ប៉ុន្មានថ្ងៃនៃខែ មេសា ប្រវត្តិសាស្ត្រ ក្នុងបរិយាកាសជាមួយនឹងប្រទេសទាំងមូលបញ្ចេញកម្លាំងប្រលងប្រណាំងពលកម្មផលិតកម្ម បង្កើតស្នាដៃជាច្រើនអបអរសាទរអនុស្សាវរីយ៍ខួប ៥០ ឆ្នាំទិវារំដោះភូមិភាគខាងត្បូង បង្រួបបង្រួមប្រទេសជាតិ (ថ្ងៃទី ៣០ ខែ មេសា ឆ្នាំ ១៩៧៥ ដល់ថ្ងៃទី ៣០ ខែ មេសា ឆ្នាំ ២០២៥) ប្រជាជន អៀនបាយ ម្នាក់ៗ ក៏រំជួលចិត្តរំលឹកឡើងវិញអំពីអំឡុងខែឆ្នាំក្លាហានមោះមុតរបស់ប្រជាជាតិ ជាពិសេសគឺក្នុងអំឡុងសម័យកាលសង្គ្រាមបំផ្លិចបំផ្លាញទាំងពីរលើក ខេត្ត អៀនបាយ ក្លាយជាគោលដៅសំខាន់វាយបំផ្លិចបំផ្លាញយ៉ាងសាហាវនៃចក្រពត្តិ អាម៉េរិក ដោយមានគោលដៅទាំងឡាយដូចជា៖ រោងចក្រវារីអគ្គិសនី ថាកបា អាកាសយានដ្ឋាន អៀនបាយ រោងចក្រ Z183 និងខ្សែផ្លូវដែកមានលក្ខណៈសរសៃឈាមពី យូណាន (ប្រទេស ចិន) ទៅខេត្ត ឡាវកាយ - ខេត្ត អៀនបាយ - ហាណូយ ដឹកជញ្ជូនស្បៀងអាហារ ភោជនាហារនិងគ្រឿងអាវុធយុទ្ធោបករណ៍ ជំនួយពីបរទេសមកកាន់ប្រទេស វៀតណាម។
ដោយមានស្មារតី "ទាំងអស់ដើម្បីភូមិភាគខាងត្បូងសាច់ឈាមបង្កើត" ខេត្ត អៀនបាយ មោទកភាពចូលរួមវិភាគទានស្បៀងអាហារចំនួន ២៩.០០០ តោន ភោជនាហារចំនួន ១៥.០០០ តោន យុវជនជិត ២៥.០០០ នាក់ចេញដំណើរចូលបម្រើកងទ័ព។
ក្នុងនោះ មានកងវរសេនាតូចចំនួន ៤ មានឈ្មោះថា អៀននិញ ចូលរួមប្រយុទ្ធនៅគ្រប់សមរភូមិនៃភូមិភាគខាងត្បូង រួមចំណែកជាមួយប្រទេសទាំងមូលបង្កើតបានជាមហាជ័យជម្នះនិទាឃរដូវឆ្នាំ ១៩៧៥ រំដោះភូមិភាគខាងត្បូងទាំងស្រុង បង្រួបបង្រួមប្រទេសជាតិ។
ពាក់កណ្តាលសតវត្សក្រោយបង្រួបបង្រួមប្រទេសជាតិ ខេត្ត អៀនបាយ បានសម្រេចបណ្តាសមិទ្ធផលលេចធ្លោជាងគេក្នុងអាណត្តិ ២០២០ - ២០២៥ ធ្វើមូលដ្ឋានគ្រឹះ ជំរុញការស្ទុះផ្លោះឈានឡើងសម្រាប់អាណត្តិថ្មី។ លោក ត្រឹន ហ៊ុយទន់ លេខាគណៈកម្មាធិការបក្សខេត្ត អៀនបាយ បានឲ្យដឹងថា ក្រោយរយៈពេល ៤ ឆ្នាំអនុវត្តសេចក្តីសម្រេចចិត្តមហាសន្និបាតបក្ខភាគលើកទី ១៩ អាណត្តិ ២០២០ - ២០២៥ ខេត្ត អៀនបាយ មាន ១៧ ក្នុងចំណោម ១៩ សន្ទស្សន៍សម្រេចបាននិងលើសពីគោលដៅ ល្បឿនកំណើន GRDP (ផលិតផលនៅលើភូមិសាស្ត្រសរុប) ជាមធ្យមសម្រេចបានចំនួន ៧,៥៤% ឈរលំដាប់ទី ៥ ក្នុងចំណោមខេត្តចំនួន ១៤ តំបន់ទំនាបកណ្តាលនិងតំបន់ភ្នំនៃភូមិភាគខាងជើង។
រចនាសម្ព័ន្ធសេដ្ឋកិច្ចផ្លាស់ប្តូរជាវិជ្ជមាន ប្រព័ន្ធហេដ្ឋារចនាសម្ព័ន្ធសេដ្ឋកិច្ច - សង្គមត្រូវបានយកចិត្តទុកដាក់វិនិយោគតាមទិសដៅស៊ីចង្វាក់នឹងគ្នាទាំងស្រុង ផ្តោតចំណុចស្នូល គោលដៅសំខាន់។
បច្ចុប្បន្នខេត្តឈរលំដាប់ថ្នាក់ទី ២៤ ក្នុងប្រទេសទាំងមូលសម្រេចស្តង់ដារ ធ្វើឧត្តានកម្មអប់រំបឋមសិក្សាកម្រិត ៣ ឈរលំដាប់ថ្នាក់ទី ១៨ ក្នុងប្រទេសទាំងមូលសម្រេចស្តង់ដារធ្វើឧត្តានកម្មអប់រំអនុវិទ្យាល័យកម្រិត ២ អត្រាកាត់បន្ថយភាពក្រីក្រសម្រេចបានចំនួន ៣,៥% ក្នុងមួយឆ្នាំ វិស័យវប្បធម៌ - សង្គមត្រូវបានយកចិត្តទុកដាក់ គិតគូរ ការងារការពារ ថែទាំសុខភាពប្រជាជនមានការរីកចម្រើនច្រើន។ល។
ជាពិសេស ខេត្ត អៀនបាយ គឺជាមូលដ្ឋានដំបូងគេក្នុងប្រទេសទាំងមូលដាក់លក្ខណៈ វិនិច្ឆ័យ "សុភមង្គល" បញ្ចូលក្នុងសេចក្តីសម្រេចចិត្តនៃមហាសន្និបាតតំណាងបក្ខភាគ ខេត្តលើកទី ១៩ ឆ្ពោះទៅគោលដៅកសាង "ខេត្តសុភមង្គល"។
ឆ្នាំ ២០២៤ សន្ទស្សន៍សុភមង្គលរបស់ប្រជាជនសម្រេចបានចំនួន ៦៦,៥២% កើនឡើង ០,៩% បើធៀបនឹងឆ្នាំ ២០២៣ (៦៥,៦២%)។ ឆ្នាំ ២០២៥ ខេត្ត អៀនបាយ ខិតខំឱ្យសន្ទស្សន៍សុភមង្គលរបស់ប្រជាជនសម្រេចបានចំនួន ៦៨,៣%។
សព្វថ្ងៃនេះ ក្នុងកិច្ចការផ្លាស់ប្តូរថ្មី បងប្អូនបណ្តាជនជាតិខេត្ត អៀនបាយ បន្តសាមគ្គីរួម កម្លាំងរួមចិត្តគំនិតគ្នាប្រលងប្រណាំងពលកម្ម សិក្សារៀនសូត្រ រួមគ្នាអនុវត្តល្អគោលការណ៍ គោលនយោបាយរបស់បក្សនិងរដ្ឋ កសាងជីវភាពកាន់តែត្រជាក់ត្រជុំបរិបូរ សុភមង្គល៕
អត្ថបទ៖ ឌិញធុយ រូបថត៖ ទន់អាញ់
ប្រែសម្រួលនិងបញ្ចូលទិន្នន័យ៖ យ័ញលើយ
