អស់រយៈពេលជាងមួយថ្ងៃហើយ ទឹកជំនន់នៅទន្លេកើនឡើងយ៉ាងលឿនបានធ្វើឱ្យជន់លិចតំបន់មួយចំនួននៃឃុំ ទ្រុងយ៉ា ដាភុក ទីក្រុង ហាណូយ។ គណៈបញ្ជាការទប់ទល់ការពារស៊ីវិល បានរួមកម្លាំងជាមួយកងទ័ព នគរបាល និងកងកម្លាំងឈានមុខចាត់ចែងចលនា ជួយប្រជាជនផ្លាស់ទីទៅកាន់កន្លែងសុវត្ថិភាព។ ទន្ទឹមនោះ ប្រមូលផ្តុំកងកម្លាំងការពារទប់ទំនប់ទឹក ទប់ស្កាត់កុំឱ្យទឹកជន់លិច។ មកទល់ពេលនេះ ទំនប់ទឹកទាំងឡាយក្នុងភូមិសាស្រ្ត អានឡាក ផុងមី... ត្រូវបានពូនឡើងប្រហែល ១ ម៉ែត្រ ដើម្បីទប់ស្កាត់មិនឲ្យទឹកហូរចូលតំបន់ប្រជានិវេសន៍ខាងក្នុងទំនប់។
ក៏ប៉ុន្តែ នៅរសៀលថ្ងៃទី ៩ ខែ តុលា មួយចំនួនគ្រឹះនៃខ្សែផ្លូវរថភ្លើង ហាណូយ - ថាយង្វៀន ឆ្លងកាត់ឃុំ ទ្រុងយ៉ា ត្រូវបានទឹកជន់លិច និងកួចរសាត់ទៅ បណ្ដាលឱ្យផ្លូវរថភ្លើងត្រូវរបើករបាញ ខ្សែផ្លូវរថភ្លើងត្រូវជាប់គាំង។ កងកម្លាំងនៃអគ្គក្រុមហ៊ុនផ្លូវដែក វៀតណាម មានវត្តមាននៅកន្លែងកើតហេតុវាយតម្លៃការខូចខាតដើម្បីរកដំណោះស្រាយ ជួសជុល គ្រោងថាខ្សែរថភ្លើងនឹងបើកឡើងវិញក្នុងរយៈពេលប៉ុន្មានថ្ងៃខាងមុខនេះ។
អញ្ជើញចុះមកសួរសុខទុក្ខ លើកទឹកចិត្តប្រជាជនក្នុងមូលដ្ឋាន លោកនាយករដ្ឋមន្ត្រីបានណែនាំ និងសង្ឃឹមថាបងប្អូនមាមីងនឹងសាមគ្គី ជួយទំនុកបម្រុងគ្នាទៅវិញទៅមក ហើយគោរពតាមការណែនាំរបស់កងកម្លាំងសមត្ថកិច្ចយ៉ាងម៉ឺងម៉ាត់ ដោយផ្តល់អាទិភាពដល់ការជួយសង្គ្រោះមនុស្សចាស់ កុមារ និងស្ត្រីមានផ្ទៃពោះ។ល។
នាយករដ្ឋមន្ត្រីបានស្នើឱ្យទីក្រុង ហាណូយ និងស្ថាប័នពាក់ព័ន្ធទាំងឡាយសិក្សាស្រាវជ្រាវរាវរកដំណោះស្រាយរយៈពេលវែង និងជាមូលដ្ឋានគ្រឺះសម្រាប់ទំនប់ព្រោះថានាពេលនេះកម្ពស់នៃកម្រិតទឹកទន្លេបានកើនឡើងលើសកម្រិតទឹកជំនន់ដែលជាប្រវត្តិសាស្ត្រហើយ៕
អត្ថបទ៖ ផាមទីប រូបថត៖ យឿងយ៉ាង
ប្រែសម្រួលដោយ៖ ចន្ថា
