ការបង្រួញគម្លាតបច្ចេកវិទ្យាជូនបងប្អូនជនជាតិ
បច្ចុប្បន្ននេះ បរិវត្តកម្មឌីជីថលលែងជាបញ្ហាប្រឈមចំពោះបងប្អូនជនជាតិភាគតិចនៅឃុំព្រំដែន ដាក់អ៊ើ ទៀតហើយ ពេលបែបបទរដ្ឋបាលត្រូវបានធ្វើសាមញ្ញកម្មនិងទទួលនៅថ្នាក់ឃុំតែម្តង។ ដោយសារជំនួយយ៉ាងដិតដល់របស់កងកម្លាំងសមត្ថកិច្ចនៅក្នុងប្រតិបត្តិការអនឡាញម្តងៗ ប្រជាជនតំបន់ព្រំដែនឥឡូវនេះដំណើរការសំណុំឯកសារបានកាន់តែងាយស្រួល ឆាប់រហ័សជាងមុនឆ្ងាយ មិនចាំបាច់ចំណាយពេលវេលា កម្លាំងពលំនឿយហត់ធ្វើដំណើរចុះឡើងទៅស្រុកដូចមុនទៀតទេ។
ក្នុងនាមជាអ្នកទទួលផលគំរូថ្មីៗ ដោយផ្ទាល់ លោក ដៀវ ម៉ាលើន នៅភូមិ ប៊ូឃើន មិនអាចលាក់បាំងការសោមនស្សរីករាយនៅពេលចែករំលែកអំពីការផ្លាស់ប្តូរជាវិជ្ជមានក្នុងការងារចាត់ការបែបបទរដ្ឋបាលនៅមូលដ្ឋាន។ ចាប់តាំងពីមជ្ឈមណ្ឌលសេវារដ្ឋបាលសាធារណៈឃុំដាក់ដំណើរការ ការធ្វើក្រដាសស្នាមកាន់តែងាយស្រួលជាងមុនច្រើនហើយខណៈពេលត្រូវបានធ្វើនៅថ្នាក់ឃុំតែម្តង លែងនៅធ្វើដំណើរទៅមកផ្លូវឆ្ងាយឡើងទៅកាន់ថ្នាក់ស្រុកដូចពីមុនទៀតហើយ។
លោក ដៀវ ម៉ាលើន ឱ្យដឹងថា កាលពីមុននេះពេលធ្វើក្រដាសស្នាមម្តងៗ គឺត្រូវធ្វើដំណើរឡើងទៅកាន់ស្រុក បង់ពេលអស់ពេញមួយថ្ងៃ ខាតបង់ប្រាក់ចំណាយ។ ឥឡូវនេះ គ្រាន់តែធ្វើនៅថ្នាក់ឃុំបានយ៉ាងឆាប់តែម្តង។ ក៏ប៉ុនតែ នៅពេលប្តូរទៅធ្វើបែបបទតាមរយៈអនឡាញនៅលើកុំព្យូទ័រ ទូរស័ព្ទ បែរជាបងប្អូនជនជាតិភាគតិចជួបការលំបាកលំបិនជាច្រើន។ មនុស្សវ័យចំណាស់ជាច្រើនមិនដឹងពីរបៀបដំណើរការ ចំណេះដឹងនៅមានកម្រិតបានជាឱ្យតែឃើញបច្ចេកវិទ្យាគឺព្រួយបារម្ភ គឺអល់អែក។ ក្នុងរយៈពេលកន្លងទៅ កងជួរកម្មាភិបាលជាមួយនឹងក្រុមឧបត្ថម្ភនៅមជ្ឈមណ្ឌលក៏តែងតែអស់ពីចិត្តពីថ្លើមកាន់ដៃបង្គាប់ការតាំងពីប្រជាជនម្នាក់ៗ។ ជាសំណាងល្អ គឺកម្មាភិបាលនៅទីនេះមានអំណត់និងរីករាយណែនាំជាខ្លាំង។ ដោយដឹងថាមាមីងបងប្អូនជនជាតិភាគតិចយល់បច្ចេកវិទ្យាបានយ៉ាងយឺតបានជាអត់ធ្មត់ណែនាំល្អិតល្អន់ពីមួយជំហានទៅមួយជំហាន ចាប់ពីដំណាក់កាលស្កេនលេខកូដ បញ្ចូលព័ត៌មានរហូតដល់បំពេញសំណុំឯកសារួចរាល់។ របៀបធ្វើថ្មី មាមីងបងប្អូនស្ងប់ចិត្តនិងកក់ក្តៅណាស់។
មតិប្រតិកម្មជាវិជ្ជមានពីប្រជាជនផ្ទាល់តែម្តងបង្ហាញឱ្យឃើញគំរូរដ្ឋបាលសាធារណៈថ្មីកំពុងដើរត្រង់ផ្លូវហើយពិតជាបង្ហាញប្រសិទ្ធភាពនៅភូមិសាស្ត្រព្រំដែន។ ការផ្លាស់ប្តូរមិនត្រឹមតែស្ថិតនៅលើគោលការណ៍ យន្តសាស្ត្រប៉ុននោះទេ ប៉ុន្តែសំខាន់ជាងនេះទៅទៀតគឺស្ថិតនៅលើស្មារតី អាកប្បកិរិយានៃការបម្រើរបស់កងជួរកម្មាភិបាល បុគ្គលិករដ្ឋការសាធារណៈ។
លោក ឡា វ៉ាន់យុង នៅភូមិ ប៊ូឃើន សោមនស្សរីករាយរៀបរាប់ថា ការអនុវត្តបែបបទនៅមជ្ឈមណ្ឌលឃុំនិយាយរួមឥឡូវនេះគឺល្អណាស់សម្រាប់ប្រជាជន។ កម្មាភិបាលធ្វើការយ៉ាងឆាប់រហ័សបានជាមិនចាំបាច់រង់ចាំយូរទេ។ កម្មាភិបាលក៏មានភាពទន់ភ្លន់ ណែនាំយ៉ាងដិតដល់។ មាមីងបងប្អូនអ្នកណាក៏រីករាយនិងមានបំណងចង់អាជ្ញាធរបន្តថែរក្សាប្រចាំ បម្រើប្រជាជនឱ្យកាន់តែល្អប្រសើរឡើងពីមួយថ្ងៃទៅមួយថ្ងៃថែមទៀត។ នៅពេលគោលការណ៍ត្រូវបានកាត់បន្ថយរួមជាមួយនឹងការប្រាស្រ័យទាក់ទងរួសរាយ សមស្របរបស់កម្មាភិបាលទទួល អារម្មណ៍ក្រែងរអែងខ្លួនរបស់ប្រជាជននៅពេលមកដល់ស្ថាប័នរដ្ឋក៏បានរំសាយទៅវិញទាំងស្រុង”។
បច្ចុប្បន្ននេះ ១០០% កម្មាភិបាលបុគ្គលិករដ្ឋការសាធារណៈនៅមជ្ឈមណ្ឌលសេវាកម្មរដ្ឋបាលសាធារណៈឃុំ ដាក់អ៊ើ ត្រូវបានបំពាក់កុំព្យូទ័រ ម៉ាស៊ីនព្រីន ម៉ាស៊ីនស្កេន ប្រព័ន្ធបណ្តាញអ៊ីនធឺណិតល្បឿនលឿនរួមជាមួយប្រព័ន្ធចុចលេខស្វ័យប្រវត្តិ (ប្រព័ន្ធគ្រប់គ្រងជួរ) អេក្រង់ឆែកមើលព័ត៌មានជួយប្រជាជន សហគ្រាសមកធ្វើប្រតិបត្តិការងាយស្រួល។
ការអស់ពីចិត្តពីថ្លើមបម្រើ រួមដំណើរជាមួយប្រជាជន
មជ្ឈមណ្ឌលសេវារដ្ឋបាលសាធារណៈឃុំ ដាក់អ៊ើ ប្រតិបត្តិការទទួល ចាត់ការ ប្រគល់ជូនលទ្ធផលសំណុំឯកសាររដ្ឋបាលវិញតាមរយៈប្រព័ន្ធកម្មវិធីរបស់ក្រសួង ផ្នែកទាំងឡាយ បែបបទរដ្ឋបាលត្រូវបានចាត់ការយ៉ាងឆាប់រហ័ស ទាន់ពេលវេលា សំចៃបានថ្លៃចំណាយធ្វើដំណើរទៅមកជូនប្រជាជន។ ប្រព័ន្ធនេះជំនួយឱ្យថ្នាក់ដឹកនាំឃុំអាចតាមដានដំណើរផ្ទេរសំណុំឯកសារ ឃើញបានដំណើរការផ្ទេរនៅអង្គភាពណាយឺតដើម្បីកែតម្រូវទាន់ពេលវេលា។
លោកស្រី ហ្វាង ធីហៃអៀន មានរយៈពេល ៩ ឆ្នាំមកហើយបានបម្រើការជាប្រធានភូមិ ៩ ឃុំ ដាក់អ៊ើ បានជាយល់ច្បាស់ការនឿយហត់ ក្តីកង្វល់ទាំងឡាយរបស់មាមីងបងប្អូននៅពេលទៅធ្វើក្រដាសស្នាមម្តងៗ។ យោងតាមលោកស្រី អៀន ចាប់តាំងពីគំរូអាជ្ញាធរមូលដ្ឋានពីរថ្នាក់ដំណើរការជាផ្លូវការ ការវិវឌ្ឍនៈទៅយ៉ាងច្បាស់ក្រឡែតនិងគួរឱ្យកត់សម្គាល់បំផុតគឺអាកប្បកិរិយាបម្រើរបស់កងជួរកម្មាភិបាលនៅផ្នែក "ច្រកចេញចូលតែមួយ"។ ការទទួលស្វាគមន៍យ៉ាងហ្មត់ចត់ ណែនាំដិតដល់ រីករាយរបស់កម្មាភិបាលបានរំសាយអារម្មណ៍ក្រែងរអែង នាំមកនូវសេចក្កីស្ងប់ចិត្តនិងការពេញចិត្តយ៉ាងខ្លាំងជូនប្រជាជននៅតំបន់ព្រំដែន។ ទោះបីជាគុណសម្បត្តិលេចធ្លោជាងគេគឺសំណុំឯកសារត្រូវបានរក្សាទុកមានតម្លាភាព ច្បាស់លាស់ក៏ដោយ ក៏ប៉ុន្តែល្បឿនដំណើរការនៃប្រព័ន្ធពេលខ្លះនៅយឺតយ៉ាវ។ ដូច្នេះហើយ លោកស្រី អៀន រួមជាមួយនឹងប្រជាជន់មូលដ្ឋានចង់ប្រព័ន្ធនឹងត្រូវបានធ្វើឲ្យក្លាយជាល្អឥតខ្ចោះបំផុតក្នុងពេលឆាប់ៗ នេះ កាត់បន្ថយពេលវេលាចាត់ការសំណុំឯកសារក្នុងថ្ងៃតែម្តងឬក៏រហូតដល់ថ្ងៃក្រោយដើម្បីការកំណែទម្រង់រដ្ឋបាលបង្ហាញឱ្យឃើញប្រសិទ្ធភាពពេញលេញ។
លោក ង្វៀន វ៉ាន់កឿង នាយកមជ្ឈមណ្ឌលសេវារដ្ឋបាលសាធារណៈឃុំ ដាក់អ៊ើ ផ្តល់ព័ត៌មាន មជ្ឈមណ្ឌលតែងតែកំណត់យកការបម្រើប្រជាជន យកការពេញចិត្តរបស់ប្រជាជននិងសហគ្រាសធ្វើជារង្វាស់ប្រសិទ្ធភាពការងារ។ ដើម្បីធ្វើឱ្យគោលដៅនេះក្លាយជាការពិតជាក់ស្ដែង អង្គភាពបានអនុវត្តដំណោះស្រាយព្រមៗ គ្នាជាច្រើន ចំណុចស្នូលគឺការអនុវត្តល័ក្ខការណ៍ច្បាស់លាស់ទាំង ៦៖ មនុស្សច្បាស់លាស់ ភារកិច្ចច្បាស់លាស់ ការទទួលខុសត្រូវច្បាស់លាស់ គោលការណ៍ច្បាស់លាស់ ពេលវេលាច្បាស់លាស់ លទ្ធផលច្បាស់លាស់។ ការងារត្រួតពិនិត្យ ឃ្លាំមើលត្រូវបានរក្សាជាប្រចាំ កម្មាភិបាល បុគ្គលិករដ្ឋការសាធារណៈម្ចាស់ការចុះបញ្ជីសន្ទស្សន៍ប្រលងប្រណាំងប្រចាំសប្តាហ៍ ប្រចាំខែ ប្រចាំត្រីមាសធ្វើជាមូលដ្ឋានវាយតម្លៃសមត្ថភាពនិងស្មារតីបម្រើការ។
ផ្តើមចេញពីឃុំពិសេសដោយឡែកមានចំនួនប្រជាជនជាង ៤០% ជាបងប្អូនជនជាតិភាគតិច កម្រិតវិជ្ជាប្រើបច្ចេកវិទ្យានៅមានកម្រិត មជ្ឈមណ្ឌលបានម្ចាស់ការធ្វើសេនាធិការបង្កើតបណ្តាក្រុមជំនួយនៅទីស្នាក់ការនិងនៅតាមភូមិតែម្តង។ ដោយមានការរួមដំណើររបស់សម្ព័ន្ធយុវជនកុម្មុយនិស្ត ហូ ជីមិញ និងកងកម្លាំងយុវជនដែលមានការយល់ដឹងផ្នែកបច្ចេកវិទ្យាជ្រៅជ្រះ ក្រុមទាំងនេះផ្តោតលើការ “កាន់ដៃបង្គាប់ការ” ណែនាំមាមីងបងប្អូនបំពេញទម្រង់បែបបទ ប្រើប្រាស់សេវាសាធារណៈអនឡាយទាំងអស់។ ចំពោះមុខសញ្ញាខ្សត់ខ្សោយ កម្មាភិបាលឃុំចុះទៅដល់ភូមិ ទទួលយកសំណុំឯកសារ ជួយណែនាំអំពីលំដាប់លំដោយបែបបទរដ្ឋបាលជូនប្រជាជនចូលប្រើហើយថ្នឹកនឹងបរិស្ថានអេឡិចត្រូនិចបន្តិចម្តង។ កម្រិតប្រជាបញ្ញារួមមិនទាន់ស្មើគ្នាបណ្តាលឱ្យកម្មាភិបាលត្រូវតែចំណាយពេលវេលាជាច្រើនណែនាំករណីនីមួយៗ យ៉ាងលម្អិត។ ប្រព័ន្ធកម្មវិធីឯកទេសស្ថិតនៅក្នុងដំណាក់កាលធ្វើឱ្យសុក្រឹតបានជាពេលខ្លះស្ទះបណ្តាញ អាស្រ័យលើហេដ្ឋារចនាសម្ព័ន្ធខ្សែបញ្ជូន។ ទោះបីជាយ៉ាងនេះក្តី កងជួរកម្មាភិបាលមជ្ឈមណ្ឌលនៅតែរួមដំណើរ ព្យាយាមជួយដើម្បីលើកកម្ពស់គុណភាពបម្រើប្រជាជនតំបន់ព្រំដែន។
មជ្ឈមណ្ឌលសេវាកម្មរដ្ឋបាលសាធារណៈឃុំ ព្រំដែន ដាក់អ៊ើ កំពុងបង្ហាញឱ្យឃើញប្រសិទ្ធភាពជាក់ស្តែង។ ទិសស្លោកយកប្រជាជនធ្វើជាគោល ការរួមដំណើរ អស់ពីចិត្តពីថ្លើមរបស់កងជួរកម្មាភិបាលនោះគឺជាគន្លឹះដោះស្រាយគ្រឿងរារាំងបច្ចេកវិទ្យា នាំឱ្យបរិវត្តកម្មឌីជីថលទៅរកលទ្ធផលជាក់ស្តែងនិងកសាងខឿនរដ្ឋបាលតំបន់ជាយដែនមានប្រសិទ្ធភាព តម្លាភាពថែមទៀតពីមួយថ្ងៃទៅមួយថ្ងៃ៕
អត្ថបទនិងរូបថត៖ កហ្គឿយហ៍ - ទីភ្នាក់ងារព័ត៌មានវៀតណាម
ប្រែសម្រួល៖ ពេជ្រពិសិដ្ឋ
