គោលនយោបាយឧបត្ថម្ភជាច្រើន
ខេត្ត វិញឡុង មានចំនួនប្រជាជនសរុបជាង ៣,៣៨ លាននាក់ ក្នុងនោះជាង ៣៧៣.៦៤០ នាក់ជាបងប្អូនជនជាតិ ស្មើនឹង ១១,០៣% នៃចំនួនប្រជាជន ដោយឡែកបងប្អូនជនជាតិ ខ្មែរ ជាង ៣៥៣.០០០ នាក់ ស្មើនឹង ១០,៤២%។ ដោយមានភូមិសាស្រ្តមានបងប្អូនជនជាតិ ខ្មែរ រស់នៅច្រើនកុះករ ខេត្តកំណត់ការកាត់បន្ថយភាពក្រីក្រប្រកបដោយចីរភាពមិនត្រឹមតែជាភារកិច្ចសុខុមាលភាពសង្គមប៉ុននោះទេ ថែមទាំងជាវិធានការសំខាន់សម្រាប់ជំរុញការអភិវឌ្ឍគ្រប់ជ្រុងជ្រោយតំបន់បងប្អូនជនជាតិ ធានាថានៅក្នុងដំណើរការអភិវឌ្ឍន៍គ្មាននរណាម្នាក់ត្រូវទុកចោលនៅខាងក្រោយឡើយ។
ដើម្បីជួយបងប្អូនជនជាតិមានការងាររកស៊ីចិញ្ចឹមជីវិតបានយូរអង្វែង ខេត្ត វិញឡុង បាន ផ្តោតលើការអនុវត្តគោលនយោបាយឧបត្ថម្ភជាច្រើនដល់ការអភិវឌ្ឍផលិតកម្ម បង្កើតការងារធ្វើ បណ្តុះបណ្តាលវិជ្ជាជីវៈ ផ្តល់ប្រាក់កម្ចីឥណទានអនុគ្រោះ និងផ្ទេរវិទ្យាសាស្ត្របច្ចេកទេស។ ផ្តើមពីគោលនយោបាយទាំងនេះ ក្រុមគ្រួសារ ខ្មែរ ជាច្រើនបានក្លៀវក្លា វិនិយោគក្នុងផលិតកម្ម ប្តូរគំរូសេដ្ឋកិច្ចឱ្យសមស្របនឹងស្ថានភាពជាក់ស្តែងរបស់គ្រួសារ។
តួយ៉ាងគឺគ្រួសាររបស់បង ត្រឹម ង៉ុកត្រាង នៅឃុំ ហាមយ៉ាង ធ្លាប់ជាក្រុមគ្រួសារ ខ្មែរ ក្រីក្រ។ ក្រោយពីទទួលបានការឧបត្ថម្ភដីធ្លី លំនៅឋាន គ្រួសារបងបន្តបានទទួលប្រភពឥណទានអនុគ្រោះចំនួន ៥០ លានដុងសម្រាប់អភិវឌ្ឍការងាររកស៊ីចិញ្ចឹមជីវិត។ ផ្តើមពីប្រភពទុននេះ បងវិនិយោគទិញសម្លៀកបំពាក់ប្រពៃណី ខ្មែរ ឧបករណ៍សម្តែង និងអភិវឌ្ឍសេវាកម្មសម្រាប់ការជួលសម្លៀកបំពាក់ ស្អិតស្អាងបម្រើពិធីមង្គលការ ពិធីបុណ្យ និងសកម្មភាពវប្បធម៌របស់បងប្អូនជនជាតិ ខ្មែរ។
ដោយបានបណ្តុះបណ្តាលផ្នែកសិល្បៈរបាំ ខ្មែរ បងសម្តែងផ្ទាល់ផង ផ្តល់សេវាកម្មសម្រាប់ក្រុមសិល្បៈ វត្តនិងអង្គភាពរៀបចំព្រឹត្តិការណ៍ទាំងក្នុងស្រុក និងក្រៅស្រុកផង។ ការងាររបស់បងមមាញឹកនៅរដូវបុណ្យចូលឆ្នាំថ្មី បុណ្យសែនដូនតា បុណ្យអកអំបុក និងពិធីបុណ្យផ្នែកពុទ្ធសាសនា ខ្មែរ ជាដើមរបស់សហគមន៍ប្រជានិវេសន៍ ផ្តល់ប្រាក់ចំណូលស្ថិរភាពផង រួមចំណែកថែរក្សា និងលើកស្ទួយអត្តសញ្ញាណវប្បធម៌ជនជាតិផង។
លោក តាំង គ្វឹកទិញ នាយករងការិយាល័យប្រតិបត្តិការធនាគារគោលនយោបាយសង្គម ត្រាគូ មានប្រសាសន៍ថា អង្គភាពតែងតែសហការជាមួយអាជ្ញាធរមូលដ្ឋាន អង្គការនយោបាយ - សង្គមទទួលការប្រគល់ និងក្រុមសន្សំសំចៃ ខ្ចីទុនដើម្បីផ្តល់ប្រភពទុនអនុគ្រោះចំមុខសញ្ញា រួមចំណែកជួយប្រជាជនមានលក្ខខណ្ឌអភិវឌ្ឍផលិតកម្ម បង្កើតការងារធ្វើ និងលំនឹងជីវភាព។
គិតត្រឹមថ្ងៃទី ៣០ ខែ មិថុនា ឆ្នាំ ២០២៦ ប្រភពទុនសរុបរបស់ការិយាល័យប្រតិបត្តិការធនាគារគោលនយោបាយសង្គម ត្រាគូ សម្រេចបានជាង ១.០៤២ ពាន់លានដុង ប្រាក់កម្ចីសរុបដែលមិនទាន់សងបណ្តាកម្មវិធីឥណទានសម្រេចជាង ៩៧៤ ពាន់លានដុង ដោយមានក្រុមគ្រួសារក្រីក្រ ក្រុមគ្រួសារជិតបន្ទាត់ភាពក្រីក្រ និងមុខសញ្ញាគោលនយោបាយផ្សេងនៅមិនទាន់សង។ ប្រភពទុនបានជួយក្រុមគ្រួសារក្រីក្រ ក្រុមគ្រួសារជិតភាពក្រីក្ររាប់ពាន់ក្រុមគ្រួសារ និងបងប្អូនជនជាតិ ខ្មែរ វិនិយោគលើការអភិវឌ្ឍសេដ្ឋកិច្ច បង្កើតការងារធ្វើ បង្កើនប្រាក់ចំណូល និងរួចផុតពីភាពក្រីក្រពីមួយជំហានទៅមួយជំហាន។
លើកកម្ពស់លទ្ធភាព
លទ្ធផលពីគំរូការងាររកស៊ីចិញ្ចឹមជីវិតគឺជាសក្ខីកម្មអំពីប្រសិទ្ធភាពនៃការអនុវត្តគោលនយោបាយជនជាតិ សាសនានៅក្នុងភូមិសាស្រ្តខេត្ត។ ដំណាក់កាល ២០២៦ - ២០៣០ វិញឡុង បន្តកំណត់ការកាត់បន្ថយភាពក្រីក្រប្រកបដោយចីរភាព និងការអភិវឌ្ឍតំបន់ជនជាតិជាភារកិច្ចសំខាន់ ភ្ជាប់នឹងគោលដៅកសាងជនបទថ្មី និងការអភិវឌ្ឍសេដ្ឋកិច្ច - សង្គម។
ចំពោះកម្មវិធីគោលដៅជាតិស្តីអំពីការកាត់បន្ថយភាពក្រីក្រប្រកបដោយចីរភាព ខេត្តផ្តោតលើវិធានការជួយឧបត្ថម្ភការងាររកស៊ីចិញ្ចឹមជីវិត អភិវឌ្ឍផលិតកម្មតាមខ្សែចង្វាក់តម្លៃ ការបណ្តុះបណ្តាលវិជ្ជាជីវៈ ដោះស្រាយការងារធ្វើ ពង្រីកឥណទានគោលនយោបាយ និងកែលម្អលក្ខខណ្ឌរស់នៅជូនប្រជាជន។ បច្ចុប្បន្នខេត្តទាំងមូលមានក្រុមគ្រួសារក្រីក្រចំនួន ៨.៧៣៧ ក្រុមគ្រួសារ ស្មើនឹង ០,៨៨% និងក្រុមគ្រួសារជិតបន្ទាត់ភាពក្រីក្រចំនួន ១៩.២៤៦ ក្រុមគ្រួសារ ស្មើនឹង ១,៩៤% ក្នុងនោះភាគច្រើនប្រមូលផ្តុំនៅតំបន់ជនបទ។ ឆ្នាំ ២០២៦ ខេត្តប្រឹងប្រែងបន្តកាត់បន្ថយអត្រាក្រុមគ្រួសារក្រីក្រ ០,០៧% បន្ថែមទៀត។
ទន្ទឹមនឹងការជួយឧបត្ថម្ភអភិវឌ្ឍផលិតកម្ម វិញឡុង ដាក់ដំណើរការសាងសង់ផ្ទះចំនួន ៣០០ ខ្នងសម្រាប់ក្រុមគ្រួសារក្រីក្រ ក្រុមគ្រួសារជិតបន្ទាត់ភាពក្រីក្រ និងក្រុមគ្រួសារដែលមានជីវភាពខ្វះខាតនៅក្នុងឃុំទាំង ៣៩ ផ្តើមពីប្រភពចលនាសហគ្រាសផ្តល់ឧបត្ថម្ភឲ្យ។ រហូតមកដល់ពេលនេះ បានសង់បង្ហើយផ្ទះចំនួន ៣១ ខ្នង មាន ៦៩ ខ្នងកំពុងសាងសង់ និងមាន ២០០ ខ្នងទៀតកំពុងបំពេញបែបបទសម្រាប់ដំណើរការ។ មូលដ្ឋានទាំងឡាយក៏កំពុងបង្កើតគម្រោងឧបត្ថម្ភអភិវឌ្ឍផលិតកម្មតាមខ្សែចង្វាក់តម្លៃសំដៅបង្កើតការងារធ្វើ បង្កើនប្រាក់ចំណូល និងទប់ស្កាត់ភាពក្រឡើងវិញ។
ចំពោះកម្មវិធីគោលដៅជាតិអភិវឌ្ឍសេដ្ឋកិច្ច - សង្គមតំបន់បងប្អូនជនជាតិនិងតំបន់ភ្នំ ខេត្តបានបញ្ចប់ការពិនិត្យផ្ទៀងផ្ទាត់ កំណត់ឃុំ សង្កាត់ ភូមិ អនុសង្កាត់ចំណុះតំបន់បងប្អូនជនជាតិ និងភូមិសាស្រ្តស្ថិតក្នុងស្ថានភាពលំបាកខ្លាំងដំណាក់កាល ២០២៦ - ២០៣០ ធ្វើជាមូលដ្ឋានសម្រាប់ដំណើរការគោលនយោបាយ។ ស្របពេលនោះ ខេត្តជំរុញពន្លឿនវឌ្ឍនភាពចំណាយថវិកាប្រភពទុនពីមជ្ឈិម បញ្ជូនប្រភពទុនមិនទាន់មានតម្រូវការប្រើប្រាស់ទៅឱ្យអង្គភាពដែលមានសមត្ថភាពដំណើរការសំដៅបង្កើនប្រសិទ្ធភាពវិនិយោគ និងបង្កើនប្រសិទ្ធភាពប្រភពធនធាន។
យោងតាមមន្ទីរកិច្ចការជនជាតិ និងសាសនាខេត្ត វិញឡុង ដំណាក់កាល ២០២១ - ២០២៥ ខេត្ត វិញឡុង បានវិនិយោគសាងសង់ថ្មីសំណង់ហេដ្ឋារចនាសម្ព័ន្ធចាំបាច់ចំនួន ២៧៩ ដោយមានថវិកាសរុបជាង ៤៣៤ ពាន់លានដុង ឧបត្ថម្ភការសាងសង់ផ្ទះជូន ១.២៧០ ក្រុមគ្រួសារ ដីលំនៅឋាន ៤៤ ក្រុមគ្រួសារ ប្តូរមុខរបរជូន ៥៤៥ ក្រុមគ្រួសារ និងរាប់រយក្រុមគ្រួសារទទួលបានការឧបត្ថម្ភទឹកប្រើប្រាស់។ លើសពីនោះ ធនាគារគោលនយោបាយសង្គមបានចំណាយថវិកាជាង ៦០ ពាន់លានដុងជូនមុខសញ្ញាជាង ១.៣០០ លើកនាក់ចំណុះតំបន់បងប្អូនជនជាតិទទួលបានប្រភពទុនអនុគ្រោះសម្រាប់ការអភិវឌ្ឍផលិតកម្ម កែលម្អការរស់នៅ។
មិនត្រឹមតែយកចិត្តទុកដាក់អភិវឌ្ឍសេដ្ឋកិច្ច វិញឡុង នៅផ្តោតការលើកកម្ពស់គុណភាពប្រភពធនធានមនុស្ស និងថែរក្សាអត្តសញ្ញាណវប្បធម៌ជនជាតិផងដែរ។ បច្ចុប្បន្ន ខេត្តនេះមានសាលារៀនចំនួន ១៣២ រៀបចំបង្រៀនភាសា ខ្មែរ ជូនសិស្សជាង ៤១.៥០០ នាក់។ វត្តពុទ្ធសាសនាទក្ខិណនិកាយ ខ្មែរ ជាច្រើនបើកថ្នាក់រៀនភាសា ខ្មែរ ក្នុងរដូវវិស្សមកាល រួមចំណែកអភិរក្សភាសានិយាយ អក្សរសរសេរ និងវប្បធម៌ប្រពៃណីរបស់បងប្អូនជនជាតិ។ ពិធីបុណ្យ វប្បធម៌ប្រពៃណីរបស់បងប្អូនជនជាតិ ខ្មែរ ត្រូវបានខេត្តថែរក្សា និងរៀបចំយ៉ាងឱឡារិកជារៀងរាល់ឆ្នាំ។
គោលនយោបាយចំពោះអ្នកមានកិត្យានុភាពក្នុងចំណោមបងប្អូនជនជាតិក៏ត្រូវបានអនុវត្តយ៉ាងពេញលេញ ពង្រីកតួនាទីរបស់សមណសក្តិ អ្នកមុខអ្នកការ បុគ្គលគំរូក្នុងការផ្សព្វផ្សាយគោលការណ៍ គោលនយោបាយរបស់បក្ស ច្បាប់របស់រដ្ឋ ចលនាប្រជាជនឱ្យរួបរួមសាមគ្គីគ្នា អភិវឌ្ឍសេដ្ឋកិច្ច និងកសាងការរស់នៅវប្បធម៌នៅទីប្រជុំជន។
អាស្រ័យដោយអនុវត្តវិធានការជាច្រើនយ៉ាងស៊ីចង្វាក់គ្នា អត្រាក្រុមគ្រួសារក្រីក្រក្នុងតំបន់បងប្អូនជនជាតិរបស់ខេត្តបានថយចុះគួរឱ្យកត់សម្គាល់។ ដល់ចុងឆ្នាំ ២០២៥ ខេត្តទាំងមូលនៅតែ ១.១១៩ ក្រុមគ្រួសារដែលជាបងប្អូនជនជាតិ ស្មើនឹង ១,១៦% និងក្រុមគ្រួសារជិតបន្ទាត់ភាពក្រីក្រចំនួន ២.៨២២ ក្រុមគ្រួសារ ស្មើនឹង ២,៧៥%។
យោងតាមលោកស្រី ថាច់ ធីធូហា នាយិកាមន្ទីរកិច្ចការជនជាតិ និងសាសនាខេត្ត វិញឡុង អញ្ជើញមានប្រសាសន៍ នាពេលខាងមុខខេត្តនឹងបន្តដាក់ដំណើរការកម្មវិធី គោលនយោបាយប្រកបដោយប្រសិទ្ធភាពសម្រាប់តំបន់បងប្អូនជនជាតិ ក្នុងនោះផ្តល់អាទិភាពឧបត្ថម្ភអភិវឌ្ឍផលិតកម្ម បណ្តុះបណ្តាលវិជ្ជាជីវៈ បង្កើតការងារធ្វើ លើកកម្ពស់គុណភាពធនធានមនុស្ស លើកស្ទួយតម្លៃវប្បធម៌ប្រពៃណី និងលើកទឹកចិត្តប្រជាជនឱ្យចូលរួមក្នុងគំរូសេដ្ឋកិច្ចដែលសមស្របនឹងលក្ខខណ្ឌរបស់មូលដ្ឋាននីមួយៗ។
គោលដៅរបស់ខេត្តមិនត្រឹមតែកាត់បន្ថយចំនួនក្រុមគ្រួសារក្រីក្រប៉ុននោះទេ តែសំខាន់ជាងនេះទៅទៀតគឺបង្កើតលក្ខខណ្ឌសម្រាប់ប្រជាជនឱ្យមានការងារធ្វើ មានប្រាក់ចំណូលទៀងទាត់ និងម្ចាស់ការឈោងឈានឡើង។ នៅពេលប្រជាជនទទួលបានដើមទុន វិទ្យាសាស្ត្របច្ចេកទេស វិជ្ជាជីវៈ និងទីផ្សារលក់ផលិតផល ប្រសិទ្ធភាពនៃការកាត់បន្ថយភាពក្រីក្រនឹងកាន់តែចីរភាព៕
ផលិត៖ ថាញ់ហ្វា
ប្រែសម្រួល៖ ចន្ថា
