បង ឡា មិញភុក (កើតឆ្នាំ ១៩៩០ ជនជាតិ យ៉ាវ) បញ្ចប់ការសិក្សាផ្នែកគណនេយ្យតែផ្សារភ្ជាប់ជាមួយមុខរបរបណ្តុះជាលិកានៅវិទ្យាស្ថានស្រាវជ្រាវរុក្ខជាតិវត្ថុធាតុដើមក្រដាស ភូនិញ (ខេត្ត ភូ ថ)។ ក្រោយរយៈពេលជិត ១០ ឆ្នាំសន្សែសន្សំដកស្រង់ពិសោធន៍ក្នុងការបណ្តុះពូជប្រេងខ្យល់ អាកាស្យាកាត់ ឆ្នាំ ២០២១ បងត្រឡប់មកខេត្ត ត្វៀនក្វាង វិញដើម្បីបើកសិប្បកម្មផលិតកម្មពូជដំណាំផ្ទាល់ខ្លួន។
ចាប់ផ្តើមពីទ្រង់ទ្រាយតូចតាច នៅពេលតម្រូវការទីផ្សារកើនឡើង បង ភុក បានខ្ចីដើមទុនដើម្បីពង្រីកថ្នាលបណ្តុះមានទំហំផ្ទៃដីជាង ៦០ ម៉ែត្រការ៉េ ដោយវិនិយោគបន្ទប់បណ្តុះជាលិកាតាមបែបស្តេរីល (sterile inoculation) ឆ្នាំងចំហុយ ជញ្ជីងវិភាគ ទូសារធាតុគីមី។ ដើម្បីកាត់បន្ថយចំណាយ បងម្ចាស់ការកែលម្អឧបករណ៍មួយចំនួន និងធ្វើប្រព្រឹត្តកម្មដោយខ្លួនឯង កម្ចាត់មេរោគក្នុងបំពង់ធ្វើតេស្តឡើងវិញដែលបានប្រើរួចហើយ។
បច្ចុប្បន្នសិប្បកម្មផលិតជាចម្បងគឺពូជអាកាស្យាកូនកាត់ ដើមប្រេងខ្យល់ លក់ចេញជាង ៧០.០០០ ដើមមួយខែ។ លោក ហា ហុងគ្វឹន (ភូមិ ញុងយ៉ាម ឃុំ អៀនសឺន ខេត្ត ត្វៀនក្វាង) វាយតម្លៃពូជរុក្ខជាតិរបស់បង ភុក គឺល្អមាំមួនណាស់ អត្រារស់រានខ្ពស់។ ក្រៅពីនេះ បង ភុក នៅបានណែនាំអំពីបច្ចេកទេសដាំដុះ និងថែទាំដំណាំជូនប្រជាជនក្នុងមូលដ្ឋានផងដែរ។
គំរូបាននាំមកប្រាក់ចំណូលប្រមាណ ៦០០ លានដុងមួយឆ្នាំ បង្កើតការងារធ្វើទៀងទាត់ជូនពលករក្នុងស្រុកជាមួយនឹងប្រាក់ចំណូលពី ៧ ទៅ ៨ លានដុងមួយខែ។ បងស្រី ហ្វាង ធីហុងធុយ (ភូមិ តឹនហូ ឃុំ ញឺឃេ) ផ្សារភ្ជាប់ជាង ៣ ឆ្នាំ ទទួលបានប្រាក់ចំណូលប្រមាណ ៧ លានដុងមួយខែ។ បង ភុក ក៏បានឧបត្ថម្ភបច្ចេកទេសដល់យុវជនជាច្រើននាក់ផ្សេងទៀតផងដែរ។
វាយតម្លៃគំរូ លោក ត្រឹន វ៉ាន់ត្វៀន អនុប្រធានគណៈកម្មាធិការប្រជាជនឃុំ ញឺឃេ អះអាងថានេះជាគំរូសេដ្ឋកិច្ចមានប្រសិទ្ធភាព បង្កើតការងារធ្វើផង ផ្គត់ផ្គង់ពូជដំណាំមានគុណភាពជូនមូលដ្ឋានផង។ ភាពម្ចាស់ការក្នុងការអនុវត្តបច្ចេកទេសរបស់បង ភុក គឺជាទិសដៅដ៏សមស្រប ជំរុញអភិវឌ្ឍសេដ្ឋកិច្ចកសិកម្ម រុក្ខកម្មនៅស្រុកកំណើត៕
អត្ថបទ និងរូបថត៖ ហ្វាងហាយ
ប្រែសម្រួល៖ អៀងថាន់
