ដោយមានមានប្រជាប្រិយភាព ស្មារតីទទួលខុសត្រូវ អាកប្បកិរិយាគំរូ និងការយល់ដឹងអំពីទំនៀមទម្លាប់ ប្រពៃណី ពួកគាត់បានក្លាយជាស្ពានមេត្រីសំខាន់រវាងគណៈកម្មាធិការបក្ស អាជ្ញាធរមូលដ្ឋានជាមួយនឹងប្រជាជន រួមចំណែកនាំយកគោលការណ៍របស់បក្ស គោលនយោបាយ ច្បាប់របស់រដ្ឋចូលទៅក្នុងការរស់នៅ បង្កើតការផ្លាស់ប្តូរយ៉ាងវិជ្ជមាននៅក្នុងតំបន់បងប្អូនជនជាតិ។
ព្យាយាមជាមួយនឹងសហគមន៍
ក្នុងភូមិស្រុករបស់បងប្អូនជនជាតិ ខ្មែរ នៅខេត្ត វិញឡុង អ្នកមានប្រជាប្រិយភាពមិនត្រឹមតែជាបង្អែកស្មារតីប៉ុននោះទេ ថែមទាំងចូលរួមដោយផ្ទាល់ក្នុងការងារចលនាប្រជាជនឱ្យអភិវឌ្ឍសេដ្ឋកិច្ច កាត់បន្ថយភាពក្រីក្រ កសាងតំបន់ជនបទថ្មី កែលម្អជីវភាពវប្បធម៌ និងរក្សាសន្តិសុខ សណ្តាប់ធ្នាប់នៅមូលដ្ឋានទៀតផង។ ដោយមានការអំណត់ព្យាយាម និងការទទួលខុសត្រូវ ពួកគាត់កំពុងតែរួមចំណែកបន្តិចម្តងៗក្នុងការផ្លាស់ប្តូរមុខមាត់ជនបទតំបន់បងប្អូនជនជាតិ។
លោក ថាច់អួង (កើតឆ្នាំ ១៩៦៤ រស់នៅក្នុងភូមិចើ ឃុំប៊ិញភូ) គឺជាអ្នកមានប្រជាប្រិយភាពគំរូមួយរូបក្នុងតំបន់បងប្អូនជនជាតិ ខ្មែរ នៅ វិញឡុង។ អស់រយៈពេលជាច្រើនឆ្នាំកន្លង ក្នុងនាមជាសមាជិកគណៈកម្មាធិការរណសិរ្ស ប្រធានសាខាកាកបាទក្រហមភូមិ និងចូលរួមយ៉ាងសកម្មក្នុងកិច្ចការថែទាំមនុស្សមានវ័យចាស់ លោកតែងតែជាគំរូឈានមុខគេក្នុងរាល់ចលនានៅមូលដ្ឋាន។
បច្ចុប្បន្ន ភូមិចើ មានប្រជាជនជាង ៥៦៤ ក្រុមគ្រួសារ ក្នុងនោះបងប្អូនជនជាតិ ខ្មែរ ជាង ៤២%។ ដោយមានស្មារតីទទួលខុសត្រូវ លោក ថាច់អួង តែងតែចលនាសប្បុរសជនឧបត្ថម្ភអំណោយចែកជូនក្រុមគ្រួសារក្រីក្រ ក្រុមគ្រួសារជិតបន្ទាត់ភាពក្រីក្រ និងក្រុមគ្រួសារដែលមានជីវភាពខ្វះខាតក្នុងឱកាសបុណ្យចូលឆ្នាំថ្មី។ ទន្ទឹមនោះ លោកក៏បានទំនាក់ទំនងជួយក្នុងការសាងសង់ផ្ទះមហាសាមគ្គីចំនួន ២ ខ្នងសម្រាប់ចែកជូនគ្រួសារដែលស្ថិតក្នុងស្ថានភាពលំបាកលំបិនខ្លាំង រួមចំណែកធ្វើឲ្យសាយភាយស្មារតីទំនុកបម្រុងគ្នាទៅវិញទៅមកនៅក្នុងសហគមន៍។
ប្រការលេចធ្លោបំផុតមួយរបស់លោកគឺរួមជាមួយអាជ្ញាធរមូលដ្ឋានចលនា ៣៤ ក្រុមគ្រួសារឱ្យបរិច្ចាគដីជាង ៣.០០០ ម៉ែត្រការ៉េដោយស្ម័គ្រចិត្តសម្រាប់សាងសង់ខ្សែផ្លូវជនបទចំនួន ៣ ខ្សែដែលមានប្រវែងសរុបជាង ១,៥ គីឡូម៉ែត្រ។ ដំបូងឡើយ ក្រុមគ្រួសារជាច្រើននៅព្រួយបារម្ភដោយសារតែផលប៉ះពាល់លើដីរបស់គ្រួសារ។ ដោយមានភាពស្មោះត្រង់ និងប្រជាប្រិយភាព លោក ថាច់អួង បានទៅដល់ផ្ទះនីមួយៗម្តងហើយម្តងទៀតដើម្បីចលនា ពន្យល់អំពីផលប្រយោជន៍ក្នុងរយៈពេលវែងនៃការបើកផ្លូវ ក៏ដូចជាសម្រួលដល់ការផ្លាស់ប្តូរពាណិជ្ជកម្ម បង្កើនតម្លៃដីធ្លី កែលម្អលក្ខខណ្ឌប្រជុំជីវភាព និងជួយប្អូនៗសិស្សធ្វើដំណើរទៅមកកាន់តែសុវត្ថិភាពជាង។
មិនត្រឹមតែសកម្មក្នុងការងារសង្គមប៉ុននោះតេ ចាប់ពីឆ្នាំ ១៩៨៦ រហូតមកដល់បច្ចុប្បន្ន លោក ថាច់អួង នៅខ្មីឃ្មាតបន្តរក្សាថ្នាក់បង្ហាត់បង្រៀនអក្សរ ខ្មែរ ដោយឥតគិតថ្លៃសម្រាប់កុមារនៅក្នុងតំបន់ រួមចំណែកអភិរក្សភាសានិយាយ អក្សរសរសេរ និងអត្តសញ្ញាណវប្បធម៌របស់បងប្អូនជនជាតិ ខ្មែរ ថែមទៀតផង។
ប្អូន ថាច់ ង៉ុកត្រឹម សិស្សថ្នាក់ទី ៧ អនុវិទ្យាល័យ ភឿងថាញ់ បានចែករំលែកថា អស់រយៈពេលជាច្រើនឆ្នាំមកហើយ ឲ្យតែដល់រដូវវិស្សមកាលម្តងៗ នាងតែងតែចូលរួមក្នុងថ្នាក់រៀនអក្សរ ខ្មែរ ដោយឥតគិតថ្លៃដែលលោកគ្រូ ថាច់អួង បង្ហាត់បង្រៀនដោយផ្ទាល់នៅក្នុងមូលដ្ឋាន។ លោកមិនត្រឹមតែណែនាំនាងអស់ពីចិត្តពីថ្លើមក្នុងការហាត់សរសេរអក្សរ ការអាន និងចំណេះដឹងអំពីភាសាកំណើតប៉ុននោះទេ លោកក៏បានជួយប្អូនៗហ្វឹកហាត់ពិនិត្យឡើងវិញជាប្រចាំនូវចំណេះដឹងអំពីវប្បធម៌ ខ្មែរ បន្ថែមទៀត ហើយក៏ពន្យល់មេរៀនកន្លែងណាមិនទាន់យល់ ក៏ដូចជាក្នុងការរស់នៅប្រចាំថ្ងៃផងដែរ។
អាស្រ័យដោយមានការណែនាំយ៉ាងជិតស្និទ្ធ និងអត់ធ្មត់របស់លោកគ្រូ ថាច់អួង នាងមិនត្រឹមតែចេះអាន ចេះសរសេរអក្សរ ខ្មែរ កាន់តែល្អប៉ុននោះទេ ថែមទាំងជួយឲ្យនាងកាន់តែយល់ដឹង និងស្រឡាញ់ភាសានិយាយ អក្សរសរសេរ ទំនៀមទម្លាប់ និងអត្តសញ្ញាណវប្បធម៌របស់ជាតិខ្លួនទៀតផង។ លោកតែងតែលើកទឹកចិត្តនាងឱ្យខិតខំរៀនអក្សរ ខ្មែរ ដើម្បីជួយថែរក្សាប្រពៃណី។ អាស្រ័យដោយមានលោកគ្រូ ថាច់អួង នាងកាន់តែមានមោទនភាពចំពោះវប្បធម៌ ខ្មែរ របស់ខ្លួនរឹតតែខ្លាំង។
ថ្នាក់រៀនសាមញ្ញ តែយូរអង្វែងជាច្រើនឆ្នាំមកហើយរបស់លោក ថាច់អួង មិនត្រឹមតែបានរួមចំណែកថែរក្សាភាសានិយាយ និងអក្សរ ខ្មែរ សម្រាប់យុវជនជំនាន់ក្រោយប៉ុននោះទេ ថែមទាំងជួយពូនជ្រំសតិសម្បជញ្ញៈថែរក្សាអត្តសញ្ញាណវប្បធម៌ប្រពៃណី ផ្តល់កម្លាំងចិត្តសម្រាប់ប្អូនៗតំបន់ជនជាតិកាន់តែជឿជាក់លើខ្លួនឯងឈោងឈានឡើងក្នុងការសិក្សា និងការរស់នៅ។
យោងតាមលោក ថាច់រៀង ប្រធានគណៈកម្មាធិការប្រជាជនភូមិចើ ដោយសារតែមានការរួមដំណើរយ៉ាងសកម្មពីមនុស្សម្នាដូចជាលោក ថាច់អួង ការរស់នៅក្នុងមូលដ្ឋានមានការផ្លាស់ប្តូរជាច្រើនយ៉ាងច្បាស់ក្រឡែត។ បើប្រហែល ១៥ ឆ្នាំមុន អត្រាក្រុមគ្រួសារក្រីក្រនៅក្នុងភូមិមានជាង ៥០% ឥឡូវនេះនៅតែ ២ ក្រុមគ្រួសារប៉ុននោះដែលស្ថិតក្នុងក្របខណ្ឌទទួលការគាំពារសង្គម ប្រាក់ចំណូលជាមធ្យមក្នុងមនុស្សម្នាក់កើនឡើងទ្វេដង សម្រេច ៨២ លានដុងមនុស្សម្នាក់ក្នុងមួយឆ្នាំ។
នៅភូមិ ង្វៀតឡាងសេ ឃុំ ប៊ិញភូ លោក គីមថាញ់ (កើតឆ្នាំ ១៩៦២) ប្រធានគណៈកម្មាធិការកិច្ចការរណសិរ្សភូមិគឺជាគំរូមួយក្នុងចំណោមគំរូតួយ៉ាងក្នុងការងារប្រជាចលនាក្នុងតំបន់បងប្អូនជនជាតិ ខ្មែរ។ ដោយមានភាពជិតដិត ការទទួលខុសត្រូវ និងប្រជាប្រិយភាពនៅក្នុងសហគមន៍ លោកចូលរួមឃោសនា ចលនាប្រជាជនឱ្យចូលរួមក្នុងការកសាងជនបទថ្មី បរិច្ចាគដីសម្រាប់ធ្វើផ្លូវ សាងសង់ប្រព័ន្ធបង្ហូរទឹក និងកែឱ្យល្អប្រសើរឡើងសោភណភាពបរិស្ថាន។
ពង្រីកតួនាទីរបស់ខ្លួន លោក គីមថាញ់ រួមជាមួយអាជ្ញាធរមូលដ្ឋានបានចលនាជាង ៨០ ក្រុមគ្រួសារឱ្យបរិច្ចាគដីប្រហែល ៣.៥០០ ម៉ែត្រការ៉េដោយស្ម័គ្រចិត្ត ដើម្បីសាងសង់ផ្លូវជនបទចំនួន ៣ ខ្សែដែលមានប្រវែងសរុបជិត ៣,៥ គីឡូម៉ែត្រ។ លើសពីនេះ លោកតែងតែចូលរួមសម្របសម្រួលរាល់ជម្លោះក្នុងសហគមន៍ រួមចំណែកពង្រឹងសាមគ្គីជាធ្លុងមួយនៅក្នុងទីប្រជុំជន និងរក្សាសន្តិសុខ សណ្តាប់ធ្នាប់នៅក្នុងមូលដ្ឋាន។
ចូលរួមកម្លាំងកសាងជនបទថ្មី
អាស្រ័យដោយពង្រីកតួនាទីរបស់កងជួរអ្នកមានប្រជាប្រិយភាពក្នុងសហគមន៍ ខ្មែរ ប្រកបដោយប្រសិទ្ធភាព មូលដ្ឋានជាច្រើននៅក្នុងភូមិសាស្រ្តខេត្តបានឯកភាពគ្នា កៀរគរធនធានសហគមន៍យ៉ាងប្រសិទ្ធភាពដើម្បីពន្លឿនវឌ្ឍនភាពនៃការសាងសង់ជនបទថ្មី ជាពិសេសក្នុងការអភិវឌ្ឍហេដ្ឋារចនាសម្ព័ន្ធគមនាគមន៍ កែលម្អទេសភាព និងកាត់បន្ថយភាពក្រីក្រប្រកបដោយចីរភាព។
លោក កៀនបាញ់ អនុប្រធានគណៈកម្មាធិការរណសិរ្សមាតុភូមិ វៀតណាម ខេត្ត វិញឡុង បានឲ្យដឹងថា បច្ចុប្បន្នខេត្តទាំងមូលមានអ្នកមានប្រជាប្រិយភាពចំនួន ៤៤៥ អង្គនិងរូបក្នុងចំណោមបងប្អូនជនជាតិ។ នេះគឺជាកងកម្លាំងចូលរួមចំណែកវិជ្ជមានជាច្រើនក្នុងការអភិវឌ្ឍសេដ្ឋកិច្ច - សង្គម ការកសាងជនបទថ្មី និងការពង្រឹងធ្លុងមហាសាមគ្គីប្រជាជាតិនៅក្នុងមូលដ្ឋាន។ រយៈពេលកន្លង គណៈកម្មាធិការបក្ស និងអាជ្ញាធរគ្រប់លំដាប់ថ្នាក់បានយកចិត្តទុកដាក់ថែទាំ និងលើកស្ទួយតួនាទីរបស់កងជួរអ្នកមានប្រជាប្រិយភាពក្នុងចំណោមបងប្អូនជនជាតិភាគតិចតាមរយៈគោលនយោបាយជាក់ស្តែងជាច្រើន។
ជារៀងរាល់ឆ្នាំ អាជ្ញាធរមូលដ្ឋានរៀបចំការទៅសួរសុខទុក្ខ ជូនអំណោយ និងលើកទឹកចិត្តអ្នកមានប្រជាប្រិយភាពក្នុងឱកាសបុណ្យទាន បុណ្យចូលឆ្នាំថ្មី ពេលឈឺថ្កាត់ ឧបត្ថម្ភការធានារ៉ាប់រងសុខភាព ចែកចាយកាសែត ផ្តល់ជូនព័ត៌មានសម្រាប់ឃោសនា បង្កើតលក្ខខណ្ឌទៅទស្សនកិច្ច សិក្សាបទពិសោធ។ ដោយឡែកក្នុងឆ្នាំ ២០២៥ តែមួយ ខេត្តបានបែងចែកថវិកាជាង ១,៥ ពាន់លានដុងសម្រាប់អនុវត្តគោលនយោបាយជូនអ្នកមានប្រជាប្រិយភាព។ បច្ចុប្បន្នមូលដ្ឋានកំពុងបង្កើតសេចក្តីសម្រេចចិត្តថ្មីដើម្បីបន្តឧបត្ថម្ភការការធានារ៉ាប់រងសុខភាព និងបន្ថែមថវិកាបម្រើការងារព័ត៌មាន ឃោសនាសម្រាប់កងកម្លាំងនេះ៕
អត្ថបទ និងរូបថត៖ ថាញ់ហ្វា
ប្រែសម្រួល៖ សិរីសួស្តី
