ពីថ្ងៃទី ២០ ខែ កក្កដា ដល់ថ្ងៃទី ២០ ខែ សីហា ឆ្នាំ ២០២៥ សាលាចំណេះទូទៅជនជាតិបង្រៀននិងរៀនពេញមួយថ្ងៃបឋមសិក្សានិងអនុវិទ្យាល័យ សឺនលៀន (ឃុំ សឺនតីថឿង) បានបើកថ្នាក់បង្រៀនភាសា វៀតណាម ឱ្យសិស្សត្រៀមចូលរៀនថ្នាក់ទី ១។ អ្នកគ្រូ ឌិញ ធីយៀម (គ្រូបង្រៀនថ្នាក់ភាសា វៀតណាម ឱ្យកូនសិស្សត្រៀមចូលរៀនថ្នាក់ទី ១ របស់សាលា) បានឱ្យដឹងថា ឧបសគ្គធំបំផុតគឺការដែលប្អូននៅឯផ្ទះប្រាស្រ័យទាក់ទងជាមាតុភាសាតែប៉ុននោះ។ ព្រោះហេតុដូច្នោះហើយ អ្នកគ្រូត្រូវគួបផ្សំទាំងភាសា វៀតណាម និងគ្រាមភាសាប្រកបដោយភាពបត់បែនដើម្បីជួយប្អូនៗ យល់មេរៀន។ “អំឡុងថ្ងៃដំបូងទើបចូលមកកាន់ថ្នាក់រៀន ប្អូនៗ នៅប្លែកអារម្មណ៍ ញញើតញញើមណាស់។ ខ្ញុំមិនត្រឹមតែបង្រៀនក្មេងៗ របៀបកាន់ប៊ិច អង្គុយត្រឹមត្រូវតាមឥរិយាបថឬក៏សរសេរតួអក្សមូលដ្ឋានប៉ុននោះទេ ថែមទាំងត្រូវតែបង្ហាញប្រាប់របៀបប្រាស្រ័យទាក់ទកទៀតផង អ្នកគ្រូឱដឹងដូច្នេះ។
ឆ្នាំសិក្សា ២០២៥ - ២០២៦ សាលាចំណេះទូទៅជនជាតិបង្រៀននិងរៀនពេញមួយថ្ងៃបឋមសិក្សានិងអនុវិទ្យាល័យ សឺនលៀន មានសិស្សថ្នាក់ទី ១ ចំនួន ២៦ នាក់។ ទាំងអស់សុទ្ធតែជាជនជាតិ កាយ៉ុង។ នាយិការងសាលា ឡេ ធីថាញ់ធុយ បានឱ្យដឹងថា សាលាម្ចាស់ការកសាងកម្មវិធីមុនបឋមសិក្សាយ៉ាងជិតស្និទ្ធទៅនឹងជីវភាពប្អូនៗ ប្រើរូបភាព ហ្គេម បទចម្រៀងជាច្រើនដើម្បីទុកឱ្យប្អូនៗ រៀនតែលេង។ ស្របពេលនោះដែរ សាលាចាត់ចែងគ្រូបង្រៀនមានមុខជំនាញ អស់ពីចិត្តពីថ្លើម និងយល់ដឹងជ្រៅជ្រះវប្បធម៌នៅមូលដ្ឋានដើម្បីធ្វើឱ្យការបង្រៀនកាន់តែមានប្រសិទ្ធភាពថែមទៀត។
ដូចគ្នានេះដែរ សាលាបឋមសិក្សា ត្រាផុង (ឃុំ តីត្រា) បានធ្វើពិពិធកម្មសកម្មភាពពង្រឹងភាសា វៀតណាម បន្ថែមដូចជា៖ ហ្វឹកហាត់ រៀបចំល្បែងសមូហភាពនិងសិល្បៈដើម្បីលើកទឹកចិត្តដល់ការធ្វើម្ចាស់ការប្រាស្រ័យទាក់ទងគ្នារបស់កូនសិស្ស។ លោក ដូ មិញឌិញ នាយករងទទួលបន្ទុកសាលាបានសង្កត់ធ្ងន់ថា ចំពោះសិស្សសាលាជនជាតិភាគតិច ភាសា វៀតណាម ប្រៀបដូចជាភាសាបរទេស ត្រូវការសិក្សាជាប្រចាំ។ ដូច្នេះហើយ សាលាបានជំរុញឱ្យអាណាព្យាបាលប្រើប្រាស់ភាសា វៀតណាម ឱ្យបានទៀងទាត់ពេលប្រាស្រ័យទាក់ទងនៅឯផ្ទះដើម្បីបង្កើនលទ្ធភាពវាក្យសព្ទសម្រាប់ប្អូនៗ។
ក្រៅពីនេះ គណៈចាងហ្វាងសាលាក៏ជ្រើសរើសខ្លឹមសារអប់រំទាំងឡាយមានអត្តសញ្ញាណវប្បធម៌មូលដ្ឋាន តំបន់ភូមិភាគ រួមបញ្ចូលទៅក្នុងសកម្មភាពអប់រំទាំងឡាយ សមស្របជាមួយចំណុចសាលានីមួយៗ បង្កើតភាពស្និទ្ធស្នាលដើម្បីក្មេងៗ ចូលរួមសកម្មភាពអប់រំយ៉ាងសកម្ម។ អ្នកស្រី ហូ ធីថេម (ភូមិ ត្រាង៉ា ឃុំ តីត្រា) ចែករំលែកថា ពីពេលទៅរៀនថ្នាក់ពង្រឹងបន្ថែម កូនអ្នកស្រីមិនត្រឹមតែចេះស្តាប់ អាន សរសេរតួអក្សរមូលដ្ឋានប៉ុននោះទេ ថែមទាំងសម្របខ្លួនជាមួយមិត្រភក្ដិកាន់តែល្អប្រសើរថែមទៀតផង។
យោងតាមស្ថិតិរបស់មន្ទីរអប់រំនិងបណ្តុះបណ្តាលខេត្ត ក្វាងង៉ាយ ឆ្នាំសិក្សា ២០២៥ - ២០២៦ ទូទាំងខេត្តមានកុមារជាង ៣២.៨០០ នាក់ចូលរៀនថ្នាក់ទី ១ ក្នុងនោះមានជាង ១១.៦០០ ប្អូនជាជនជាតិភាគតិច។ នាយកមន្ទីរអប់រំនិងបណ្តុះបណ្តាលខេត្ត ក្វាងង៉ាយ លោក ង្វៀន ង៉ុកថៃ បញ្ជាក់ថា គម្រោងពង្រឹងភាសា វៀតណាម បន្ថែមជាយុទ្ធសាស្ត្រសំខាន់មួយ ជួយប្អូនៗ ហាត់ពត់បំណិនទាំង ៤ ស្តាប់ និយាយ អាន សរសេរ រៀនចំណាំដោយវិធីសាស្រ្តសិក្សារៀនសូត្រនិងបើកអនាគតកាន់តែភ្លឺស្វាងស្រស់បំព្រងថែមទៀត។
“ផ្នែកអប់រំខេត្តបន្តអនុវត្តសារាចរលេខ 23/2023/TT-BGDĐT ចុះថ្ងៃទី ៨ ខែ ធ្នូ ឆ្នាំ ២០២៣ របស់ក្រសួងអប់រំ និងបណ្តុះបណ្តាល “បទប្បញ្ញត្តិស្តីពីការបង្រៀននិងរៀនភាសា វៀតណាម ឱ្យកុមារជាជនជាតិភាគតិចមុនពេលចូលរៀនថ្នាក់ទី ១” សហការជាមួយមូលដ្ឋានទាំងឡាយឃោសនា លើកកម្ពស់ការយល់ដឹងដល់សហគមន៍។ស្របពេលនោះដែរ ផ្នែកបញ្ជាចង្អុលបង្ហាញនិងណែនាំសាលារៀនកសាងបរិស្ថានអប់រំយកកុមារធ្វើមជ្ឈមណ្ឌល បង្កើតបរិយាកាសអាននិងសិក្សារៀនសូត្រភាសា វៀតណាម ស្និទ្ធស្នាល មានប្រសិទ្ធភាព"។ លោក ង្វៀន ង៉ុកថៃ បានសង្កត់ធ្ងន់ដូច្នេះ៕
អត្ថបទនិងរូបថត៖ ឌិញ ធីហឿង
ប្រែសម្រួលនិងបញ្ចូលទិន្នន័យ៖ យ័ញលើយ
