អាសយដ្ឋាននីមួយៗ ត្រូវការវិធានការតែមួយ
មុនពេលសម្រេចសាងសង់ឧទ្យាននៅវាលដីលេខ ១ លី ថាយតូ (សង្កាត់ វឿនឡាយ) ទីក្រុង ហូជីមិញ ធ្លាប់ ទទួលបានសំណើជាច្រើនអំពីការវិនិយោគគម្រោងពាណិជ្ជកម្ម។ ក៏ប៉ុន្តែ ចុងក្រោយទីក្រុងជ្រើសរើសវាលដីសម្រាប់ធ្វើជាលំហសាធារណៈ ឆ្លើយតបនឹងតម្រូវការអំពីរុក្ខជាតិបៃតង និងកន្លែងប្រជុំជីវភាពរបស់ប្រជាជននៅបរិវេណកណ្តាលក្រុង។
លោក ត្រឹន លីវក្វាង លេខាគណៈកម្មាធិការបក្សទីក្រុង ហូជីមិញ បានឱ្យដឹងថា ឧទ្យានគឺជាកន្លែងប្រជាជនមកលេងកម្សាន្ត ហាត់ប្រាណ ស្រូបយកខ្យល់អាកាសបរិសុទ្ធ ព្រមទាំងរួមចំណែកកាត់បន្ថយការបំពុលបរិស្ថានផងដែរ។ ផ្ដើមពីករណីនេះ លោកកំណត់ថាវាលដីនៅសេសសល់ចាំបាច់ត្រូវបានពិចារណាទៅតាមតម្រូវការជាក់ស្តែង ផ្តល់អាទិភាពដល់ភូមិសាស្រ្តដែលកំពុងខ្វះសាលារៀន ស្ថានីយសុខាភិបាល ឧទ្យាន និងគ្រឹះស្ថានបម្រើសហគមន៍។
យោងតាមគណៈកម្មាធិការប្រជាជនទីក្រុង ហូជីមិញ ក្រោយដំណើរការបង្រួមក្បាលម៉ាស៊ីន និងកែសម្រួលអង្គភាពរដ្ឋបាល ទីក្រុងមានផ្ទះ ដីសាធារណៈនៅសេសសល់ជាច្រើន។ ប្រសិនបើមិនបានដោះស្រាយទាន់ពេលវេលាទេ មូលដ្ឋានទាំងនេះនឹងបន្តទុកចោល ទ្រុឌទ្រោម ការទន្ទ្រានយកកើតមានឡើង និងបង្កឱ្យខាតបង់ធនធានសាធារណៈ។ ហេតុដូច្នេះ ទីក្រុងបានរៀបចំផែនការអនុវត្តព្រមៗ គ្នានូវយន្តការពិសេសដោយឡែករបស់រដ្ឋាភិបាល។
វិសាលភាពដោះស្រាយមិនត្រឹមតែរាប់បញ្ចូលធនធានទើបកើតមានក្រោយការរៀបចំឡើងវិញប៉ុននោះទេ រួមទាំងមូលដ្ឋានដែលបានប្រគល់ឲ្យអង្គការគ្រប់គ្រង ធ្វើអាជីវកម្មផ្ទះតាំងពីថ្ងៃទី១ ខែមីនា ឆ្នាំ២០២៥ មកម៉្លេះ តែមិនទាន់បានទាញយក និងបណ្តាអាសយដ្ឋានលែងមានតម្រូវការប្រើប្រាស់តាំងពីមុនមក ប៉ុន្តែនៅតែត្រូវទុកចោល។
លោក ង្វៀន វ៉ាន់ដឿក ប្រធានគណៈកម្មាធិការប្រជាជនទីក្រុង ហូជីមិញ អះអាងថាទីក្រុងនឹងបង្កើតលក្ខខណ្ឌសម្រាប់ឱ្យធនធាននៅសេសសល់បានផ្លាស់ប្តូរយ៉ាងឆាប់រហ័ស ឱ្យតែផែនការប្រើប្រាស់ស្របតាមបទប្បញ្ញត្តិ ធម្មានុរូប និងនាំមកនូវប្រសិទ្ធភាពជាក់ស្តែង។
ការផ្តោតសំខាន់គឺមិនមែនលើការចេញសេចក្តីសម្រេចឱ្យបានច្រើននោះទេ តែត្រូវភ្ជាប់នឹងអាសយដ្ឋាននីមួយៗ នឹងតម្រូវការសង្គម ជ្រើសរើសអង្គភាពទទួលគ្រប់លទ្ធភាព និងកំណត់ពេលសំណង់បើកដំណើរការ។ ដើម្បីអនុវត្តតម្រូវការនេះ ទីក្រុងចាំបាច់បង្កើតមូលដ្ឋានទិន្នន័យរួមតែមួយអំពីមូលនិធិផ្ទះ ដីសាធារណៈទាំងមូល។
ឯកសារនៃអាសយដ្ឋាននីមួយៗ ត្រូវបង្ហាញអំពីទំហំ ផ្លូវច្បាប់ ស្ថានភាព គម្រោង អង្គភាពគ្រប់គ្រង តម្រូវការប្រើប្រាស់ ប្រភពទុន ផែនការស្នើឡើង និងកាលបរិច្ឆេទបញ្ចប់រួចរាល់។ ទិន្នន័យអំពីចំនួនប្រជាជន សិស្ស តម្រូវការពិនិត្យ ព្យាបាលជំងឺ អត្រារុក្ខជាតិបៃតង និងគ្រឹះស្ថានវប្បធម៌ក៏ត្រូវរួមបញ្ចូលគ្នាសម្រាប់ជ្រើសរើសមុខងារប្រើប្រាស់ឱ្យច្បាមជាប់ភាពជាក់ស្តែង។
ផ្អែកលើមូលដ្ឋានទិន្នន័យនោះ ធនធានអាចត្រូវបានបែងចែកជា ៤ ក្រុម។ ក្រុមទីមួយរួមមានមូលដ្ឋានមានលក្ខខណ្ឌគ្រប់គ្រាន់ប្តូរទៅជាសាលារៀន ស្ថានីយសុខាភិបាល គ្រឹះស្ថានវប្បធម៌ ឬកីឡា។ ក្រុមទីពីរគឺវាលដីសមធ្វើជាឧទ្យាន ទីលានកម្សាន្ត និងលំហសហគមន៍បណ្តោះអាសន្ន។ ក្រុមទីបីរួមមានធនធានមានលទ្ធភាពឲ្យជួល ទាញយកដើម្បីបង្កើតប្រភពចំណូល។ ក្រុមចុងក្រោយគឺអាសយដ្ឋានកំពុងមានទំនាស់ ត្រូវទន្ទ្រានយក ខ្វះឯកសារ ឬជាប់ពាក់ព័ន្ធនឹងការរៀបចំគម្រោង ចាំបាច់មានវិធីដោះស្រាយដោយឡែក។
តាមលោក ង្វៀន វ៉ាន់ដឿក ការបែងចែកជាក្រុមជួយឱ្យមូលដ្ឋានមានលក្ខខណ្ឌគ្រប់គ្រាន់អាចដំណើរការភ្លាមៗ ដោយមិនបាច់រង់ចាំឯកសារស្មុគស្មាញ។ នៅពេលអង្គភាពជាច្រើនស្នើប្រើប្រាស់ទីស្នាក់ការតែមួយ ផែនការជ្រើសរើសត្រូវផ្អែកលើកម្រិតភាពចាំបាច់ ចំនួនប្រជាជនទទួលសេវា និងសមត្ថភាពប្រតិបត្តិការ។ តំបន់ខ្វះបន្ទប់រៀនគប្បីអាទិភាពវិស័យអប់រំ កន្លែងខ្វះចំណុចថែទាំសុខភាពត្រូវពិចារណារៀបចំគ្រឹះស្ថានសុខាភិបាល។ ចំពោះធនធានណាដែលមិនសមស្របនឹងគោលដៅសាធារណៈទើបប្តូរទាញយកដើម្បីបង្កើតប្រភពចំណូល។
យោងតាមស្ថិតិរបស់មន្ទីរហិរញ្ញវត្ថុទីក្រុង ហូជីមិញ ទីក្រុង ហូជីមិញ មានមូលដ្ឋានផ្ទះ ដីចំនួន ៩.៤៣៤ កន្លែងត្រូវបន្តរក្សាទុកសម្រាប់ប្រើប្រាស់ រួមមានមូលដ្ឋាន ៦.៤៥៤ កន្លែងនៅបរិវេណទីក្រុង ហូជីមិញ ពីមុន មានមូលដ្ឋាន ១.៥៥៣ កន្លែងនៅ ប៊ិញយឿង និង ១.៤២៧ កន្លែង នៅ បារៀ- វុងតាវ។ ទីក្រុងបានចាត់បញ្ជូន ដកហូត ឬប្រគល់មកមូលដ្ឋានគ្រប់គ្រងចំនួន ៣៧០ មូលដ្ឋាន ព្រមទាំងបន្តសហការទទួលយក ១៥ មូលដ្ឋានពីបណ្តាស្ថាប័នមជ្ឈិម។
ការប្រគល់សិទ្ធិភ្ជាប់នឹងការទទួលខុសត្រូវ
ដើម្បីឱ្យការផ្លាស់ប្តូរច្បាមជាប់នឹងតម្រូវការជាក់ស្តែង ទីក្រុងចាំបាច់ត្រូវប្រគល់សិទ្ធិម្ចាស់ការបន្ថែមទៀតទៅអាជ្ញាធរថ្នាក់សង្កាត់ កន្លែងក្តាប់ច្បាស់ពីស្ថានភាពបច្ចុប្បន្ននៃវាលដីនីមួយៗ និងបំណងរបស់ប្រជាជន។ ក៏ប៉ុន្តែ សិទ្ធិស្នើ និងចាត់តាំងអនុវត្តត្រូវតែដើរទន្ទឹមគ្នាជាមួយនឹងការទទួលខុសត្រូវលើការគ្រប់គ្រង ការប្រតិបត្តិការ និងការរក្សាសំណង់ក្រោយវិនិយោគ។
ចំណែកលោក ត្រឹន គ្វឹកទ្រុង លេខាគណៈកម្មាធិការបក្សសង្កាត់ ប៊ិញទ្រឹង ស្នើឱ្យជ្រើសរើសមុខងារតាមទិសដៅពហុគោលដៅ ដោយរួមបញ្ចូលគ្នារវាងរុក្ខជាតិបៃតង កីឡា ប្រជុំជីវភាពសហគមន៍ និងអប់រំប្រពៃណីនៅក្នុងលំហតែមួយ។
ជាក់ស្តែង ជាមួយគំរូលំហវប្បធម៌ ហូជីមិញ នៅឧទ្យាន ង្វៀន ទឺងៀម ត្រូវបានដាក់ឱ្យដំណើរការបានជួយឱ្យប្រជាជនទទួលបានឯកសារយ៉ាងងាយស្រួល ព្រមទាំងមានបន្ថែមលំហកម្សាន្ត លំហែកាយសម្រាប់ប្រជាជនផងដែរ។ វិធីសាស្ត្រនេះកំពុងបើកផ្លូវឱ្យមានការជ្រើសរើសមុខងារពហុគោលដៅសម្រាប់ដីសាធារណៈនៅពេលប្តូរ ក្នុងនោះឧទ្យានមួយអាចបន្ថែមនូវលំហដើមឈើបៃតង លំហលេងកម្សាន្ត បម្រើប្រជុំជីវភាពសហគមន៍ និងលំហវប្បធម៌ អប់រំប្រពៃណី។
យោងតាមគណៈកម្មាធិការប្រជាជនទីក្រុង ហូជីមិញ ដើម្បីឱ្យបណ្តាគំរូប្តូរផ្ទះ ដីសាធារណៈទទួលបានប្រសិទ្ធភាពដោយមិនបង្អង់ត្រឹមតែជាគំនិតផ្តួចផ្តើមដាច់ដោយឡែក មន្ទីរហិរញ្ញវត្ថុត្រូវធ្វើជាដើមហេតុដើមទងធ្វើសំយោគបញ្ជីរាយនាម តាមដានវឌ្ឍនភាព និងដោះស្រាយបញ្ហាប្រឈមនានា។ មន្ទីរសាងសង់ណែនាំផែនការទាញយក តម្លៃ គោលនយោបាយឧបត្ថម្ភ ទន្ទឹមនឹងនេះបណ្តាផ្នែករៀបចំគម្រោង ដីធ្លី សុខាភិបាល អប់រំ វប្បធម៌រួមជាមួយអាជ្ញាធរមូលដ្ឋានត្រូវឃ្លាំមើលតាំងពីដំបូង ជៀសវាងបញ្ជូនឯកសារតាមលំដាប់លំដោយឆ្លងកាត់ច្រើនអង្គភាពហើយត្រឡប់មកបំពេញបន្ថែមឡើងវិញ។
បន្ទាប់នោះ មន្ទីរមហាផ្ទៃបានប្រគល់ភារកិច្ចឱ្យរៀបចំប្រព័ន្ធសន្ទស្សន៍វាយតម្លៃ នាំយកលទ្ធផលគ្រប់គ្រង និងទាញយកផលពីផ្ទះ ដីនៅសេសសល់ទៅជាលក្ខណៈវិនិច្ឆ័យមួយដើម្បីពិចារណាកម្រិតបំពេញភារកិច្ចរបស់ថ្នាក់ដឹកនាំមន្ទីរ ផ្នែក មូលដ្ឋាន។ សន្នស្សន៍មិនស្តែងចេញត្រឹមតែចំនួនសេចក្តីសម្រេចបានចេញផ្សាយនោះទេ ប៉ុន្តែត្រូវថ្លឹងថ្លែងពេលវេលាយកធនធានដាក់ឱ្យប្រើប្រាស់ ចំនួនមនុស្សបានទទួលការបម្រើ ស្ថានភាពថែទាំជួសជុល និងប្រសិទ្ធភាពនៃការកាត់បន្ថយការទន្ទ្រានយក។
តាមពេលវេលា ចំពោះវាលដីសាធារណៈកំពុងរង់ចាំគម្រោងរយៈពេលវែង ទីក្រុងនឹងពង្រីកទម្រង់រូបភាពប្រើប្រាស់បណ្តោះអាសន្នតាមគោលការណ៍វិនិយោគល្មមបង្គួរ បត់បែន និងមានលទ្ធភាពប្រគល់ធារដីមកវិញ។ ឧទ្យានខ្នាតតូច ទីលានលេងកម្សាន្ត សួនសហគមន៍ ទីលានហាត់កីឡា ឬលំហវប្បធម៌នៅកណ្តាលថ្ងៃគឺជាមុខងារអាចដំណើរការបានយ៉ាងឆាប់រហ័ស រួមចំណែកកាត់បន្ថយការរាយសំរាម និងការទន្ទ្រានយកដីធ្លីឡើងវិញ។ កាលកំណត់នៃការប្រើប្រាស់បណ្តោះអាសន្នចាំបាច់ត្រូវប្រកាសឱ្យដឹងជាសាធារណៈតាំងពីដំបូង ដើម្បីឱ្យប្រជាជនយល់ច្បាស់ និងមិនមានបញ្ហារារាំងកើតឡើងនៅពេលគម្រោង ដាក់ដំណើរការជាផ្លូវការ។ ប្រភពធនធានសង្គមូបនីយកម្មក៏ត្រូវតែភ្ជាប់ជាមួយនឹងតម្លាភាពផងដែរ។ សហគ្រាស ប្រជាជនអាចរួមវិភាគទានដើមឈើ បរិក្ខារ ថវិកា ឬកម្លាំងថែទាំ ប៉ុន្តែសិទ្ធិខិតចូលប្រើប្រាស់សំណង់ត្រូវតែបានទៅសហគមន៍។
រាល់គម្រោងការនីមួយៗ ចាំបាច់កំណត់ប្រភពធនធានរក្សាបំភ្លឺ អនាម័យ ស្រោចស្រពដើមឈើ ជួសជុលគ្រឿងបរិក្ខារ និងការធានាសន្តិសុខ។ ថវិការដ្ឋទទួលខុសត្រូវលើចំណាយចាំបាច់នានា អនុសង្កាត់ អង្គការមហាជន និងប្រជាជនអាចចូលរួមស្វ័យគ្រប់គ្រង រាយការណ៍អំពីការខូចខាត និងទប់ស្កាត់ការទន្ទ្រានយកឡើងវិញ។ ប្រសិនបើគ្មានអង្គភាពប្រតិបត្តិការ និងថវិកាថែទាំទេនោះ សំណង់នឹងងាយទ្រុឌទ្រោមទោះបីជាត្រូវបានវិនិយោគរួចហើយក៏ដោយ។
ក្រៅពីនេះ យោងតាមសារាចរលេខ 14-CT/TU របស់គណៈកម្មាធិការបក្សទីក្រុង ហូជីមិញ ការគ្រប់គ្រងមូលនិធិផ្ទះ និងដីសាធារណៈត្រូវតែផ្សារភ្ជាប់ជាមួយនឹងការទទួលខុសត្រូវរបស់ថ្នាក់ដឹកនាំ។ ក្រុមប្រឹក្សាប្រជាជន រណសិរ្សមាតុភូមិ សហគមន៍ប្រជាជន និងសារព័ត៌មានចាំបាច់ត្រូវចូលរួមឃ្លាំមើលអាសយដ្ឋានណាដែលយឺតយ៉ាវដំណើរការ ត្រូវបានប្រើប្រាស់ខុសគោលដៅ ឬបន្តទុកចោលទំនេរ។ ព្រោះថាធនធានមួយត្រូវបានចាត់ទុកថាទាញយកផលបានយ៉ាងមានប្រសិទ្ធភាពលុះត្រាតែមានអ្នកប្រើប្រាស់ជាប្រចាំ ទេសភាពត្រូវបានរក្សា ហើយមុខងារឆ្លើយតបតម្រូវការត្រឹមត្រូវ។
នៅពេលអាសយដ្ឋាននីមួយៗ មានឯកសារឌីជីថល ផែនការផ្ទាល់ខ្លួន អង្គភាពប្រតិបត្តិការ និងកាលកំណត់បញ្ចប់ច្បាស់លាស់ ទើបមូលនិធិផ្ទះ ដីសាធារណៈអាចប្តូរយ៉ាងពិតប្រាកដពីស្ថានភាព “បានត្រួតពិនិត្យរួចរាល់ហើយ”ទៅជា “កំពុងបម្រើ” ប្រជាជន៕
អត្ថបទនិងរូបថត៖ ហ្វាងត្វៀត
ប្រែសម្រួល៖ ចន្ថា
