អញ្ជើញចូលរួមក្នុងពិធីនេះ មានតំណាងថ្នាក់ដឹកនាំ នគរបាលទីក្រុង កឹនធើ តំណាងបណ្ដាការិយាល័យវិជ្ជាជីវៈ អង្គភាពទាំងឡាយចំណុះនគរបាលទីក្រុង គណៈនាយកនៃសាលាមធ្យមសិក្សាបំពេញវិជ្ជាបាលី ណាមបូ លោកគ្រូអ្នកគ្រូ គ្រូឧទ្ទេសក៍រួមជាមួយសិក្ខាកាមទាំងអស់ជាកម្មាភិបាល យុទ្ធជនចូលរួមវគ្គសិក្សានេះ។
អញ្ជើញថ្លែងសុន្ទរកថានៅក្នុងពិធីបើកវគ្គសិក្សានេះ លោកគ្រូ ថាច់សុង - នាយកសាលាមធ្យមសិក្សាបំពេញវិជ្ជាបាលី ណាមបូ សង្កត់ធ្ងន់អត្ថន័យជាក់ស្តែងនៃវគ្គបំប៉នក្នុងការលើកកម្ពស់ចំណេះដឹងជនជាតិ បំណិនទំនាក់ទំនងនិងការយល់ដឹងវប្បធម៌ ខ្មែរ នៅតំបន់ ណាមបូ (ភូមិភាគខាងត្បូងប្រទេស វៀតណាម) សម្រាប់កងកម្លាំងកម្មាភិបាល យុទ្ធជននគរបាលដែលកំពុងបំពេញការងារនៅភូមិសាស្ត្រមានបងប្អូនជនជាតិ ខ្មែរ រស់នៅច្រើនកុះករ។ លោកគ្រូបន្តប្រសាសន៍ថា នេះមិនត្រឹមតែជាសកម្មភាពបណ្តុះបណ្តាលមុខជំនាញប៉ុននោះទេ ថែមទាំងរួមចំណែកពង្រឹងប្រសិទ្ធភាពការងារប្រជាចលនា កសាងទំនាក់ទំនងសាមគ្គីភាពយ៉ាងជិតស្និទ្ធរវាងកងកម្លាំងនគរបាលនិងប្រជាជនបន្ថែមទៀតផង។
ក្នុងសុន្ទរកថាបើកវគ្គ លោកគ្រូ ថាច់សុង បញ្ជាក់ថា៖ “ភាសាគឺជាស្ពានមេត្រីនៃការយល់ជ្រៅជ្រះ វប្បធម៌គឺជាមូលដ្ឋានគ្រឹះនៃការចែករំលែក”។ ការដែលកម្មាភិបាល យុទ្ធជនយល់បានភាសានិយាយ ប្រពៃណី ទំនៀមទម្លាប់និងជីវភាពវប្បធម៌របស់បងប្អូនជនជាតិ ខ្មែរ នឹងរួមចំណែកលើកកម្ពស់ប្រសិទ្ធភាពការងារឃោសនា ចលនាមហាជន ថែរក្សាសន្តិសុខសណ្តាប់ធ្នាប់និងពង្រឹងធ្លុងមហាសាមគ្គីប្រជាជាតិទាំងមូល។
យោងតាមផែនការ ថ្នាក់រៀននឹងអនុវត្តឯកទេសបទជាក់ស្តែងជាច្រើនដូចជា៖ ការងារជនជាតិ គោលការណ៍ គោលនយោបាយរបស់បក្សនិងរដ្ឋចំពោះតំបន់បងប្អូនជនជាតិភាគតិច បំណិនអនុវត្តការងារប្រជាចលនា ចំណេះដឹងការពារជាតិ - សន្តិសុខ ព្រមទាំងបណ្តុះបណ្តាលភាសា ខ្មែរ បម្រើតម្រូវការជាក់ស្តែងក្នុងការងារ។
ចំពោះកងជួរគ្រូបង្រៀនមានបទពិសោធច្រើន អស់ពីចិត្តពីថ្លើមជាមួយនឹងបរិស្ថានអប់រំដិតដាមដោយអត្តសញ្ញាណវប្បធម៌ ខ្មែរ - បាលី សាលាមធ្យមសិក្សាបំពេញវិជ្ជាបាលី ណាមបូ សន្យាថាបង្កើតរាល់ល័ក្ខខ័ណ្ឌអំណោយផលដើម្បីសិក្ខាកាមសិក្សារៀនសូត្រមានប្រសិទ្ធភាព ទទួលយកចំណេះដឹងយ៉ាងល្អនិងអនុវត្តពិតប្រាកដចូលក្នុងការងារជាក់ស្តែង។
ពិធីបើកវគ្គប្រព្រឹត្តទៅដោយជោគជ័យល្អប្រសើរ បង្ហាញពីការយកចិត្តទុកដាក់របស់ទីក្រុង កឹនធើ ចំពោះការងារបណ្តុះបណ្តាល បំប៉នចំណេះដឹងអំពីជនជាតិនិងលើកស្ទួយតម្លៃវប្បធម៌ប្រពៃណីក្នុងស្ថានភាពថ្មី ស្របពេលនោះដែររួមចំណែកកសាងរូបភាពយុទ្ធជននគរបាលប្រជាជនដែលជិតស្និទ្ធជាមួយនឹងប្រជាជន យល់ប្រជាជននិងដើម្បីបម្រើប្រជាជន៕
អត្ថបទ៖ យ៉ាញ់មេន
រូបថត៖ សឺន ច័ន្ទភៀវ
បញ្ចូលទិន្នន័យ៖ អៀងថាន់
