គំរូនេះរួមចំណែកដល់ការលើកកម្ពស់ប្រសិទ្ធភាពបរិវត្តកម្មឌីជីថលនៅក្នុងកងកម្លាំងកងទ័ពការពារព្រំដែន ស្រពពេលនោះដែរសាយភាយចលនា "ប្រជាសិក្សាឌីជីថល" ដល់បងប្អូនជនជាតិតំបន់ព្រំដែន បង្រួមគម្លាតឌីជីថលនិងលើកកម្ពស់បំណិនឌីជីថលជូនប្រជាជនពីមួយជំហានទៅមួយជំហាន។
ផ្តើមចេញពីតម្រូវការជាក់ស្តែង
បរិវត្តកម្មឌីជីថលប្រព្រឹត្តឡើងងខ្លាំងក្លានៅគ្រប់វិស័យទាំងអស់។ ក៏ប៉ុន្តែតំបន់ព្រំដែននៅតែជាកន្លែងជួបលំបាកលំបិនជាច្រើនអំពីហេដ្ឋារចនាសម្ព័ន្ធបច្ចេកវិទ្យានិងបំណិនប្រើប្រាស់ឧបករណ៍ឌីជីថល។ ប្រជាជនជាច្រើននៅអល់អែកនៅពេលចូលប្រើសេវាសាធារណៈអនឡាញ កំណត់អត្តសញ្ញាណតាមអេឡិចត្រូនិច ទូទាត់ប្រាក់ដោយមិនប្រើសាច់ប្រាក់ឬបំណិនធានាសុវត្ថិភាពតាមអ៊ីនធឺណិត។
ផ្តើមចេញពីភាពជាក់សែ្ដងនោះ លោកអនុសេនីយ៍ឯក ក្វាង អាញ់គ្វន់ ជំនួយការទទួលបន្ទុកកិច្ចការមហាជន ការិយាល័យនយោបាយ (គណៈបញ្ជាការកងទ័ពការពារព្រំដែនខេត្ត ដៀនបៀន) បានកសាងគំរូ "យុទ្ធជនសក្តិពណ៌បៃតងពន្លឿនបរិវត្តកម្មឌីជីថល" ក្នុងគោលបំណងលើកកម្ពស់សមត្ថភាពឌីជីថលជូនកម្មាភិបាល យុទ្ធជន ស្របពេលនោះដែរនាំបច្ចេកវិទ្យាឌីជីថលឱ្យកាន់តែខិតជិតប្រជាជននៅតំបន់ព្រំដែនថែមទៀត។
យោងតាមអនុសេនីយ៍ឯក ក្វាង អាញ់គ្វន់ គំរូត្រូវបានអនុវត្តពីចុងឆ្នាំ ២០២៥ ហើយរហូតមកដល់ឥឡូវនេះបានចម្លងទូលំទូលាយនៅសាខាសម្ព័ន្ធយុវជនកុម្មុយនិស្ត ហូ ជីមិញ ចំនួន ១៩ ក្នុងកងទ័ពការពារព្រំដែនខេត្ត។ សាខាសម្ព័ន្ធយុវជនកុម្មុយនិស្ត ហូ ជីមិញ នីមួយៗ បង្កើតក្រុមជំនួយឌីជីថលរួមមានពី ៣ ដល់ ៥ សមាជិកដែលមានចំណេះដឹងផ្នែកបច្ចេកវិទ្យាព័ត៌មានដើម្បីណែនាំកម្មាភិបាល យុទ្ធជននិងប្រជាជនក្នុងការប្រើប្រាស់បណ្តាវេទិកាឌីជីថល។ អង្គភាពនានាក្នុងពេលដំណាលគ្នាកសាងមូលដ្ឋានទិន្នន័យសមាជិកសម្ព័ន្ធយុវជន បង្កើត "សាខាសម្ព័ន្ធយុវជនឌីជីថល" "ឯកសារឌីជីថល" "បណ្ណាល័យឌីជីថល" ប្រើកូដ QR ក្នុងការឃោសនាច្បាប់និងជម្រុញយ៉ាងខ្លាំងក្លាការប្រើប្រាស់បណ្តាវេទិកាបណ្តាញសង្គមផ្លូវការបម្រើភារកិច្ចគ្រប់គ្រង ឃោសនា។ ការធ្វើឌីជីថលភាវូបនីយកម្មទិន្នន័យផ្ទៃក្នុងបានបង្កើតមូលដ្ឋានគ្រឹះដើម្បីបណ្តាអង្គភាពផ្លាស់ប្តូរថ្មីវិធីសាស្រ្តឃោសនា។ ជំនួសឱ្យបណ្តាទម្រង់ប្រពៃណី វីដេអូ ព័ត៌មានក្រាហ្វិកនិងផលិតផលប្រើបញ្ញាសិប្បនិម្មិត (AI) ជាច្រើនត្រូវបានកសាងដោយមានខ្លឹមសារសង្ខេបខ្លី ផ្ទាល់ភែ្នក សមស្របទៅនឹងទម្លាប់ចូលប្រើព័ត៌មានរបស់ប្រជាជន។
រហូតមកដល់ពេលនេះ សាខាសម្ព័ន្ធយុវជននីមួយៗ បានបង្កើតចំនួន ៣ វីដេអូនិងចំនួន ១០ ផលិតផលរូបភាពប្រើ AI បម្រើការឃោសនាច្បាប់។ ផលិតផលទាំងឡាយត្រូវបានបង្ហោះលើវេទិកាឌីជីថលរបស់អង្គភាព ទាក់ទាញប្រហែល ១០.០០០ លើកអ្នកចូលចិត្តនិងជាង ១ លានលើកនាក់ធ្វើអន្តរកម្ម រួមចំណែកសាយភាយគោលការណ៍របស់បក្ស គោលនយោបាយ ច្បាប់របស់រដ្ឋដល់បងប្អូនជនជាតិតំបន់ព្រំដែនដោយវិធីសាស្រ្តទំនើប ងាយស្រួលចូលប្រើ។
ការនាំយកបច្ចេកវិទ្យាឌីជីថលទៅកាន់ភូមិនិគមនីមួយៗ
ណាហ៊ី គឺជាឃុំព្រំដែនរបស់ខេត្ត ដៀនបៀន ដោយមានចំនួន ១.៣៩៥ ក្រុមគ្រួសារ មនុស្សចំនួន ៧.៦៩៧ នាក់ ស្ថិតក្នុងចំណោម ៨ ជនជាតិរស់នៅជាមួយគ្នា ក្នុងនោះបងប្អូនជនជាតិ ម៉ុង មានជិត ៨៩% នៃចំនួនប្រជាជន។ ដើម្បីនាំយកបច្ចេកវិទ្យាឌីជីថលមកកាន់តែជិតប្រជាជនថែមទៀត ប៉ុស្តិ៍ការពារព្រំដែន ណឹមញឺ បានបង្កើតក្រុមមេឌៀឌីជីថលរួមមានកម្មាភិបាល យុទ្ធជនចំនួន ៥ នាក់តែងតែចុះទៅភូមិនីមួយៗ ណែនាំប្រជាជនដំឡើងនិងប្រើប្រាស់កម្មវិធី VNeID បង្កើតគណនីប្រអប់សំបុត្រអេឡិចត្រូនិច ស្កេនកូដ QR ចូលប្រើសេវាសាធារណៈតាមអនឡាញនិងវេទិកាឌីជីថលដ៏ចាំបាច់ជាប្រចាំ។ ខ្លឹមសារឃោសានាត្រូវបានបង្ហាញដោយប្រើរូបភាព និមិត្តសញ្ញា វីដេអូខ្លីៗ ជួយឱ្យប្រជាជនងាយស្រួលយល់ ងាយចងចាំនិងងាយអនុវត្ត។ អង្គភាពបានដាក់ពង្រាយប្រព័ន្ធកូដ QR ទទួលព័ត៌មាននៅតាមចំណុចសាធារណៈ។ ឆ្លងតាមរយៈវិធីសាស្ត្រនេះ កងកម្លាំងការពារព្រំដែនបានទទួល ពិនិត្យបញ្ជាក់ចំនួន ៣៥ ប្រភពព័ត៌មានដែលផ្តល់ដោយប្រជាជន រួមចំណែកលើកកម្ពស់ប្រសិទ្ធភាពក្តាប់ស្ថានភាពភូមិសាស្ត្រ លើកស្ទួយតួនាទីរបស់សាធរណៈជនក្នុងការការពារអធិបតេយ្យភាពទឹកដី សន្តិសុខព្រំដែន។
យោងតាមវរសេនីយ៍ត្រី ដូ ស៊ន់ដៀម ស្នងការនយោបាយប៉ុស្តិ៍ការពារព្រំដែន ណឹមញឺ ជំនួសឱ្យការគ្រាន់តែឃោសនាតាមរយៈបណ្តាកិច្ចប្រជុំភូមិដូចពីមុននេះ អង្គភាពនេះបានគួបផ្សំព័ត៌មានក្រាហ្វិក វីដេអូប្រើ AI និងកូដ QR ដើម្បីផ្សព្វផ្សាយព័ត៌មាន។ ព័ត៌មានក្រាហ្វិកទាំងឡាយត្រូវបានរចនាឡើងសង្ខេបខ្លី ផ្ទាល់ភែ្នក វីដេអូត្រូវបានផលិតយ៉ាងមធ្យ័តអំពីខ្លឹមសារ រូបភាព ធានាសម្លៀកបំពាក់ ឥរិយាបទ អាកប្បកិរិយារបស់តួអង្គ AI ត្រូវតាមបទបញ្ជាយោធាប្រជាជន វៀតណាម។ ជាពិសេស ផលិតផលជាច្រើនក៏បានបញ្ចូលភាសា ម៉ុង ដើម្បីបងប្អូនជនជាតិងាយយល់។ ក្រោយពីពេលផលិតហើយ វីដេអូ ព័ត៌មានក្រាហ្វិកទាំងឡាយត្រូវបានបង្ហោះនៅលើទំព័រអ្នកគាំទ្ររបស់ប៉ុស្តិ៍ការពារព្រំដែន ណឹមញឺ ទំព័រអ្នកគាំទ្ររបស់ឃុំ ណាហ៊ី និងបោះពុម្ពជាខិត្តប័ណ្ណចែកចាយដល់ភូមិនីមួយៗ។ វិធីធ្វើនេះបានរួមចំណែកដល់ការលើកកម្ពស់ការយល់ដឹងច្បាប់ បំណិនឌីជីថលរបស់ប្រជាជន ស្របពេលនោះដែរបង្កើនប្រសិទ្ធភាពឃោសនាក្នុងល័ក្ខខ័ណ្ឌភូមិសាស្ត្រធំ ប្រជាជនរស់នៅរាយប៉ាយ។
លោក វ៉ាង អាវ៉ាង់ លេខាសាខាបក្ខភាគភូមិ ណឹមជួ (ឃុំ ណាហ៊ី) ឱ្យដឹងថា អាស្រ័យដោយបានកម្មាភិបាលប៉ុស្តិ៍ការពារព្រំដែន ណឹមញឺ ណែនាំដោយផ្ទាល់ ប្រជាជនក្នុងភូមិបានចេះប្រើប្រាស់ VNeID ស្កេនកូដ QR ចូលប្រើសេវាសាធារណៈតាមអនឡាញ កាត់បន្ថយពេលវេលាធ្វើដំណើរទៅមកនិងធ្វើឱ្យវាកាន់តែងាយស្រួលថែមទៀតនៅពេលធ្វើបែបបទរដ្ឋបាល។
ចំពោះប្រជាជនជាច្រើនតំបន់ភ្នំ ស្មាតហ្វូនពីមុននេះជាទូទៅប្រើដើម្បីស្តាប់ហៅទូរស័ព្ទឬទំនាក់ទំនងជាមួយសាច់ញាតិប៉ុននោះ។ ក្រោយពីពេលត្រូវបានបណ្តាយុទ្ធជនកងទ័ពការពារព្រំដែនណែនាំដំឡើង VNeID និងប្រើប្រាស់បណ្តាកម្មវិធីឌីជីថល មនុស្សជាច្រើនបានចេះប្រើប្រាស់ប្រកបដោយប្រសិទ្ធភាពបណ្តាមធ្យោបាយជំនួយបម្រើជីវភាពប្រចាំថ្ងៃ។ អ្នកស្រី ហាំង ធីសូ (នៅភូមិ ណឹមញឺ ២) ចែករំលែកថា៖ “កាលពីមុននេះ ខ្ញុំគ្រាន់តែប្រើទូរស័ព្ទដើម្បីហៅទូរស័ព្ទទៅសាច់ញាតិប៉ុននោះ។ ឥឡូវនេះ ខ្ញុំបានដឹងពីរបៀបប្រើ VNeID ស្កេនកូដ QR និងឆែកមើលព័ត៌មានចាំបាច់ជាច្រើន។ ខ្ញុំនឹងណែនាំសាច់ញាតិឱ្យរៀនជាមួយនិងប្រើប្រាស់បច្ចេកវិទ្យាឌីជីថលដោយសុវត្ថិភាព មានប្រសិទ្ធភាព”។
យោងតាមអនុលេខាសម្ព័ន្ធយុវជនកុម្មុយនិស្ត ហូ ជីមិញ ខេត្ត ដៀនបៀន ឡ ស៊ន់ហាញ់ គំរូ "យុទ្ធជនសក្តិពណ៌បៃតងពន្លឿនបរិវត្តកម្មឌីជីថល" បាននាំមកនូវប្រសិទ្ធភាពយ៉ាងច្បាស់ក្រឡែត។ ១០០% សមាជិកសម្ព័ន្ធយុវជន សមាជិកសមាគមនារីក្នុងកងកម្លាំងកងទ័ពការពារព្រំដែនបានលើកកម្ពស់លទ្ធភាពឌីជីថល ទិន្នន័យត្រូវបានធ្វើបមាណីយកម្ម រយៈពេលចាត់ការសំណុំឯកសារការងារកិច្ចការសម្ព័ន្ធយុវជនថយចុះ ៣០ - ៥០% ប្រជាជនរាប់ពាន់លើកនាក់តំបន់ព្រំដែនត្រូវបានឧបត្ថម្ភក្នុងការទទួលបានសេវាកម្មឌីជីថល។ គំរូថែមទាំងរួមចំណែកដល់ការពង្រឹងការឃោសនា ការការពារមូលដ្ឋានគ្រឹះមនោគមវិជ្ជារបស់បក្សនៅបណ្តាញអ៊ីនធឺណិតនិងលើកស្ទួយតួនាទីរបស់យុវជនក្នុងការអនុវត្តសេចក្តីសម្រេច 57-NQ/TW បន្ថែមទៀត។
ផ្តើមពីបណ្តាទង្វើច្បាស់លាស់ ជាក់ស្តែង គំរូបាននាំបរិវត្តកម្មឌីជីថលឱ្យកាន់តែខិតជិតដល់បងប្អូនជនជាតិតំបន់ព្រំដែន រួមចំណែកលើកកម្ពស់បំណិនឌីជីថល កែលម្អជីវភាពរស់នៅនិងបង្កើតមូលដ្ឋានគ្រឹះបន្ថែមដើម្បីកសាងតំបន់ព្រំដែនរឹងមាំ សុវត្ថិភាពនៅក្នុងយុគសម័យឌីជីថល៕
អត្ថបទ៖ ផានគ្វិន - ទីភ្នាក់ងារព័ត៌មានវៀតណាម
ប្រែសម្រួល៖ ពេជ្រពិសិដ្ឋ
