ការអនុវត្តគោលនយោបាយស្ទុះផ្លោះ
ទីក្រុងកំណត់ការកែលម្អតុបតែងទីក្រុងគឺជាភារកិច្ចចម្បងដើម្បីលើកកម្ពស់គុណភាពការរស់នៅ។ ដោយយកផលប្រយោជន៍របស់ប្រជាជនធ្វើជាកត្តាគន្លឺះ ទីក្រុងចេញគោលនយោបាយសងសំណង និងតាំងទីលំនៅថ្មីឡើងវិញ។
ចំពោះដីមិនមែនកសិកម្មដែលបានប្រើប្រាស់មុនថ្ងៃទី១៥ ខែតុលា ឆ្នាំ១៩៩៣ កម្រិតឧបត្ថម្ភស្មើ ៧០% ថ្លៃដី ចាប់ពីថ្ងៃទី១៥ ខែតុលា ឆ្នាំ១៩៩៣ ដល់មុនថ្ងៃទី១ ខែកក្កដា ឆ្នាំ២០០៤ បានឧបត្ថម្ភ ៥៦% ចាប់ពីថ្ងៃទី១ ខែកក្កដា ឆ្នាំ ២០០៤ ដល់មុនថ្ងៃទី១ ខែកក្កដា ឆ្នាំ២០១៤ បានឧបត្ថម្ភ ៤២%។ ចំពោះដីកសិកម្ម កម្រិតឧបត្ថម្ភស្មើ ៧០% ថ្លៃដីយោងតាមផែនការដែលបានស្ថាប័នសមត្ថកិច្ចឆ្លងអនុម័ត។
តំណាងឱ្យមន្ទីរកសិកម្ម និងបរិស្ថានទីក្រុង ហូជីមិញ ឱ្យដឹងបន្ថែមថា៖
“ក្រៅពីនេះ ទីក្រុងនៅឧបត្ថម្ភ ៦០% ថ្លៃផ្ទះចំពោះផ្នែកផ្ទៃដីដែលស្ថិតនៅក្នុងច្រករបៀងការពារព្រែក ប្រឡាយ ព្រមទាំងធានាចំណែកតាំងទីលំនៅឡើងវិញយ៉ាងតិចបំផុតជូនប្រជាជន។ ក្នុងករណីប្រាក់សំណងមិនគ្រប់គ្រាន់ដើម្បីទិញចំណែកតាំងទីលំនៅឡើងវិញតិចបំផុត រដ្ឋនឹងជួយឧបត្ថម្ភចំណែកអតុល្យភាព។ ចំណែកតាំងទីលំនៅឡើងវិញអាចរៀបចំជាដី ផ្ទះសម្បែង ឬជាទឹកប្រាក់ ក្នុងនោះផ្ទះល្វែងតាំងទីលំនៅឡើងវិញតិចបំផុតមានទំហំ ៣០ ម៉ែត្រការ៉េ។ ដើម្បីពន្លឿនវឌ្ឍនភាពនៃការរុះរើធារដី ទីក្រុង ហូជីមិញ ក៏បានជូនរង្វាន់ចំពោះករណីដែលប្រគល់ធារដីឆាប់។ យោងតាមនោះ ក្រុមគ្រួសារណាដែលត្រូវដកហូតដីទាំងស្រុងអាចទទួលបានរង្វាន់ជាទឹកប្រាក់ច្រើនបំផុត ៥០ លានដុង ករណីដកហូតមួយចំណែកត្រូវបានជូនរង្វាន់ជាទឹកប្រាក់ច្រើនបំផុត ២៥ លានដុង។ ចំពោះអង្គភាព កម្រិតប្រាក់រង្វាន់ច្រើនបំផុតរហូតដល់ ១០០ លានដុង”។
យោងតាមមេធាវី ត្រឹន អាញ់ទន់ បានសង្កត់ធ្ងន់ថាបន្តអនុវត្តយ៉ាងសកម្មយន្តការពិសេសដោយឡែកតាមសេចក្តីសម្រេចលេខ 260/2025/QH15 របស់រដ្ឋសភា ក្នុងនោះបង្កើនការប្រគល់សិទ្ធិ និងអំណាចជូនអាជ្ញាធរមូលដ្ឋាន។ ទីក្រុងចាំបាច់ត្រូវបន្តកែលម្អយន្តការឧបត្ថម្ភហិរញ្ញវត្ថុឱ្យមានភាពបត់បែនជាងមុននៅលើមូលដ្ឋានគ្រឺះនៃសេចក្តីសម្រេចចិត្តលេខ 11/2026/QĐ-UBND។ ក្រៅពីនេះ ទីក្រុងសិក្សាស្រាវជ្រាវកសាងកញ្ចប់ឥណទានអនុគ្រោះរយៈពេលវែងសម្រាប់ក្រុមគ្រួសារប្រជាជនស្ថិតក្នុងក្របខ័ណ្ឌត្រូវរុះរើដើម្បីកាត់បន្ថយសម្ពាធហិរញ្ញវត្ថុក្រោយការតាំងទីលំនៅឡើងវិញ។
ការផ្លាស់ប្តូរគំនិតពី “រុះរើសុទ្ធសាធ” ទៅជា “កសាងលម្ហរស់នៅឡើងវិញ”
ក្រៅពីប្រភពថវិការដ្ឋដែលនៅមានកម្រិត បញ្ហាធំបំផុតគឺការកៀរគរប្រភពធនធានវិនិយោគ។ ទីក្រុងចាំបាច់ត្រូវធ្វើពិពិធកម្មប្រភពកម្លាំង ជំរុញសង្គមូបនីយកម្ម និងទាក់ទាញសហគ្រាសតាមទម្រង់រូបភាពដៃគូរដ្ឋ - ឯកជន។ ជាក់ស្តែងគម្រោងកែលម្អព្រែកប្រឡាយពីមុនបង្ហាញឲ្យឃើញថាតម្លៃអចលនទ្រព្យ និងសេវាកម្មបានកើនឡើងយ៉ាងខ្លាំង។
អ្នកជំនាញការបានស្នើឱ្យផ្លាស់ប្តូរការគិតផ្តើមពីការគ្រាន់តែរុះរើទៅជាការកសាងលំហរស់នៅឡើងវិញ រៀបចំផែនការហេដ្ឋារចនាសម្ព័ន្ធ និងឧទ្យានសាធារណៈឱ្យមានភាពស្រុះគ្នា។ អនុប្រធានគណៈកម្មាធិការប្រជាជនទីក្រុង លោក ប៊ូយ ស្វឹនកឿង បានអះអាងថា នឹងផ្តល់អាទិភាពដល់ការរៀបចំមូលនិធិផ្ទះតាំងទីលំនៅឡើងវិញភ្ជាប់នឹងផ្ទះសង្គមកិច្ច។ ចំពោះគម្រោងទាំងឡាយជាប់បញ្ហាផ្លូវច្បាប់ប្តូរទៅជាការវិនិយោគសាធារណៈវិញ។
តំណាងឱ្យបំណងរបស់ប្រជាជន ប្រធានក្រុមប្រឹក្សាប្រជាជនទីក្រុង លោក វ៉ វ៉ាន់មិញ សង្កត់ធ្ងន់ថា កម្មវិធីរុះរើផ្ទះ នៅជាប់ព្រែកប្រឡាយគឺជាប្រដាប់វាស់ប្រសិទ្ធភាពនៃការប្រតិបត្តិការរបស់ប្រព័ន្ធនយោបាយ។ តម្រូវការជាបន្តបន្ទាប់គឺត្រូវធានាច្បាស់លាស់ការទទួលខុសត្រូវ ច្បាស់វឌ្ឍនភាព និងច្បាស់ប្រភពធនធាន។ ឆ្លងតាមរយៈនោះ កម្មវិធីនឹងឈានដល់គោលដៅបង្កើតមុខមាត់ថ្មីឲ្យទីក្រុង៕
អត្ថបទនិងរូបថត៖ អានហៀវ
ប្រែសម្រួល៖ អៀងថាន់
