ចង្វាក់ជីវិតថ្មីកំពុងហូរចូលពាសពេញច្រកល្ហកភូមិ។ មនុស្សចាស់ក្មេងតូចមូលមីរជុំគ្នាយ៉ាងសប្បាយក្បែរសំយ៉ាបផ្ទះ យុវជនមមាញឹកជួសជុលឧបករណ៍កសិកម្ម ឬក៏ប៉ះសំណាញ់ សំឡេងម៉ាស៊ីនកិនស្រូវលាន់ឮអឺងកងពេញភូមិពេលរសៀលម្តងៗ ជាដើម។ លោក ឡា វ៉ាន់តាម ប្រធានភូមិ កផាត ចែករំលែកថា ជនជាតិ ដានឡាយ ឥឡូវនេះចេះចិញ្ចឹមសត្វ ដាំដុះស្រូវស្រែ ចេះទទួលម៉ៅការការពារព្រៃឈើនិងប្រើប្រាស់គ្រឿងម៉ាស៊ីនក្នុងផលិតកម្មហើយ។ គ្រួសារជាច្រើនទិញបានម៉ូតូ ទូរទស្សន៍។
ការផ្លាស់ប្តូរដ៏ធំនេះបានគឺដោយសារកម្មវិធីគម្រោងរបស់បក្សនិងរដ្ឋ។ "តួយ៉ាងគឺកម្មវិធីគោលដៅជាតិអភិវឌ្ឍសេដ្ឋកិច្ច - សង្គមតំបន់បងប្អូនជនជាតិភាគតិចនិងតំបន់ភ្នំដំណាក់កាល ២០២១ - ២០៣០ (កម្មវិធីលេខ ១៧១៩)។ លោក ផាម ម៉ាញ់ហ៊ុង ប្រធានគណៈកម្មាធិការប្រជាជនឃុំ ម៉ូនស៊ើន ឱ្យដឹងថា មូលដ្ឋានជាឃុំព្រំដែនដោយមានខ្សែបន្ទាត់ព្រំដែនជាប់ ឡាវ ជាង ៣៥ គីឡូម៉ែត្រចំនួនប្រជាជនជាង ៩០% ជាបងប្អូនជនជាតិភាគតិច។ គោលនយោបាយទាំងឡាយឧបត្ថម្ភទាន់ពេលវេលាបានបង្កើតកម្លាំងជំរុញដ៏ខ្លាំងក្លាដើម្បីជនជាតិ ដានឡាយ ជឿជាក់លើខ្លួនឯងឈោងឈានឡើង។
មកទល់នឹងពេលនេះ ហេដ្ឋារចនាសម្ព័ន្ធនៅឃុំ ឃាប៊ុង និង កផាត បានធ្វើឱ្យសុក្រឹតព្រមៗ គ្នា។ ភូមិនិគមមានអគារវប្បធម៌ ស្ថានីយសុខភាព បណ្តាញភ្លើងអគ្គិសនីជាតិនិងបានអុជបំភ្លឺដោយប្រព័ន្ធភ្លើងបំភ្លឺថាមពលពន្លឺព្រះអាទិត្យបណ្តោយតាមខ្សែផ្លូវស៊ីវិល។ ដងផ្លូវទាំងឡាយត្រូវបានចាក់ជាបេតុង។ សាខាសាលារៀនទាំងឡាយត្រូវបានសាងសង់នៅក្នុងភូមិតែម្តង ជួយកូនក្មួយបងប្អូនជនជាតិមកកាន់ថ្នាក់រៀនចិញ្ចឹមក្តីសុបិនច្បាមយកការសិក្សាយូរអង្វែង។ ផ្ទះទ្រុឌទ្រោមទាំងឡាយកាលពីមុននេះត្រូវបានជំនួសដោយផ្ទះសម្បែងដ៏រឹងមាំ ធំទូលាយស្អាតបាត។ ទទួលផ្ទះថ្មីពីកម្មវិធីឧបត្ថម្ភ លោកស្រី ឡា ធីហ៊ើយ នៅភូមិ ឃាបុង អួលដើមកចែករំលែកថា ការទទួលបានផ្ទះមាំទាំនៅក្នុងវ័យជ្រេទៅហើយគឺជាក្តីសុភមង្គលធំបំផុតដែលពេញមួយជីវិតលោកស្រីមិនហ៊ានស្រមៃដល់។
ដំណក់ទឹកភ្នែកសុភមង្គលរបស់លោកស្រី ហ៊ើយ គឺជាសក្ខីភាពសម្រាប់ជីវភាពរស់នៅសុខដុមរមនារបស់ជនជាតិ ដានឡាយ កណ្តាលព្រៃព្រឹក្សា ពូម៉ាត ដ៏ធំល្វឹងល្វើយនាសព្វថ្ងៃនេះ៕
អត្ថបទនិងរូបថត៖ ស៊ន់តៀន
ប្រែសម្រួល៖ យ័ញលើយ
