ឆ្នាំនេះ ពិធីបុណ្យកឋិនប្រព្រឹត្តទៅចាប់ពីថ្ងៃ ១ រោច ខែអស្សុជ រហូតដល់ថ្ងៃ ១៥ កើត ខែកត្តិក តាមប្រតិទិនចន្ទគតិ ខ្មែរ ត្រូវនឹងថ្ងៃទី ៨ ខែតុលា ដល់ថ្ងៃទី ៥ ខែវិច្ឆិកា តាមប្រតិទិនសុរិយគតិ។ ក្នុងអំឡុងពេលនេះហៅថា កឋិនកាល មានតាំងពីព្រះពុទ្ធអង្គទ្រង់គង់នៅមានព្រះជន្មនៅឡើយ ហើយបន្តធ្វើរហូតមកដល់សព្វថ្ងៃនេះ។
ព្រះតេជគុណ ឡឹមហៀប ព្រះចៅអធិការវត្តបទុមរង្សីទំនប់ (ឃុំ អាននិញ ទីក្រុង កឹនធើ) និមន្តមានសង្ឃដីកាថា តាមទម្លាប់ជាទូទៅ ក្នុងឱកាសនេះ ពុទ្ធបរិស័ទ ខ្មែរ និងវត្តអារាម ក្នុងភូមិនីមួយៗ ព្រមព្រៀងគ្នាជាឯកឆន្ទកំណត់យកថ្ងៃជាក់លាក់ដើម្បីបង្កលក្ខខណ្ឌសម្រាប់ក្រុមគ្រួសារម្ចាស់កឋិនត្រៀមរៀបចំបរិក្ខារប្រគេនដល់ព្រះសង្ឃបន្ទាប់ពីចេញវស្សារួចហើយ។ ពិធីប្រគេនត្រៃចីវរកឋិនមានលក្ខណៈពិសេសដោយឡែកបើប្រៀបធៀបទៅនឹងពិធីប្រគេនត្រៃចីវរធម្មតា។ នៅក្នុងឆ្នាំ ពុទ្ធបរិស័ទអាចប្រគេនចីវរនៅពេលណាក៏បាន មិនមានកំណត់ឡើយ ហើយអាស្រ័យទៅតាមសទ្ធាទាំងស្រុង។ ព្រះសង្ឃក៏អាចទទួលត្រៃចីវរធម្មតានៅពេលណាក៏បាន។ រីឯចីវរកឋិនកាលមានកំណត់ត្រឹម ២៩ ថ្ងៃប៉ុណ្ណោះ។ ក្នុងអំឡុងពេលនេះ ព្រះសង្ឃមួយអង្គអាចទទួលបានចីវរកឋិនតែម្តងគត់នៅថ្ងៃប្រារពពិធីតែប៉ណ្ណោះ មិនអាចទទួលបន្ថែមនៅថ្ងៃនៅសល់នោះបានទៀតទេ។
វត្តនីមួយៗប្រារព្ធពិធីបុណ្យតែម្តងក្នុងមួយឆ្នាំ នៅថ្ងៃណាមួយក្នុងខែ។ ការប្រគេនចីវរត្រូវបានប្រព្រឹត្តិទៅចំពោះសង្ឃ មិនចំពោះភិក្ខុអង្គណាមួយឡើយ។ បន្ទាប់មក ចីវរត្រូវបានបែងចែកតាមវិន័យ។ ម្ចាស់កឋិនដាក់ចីវរនៅចំពោះជំនុំសង្ឃ ហើយវេប្រគេន។ ព្រះសង្ឃទទួលចីវរសមស្របប្រព្រឹត្តិទៅតាមវិន័យ។
ឱកាសនេះដែរ ពុទ្ធបរិស័ទក៏រៀបចំប្រារព្ធធ្វើបុណ្យផ្កា ដើម្បីរៃអង្គាសបច្ច័យសម្រាប់កសាង ជួសជុលឡើងវិញនូវកុដិ សាលាឆទាន ទីធ្លាវត្តផងដែរ។
គ្រូអាចារ្យ ជា ដាន វត្តទំនប់ ឃុំ អាននិញ ទីក្រុង កឹនធើ បានអោយដឹងថា “បើប្រៀបធៀបទៅនឹងឆ្នាំ ២០២៤ មានពុទ្ធបរិស័ទហែចំនួន ៨ អង្គកឋិន ឆ្នាំ ២០២៥ មានចំនួន ១០ អង្គកឋិនរៀបចំដង្ហែមកកាន់វត្តទំនប់។ ពុទ្ធបរិស័ទប្រគេនចីវរកឋិន និងទេយ្យទានសំខាន់ៗ ជាច្រើនចំពោះព្រះសង្ឃដោយសទ្ធាជ្រះថ្លាបន្ទាប់ពីចេញវស្សាបង្ហាញពីស្មារតីនៃការទំនុកបម្រុងដល់ព្រះរតនត្រៃ និងរក្សាប្រពៃណីល្អរបស់ពុទ្ធសាសនាទក្ខិណនិកាយ ខ្មែរ”។
ពិធីបុណ្យកឋិនទានប្រព្រឹត្តទៅរយៈពេល ២ ថ្ងៃ។ នៅថ្ងៃទី ១ ពុទ្ធបរិស័ទប្រារព្ធពិធីបុណ្យនៅផ្ទះ ហៅថា "ពិធីសូត្រមន្ត"។ ក្រុមគ្រួសារទទួលស្វាគមន៍សាច់ញាតិនៅក្នុងភូមិ និងភ្ញៀវកិត្តិយសអញ្ជើញមកពីទីជិតទីឆ្ងាយចូលរួមអនុមោទនាផលានិសង្ស។ ជាមួយនឹងពិធីកិច្ចប្រពៃណី ទស្សនីយភាពជាច្រើនរួមចំណែកនាំមកនូវភាពសម្បាយរីករាយ ការតភ្ជាប់សហគមន៍ និងការថែរក្សាអត្តសញ្ញាណវប្បធម៌របស់ជនជាតិ ខ្មែរ។
ក្នុងឱកាសនេះ ក្រុមគ្រួសារពុទ្ធបរិស័ទ និងអ្នកស្រុកអ្នកភូមិរួមគ្នាចូលជាកុសលតាមសទ្ធាជ្រះថ្លាម្នាក់ៗ។ បន្ទាប់មក និមន្តព្រះសង្ឃសម្តែងព្រះបរិតដើម្បីសុំសេចក្ដីសុខចម្រើន និងសុភមង្គលដល់សាមីបុណ្យ និងមាមីងបងប្អូន។
នៅថ្ងៃទី ២ នៃពិធីបុណ្យ មាមីងបងប្អូនរៀបចំក្បួនដង្ហែឆ្លងកាត់ភូមិនិគម ជាមួយនឹងតន្ត្រីអ៊ូអរ របាំឆៃយ៉ាំដ៏រស់រវើកទាក់ទាញមនុស្សម្នាចូលរួមសប្បាយរីករាយ។ នៅពេលក្បួនដង្ហែមកដល់វត្ត ពិធីបុណ្យកឋិនទានត្រូវបានប្រារព្ធឡើងយ៉ាងឱឡារិកនៅក្នុងអារាមដ្ឋានដោយមានពិធីកិច្ចសាសនាផ្សេងៗ ៖ នមស្ការព្រះរតនត្រ័យ ចម្រើនព្រះបរិត ទេសនា ប្រគេនទេយ្យទាននិងវិធីក្រាលគ្រងកឋិន។ បន្ទាប់ពីនោះ មានសកម្មភាពវប្បធម៌ និងល្បែងប្រជាប្រិយដូចជា យូកេ រាំវង់... អាចារ្យ ជា ដាន មានប្រសាសន៍។
លោកស្រី សឺន ធី ព្រាប ជាម្ចាស់អង្គកឋិននៅភូមិ សាឡាង ឃុំ អាននិញ ទីក្រុង កឹនធើ បានអោយដឹងថា “ឆ្នាំនេះ ក្រុមគ្រួសារខ្ញុំនិងកូន ចៅទាំងឡាយបានរៀបចំពិធីដង្ហែអង្គកឋិនទៅកាន់វត្តបទុមរង្សីទំនប់។ ខ្ញុំពិតជារីករាយណាស់ដែលបានរៀបចំទេយ្យទាន ត្រៃចីវរ និងទេយ្យវត្ថុសំខាន់ៗ មួយចំនួនក្នុងនោះមានបច្ច័យ ៤ ជាដើមដើម្បីប្រគេនព្រះសង្ឃ ដូចជា៖ ចីវរកឋិន បាត្រ សៀវភៅ ប៊ិក និងវត្ថុសម្រាប់ការសិក្សា និងប្រជុំជីវភាពប្រចាំថ្ងៃរបស់ព្រះសង្ឃជាច្រើនទៀត។ ក្នុងចំណោមវត្ថុទាំងនោះ ចីវរកឋិនគឺជាវត្ថុដែលមិនអាចខ្វះបាន ហើយមានអត្ថន័យដ៏ពិសិដ្ឋនៅក្នុងពិធីកឋិនទាន។
ក្រៅពីនេះ ក្រុមគ្រួសារក៏បានប្រគេនទេយ្យវត្ថុប្រើប្រាស់ទូទៅមួយចំនួនដូចជា តុ កៅអី គ្រែ មុង ភួយ... ដើម្បីបង្ហាញការគោរព រួមចំណែកក្នុងការតុបតែង និងទំនុកបម្រុងព្រះសង្ឃ និងវត្តអារាម។
ពិធីបុណ្យកឋិននៅឆ្នាំ ២០២៥ បានប្រព្រឹត្តទៅក្នុងបរិយាកាសដ៏ឱឡារិក និងរីករាយ ឆ្លុះបញ្ចាំងយ៉ាងជ្រាលជ្រៅអំពីជីវិតនិងជំនឿ វប្បធម៌ដ៏វិសេសវិសាលរបស់ជនជាតិ ខ្មែរ។ មិនត្រឹមតែជាលក្ខណៈប្រពៃណីនៃព្រះពុទ្ធសាសនាទក្ខិណនិកាយ ខ្មែរ ប៉ុណ្ណោះទេ ថែមទាំងជាឱកាសមួយដើម្បីផ្សារភ្ជាប់សហគមន៍ ពូនផ្ដុំជីវភាពរស់នៅខាងព្រលឹងវិញ្ញាណ នាំមកនូវការអភិវឌ្ឍប្រកបដោយចីរភាព និងអត្តសញ្ញាណជាតិដ៏វិសេសវិសាលផងដែរ៕
ផលិតដោយ៖ សឺន ហេង
