្មែរ តែងតែអាទិភាពក្នុងការសាងសង់វត្តអារាមនៅកណ្តាលភូមិស្រុក។ វត្តត្រូវបានចាត់ទុកជាមជ្ឈមណ្ឌលប្រជុំជីវភាពសហគមន៍គ្រប់ជ្រុងជ្រោយ ជាកន្លែងសម្រាប់ធ្វើពិធីកិច្ចសាសនា ពិធីបុណ្យតាមទំនៀមទម្លាប់ផង ហើយក៏ជាកន្លែងថែរក្សាភាសានិយាយ អក្សរសរសេរ និងទំនៀមទម្លាប់ដ៏ល្អផូរផង់របស់បងប្អូនជនជាតិ ខ្មែរ ថែមទៀតផង។
ក្នុងចង្វាក់ជីវិតរស់នៅនៃដំណើរការនគរូបនីយកម្ម វត្តពុទ្ធសាសនាទក្ខិណនិកាយ ខ្មែរ នៅតែរក្សាតួនាទីជា "តម្រុយវប្បធម៌" ថែរក្សាលក្ខណៈដើមនៃស្ថាបត្យកម្មវិចិត្រសិល្បៈដ៏ល្អឯក ព្រមទាំងជាកន្លែងប្រជុំសកម្មភាពពិធីបុណ្យប្រពៃណីដូចជា៖ បុណ្យចូលឆ្នាំថ្មី បុណ្យសែនដូនតា និងបុណ្យអកអំបុកតាមផ្នត់រស់នៅថ្មី ដិតដោយអត្តសញ្ញាណជាតិផងដែរ។
វាយតម្លៃអំពីតម្លៃផ្សារភ្ជាប់របស់សកម្មភាពទាំងនេះ សមាគមសាមគ្គីព្រះសង្ឃស្នេហាជាតិទីក្រុង កឹនធើ បានឲ្យដឹងថា តាមរយៈសកម្មភាពវប្បធម៌ទាំងនេះ វត្តនីមួយៗ បន្តបញ្ជាក់ជំហររបស់ខ្លួនយ៉ាងរឹងមាំជាមជ្ឈមណ្ឌលប្រជុំជីវភាពសាសនា វប្បធម៌ ព្រមទាំងជាលម្ហពិសិដ្ឋផ្សារភ្ជាប់សហគមន៍សំដៅថែរក្សា និងលើកស្ទួយអត្តសញ្ញាណជាតិ។ សំខាន់ជាងនេះទៅទៀត ក្រៅពីរៀបចំពិធីបុណ្យសំខាន់ៗ វត្តនៅមានបើកថ្នាក់បង្រៀនអក្សរ ខ្មែរ ជាប្រចាំ និងរៀបចំសកម្មភាពអប់រំយុវជនជំនាន់ក្រោយអំពីសីលធម៌ និងរបៀបរស់នៅ។ ការសាយភាយលម្ហវប្បធម៌ទាំងនេះបានរួមចំណែកដោយស្ងៀមស្ងាត់ក្នុងការកសាងផ្នត់រស់នៅថ្មីនៅក្នុងគ្រួសារនីមួយៗ ពង្រឹងទំនាក់ទំនងភូមិផងរបងជាមួយ និងលើកទឹកចិត្តឱ្យបងប្អូនជនជាតិចេះជួយគ្នាទៅវិញទៅមក។
សមាគមក៏ស្នើព្រះចៅអធិការគ្រប់ព្រះអង្គជាមួយគណៈកម្មការវត្ត ខ្មែរ ធានាតួនាទីជាអ្នកត្រួសត្រាយផ្លូវក្នុងការលើកទឹកចិត្តព្រះសង្ឃ មាមីងបងប្អូនពុទ្ធបរិស័ទ ឆ្លងតាមរយៈនោះ ដាស់ប្រពៃណីសាមគ្គីភាព លើកទឹកចិត្តស្វាហាប់ប្រលងប្រណាំងក្នុងការងារផលិតកម្ម កែលម្អជីវភាពរស់នៅ និងរួមដៃគ្នាកសាងរបៀបរបបរស់នៅវប្បធម៌គាប់ប្រសើរនៅតាមទីប្រជុំជន។
ចែករំលែកអំពីតថភាពសកម្មភាពនៅមន្ទីរ លោក ឌៀនវ៉ូន សមាជិកគណៈកម្មការវត្តជ្រោយទឹមចាស់ (សង្កាត់ មីស្វៀន) មានប្រសាសន៍ថា គណៈកម្មការវត្តដើរតួនាទីស្នូលក្នុងការផ្សព្វផ្សាយគោលនយោបាយ សាមគ្គីប្រជាជាតិ ថែរក្សាអត្តសញ្ញាណវប្បធម៌ និងកសាងជនបទថ្មី។ ព្រះចៅអធិការនិងសមាជិកនៃគណៈកម្មការវត្តច្រើនតែជាអ្នកមានប្រជាប្រិយភាពយ៉ាងខ្លាំង មានចំណេះដឹង និងស្ទាត់ជំនាញភាសាជនជាតិ យល់ដឹងពីទំនៀមទម្លាប់ និងប្រពៃណីដែលជាលក្ខណៈងាយស្រួលសម្រាប់ការសន្ទនា ការឃោសនា និងការចលនា ជួយមាមីងបងប្អូនលុបបំបាត់ទំនៀមទម្លាប់ហួសសម័យ អនុវត្តគោលនយោបាយរបស់បក្ស និងរដ្ឋប្រកបដោយប្រសិទ្ធភាព។
ងាកមើលការរួមដំណើរនៃព្រះពុទ្ធសាសនា ខ្មែរ ជាមួយនឹងការអភិវឌ្ឍរបស់ទីក្រុង លោកស្រី ទ្រីវ ធីង៉ុកយៀម អនុប្រធានគណៈកម្មាធិការរណសិរ្សមាតុភូមិ វៀតណាម ទីក្រុង កឹនធើ បញ្ជាក់ថា ព្រះពុទ្ធសាសនា ខ្មែរ ទីក្រុង កឹនធើ គឺជាផ្នែកមួយមិនអាចកាត់ផ្តាច់បាននៃធ្លុងមហាសាមគ្គីប្រជាជាតិទាំងមូល តែងតែរួមចំណែកយ៉ាងសំខាន់ និងជាស្ពានមេត្រីយ៉ាងរឹងមាំរវាងបក្ស អាជ្ញាធរ និងបងប្អូនជនជាតិ ខ្មែរ៕
អត្ថបទ៖ ទ្រុងកៀន
ប្រែសម្រួល៖ អៀងថាន់
