រួមដៃគ្នាលុបបំបាត់ផ្ទះបណ្តោះអាសន្ននៅតំបន់លំបាកលំបិន
ប៉ុស្តិ៍ការពារព្រំដែន អៀ រវ៉េ ត្រូវបានប្រគល់ភារកិច្ចឱ្យគ្រប់គ្រង ការពារព្រំដែន វៀតណាម និង កម្ពុជា ចំណុះភូមិសាស្រ្តឃុំ អៀ រវ៉េ ខេត្ត ដាក់ឡាក់។ តំបន់ដែលប៉ុស្តិ៍គ្រប់គ្រងរួមមានភូមិនិគមចំនួន ១២ ចំណុះឃុំ អៀ រវ៉េ ដោយមានក្រុមគ្រួសារប្រជាជនជាង ២.០០០ គ្រួសារ។ នៅទីនេះមានបងប្អូនជនជាតិចំនួន ២០ រស់នៅជាមួយគ្នា។ រយៈពេលកន្លង ទោះបីជាមានការយកចិត្តទុកដាក់ពីគណៈកម្មាធិការបក្ស និងអាជ្ញាធរមូលដ្ឋានក៏ដោយ ក៏អាកាសធាតុ និងដីមិនអំណោយផលទើបការរស់នៅរបស់ប្រជាជននៅទីនេះនៅតែជួបការលំបាកជាច្រើន។ អត្រាក្រុមគ្រួសារក្រីក្រ និងជិតបន្ទាត់ក្រីក្រក្នុងឃុំមានជាង ៦២%។
អតីតយុទ្ធជន ង្វៀន វ៉ាន់តួ នៅភូមិ ៦ ឃុំ អៀ រវ៉េ ស្ថិតក្នុងស្ថានភាពលំបាកលំបិន ឈឺថ្នាក់ញឹកញាប់ ហើយគ្រួសាររបស់គាត់គ្មានទីពឹងទៀត។ ពីមុន គាត់រស់នៅក្នុងផ្ទះចាស់ ចង្អៀតចង្អល់ និងទ្រុឌទ្រោម ប៉ុន្តែគ្មានថវិកាជួសជុលឡើយ។ ខែ កក្កដា ឆ្នាំ ២០២៤ កងទ័ពការពារព្រំដែនខេត្ត ដាក់ឡាក់ បានឧបត្ថម្ភគ្រួសារលោកចំនួន ៥០ លានដុង ដើម្បីសាងសង់ផ្ទះថ្មី ទន្ទឹមនោះ ចាត់កម្មាភិបាល យុទ្ធជនមកជួយគ្រួសារគាត់ក្នុងការសាងសង់ផ្ទះ ហើយចុះសួរសុខទុក្ខ លើកទឹកចិត្ត និងពិនិត្យសុខភាពគាត់ជាប្រចាំ។
នៅពេលជួបយុទ្ធជនប៉ុស្តិ៍ការពារព្រំដែន អៀ រវ៉េ ម្តងទៀត លោក តួ មិនអាចលាក់បាំងបានការត្រេកអរ ហើយអួតបង្ហាញថា ផ្ទះថ្មីបានជួយការរស់នៅរបស់គ្រួសារលោកកាន់តែស្ថិរភាព។ ផ្ទះថ្មីរបស់គ្រួសារលោកធំទូលាយគួរសម មាំទាំ។ មានផ្ទះស្ថិរភាពហើយ គ្រួសារលោកស្ងប់ចិត្តបើកពង្រីកការចិញ្ចឹមមាន់បង្កើនប្រាក់ចំណូល។
យោងតាមលោក ផាន ហាយដាំង អនុប្រធានភូមិ ៦ ឃុំ អៀ រវ៉េ ឆ្នាំ ២០២៤ ភូមិសាស្រ្តភូមិនិគមមានគ្រួសារចំនួន ៤ ត្រូវបានឧបត្ថម្ភផ្ទះបណ្តោះអាសន្ន។ ក្នុងនោះ មាន ២ ក្រុមគ្រួសារត្រូវបានបញ្ជាការដ្ឋានកងទ័ពការពារព្រំដែនខេត្ត ដាក់ឡាក់ ឧបត្ថម្ភថវិកា ប៉ុស្តិ៍ការពារព្រំដែន អៀ រវ៉េ ឧបត្ថម្ភពលករសម្រាប់ការសាងសង់។ នេះជាការងារដ៏មានអត្ថន័យ រួមចំណែកកែលម្អជីវភាពប្រជាជន ពង្រឹងទំនាក់ទំនងរវាងកងទ័ព និងប្រជាជននៅតំបន់ព្រំដែន ពង្រឹងថែមទៀតក្តីទុកចិត្តរបស់ប្រជាជនចំពោះគោលការណ៍របស់បក្ស គោលនយោបាយ ច្បាប់របស់រដ្ឋ។
ថែទាំជីវភាពគ្រួសារគោលនយោបាយនៅតំបន់ព្រំដែន
ដោយមានស្លោកថា “បងប្អូនបណ្តាជនជាតិគឺជាបងប្អូនបង្កើត” និងលើកតម្កើងសីលធម៌ “ផឹកទឹក នឹកប្រភព” ក្នុងរយៈពេលប៉ុន្មានឆ្នាំកន្លង កម្មាភិបាល យុទ្ធជននៃប៉ុស្តិ៍ការពារព្រំដែន អៀ រវ៉េ បានរៀបចំកម្មវិធី និងសកម្មភាពជាក់ស្តែងជាច្រើន ដើម្បីថែទាំជីវភាពគ្រួសារគោលនយោបាយ អ្នកមានគុណបំណាច់ក្នុងភូមិសាស្រ្ត។ នេះក៏ជាវិធីអប់រំប្រពៃណីបដិវត្តន៍ដែលផ្សារភ្ជាប់នឹងភារកិច្ចនយោបាយសម្រាប់ទាហានបំពេញកាតព្វកិច្ចរក្សាការពារព្រំដែនមាតុភូមិ។
យោងតាមវរសេនីយ៍ត្រី ង្វៀន ឌឹកហូវ ស្នងការរងនយោបាយនៃប៉ុស្តិ៍ការពារព្រំដែន អៀ រវ៉េ ក្នុងប៉ុន្មានឆ្នាំកន្លងហើយ ប៉ុស្តិ៍បានដាក់ដំណើរការសកម្មភាពតបស្នងសងគុណជាច្រើនក្នុងភូមិសាស្រ្ត។ ក្នុងរយៈពេលពីរឆ្នាំ ឆ្នាំ ២០២៤ និងឆ្នាំ ២០២៥ មានគ្រួសារចំនួន ៧ ត្រូវបានអង្គភាពអង្កេតមើល ធ្វើសេនាធិការថ្នាក់ដឹកនាំកងទ័ពការពារព្រំដែន ដាក់ឡាក់ ជួយលុបបំបាត់ផ្ទះបណ្តោះអាសន្ន (តម្លៃ ៥០ លានដុងក្នុងមួយក្រុមគ្រួសារ)។ អង្គភាពបានទទួលទំនុកបម្រុងវីរមាតា វៀតណាម ១ រូបក្នុងភូមិសាស្រ្តតាំងពីឆ្នាំ ២០១៦។ លើសពីនេះ កម្មាភិបាល យុទ្ធជននៃប៉ុស្តិ៍តែងតែចុះសួរសុខទុក្ខរឿយៗ លើកទឹកចិត្ត និងជូនអំណោយដល់បណ្តាក្រុមគ្រួសារកំពុងគោរពបូជាយោធិនពលីក្នុងភូមិសាស្រ្ត។ តាមរយៈនោះ កងទ័ពការពារព្រំដែនត្រូវបានអប់រំប្រពៃណីបដិវត្តន៍ ការដឹងគុណចំពោះអ្នកជំនាន់មុនដែលបានលះបង់ជីវិតដើម្បីបុព្វហេតុរំដោះ និងបង្រួបបង្រួមប្រទេសជាតិ។
ក្នុងឱកាសបុណ្យទានម្តងៗ ប៉ុស្តិ៍ការពារព្រំដែន អៀ រវ៉េ តែងតែជូនអំណោយដល់បណ្តាគ្រួសារគោលនយោបាយ អ្នកមានកិត្យានុភាពនៅតាមភូមិនិគម និងគ្រួសារមានស្ថានភាពលំបាក។ លើសពីនេះទៅទៀត កម្មាភិបាល យុទ្ធជនពាក់ស័ក្តិពណ៌បៃតងក៏ដាក់ដំណើរការគំរូប្រកបដោយប្រសិទ្ធភាព ជាក់ស្តែងជាច្រើនសម្រាប់ប្អូនៗ សិស្សដូចជា៖ កូនធម៌ប៉ុស្តិ៍ការពារព្រំដែន ម្តាយទំនុកបម្រុងសិស្សក្រីក្រ ទ្រជំហានប្អូនៗ ទៅសាលារៀនជាដើម។
ក្នុងការអភិវឌ្ឍសេដ្ឋកិច្ច ប៉ុស្តិ៍ការពារព្រំដែន អៀ រវ៉េ បានឧប្ថម្ភប្រជាជនអនុវត្តន៍ជាច្រើនគំរូចិញ្ចឹមសត្វ ដាំដុះប្រកបដោយប្រសិទ្ធភាព រួមចំណែកដល់សុខុមាលភាពសង្គមក្នុងមូលដ្ឋាន។ លើសពីនេះ កម្មាភិបាល យុទ្ធជននៃប៉ុស្តិ៍ការពារព្រំដែន អៀ រវ៉េ ក៏យកចិត្តទុកដាក់យ៉ាងសកម្មចំពោះគ្រួសារគោលនយោបាយនៅក្នុងភូមិសាស្រ្តក្នុងរយៈពេលជាច្រើនឆ្នាំកន្លងមកនេះ។ ការងារនេះរួមចំណែកពង្រឹងសាមគ្គីភាពរវាងប្រជាជន និងកងកម្លាំងការពារព្រំដែនក្នុងការការពារកន្លែងជួរមុខរបស់ប្រទេស៕
អត្ថបទ៖ ង៉ុកមិញ រូបថត៖ តឿងគ្វឹន
ប្រែសម្រួល និង បញ្ចូលទិន្នន័យ៖ ចន្ថា
