ប្រសិនបើសម្លម្ជូរគ្រឿងត្រូវបានចម្អិនពីគ្រឿងផ្សំជាមួយគ្រឿងទេសបង្កើតរសជាតិជូរលក្ខណៈពិសេសដាច់ដោយឡែករីឯសម្លកកូរក៏ពាំនាំមកនូវរសជាតិម្លាន់ពីខ្ទិះដូង ប្រហុកហើយមានក្លិនឈ្ងុយពិសេសនៃប្រអួល គល់ស្លឹកគ្រៃ សំបកក្រូចសើច ខ្ទឹមស ខ្ជាយ រមៀត រំដេង ត្រូវបានបុកឱ្យម៉ដ្ឋ ច្របល់ចូលគ្នាឱ្យសព្វ បង្កើតបានជាមុខម្ហូបពោរពេញទៅដោយអត្តសញ្ញាណដ៏វិសេសវិសាលរបស់បងប្អូនជនជាតិ ខ្មែរ។
សម្លនេះត្រូវបានមាមីងបងប្អូនចាត់ទុកជា "ស៊ុបយ៉ិនស៊ិន" ដោយសារសារធាតុចិញ្ចឹមខ្ពស់ និងអត្ថប្រយោជន៍ប៉ូវកម្លាំង។ មូលហេតុម្ហូបមានតម្លៃខ្លាំងបែបនេះ គឺដោយសារគ្រឿងផ្សំទាំងអស់ដើម្បីស្លសុទ្ធសឹងតែរុក្ខជាតិធម្មជាតិមានស្រាប់អាចរកបានយ៉ាងងាយនៅជុំវិញផ្ទះ ឬនៅចម្ការក្នុងភូមិ។ គ្រឿងផ្សំទូទៅមាន មើម ផ្កា ផ្លែធ្លាប់ស្គាល់គ្រប់ប្រភេទដូចជា ល្ពៅ ខ្នុរខ្ចី ចេកខ្ចី ម្រះ សណ្តែកកួរ ល្ហុង ត្រប់... ភ្ជាប់ជាមួយនោះគឺជាបន្លែបៃតងជាច្រើនប្រភេទដូចជា ស្លឹកម្រុំ ផ្កាអង្គាដី ស្លឹកបាស ផ្ទី និងបន្លែព្រៃជាច្រើនទៀត។
ទោះមើលទៅហាក់ដូចជាសាមញ្ញក៏ពិតមែនប៉ុន្តែដើម្បីស្លបានមុខសម្លនេះ ចុងភៅត្រូវចំណាយពេលច្រើនត្រៀមរៀបចំ។ គ្រឿងផ្សំត្រូវបានជ្រើសរើសយ៉ាងល្អិតល្អន់ពីប្រភពជាច្រើន រួមទាំងដូងទុំ ប្រហុក បន្លែ ផ្លែ មើម សាច់ជ្រូក ឬត្រីស្រស់ រួមជាមួយនឹងគ្រឿងទេសជាច្រើនទៀត មុនពេលចាប់ផ្តើមស្ល។
ក្នុងអំឡុងពេលចម្អិន ចុងភៅចាប់ផ្តើមចិញ្ច្រាំគ្រឿងទេសរួមមាន គល់ស្លឹកគ្រៃ សំបកក្រូចសើច ខ្ទឹមស ខ្ជាយ រមៀត រំដេង។ គ្រឿងទេសចម្រុះទាំងនេះដាក់ចូលទៅក្នុងខ្ទះ លីង ជាមួយប្រេងឆាបន្តិចបន្តួច។
បន្ទាប់មក ប្រហុកចិញ្ច្រាំគល់ស្លឹកគ្រៃ និងប្រអួលត្រូវបានដាក់ចូលថែម កូរឱ្យសព្វបើកភ្លើងម៉ាល្មូមរហូតដល់មានក្លិនឈ្ងុយ។ ពេលគ្រឿងទេសចម្រុះមានក្លិនឈ្ងុយល្មម ដាក់សាច់ ឬត្រីចូល (បើស្លកកូរត្រី កាត់កង់ៗ ងាយចូលគ្រឿងទេស)។ រង់ចាំរហូតដល់ត្រីឆ្អិនល្មម រួចដាក់បន្លែ និងគ្រឿងទេសនៅសល់ចូល កូរឱ្យសព្វដើម្បីគ្រឿងផ្សំលាយចូលគ្នាល្អ។
ពេលសម្លជិតឆ្អិន ពូតខ្ទិះដូងចូលដើម្បីបង្កើតរសជាតិម្លាន់។ ចុងក្រោយ ភ្លក់បង់គ្រឿងល្មមតាមចំណង់ចំណូលចិត្ត។
លោកស្រី ឡឹម ធី សាវេន អាយុ ៦២ ឆ្នាំ នៅភូមិ កំពង់ទ្រព្យ អា ឃុំ អាននិញ ទីក្រុង កឹនធើ ឲ្យដឹងថា៖ សម្ល កកូរ គឺជាសម្លប្រពៃណីមានរសជាតិប៉ូវកម្លាំង ខ្ញុំបានរៀនចម្អិនពីម្តាយរបស់ខ្ញុំតាំងពីខ្ញុំនៅក្មេង។ ទោះបីចម្អិនមានភាពស្មុគស្មាញបន្តិចប៉ុន្តែម្ហូបនេះត្រូវបានមនុស្សម្នាជាច្រើនចូលចិត្ត ជាពិសេសមនុស្សចាស់ៗ ដោយសាររសជាតិដិត និងអត្ថប្រយោជន៍សម្រាប់សុខភាពទៀតផង។
គ្រឿងផ្សំសំខាន់ៗ រួមមាន សាច់ជ្រូក ត្រីសម្បូរទៅដោយប្រូតេអ៊ីន និងអាស៊ីតម្លាន់អូមេហ្គា-៣ មានកាឡូរីទាប ជំនួយសុខភាពខួរក្បាល និងចក្ខុសម្បទា។ បន្លែចម្រុះសម្បូរទៅដោយវីតាមីន និងសារធាតុរ៉ែ ជួយកែលម្អប្រព័ន្ធរំលាយអាហារ កាត់បន្ថយសម្ពាធឈាម ធ្វើឱ្យជាតិស្ករក្នុងឈាមមានស្ថេរភាព និងជួយដល់ការស្តារសុខភាពឡើងវិញ។
ដូច្នេះ យើងបានមានសម្លដ៏ជក់ចិត្តដោយមានផ្សំបញ្ចូលរវាងរសជាតិដិតនៃប្រហុក ក្លិនឈ្ងុយនៃប្រភេទគ្រឿងទេសប្រពៃណី និងរសជាតិម្លាន់ស្រាលនៃខ្ទិះដូង ពាំនាំមកនូវម្ហូបអាហារសាមញ្ញថែមទាំងដិតដាមដោយលក្ខណ:អន្តោគ្រាម និងបន្សល់ទុកនូវរសជាតិមិនអាចបំភ្លេចបាន៕
ផលិតដោយ៖ សឺន ហេង
