ធានារ៉ាប់រងសុខភាព - ទីបង្អែកការពារសុខភាពជូនប្រជាជន

វៀនយុង

23/08/2026 17:10

បច្ចុប្បន្ននេះ ក្នុងបរិការណ៍ថ្លៃចំណាយពិនិត្យ ព្យាបាលជំងឺកាន់តែកើនឡើងពីមួយថ្ងៃទៅមួយថ្ងៃ ការចូលរួមធានារ៉ាប់រងសុខភាពកាន់តែបញ្ជាក់តួនាទីជា "ផ្ទាំងខែល" ការពារសុខភាពរបស់គ្រួសារនីមួយៗ។ នៅ ដាក់ឡាក់ ដោយមានការចូលរួមពីប្រព័ន្ធនយោបាយទាំងមូល ការងារអភិវឌ្ឍន៍អ្នកចូលរួមធានារ៉ាប់រងសុខភាពសម្រេចបានលទ្ធផលជាច្រើន ធ្វើឲ្យគោលដៅថែទាំសុខភាពប្រជាជនទាំងមូលក្លាយទៅជាភាពជាក់ស្តែងពីមួយជំហានទៅមួយជំហាន។

គោលនយោបាយជ្រាបចូលក្នុងការរស់នៅ
អស់រយៈពេលជាច្រើនឆ្នាំមកហើយ សមាជិកទាំង ៧ នាក់ក្នុងគ្រួសារបងស្រី ង្វៀន ធីគីមហុង នៅក្រុមលំនៅឋាន ២ សង្កាត់ ថាញ់ញ៉ឹត (ខេត្ត ដាក់ឡាក់) សុទ្ធតែបានចូលរួមក្នុងការធានារ៉ាប់រងសុខភាព។ សម្រាប់បងស្រី នេះមិនត្រឹមតែជាការម្ចាស់ការការពារសុខភាពប៉ុននោះទេ ថែមទាំងជាការវិនិយោគចាំបាច់ដើម្បីបង្ការហានិភ័យដែលមិនអាចស្មានដល់ផងដែរ។ អ្នកស្រី ហុង ពោលប្រាប់ថា ការចូលរួមធានារ៉ាប់រងសុខភាពអស់រយៈពេលជាច្រើនឆ្នាំជាមួយនឹងគ្រប់សមាជិកគ្រួសារទាំងអស់បានជួយឱ្យគ្រួសារស្ងប់ចិត្តមួយចំណែក កាត់បន្ថយថ្លៃចំណាយយ៉ាងច្រើនទៅលើការពិនិត្យ ព្យាបាលជំងឺនៅពេលឈឺថ្កាត់ម្តងៗ។

បងប្អូនជនជាតិទទួលបានការមើល ពិនិត្យសុខភាពដោយប្រើប័ណ្ណធានារ៉ាប់រងសុខភាពនៅស្ថានីយសុខាភិបាលឃុំ ក្រុងអាណា ខេត្ត ដាក់ឡាក់។

តថភាពជាក់ស្តែងបានបង្ហាញឲ្យឃើញថា តម្លៃនៃការធានារ៉ាប់រងសុខភាពបានបង្ហាញយ៉ាងជាក់ច្បាស់បំផុតនៅពេលអ្នកជំងឺត្រូវការព្យាបាលជំងឺធ្ងន់ធ្ងរ បង់ថ្លៃចំណាយខ្ពស់។ អ្នកស្រី វូ ធីហុងវ៉ឹន (នៅក្រុមលំនៅឋាន ១៨ សង្កាត់ ថាញ់ញ៉ឹត) ឱ្យដឹងថា ប្តីរបស់គាត់គឺលោក ដូ មិញដាវ (កើតឆ្នាំ ១៩៧០) តែងតែឈឺជារឿយៗ។ ថ្មីៗ នេះ លោកត្រូវវះកាត់បេះដូង និងដាក់ ស្ទេន នឹងចំណាយថវិកាព្យាបាលសរុបជាង ១៣០ លានដុង។ អាស្រ័យដោយបានចូលរួមការធានារ៉ាប់រងសុខភាព មូលនិធិធានារ៉ាប់រងបានទូទាត់ជាង ៧០ លានដុង ជួយគ្រួសារឆ្លងកាត់ដំណាក់កាលលំបាក។

អ្នកស្រី វ៉ឹន ចែករំលែក ប្រសិនបើគ្មានការធានារ៉ាប់រងសុខភាពទេ គ្រួសាររបស់គាត់នឹងពិបាកដោះស្រាយនឹងការចំណាយទៅលើការព្យាបាលយ៉ាងច្រើនបែបនេះ។ ដូច្នេះហើយ អ្នកស្រីប្រាប់ថាមនុស្សគ្រប់គ្នាគួរតែចូលរួមក្នុងការធានារ៉ាប់រងសុខភាពដើម្បីមានទីពឹងផ្អែកនៅពេលមានជំងឺតម្កាត់។

ប្រជាជនត្រូវបានពិគ្រោះអំពីផលប្រយោជន៍ គោលនយោបាយនៃការធានារ៉ាប់រងសុខភាព។

ចំពោះបងប្អូនជនជាតិ ការធានារ៉ាប់រងសុខភាពនៅបង្ហាញយ៉ាងច្បាស់ពីលក្ខណៈមនុស្សធម៌នៃគោលនយោបាយសុខុមាលភាព។ បងស្រី ហនឹម នីអេ (ជនជាតិ អេដេ នៅភូមិ អេកាំ ឃុំ ក្រុងអាណា ខេត្ត ដាក់ឡាក់) ឱ្យដឹងថា គ្រួសាររបស់គាត់មានសេចក្តីសោមនស្សរីករាយយ៉ាងខ្លាំងដែលទទួលបានប័ណ្ណធានារ៉ាប់រងសុខភាពពីរដ្ឋ។ រាល់ពេលឈឺថ្កាត់ម្តងៗ សមាជិកគ្រួសារសុទ្ធតែទុកចិត្តទៅពិនិត្យ ព្យាបាលជំងឺ រួមចំណែកកាត់បន្ថយបន្ទុកសេដ្ឋកិច្ច។ រឿងរ៉ាវជីវិតពិតទាំងនេះបង្ហាញថា ការធានារ៉ាប់រងសុខភាពមិនត្រឹមតែជួយប្រជាជនកាត់បន្ថយថ្លៃព្យាបាលប៉ុននោះទេ ថែមទាំងបង្កើតស្មារតីស្ងប់ចិត្តនៅពេលទទួលបានសេវាថែទាំសុខភាពទៀតផង។ នេះក៏ជាភស្តុតាងច្បាស់លាស់នៃប្រសិទ្ធភាពគោលនយោបាយសុខុមាលភាពនៅពេលផលប្រយោជន៍របស់អ្នកចូលរួមត្រូវបានធានាភ្លាមៗ នៅពេលចាំបាច់បំផុត។

វិធានការយ៉ាងស៊ីចង្វាក់គ្នាជាច្រើន
គិតដល់ចុងខែ មិថុនា ឆ្នាំ ២០២៦ ខេត្ត ដាក់ឡាក់ ទាំងមូលមានប្រជាជនជាង ២,៧ លាននាក់ចូលរួមក្នុងការធានារ៉ាប់រងសុខភាព សម្រេច ៩៩,៣% នៃផែនការ កើនឡើងជាង ១៤៥.០០០ នាក់បើប្រៀបធៀបទៅនឹងរយៈពេលដូចគ្នាក្នុងឆ្នាំ ២០២៥ អត្រាគ្របដណ្តប់ ៩៣,៩% នៃចំនួនប្រជាជន។ ក្នុងឆមាសទី ១ ឆ្នាំ ២០២៦ ខេត្តទាំងមូលមានការពិនិត្យសុខភាព ព្យាបាលជំងឺដោយធានារ៉ាប់រងសុខភាពជាង ២,៥៥ លានដង ដោយការចំណាយសរុបជាង ១.៥០៧ ពាន់លានដុង (កើនឡើង ១១៥,២ ពាន់លានដុង ស្មើនឹង ៨,២៧%) បើប្រៀបធៀបនឹងរយៈពេលដូចគ្នាក្នុងឆ្នាំ ២០២៥។

ផ្នែកសុខាភិបាល ដាក់ឡាក់ ផ្តោតលើការពង្រឹងសុខាភិបាល លើកកម្ពស់គុណភាពពិនិត្យ ព្យាបាលជំងឺជូនប្រជាជន។

ដើម្បីសម្រេចបានលទ្ធផលខាងលើ ក្នុងឆមាសទី ១ ខេត្តទាំងមូលបានរៀបចំចំនួន ៣៤៨ កិច្ចប្រជុំឃោសនាមានមនុស្សចូលរួមជាង ១៩.២០០ នាក់។ ដោយឡែកខែចលនាអនុវត្តការធានារ៉ាប់រងសុខភាពប្រជាជនទាំងមូលឆ្នាំ ២០២៦ បានរៀបចំចំនួន ១១៨ ពិធីបើកប្រតិបត្តិការចំនួន ១៨ ការពិគ្រោះយោបល់ជាក្រុមតូចៗ ចំនួន ១៨៦ និងសាខាទូរគមនាគមន៍សហគមន៍ចំនួន ១៩ ឆ្លងតាមរយៈនោះចលនាបន្ថែមជាង ៨.១០០ នាក់ឱ្យចូលរួមក្នុងការធានារ៉ាប់រងសុខភាព។ គំរូដូចជាពង្រីកតួនាទីរបស់អ្នកមានប្រជាប្រិយភាពក្នុងចំណោមបងប្អូនជនជាតិ ឬទិសស្លោក "ចូលទៅកាន់ច្រកនីមួយៗ គោះទ្វារផ្ទះនីមួយៗ" នៅតែបន្តមានប្រសិទ្ធភាព។

លោកស្រី លេ ធីថាញ់ហាំង សហការីនៅការិយាល័យធានារ៉ាប់រងសង្គមសង្កាត់ ថាញ់ញ៉ឹត ឱ្យដឹងថា អស់រយៈពេល ២០ ឆ្នាំកន្លង លោកស្រីតែងតែឃោសនាអំពីការធានារ៉ាប់រងសុខភាពជាប្រចាំតាមរយៈការប្រជុំភូមិ ក្រុមលំនៅឋាន ប្រជុំសកម្មភាពសមាគមនារី និងចុះទៅចលនាជួបគ្រួសារនីមួយៗ ដោយផ្ទាល់។ មានគ្រួសារជាច្រើនបន្ទាប់ពីបានឃើញផលប្រយោជន៍ ឬជួបប្រទះបញ្ហាសុខភាពបានម្ចាស់ការចូលរួមក្នុងការធានារ៉ាប់រងសុខភាពសម្រាប់ឱ្យសមាជិកទាំងអស់។ ក្នុងតួនាទីជាសហការី លោកស្រីតែងតែត្រៀមខ្លួនជាស្រេចជួយប្រជាជន ព្រមទាំងអត់ធ្មត់ពន្យល់ឱ្យប្រជាជនយល់កាន់តែច្បាស់អំពីផលប្រយោជន៍របស់ការធានារ៉ាប់រងសុខភាព។

ការចូលរួមធានារ៉ាប់រងសុខភាពបញ្ជាក់ពីតួនាទីជា "ផ្ទាំងខែល" ការពារសុខភាពរបស់គ្រួសារនីមួយៗ។

លោក ផាន ថាញ់វៀត អនុប្រធានគណៈកម្មាធិការប្រជាជនឃុំ ក្រុងអាណា ឱ្យដឹងថា បច្ចុប្បន្នអត្រាគ្របដណ្តប់ការធានារ៉ាប់រងសុខភាប្រជាជនទាំងមូលរបស់ឃុំសម្រេចជាង ៩៥%។ មូលដ្ឋាននៅតែបន្តជំរុញការឃោសនាដើម្បីឱ្យប្រជាជនមានស្មារតីយល់ដឹងកាន់តែពេញលេញអំពីគោលនយោបាយធានារ៉ាប់រងសុខភាព។ បច្ចុប្បន្ន ស្ថានីយសុខាភិបាលឃុំជាមូលដ្ឋានបំពេញលក្ខខណ្ឌសម្រាប់ការពិនិត្យ ព្យាបាលជំងឺដោយមានវេជ្ជបណ្ឌិតចំនួន ៣ នាក់។ ក៏ប៉ុន្តែ គ្រឿងសម្ភារដូចជាម៉ាស៊ីនថតកាំរស្មីអ៊ិច ធ្វើតែស្តជាដើមនៅតែខ្វះខាត។ មូលដ្ឋានសង្ឃឹមថាផ្នែកសុខាភិបាលបន្តវិនិយោគគ្រឿងឧបករណ៍ដើម្បីលើកកម្ពស់គុណភាពថែទាំសុខភាពប្រជាជន។

ស្របពេលជាមួយនឹងការពង្រីកវិសាលភាពគ្របដណ្តប់ ផ្នែកសុខាភិបាល ដាក់ឡាក់ ក៏ផ្តោតលើការលើកកម្ពស់គុណភាពពិនិត្យ ព្យាបាលជំងឺ ជំរុញបរិវត្តកម្មឌីជីថល បង្កើតលក្ខខណ្ឌសម្រាប់ប្រជាជនប្រើសេវាថែទាំសុខភាពបានយ៉ាងងាយស្រួល ទទួលផលប្រយោជន៍យ៉ាងពេញលេញ។

លោក ផាម មិញហ៊ឺវ នាយករងមន្ទីរសុខាភិបាលខេត្ត ដាក់ឡាក់ ថ្លែងថា បច្ចប្បន្នមូលដ្ឋានមានប្រជាជនជាង ៣ លាននាក់ ក្នុងនោះមានបងប្អូនជនជាតិជាច្រើន តំបន់ជ្រៅ តំបន់ឆ្ងាយ តែងតែបានបក្ស និងរដ្ឋផ្តល់អាទិភាពគោលនយោបាយឧបត្ថម្ភដើម្បីពង្រីកការគ្របដណ្តប់ធានារ៉ាប់រងសុខភាព។ លើសពីនេះ ផ្នែកសុខាភិបាលមូលដ្ឋានក៏បន្តលើកកម្ពស់គុណភាពសេវាកម្ម ដើម្បីបង្កើតទំនុកចិត្តសម្រាប់ប្រជាជន ពង្រឹងប្រព័ន្ធចំនួន ១០២ ស្ថានីយសុខាភិបាលតាមគំរូអាជ្ញាធរមូលដ្ឋានពីរថ្នាក់ ដោយមានមជ្ឈមណ្ឌលសុខាភិបាលប្រចាំតំបន់ជាង ២២ កន្លែង មន្ទីរពេទ្យពហុព្យាបាលជាង ១០ កន្លែង រួមជាមួយនឹងបណ្តាញមន្ទីរពេទ្យឯកជនអភិវឌ្ឍ។

ផ្នែកកំពុងផ្តោតលើការពង្រឹងសុខាភិបាលថ្នាក់មូលដ្ឋាន លើកកម្ពស់គុណភាពពិនិត្យ ព្យាបាលជំងឺជូនប្រជាជន ព្រមទាំងអនុវត្តការពិនិត្យសុខភាពតាមកាលកំណត់ជូនប្រជាជនទាំងមូល។ ផ្នែកប្រឹងប្រែងរហូតដល់ចុងឆ្នាំ ២០២៦ មាន ១០០% ប្រជាជនទទួលបានការពិនិត្យសុខភាពតាមកាលកំណត់ ឆ្លងតាមរយៈនោះរកឃើញជំងឺទាន់ពេលវេលា រួមចំណែកកាត់បន្ថយថ្លៃព្យាបាល និងជំរុញការអភិវឌ្ឍធានារ៉ាប់រងសុខភាពប្រជាជនទាំងមូល។

ការធានារ៉ាប់រងសុខភាពមិនត្រឹមតែជាគោលនយោបាយសុខុមាលភាពសង្គមប៉ុននោះទេ ថែមទាំងជាឧបករណ៍ជួយប្រជាជនទទួលបានសេវាថែទាំសុខភាពប្រកបដោយសមធម៌ កាត់បន្ថយបន្ទុកហិរញ្ញវត្ថុនៅពេលឈឺថ្កាត់ម្តងៗ។ នៅពេលគោលនយោបាយបន្តរីកសាយភាយ រួមជាមួយនឹងការលើកកម្ពស់គុណភាពពិនិត្យ ព្យាបាលជំងឺ និងពង្រឹងប្រព័ន្ធថែទាំសុខភាពនៅថ្នាក់មូលដ្ឋាន ទំនុកចិត្តរបស់ប្រជាជនលើការធានារ៉ាប់រងសុខភាពនឹងត្រូវបានពង្រឹងបន្ថែមទៀត រួមចំណែកធ្វើឲ្យក្លាយទៅជាភាពជាក់ស្តែងគោលដៅគ្របដណ្តប់ការធានារ៉ាប់រងសុខភាពប្រជាជនទាំងមូល៕

អត្ថបទនិងរូបថត៖ ង្វៀនយុង
ប្រែសម្រួល៖ ចន្ថា

កាសែតរូបភាពជនជាតិនិងតំបន់ភ្នំ