យោងតាមមន្ទីរអប់រំ និងបណ្តុះបណ្តាលខេត្ត យ៉ាឡាយ ក្នុងរយៈពេល ៩ ខែឆ្នាំ ២០២៦ មូលដ្ឋានអប់រំវិជ្ជាជីវៈបានជ្រើសរើសកូនសិស្សជនជាតិភាគតិចចំនួន ២.៧៤៥ នាក់ ក្នុងនោះមានចំនួន ១.៣៤៧ នាក់បានបញ្ចប់ការសិក្សា។ ដោយឡែក ការបណ្តុះបណ្តាលវិជ្ជាជីវៈសម្រាប់ពលករជនបទជាជនជាតិភាគតិចសម្រេចបានជាង ២.០០០ នាក់។
គួរឱ្យចាប់អារម្មណ៍ ក្នុងចំណោមជនជាតិភាគតិចចំនួន ១.៤១៨ នាក់រៀនវិជ្ជាជីវៈ មាន ៨៧១ នាក់បានបញ្ចប់ការសិក្សាកម្រិតមធ្យមសិក្សាបឋមភូមិ និង ៥៤៧ នាក់បានបញ្ចប់ការសិក្សាមធ្យមសិក្សាទុតិយភូមិ ក្នុងនោះមាននារីចំនួន ៧៦០ នាក់។ កម្មវិធីបណ្តុះបណ្តាលត្រូវបានកែសម្រួលតាមទិសដៅបង្កើនការអនុវត្ត មានការចូលរួមពីសហគ្រាស ព្រមទាំងបន្ថែមជំនាញទន់ បំណិនឌីជីថល និងចំណេះដឹងផ្តើមអាជីព។
ក្នុងបណ្តាខែចុងឆ្នាំ ខេត្តផ្តល់អាទិភាពបណ្តុះបណ្តាលបណ្តាវិជ្ជាជីវៈដូចជា៖ បច្ចេកវិទ្យារថយន្ត អគ្គិសនីឧស្សាហកម្ម អេឡិចត្រូនិចឧស្សាហកម្ម បច្ចេកទេសម៉ាស៊ីនត្រជាក់ បច្ចេកវិទ្យាព័ត៌មាន គ្រប់គ្រងសណ្ឋាគារ ច្នៃម្ហូបអាហារ ចិញ្ចឹមសត្វ - ពេទ្យសត្វ ដាំដុះដំណាំ។ល។ ខេត្តក៏បានបង្កើនការភ្ជាប់ទំនាក់ទំនងរវាងមូលដ្ឋានអប់រំវិជ្ជាជីវៈជាមួយនឹងសហគ្រាសក្នុង វិស័យឧស្សាហកម្មកែច្នៃ ទេសចរណ៍ សេវាកម្ម កសិកម្មបច្ចេកវិទ្យាខ្ពស់ ឡូហ្ស៊ីស្ទិក និងថាមពលកកើតឡើងវិញ។ ការបណ្តុះបណ្តាលភ្ជាប់នឹងអាសយដ្ឋានប្រើប្រាស់ពលករ ត្រូវបានជំរុញឆ្លងតាមរយៈការសហការរវាងផ្នែកអប់រំ មហាផ្ទៃ កងពល ១៥ និងមូលដ្ឋានអប់រំវិជ្ជាជីវៈ។
ជាពិសេស ចាប់ពីថ្ងៃទី ៣០ ខែ កញ្ញា ឆ្នាំ ២០២៦ ដល់ថ្ងៃទី ១០ ខែ មករា ឆ្នាំ ២០២៧ ខេត្តអនុវត្តយុទ្ធនាការ ១០០ ថ្ងៃយប់បណ្តុះបណ្តាលវិជ្ជាជីវៈផ្សារភ្ជាប់នឹងការដោះស្រាយការងារធ្វើ និងផ្គត់ផ្គង់ពលករ ប្រឹងប្រែងបណ្តុះបណ្តាលយ៉ាងហោចណាស់ ៣.៣៦៧ នាក់ ផ្គត់ផ្គង់ពលករ ១.៨៦៤ នាក់សម្រាប់សហគ្រាស និងឧបត្ថម្ភជាង ៤.១០០ នាក់ក្រោយពេលបណ្តុះបណ្តាលឱ្យបង្កើតការងារធ្វើដោយខ្លួនឯង អភិវឌ្ឍមុខរបរចិញ្ចឹមជីវិត។
យោងតាមផែនការលេខ 379/KH-UBND យុទ្ធនាការផ្តោតសំខាន់នៅតាមបណ្តាឃុំ សង្កាត់ដែលមានគម្រោងវិនិយោគ តំបន់ឧស្សាហកម្ម តំបន់សេដ្ឋកិច្ច បណ្តុំឧស្សាហកម្ម និងបណ្តាភូមិសាស្ត្រដែលបានប្រគល់សន្ទស្សន៍បណ្តុះបណ្តាលវិជ្ជាជីវៈជូនពលករជនបទ។
ខេត្តប្រឹងប្រែងសម្រេចវគ្គបណ្តុះបណ្តាលវិជ្ជាជីវៈជូនពលករជនបទចំនួន ៦.០២០ នាក់ក្នុងឆ្នាំ ២០២៦ និងរៀបចំយ៉ាងហោចណាស់ ៣០ វគ្គប្រជុំសម្របសម្រួលការងារ។ ចំណុចថ្មីមួយនៃយុទ្ធនាការគឺការកសាងខ្សែចង្វាក់ទិន្នន័យឯកភាពចាប់ពីថ្នាក់ឃុំរហូតដល់ថ្នាក់ខេត្ត។ ពលករម្នាក់ៗ ត្រូវបានភ្ជាប់លេខកូដតាមដាន ធ្វើបច្ចុប្បន្នភាពចាប់ពីតម្រូវការរៀនវិជ្ជាជីវៈ វគ្គបណ្តុះបណ្តាល លទ្ធផលសិក្សារហូតដល់ស្ថានភាពការងារក្រោយពេលបណ្តុះបណ្តាល។ សហគ្រាសកំណត់ទីតាំងការងារ បរិមាណ និងតម្រូវការបំណិន មូលដ្ឋានអប់រំវិជ្ជាជីវៈផ្អែកលើតម្រូវការជាក់ស្តែងដើម្បីរៀបចំការបណ្តុះបណ្តាល។
បណ្តាវគ្គសិក្សាត្រូវបានបង្កើនរយៈពេលអនុវត្ត ផ្សារភ្ជាប់នឹងទីតាំងការងារជាក់លាក់ និងរៀបចំមានភាពបត់បែន រយៈពេលខ្លី ចល័តនៅតាមឃុំ សង្កាត់ ជាពិសេសចំពោះពលករជនបទ។ ចំពោះអ្នកជ្រើសរើសបង្កើតការងារធ្វើដោយខ្លួនឯង ខេត្តភ្ជាប់ប្រភពធនធានអំពីដើមទុន ដីធ្លី បរិក្ខារ សហករណ៍ និងទីផ្សារ ព្រមទាំងឧបត្ថម្ភការផ្លាស់ប្តូរមុខរបរ អភិវឌ្ឍសេដ្ឋកិច្ចក្រុមគ្រួសារ មុខរបរចិញ្ចឹមជីវិត និងចូលរួមធ្វើការនៅបរទេស។ ខេត្ត យ៉ាឡាយ កំណត់ថាលទ្ធផលក្រោយពេលបណ្តុះបណ្តាល ពលករមានការងារធ្វើ ត្រូវបានសហគ្រាសទទួលយក ឬបង្កើតការងារធ្វើដោយខ្លួនឯងគឺជារង្វាស់សំខាន់ ជំនួសឱ្យការវាយតម្លៃត្រឹមតែតាមរយៈជម្រើសចំនួនអ្នកចូលរៀន និងបានបញ្ចប់វគ្គសិក្សា៕
ផលិត៖ ក្វាងថាយ
ប្រែសម្រួល៖ ចន្ថា
