នៅយប់នៃថ្ងៃទី ២៤ ខែ កញ្ញា ឆ្នាំ ២០២២ កីឡដ្ឋានទីរួមខេត្ត ងៀឡូ (ខេត្ត អៀនបាយ) បានក្លាយទៅជាចំណុចលេចធ្លោរបស់អ្នកស្រលាញ់វប្បធម៌ទូទាំងប្រទេស ជាកន្លែងប្រព្រឹត្តឡើងនូវពិធីទទួលវិញ្ញាបនបត្រដាក់បញ្ចូល "សិល្បៈរបាំ ស្វែ ថាយ" ក្នុងបញ្ជីឈ្មោះបេតិកភណ្ឌវប្បធម៌អរូបីតំណាងនៃមនុស្សជាតិ។
ការចុះបញ្ជីឈ្មោះរបស់អង្គការអប់រំ វិទ្យាសាស្ត្រនិងវប្បធម៌នៃអង្គការសហប្រជាជាតិ (យូណេស្កូ) ចំពោះរបាំ ស្វែ ថាយ បានបញ្ជាក់ពិភពលោកវាយតម្លៃខ្ពស់តម្លៃអត្តសញ្ញាណវប្បធម៌បងប្អូនបណ្តាជនជាតិ វៀតណាម...
ទិដ្ឋភាពរួមនៃកីឡដ្ឋានទីរួមខេត្ត ងៀឡូ ជាទីកន្លែងប្រារព្ធពិធីទទួលវិញ្ញាបនបត្ររបស់ យូណេស្កូ ដាក់បញ្ចូល "សិល្បៈរបាំ ស្វែ ថាយ"
របាំ ស្វែ ថាយ ផ្សារភ្ជាប់សហគមន៍
ក្នុងឃ្លាំងចម្រៀងប្រជាប្រិយ របាំប្រជាប្រិយរបស់ជនជាតិ ថាយ របាំ ស្វែ មានតួនាទីសំខាន់ខ្លាំងណាស់។ ជនជាតិ ថាយ រាំរបាំ ស្វែ មិនត្រឹមតែក្នុងគោលបំណងបង្ហាញអោយឃើញជីវភាពរស់នៅប្រចាំថ្ងៃ ផ្សារភ្ជាប់សហគមន៍ ផ្សារភ្ជាប់ជាមួយធម្មជាតិ ជាមួយខាងព្រលឹងវិញ្ញាណប៉ុណ្ណោះទេថែមទាំងបង្ហាញតម្លៃមនុស្សសាស្រ្តវប្បធម៌ដ៏ជ្រាលជ្រៅទៀតផង។ របាំ ស្វែ គឺជានិមិត្តរូបនៃវប្បធម៌ ថាយ រួមចំណែកក្នុងការផ្សារភ្ជាប់មនុស្សជាមួយនឹងមនុស្ស មនុស្សជាមួយមេឃដីយ៉ាងរស់រវើកបំផុត ពោរពេញទៅដោយភាពរ៉ូម៉ង់តិចប៉ុន្តែក៏ដិតជាប់លក្ខណៈសង្គមផងដែរ។
នាយករដ្ឋមន្ត្រីនៃរដ្ឋាភិបាល លោក ផាម មិញជិញ អញ្ជើញថ្លែងសុន្ទរកថានៅក្នុងពិធី
របាំ ស្វែ ថាយ មានលក្ខណៈសមភាពយ៉ាងខ្ពស់។ ពេលបានចូលក្នុងរង្វង់របាំ ស្វែ ហើយ មិននៅមានការបែងចែករវាងអ្នកមាន អ្នកក្រ ប្រកាន់វណ្ណៈឡើយ។ ទោះជាក្នុងពិធីជប់លៀងធំ ជប់លៀងតូចណាក៏ដោយដូចជាឡើងផ្ទះថ្មី ពិធីរៀបមង្គលការឬក៏ពិធី សេនបាន សេនមឿង បើមិនមានរបាំ ស្វែ ទេគឺជនជាតិ ថាយ ចាត់ទុកពិធីជប់លៀងនោះថាមិនសប្បាយ មិនជោគជ័យឡើយ។ អាស្រ័យហេតុដូច្នេះហើយ របាំ ស្វែ បានក្លាយទៅជាផ្នែកមួយនៃជីវភាពរស់នៅដូចជាបាយបរិភោគ ទឹកសម្រាប់ផឹកជារៀងរាល់ថ្ងៃ។
ចង្វាក់របាំ ស្វែ ទាំងឡាយមិនខុសអ្វីពីសង្គមបង្រួមតូចមួយរបស់ជនជាតិ ថាយ នោះទេ ឆ្លុះបញ្ចាំងពីជីវភាពរស់នៅ ចិត្តគំនិត មនោសញ្ចេតនា បំណង ប្រាថ្នាដោយវិធីបរិវិតក្កភាសារបាំប្រជាប្រិយ ថាយ។ រួមជាមួយនឹងទំនុកខាប់ មនោសញ្ចេតនា ទំនុកគែន ទំនុកពី របាំ ស្វែ បានដក់ជាប់យ៉ាងជ្រៅក្នុងដួងចិត្តមនុស្សដោយឯកឯងតែម្តង។
អនុរដ្ឋមន្ត្រីក្រសួងវប្បធម៌ កីឡានិងទេសចរណ៍ លោក ហ្វាង ដាវកឿង តំណាងក្រសួងវប្បធម៌ កីឡានិងទេសចរណ៍អញ្ជើញទទួលវិញ្ញាបនបត្ររបស់ យូណេស្កូ ដាក់បញ្ចូល "សិល្បៈរបាំ ស្វែ ថាយ" ពីលោកស្រី Pauline Tamesis អ្នកសម្របសម្រួលរបស់អង្គការសហប្រជាជាតិប្រចាំការនៅ វៀតណាម
ឆ្លងតាមរយៈចង្វាក់របាំ ស្វែ នីមួយៗ មនុស្សកាន់តែស្និទ្ធស្នាល សុខដុមរមនាជាមួយគ្នាថែមទៀត ស្រលាញ់ពីជីវិតរស់នៅស្រលាញ់មនុស្សម្នាដើម្បីឈានចូលក្នុងជីវភាពពលកម្ម តស៊ូប្រយុទ្ធជាមួយក្តីទុកចិត្តស្រឡាញ់រាប់អានភ្លឺថ្លាគ្មានដែនកំណត់។ ឆ្លងតាមរយៈចង្វាក់រាំរបាំ ស្វែ គេក៏អាចមើលឃើញពីជីវិតរស់នៅរបស់សង្គមជនជាតិ ថាយ តាំងពីបុព្វសម័យក៏ដូចជាការយល់ដឹងអំពីជីវទស្សនៈនិងលោកាទស្សនៈផងដែរ។
យោងតាមសិប្បករឆ្នើម ឡ វ៉ាន់បៀន របាំ ស្វែ ឆ្លុះបញ្ចាំងពីជីវិតពិតនៃជីវភាពរស់នៅ ព្រោះហេតុដូច្នេះហើយបានជាមានតម្លៃខាងអប់រំសីលធម៌ រួមចំណែកធ្វើអោយក្លាយទៅជាចរិតលក្ខណៈវប្បធម៌មួយដែលមិនអាចលាយឡំបាន។ របាំ ស្វែ បង្កើនតម្លៃនៃការបញ្ចេញមនោសញ្ចេតនា ព្រមទាំងរួមចំណែកក្នុងការបញ្ជាក់ពីអត្តចរិតមនុស្សរបស់ជនជាតិ ថាយ មោះមុតនិងភាពរឹងមាំមិន ព្រមចុះចាញ់ ក្លាហាន ដាក់ខ្លួន ច្នៃប្រឌិត ហើយឧស្សាហ៍ព្យាយាមឆ្ពោះទៅរកឧត្តមគតិដ៏ខ្ពង់ខ្ពស់ របៀបរស់នៅវិជ្ជមានពូនជ្រំអោយជំនាន់ក្រោយ បណ្តាសតិអារម្មណ៍ មនោសញ្ចេតនាដ៏ល្អផូរផង់។
របាំ ស្វែ ថាយ លើកតម្កើងតម្លៃដ៏ល្អផូរផង់នៃវប្បធម៌
អញ្ជើញថ្លែងសុន្ទរកថានៅក្នុងពិធីទទួលវិញ្ញាបនបត្ររបស់ យូណេស្កូ ដាក់បញ្ចូល "សិល្បៈនៃរបាំ ស្វែ ថាយ" ក្នុងបញ្ជីឈ្មោះបេតិកភណ្ឌវប្បធម៌អរូបី តំណាងនៃមនុស្សជាតិនិងបើកមហោស្រពវប្បធម៌ ទេសចរណ៍ មឿងឡ រុករកស្វែងយល់ពីរមណីយដ្ឋានជាតិពិសេសវាលស្រែថ្នាក់ៗ តាមជម្រាលភ្នំ មូកាងចាយ ឆ្នាំ ២០២២ លោកនាយករដ្ឋមន្ត្រីនៃរដ្ឋាភិបាល ផាម មិញជិញ អញ្ជើញមានប្រសាសន៍ថា សិល្បៈរបាំ ស្វែ ថាយ បានយកឈ្នះលើលក្ខណៈដ៏ស្រស់ស្អាតនៃប្រភេទទម្រង់របាំប្រពៃណីដោយមានវិចិត្រសិល្បៈច្នៃប្រឌិត បំណងប្រាថ្នាដ៏ក្លៀវក្លាឆ្ពោះទៅរកបណ្តាតម្លៃនៃសច្ចភាព - កុសលភាព - ពិចិត្រភាពរបស់សមាជិកនីមួយៗ ក្នុងសហគមន៍បណ្តាជនជាតិនៅ តីបាក់។
ទស្សនីយភាពសម្តែងក្នុងកម្មវិធីសិល្បៈពិសេសមួយក្រោមប្រធានបទ "របាំ ស្វែ ថាយ - ភាពល្អឥតខ្ចោះនៃតំបន់បេតិកភណ្ឌ"
លើកតម្កើងសិល្បៈរបាំ ស្វែ ថាយ គឺលើកតម្កើងតម្លៃដ៏ល្អផូរផង់ទាំងឡាយនៃវប្បធម៌សិល្បៈ នៃស្មារតីសាមគ្គីភាព នៃទឹកចិត្តមេត្តាករុណា នៃស្មារតីសុទិដ្ឋិនិយម នៃបរិវិតក្កក្នុងការអភិរក្សនិងអភិវឌ្ឍន៍ នៃលក្ខណៈរស់នៅក្នុងភាពសុខដុមរមនាជាមួយធម្មជាតិ នៃស្មារតីទទួលខុសត្រូវប្រវត្តិសាស្ត្រមិនត្រឹមតែរបស់បណា្តជនជាតិនៅ តីបាក់ ប៉ុណ្ណោះទេថែមទាំងជារបស់ប្រជាជន វៀតណាម ទាំងអស់ទៀតផង។
របាំ ស្វែ ថាយ គឺជាបេតិកភណ្ឌទី ១៤ របស់ វៀតណាម ត្រូវបាន យូណេស្កូ ដាក់បញ្ចូលក្នុងបញ្ជីឈ្មោះជាមោទនភាពរបស់ជនជាតិ ថាយ និងរបស់សហគមន៍ជនជាតិជាបងប្អូនទាំង ៥៤ ឆ្លងតាមរយៈនោះបន្តបញ្ជាក់ការរួមចំណែកយ៉ាងសំខាន់នៃឃ្លាំងកេរដំណែលវប្បធម៌ វៀតណាម ចំពោះពិភពលោក។ លោកនាយករដ្ឋមន្ត្រីអញ្ជើញថ្លែងអោយតម្លៃខ្ពស់ ការរួមចំណែកឥតឈប់ឈររបស់ជំនាន់សិប្បករប្រជាប្រិយ សហគមន៍ជនជាតិ ថាយ បានលើកស្ទួយ ផ្ទេរបន្ត ថែរក្សាបេតិកភណ្ឌវប្បធម៌ដ៏វិសេសវិសាលនេះដែលមិនអាចកាត់ថ្លៃបាន។
ឈុតឆាកសម្តែងសិល្បៈ ស្វែ ថាយ ដោយមានការចូលរួមរបស់តារាសម្ដែងសិប្បករនិងសិស្សសាលាចំនួន ៣.០០០ នាក់នៅក្នុងពិធីទទួលវិញ្ញាបនបត្រដាក់បញ្ចូល "សិល្បៈរបាំ ស្វែ ថាយ"
ដើម្បីបន្តបង្កើតកម្លាំងរស់រានថ្មី ការសាយភាយនិងជម្រុលទឹកចិត្តចំណាប់អារម្មណ៍យ៉ាងខ្លាំងក្លានូវតម្លៃនៃសិល្បៈ របាំ ស្វែ ថាយ លោកនាយករដ្ឋមន្ត្រីបានស្នើឱ្យអាជ្ញាធរ ប្រជាជននិងសហគមន៍ជនជាតិ ថាយ នៅបណ្តាខេត្តភាគពាយ័ព្យ ក្រសួងវប្បធម៌ កីឡានិងទេសចរណ៍ សហការអនុវត្តដំណើរការយ៉ាងម៉ឹងម៉ាត់ ប្រសិទ្ធភាព "កម្មវិធីសកម្មភាពជាតិការពារនិងពង្រីកតម្លៃ នៃបេតិកភណ្ឌវប្បធម៌អរូបីសិល្បៈរបាំ ស្វែ ថាយ" ត្រឹមត្រូវតាមកិច្ចសន្យាជាមួយ យូណេស្កូ។
លោកនាយករដ្ឋមន្ត្រីបានសង្កត់ធ្ងន់ថា៖ "យើងទាំងអស់គ្នាចូរធ្វើដោយយកចិត្តទុកដាក់អស់ពីចិត្តពីថ្លើម ដោយបេះដូង ដោយទឹកចិត្ត ដោយមោទនភាព ដោយកម្លាំងផ្ទៃក្នុងដើម្បីទំនុកច្រៀង តូរ្យតន្ត្រីទាំងឡាយ នៃបណ្តាចង្វាក់របាំ ស្វែកន្សែង ស្វែមួកដួន ស្វែផ្លិត ស្វែអង្រែ ស្វែដំបង ស្វែផ្កា។ល។ ត្រូវបានចិញ្ចឹមបំប៉នអភិវឌ្ឍនិងពង្រីកសាយភាយចេញទៅសហគមន៍បងប្អូនជនជាតិផ្សេងៗ បន្តទៀត"។
រាំរបាំ ស្វែ គឺជានិមិត្តរូបនៃវប្បធម៌ ថាយ រួមចំណែកផ្សារភ្ជាប់មនុស្សជាមួយនឹងមនុស្ស មនុស្សជាមួយនឹងមេឃដីយ៉ាងរស់រវើក ភាពរ៉ូម៉ង់តិច
ទោះបីមានអាយុ ៨៩ ឆ្នាំហើយក៏ដោយប៉ុន្តែសិប្បករឆ្នើម ឡ វ៉ាន់បៀន នៅតែអស់ពីចិត្តអស់ពីផ្លើមបង្ហាត់បង្រៀនរបាំ ស្វែ ថាយ ដល់ក្មេងៗ ជំនាន់ក្រោយជានិច្ច
លោកនាយករដ្ឋមន្ត្រីស្នើអោយបន្តសិក្សាស្រាវជ្រាវ មានដំណោះស្រាយដ៏ចាំបាច់ជាក់ស្តែងដើម្បីថែរក្សានិងពង្រីកអត្តសញ្ញាណប្រពៃណីរបស់ជនជាតិជាទូទៅនិយាយរួមនិងរបាំ ស្វែ ថាយ និយាយដោយឡែកក្នុងការអភិវឌ្ឍសេដ្ឋកិច្ច - សង្គម ជាពិសេសគឺការអភិវឌ្ឍទេសចរណ៍ ផ្សារភ្ជាប់យ៉ាងស្អិតល្មួតជាមួយវប្បធម៌មនុស្សម្នានិងប្រវត្តិសាស្ត្រ រួមចំណែកពាំនាំបេតិកភណ្ឌទៅជាទ្រព្យសម្បត្តិ ប្រែក្លាយសក្តានុពលទៅជាប្រភពកម្លាំងអភិវឌ្ឍប្រទេសជាតិ លើកកម្ពស់ជីវភាពរស់នៅខាងសម្ភារៈនិងស្មារតីរបស់ប្រជាជន៕
អត្ថបទ៖ ភឿងឡាន - ឌឹកទឿង
រូបថត៖ ង្វៀន អា - យឿងយ៉ាង
បញ្ចូលទិន្នន័យពីសារព័ត៌មានបោះពុម្ពលេខចេញផ្សាយខែ តុលា ឆ្នាំ ២០២២ ដោយ៖ សឺន ហេង
