បរិចា្ចគដីសាងសង់អគារវប្បធម៌
ឆ្នាំនេះមានអាយុ ៧១ ឆ្នាំ លោក ឌៀវស្រាញ់ គឺជាអ្នកមានប្រជាប្រិយភាពម្នាក់ក្នុងចំណោមអ្នកមានប្រជាប្រិយភាព ក្នុងតំបន់បងប្អូនជនជាតិភាគតិចខេត្ត ឡឹមដុង ហើយក៏ជាគំរូមនុស្សមានវ័យច្រើន គំរូភ្លឺថ្លាប្រចាំភូមិនិគម ប៊ូនុង ឃុំ ក្វាងទ្រឹក។ នេះជាដែនដីជួរមុខនៃមាតុភូមិ។ លោក ឌៀវស្រាញ់ ចែករំលែកថា លោកបានកើត និងធំដឹងក្តីនៅភូមិ ប៊ូ ប្រាំង ១ ឃុំ ក្វាងទ្រឹក ជិតព្រំដែន កម្ពុជា។ ក្រោយពីរៀបការរួច លោកបានរើទៅនៅភូមិនិគម ប៊ូនុង និងបានផ្សារភ្ជាប់ជាមួយនឹងទីនេះអស់រយៈពេលជិត ៥០ ឆ្នាំមកហើយ។
ដោយពង្រីកតួនាទីលើកធ្វើជាគំរូ និងស្មារតីដើម្បីសហគមន៍ នៅឆ្នាំ ២០២៣ គ្រួសារលោក ឌៀវស្រាញ់ បានបរិច្ចាគដីជូនរដ្ឋដើម្បីកសាងអគារវប្បធម៌សហគមន៍ភូមិ ប៊ូនុង។ សំណង់ត្រូវបានបញ្ចប់រួចរាល់នៅឆ្នាំ ២០២៤។ អគារវប្បធម៌ភូមិនិគមបានសម្រេចរួចរាល់ជាស្ថាពរបានជួយឱ្យមាមីងបងប្អូនមានបន្ថែមលំហប្រជុំជីវភាពវប្បធម៌ ព្រមទាំងជួយឱ្យមូលដ្ឋានសម្រេចបានលក្ខណៈវិនិច្ឆ័យសំខាន់មួយក្នុងការអនុវត្តកម្មវិធីគោលដៅជាតិកសាងជនបទថ្មី។
យោងតាមប្រសាសន៍របស់លោក ឌាន់ មិញធន់ អនុប្រធានគណៈកម្មាធិការប្រជាជនឃុំ ក្វាងទ្រឹក បានឱ្យដឹងថា លោក ឌៀវស្រាញ់ គឺជាគំរូមនុស្សវ័យច្រើនជាគំរូភ្លឺថ្លារបស់ភូមិនិគម ប៊ូនុង និយាយដោយឡែក និងឃុំ ក្វាងទ្រឹក និយាយរួម។
ខែ កញ្ញា ឆ្នាំ ២០២៤ គណៈកម្មាធិការប្រជាជនឃុំ ក្វាងទ្រឹក បានផ្ញើសំបុត្រថ្លែងអំណរគុណលោក ឌៀវស្រាញ់ និងគ្រួសារអំពីការរួមវិភាគទានជាក់ស្តែង ទាន់ពេលវេលាសម្រាប់មូលដ្ឋាននៅពេលបានបរិច្ចាគដីលំនៅឋាន និងដីកសិកម្មជាង ១.២០០ ម៉ែត្រការ៉េ ដើម្បីកសាងសំណង់អគារវប្បធម៌ភូមិនិគម។ នាខែ មិថុនា ឆ្នាំ ២០២៤ ប្រធានគណៈកម្មាធិការប្រជាជនខេត្ត ដាក់ណុង (អតីតខេត្ត បច្ចុប្បន្នជាខេត្ត ឡឹមដុង) បានប្រគល់ប័ណ្ណសរសើរជូនគ្រួសារលោក ឌៀវស្រាញ់ ដោយមានស្នាដៃឆ្នើមក្នុងការងារ និងសកម្មភាពនានាដើម្បីសហគមន៍។
ជិត ២០ ឆ្នាំថែរក្សាព្រៃនៅជួរមុខនៃមាតុប្រទេស
លោក ឌៀវកា នៅភូមិនិគម ប៊ូប្រាំង 1A ឃុំ ក្វាងទ្រឹក ក៏ជាអ្នកមានប្រជាប្រិយភាពក្នុងតំបន់បងប្អូនជនជាតិភាគតិចខេត្ត ឡឹមដុង ដែរ។ លោកជាគំរូក្នុងការគោរពប្រតិបត្តិតាមគោលការណ៍របស់បក្ស គោលនយោបាយ ច្បាប់របស់រដ្ឋផង ជាអ្នកនាំមុខគេក្នុងការងារឃោសនា ចលនាមាមីងបងប្អូនផងដោយមានទស្សនៈថា៖ រដ្ឋធ្វើគឺដើម្បីយើង ល្អសម្រាប់គ្រួសារយើង ភូមិនិគមយើង។
លោក ឌៀវកា (អាយុ ៦២ ឆ្នាំ) មានរយៈពេលជិត ២០ ឆ្នាំដែលបានទទួលការប្រគល់ឱ្យគ្រប់គ្រងការពារព្រៃឈើនៅគណៈគ្រប់គ្រងព្រៃការពារខ្សែក្រវាត់ព្រំដែន (ខេត្ត ឡឹមដុង)។ ក្រុមរបស់លោកត្រូវបានប្រគល់ឱ្យគ្រប់គ្រងព្រៃការពារជាង ១១០ ហិកតា។ នេះជាតំបន់ព្រំដែនដែលមានសណ្ឋានដីកូនភ្នំចោត គ្រោះថ្នាក់ ពិបាកធ្វើដំណើរទៅមកយ៉ាងខ្លាំង។ លោក ឌៀវកា រៀបរាប់ប្រាប់៖ “ជាច្រើនឆ្នាំកន្លង ក្រុមរបស់ខ្ញុំបានចែកជាច្រើនក្រុមតូចៗ និងផ្លាស់វេនគ្នាទៅល្បាត សហការជាមួយម្ចាស់ព្រៃដើម្បីអនុវត្តការគ្រប់គ្រង ការការពារ ការទប់ស្កាត់រាល់សកម្មភាពទន្ទ្រានបំផ្លាញព្រៃឈើ។ ដល់រដូវប្រាំង ក្រុមអនុវត្តភារកិច្ចបន្ថែមទៀតទាក់ទងនឹងការបង្ការនិងពន្លត់អគ្គិភ័យព្រៃឈើ និងគ្រប់គ្រងមនុស្សចេញចូលព្រៃ ការប្រើប្រាស់ភ្លើងនៅក្នុងព្រៃផងដែរ...”។
យោងតាមប្រសាសន៍របស់លោក ដូ ថាញ់តឹម អនុប្រធានគណៈគ្រប់គ្រងព្រៃការពារខ្សែក្រវាត់ព្រំដែន ក្រុមគ្រប់គ្រង ការពារព្រៃឈើដែលលោក ឌៀវកា ធ្វើជាប្រធានបានផ្សារភ្ជាប់ជាមួយនឹងការងារប្រគល់ឱ្យ គ្រប់គ្រងការពារព្រៃឈើរបស់អង្គភាពតាំងពីឆ្នាំ ២០០៧ មក (មុនឆ្នាំ ២០២៥ គឺជាគណៈគ្រប់គ្រងព្រៃការពារ ថាកមើ)។ នេះក៏ជាក្រុមដែលមានស្នាដៃគួរឱ្យចាប់អារម្មណ៍ដោយសារចាប់តាំងពីដើមមកមិនដែលបណ្តោយឱ្យកើតមានករណីកាប់បំផ្លាញព្រៃឈើ ការអាស្រ័យផលព្រៃឈើ ការទន្ទ្រានយកដីព្រៃ ឬអគ្គិភ័យព្រៃឈើនៅក្នុងតំបន់ដែលបានប្រគល់ឱ្យគ្រប់គ្រង និងការពារឡើយ។ “សាមីខ្លួនលោក ឌៀវកា ស្ទាត់ជំនាញសណ្ឋានដីយ៉ាងខ្លាំង ហើយធ្វើជាគំរូ មានការទទួលខុសត្រូវក្នុងការការពារព្រៃឈើ បានក្លាយជាស្នូលរបស់ក្រុមក្នុងដំណើរការបំពេញភារកិច្ច។ អង្គភាពម្ចាស់ព្រៃទុកចិត្តយ៉ាងខ្លាំងនៅពេលបានប្រគល់ព្រៃ និងសហការគ្រប់គ្រង ការពារព្រៃឈើជាមួយមាមីងបងប្អូន”។
បច្ចុប្បន្នភូមិនិគម ប៊ូប្រាំង 1A មានជាង ១៥០ ក្រុមគ្រួសារ ដោយមានប្រជាជនប្រមាណ ៥០០ នាក់ ភាគច្រើនជាជនជាតិ ម៉្នុង។ ប្រព័ន្ធហេដ្ឋារចនាសម្ព័ន្ធចរាចរណ៍ អគ្គិសនី ផ្លូវចរាចរណ៍ សាលារៀន ស្ថានីយសុខាភិបាល អគារវប្បធម៌... នៅភូមិនិគម ប៊ូប្រាំង 1A សុទ្ធតែត្រូវបានរដ្ឋវិនិយោគសាងសង់យ៉ាងស្អាតបាតមាំទាំ ឆ្លើយតបតម្រូវការរបស់ប្រជាជន។ លោក ឌៀវកា ឱ្យដឹងថា មានប្រភេទសំណង់ គម្រោងហេដ្ឋារចនាសម្ព័ន្ធជាច្រើននៅក្នុងភូមិនិគមមានការរួមវិភាគទានរបស់មាមីងបងប្អូន ចាប់តាំងពីកម្លាំងថ្ងៃពលកម្មរហូតដល់ការបរិច្ចាគដីធ្លី ដើមឈើ ជញ្ជាំងរបងជាដើម។
តាមលោក ឌៀវកា ទស្សនៈឥតប្រែប្រួលក្នុងដំណើរចលនាមាមីងបងប្អូនគឺត្រូវពន្យល់ឱ្យពួកគាត់យល់អំពីការយកចិត្តទុកដាក់របស់បក្ស រដ្ឋ ផ្នែកជំនាញ អាជ្ញាធរមូលដ្ឋាន។ ផ្តើមពីនោះ មាមីងបងប្អូនមានលក្ខខណ្ឌអំណោយផលបំផុតសម្រាប់ប្រកបរបររកស៊ីធ្វើសេដ្ឋកិច្ច និងបង្កើនកម្រិតជីវភាពសម្ភារៈ ស្មារតី គោរពតាមគោលការណ៍ គោលនយោបាយរបស់បក្ស និងរដ្ឋ។
ក្វាងទ្រឹក គឺជាឃុំមួយក្នុងចំណោមឃុំព្រំដែនដីគោករបស់ខេត្ត ឡឹមដុង ដោយមានផ្ទៃដីទូលំទូលាយ (ជិត ៥៦.០០០ ហិកតា) នឹងមានប្រជាជនជិត ៣.២០០ ក្រុមគ្រួសារ ក្នុងនោះមានជាង ៤៥% គឺជាគ្រួសារបងប្អូនជនជាតិភាគតិច។ យោងតាមសេចក្តីសម្រេចចិត្តផ្តល់អនុម័តគម្រោងប្លង់រួមឃុំ ក្វាងទ្រឹក ដែលបានគណៈកម្មាធិការប្រជាជនខេត្ត ឡឹមដុង អនុម័តនៅចុងខែ មិថុនា ឆ្នាំ ២០២៦ ឃុំគឺជាអង្គភាពរដ្ឋបាលពិសេសដោយឡែកមានលក្ខណៈយុទ្ធសាស្ត្រ និងបានកំណត់ថាជាមជ្ឈមណ្ឌលពាណិជ្ជកម្មនៅលើច្រករបៀងសេដ្ឋកិច្ច បូព៌ា-បស្ចិម ខេត្ត ឡឹមដុង៕
អត្ថបទនិងរូបថត៖ ហ៊ឹងធិញ
ប្រែសម្រួល៖ អៀងថាន់
