* ផ្ទះសំបែងក្នុងក្តីស្រមៃ
វិលត្រឡប់មកឃុំ ហ៊ឹងហូយ ជាមូលដ្ឋានមួយក្នុងចំណោមមូលដ្ឋានមានអត្រាជនជាតិ ខ្មែរ ស្មើនឹងជាង ៧៥% នៃចំនួនប្រជាជនរបស់ស្រុក វិញលើយ មិនពិបាកសង្កេតឃើញការផ្លាស់ប្តូរមុខមាត់យ៉ាងឆាប់រហ័សនៃភូមិ ស្រុកនៅទីនេះ។ ប្រព័ន្ធគមនាគមន៍ជនបទត្រូវបានវិនិយោគរួចស្រេចសព្វទីកន្លែងជាសក្ខីភាពជាក់ស្តែង រស់រវើកនៃចលនាកសាងជនបទថ្មី ជនបទគំរូតួយ៉ាងនៃស្រុក។ កាន់តែកក់ក្តៅដល់បេះដូងថែមទៀតនៅពេលបណ្តាគ្រួសារបងប្អូនជនជាតិ ខ្មែរ នៅទីនេះនៅជួបការលំបាកលំបិនអំពីលំនៅឋានបានទទួលការឧបត្ថម្ភរបស់អាជ្ញាធរគ្រប់លំដាប់ថ្នាក់ក្នុងកម្មវិធីលុបបំបាត់ផ្ទះបណ្ដោះអាសន្ន ផ្ទះធ្លុះធ្លាយទ្រុឌទ្រោមទាន់ពេលវេលា។
នៅក្នុងផ្ទះដែលនៅធុំក្លិនបាយអ លោកស្រី សឺន សាគ្វី នៅភូមិ កាវិញ ឃុំ ហ៊ឹងហូយ នៅមិនទាន់អស់រំភើបចិត្តអំពីផ្ទះថ្មីរឹងមាំទើបបានឧបត្ថម្ភសាងសង់។ រកស៊ីទាំងត្រដាបត្រដួសនឿយហត់ពេញមួយជីវិត តែក៏គ្រាន់តែគ្រប់គ្រាន់ផ្គត់ផ្គង់ថវិកាចំណាយក្នុងការប្រជុំជីវភាពអោយផុតមួយថ្ងៃៗ។ ស្ថិតក្នុងវ័យជ្រេទៅហើយក៏ការដែលមានចំនួនបាក់ច្រើនដើម្បីសង់ផ្ទះរឹងមាំ ធំទូលាយស្អាតបាតពិតជាប្រការសុបិនដ៏សែនឆ្ងាយ។
លោកស្រី សឺន សាគ្វី បានចែករំលែកថា "ពីមុននេះ ផ្ទះខ្ញុំសង់ដោយឈើប្រក់ស្លឹកបណ្តោះអាសន្ន រយីករយាក គ្រាន់តែគ្រប់បាំងកម្តៅថ្ងៃ ពេលភ្លៀងខ្លាំងម្តងៗ គឺផ្ទះក៏ត្រូវធ្លុះធ្លាយស្រក់ទឹកភ្លៀងគ្រប់កន្លែងទៅវិញ។ ប៉ុន្តែធ្វើក៏ហូបមិនគ្រប់គ្រាន់បានជាប្រាក់ឯណាមានដើម្បីជួសជុលទេ បង្ខំចិត្តនៅបណ្តោះអាសន្ន ដល់ណាល្អដល់នោះ។ ឥឡូវនេះ បានរដ្ឋឧបត្ថម្ភអោយផ្ទះធំទូលាយស្អាតបាតបានជាគ្រួសារត្រេកអរណាស់។ ពេញមួយឆាកជីវិតខ្ញុំមិនធ្លាប់គិតថាខ្លួននឹងមានផ្ទះថ្មដ៏ស្អាតដូច្នោះដើម្បីរស់នៅ។ សូបអរគុណបក្សនិងរដ្ឋដែលបានយកចិត្តទុកដាក់ជួយជ្រោមជ្រែងគ្រួសារ!"។
រីឯចំពោះលោកស្រី ថាច់ ធីផូល (រស់នៅភូមិ វិញមៅ ឃុំ វិញហូវ ស្រុក ហ្វាប៊ិញ) ផ្ទះថ្មីនឹងជួយលោកស្រីជាមួយគ្រួសារតាំងទីលំនៅស្ថិរភាពនៅពេលវ័យជ្រេទៅហើយ។ ដើរស៊ីឈ្នួលពេញមួយជីវិត ចំនួនប្រាក់រកបានគ្រាន់តែគ្រប់ហូបអោយផុតមួយពេលៗ។ ស្ថិតក្នុងវ័យអាយុ ៦៤ ឆ្នាំ ស្វាមីភរិយាលោកស្រី ផូល ក៏ត្រូវមើលថែចៅតូចៗ ពីរនាក់ពេលដែលកូនស្រីឧស្សាហ៍ចេញទៅធ្វើការរកស៊ីឆ្ងាយ។ ឥឡូវនេះ នៅក្នុងផ្ទះថ្មីដែលសង់ពីបេតុងរឹងមាំ ប្រក់ដំបូលដោយស័ង្កសីជំនួសអោយផ្ទះដែលពុកទ្រុឌទ្រោម យាយចៅប៉ុន្មាននាក់ពឹងផ្អែកគ្នា ដើម្បីឲ្យកូនស្រីរបស់លោកស្រី ផូល ស្ងប់ចិត្តទៅធ្វើការរកប្រាក់ផ្គត់ផ្គង់ជីវភាព។
លោកស្រី ថាច់ ធីផូល បានខ្សឹកខ្សួលអោយដឹងថា៖ "មានផ្ទះរឹងមាំហើយក៏មានអារម្មណ៍កក់ក្តៅថែមទៀត។ មិនត្រូវព្រួយបារម្ភពេលភ្លៀងក្តៅខុសប្រក្រតី។ មានកន្លែងរស់នៅធំទូលាយស្អាតបាត រឹងប៉ឹងគឺមើលថែកូនចៅនៅផ្ទះក៏ស្ងប់អារម្មណ៍ទៀតដែរ!"
* ឆ្ពោះទៅរកជីវិតកាន់តែល្អប្រសើរ
លោក ត្រឹន វ៉ាន់អ៊ុត ប្រធានគណៈកម្មាធិការរណសិរ្សមាតុភូមិ វៀតណាម ខេត្ត បាកលៀវ បានឲ្យដឹងថា ខេត្តផ្តោតលើការលុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោមជូនក្រុមមុខសញ្ញារួមមានក្រុមគ្រួសារគោលនយោបាយស្ថិតក្នុងស្ថានភាពលំបាកលំបិន ក្រុមគ្រួសារក្រីក្រ ក្រុមគ្រួសារជិតបន្ទាត់ក្រីក្រ និងក្រុមគ្រួសារបងប្អូនជនជាតិភាគតិច។ ត្រូវបានគណៈកម្មាធិការបក្សខេត្ត គណៈកម្មាធិការប្រជាជនខេត្តប្រគល់អោយ ជាស្ថាប័នអចិន្ត្រៃយ៍ រយៈពេលកន្លង រណសិរ្សមាតុភូមិបានបង្កើនការចលនាគ្រប់ប្រភពកម្លាំង សហការយ៉ាងស្អិតល្មួតជាមួយមន្ទីរ គណៈ ផ្នែក មូលដ្ឋានដាក់ដំណើរការសាងសង់ផ្ទះលំនៅយ៉ាងសកម្មជូនក្រុមមុខសញ្ញាឱ្យសម្រេចដំណើរការបានប្រគល់។
រណសិរ្សមាតុភូមិ វៀតណាម គ្រប់លំដាប់ថ្នាក់ និងអង្គការសមាជិកសហការជាមួយអង្គភាពពាក់ព័ន្ធអំពាវនាវយ៉ាងសកម្ម ចលនាសហគ្រាស អង្គការ សម្ព័ន្ធក្រុមហ៊ុនចូលរួមយ៉ាងសកម្មក្នុងការរួមចំណែក គាំទ្រដល់ការលុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោម ដើម្បីកៀរគររាល់ប្រភពកម្លាំងសង្គមូបនីយកម្មជួយដល់ក្រុមគ្រួសារក្រីក្រ ក្រុមគ្រួសារជិតបន្ទាត់នៃភាពក្រីក្រសាងសង់ផ្ទះថ្មី និងជួសជុលផ្ទះលំនៅ។
ដើម្បីអនុវត្តប្រកបដោយប្រសិទ្ធភាពចលនា “រួមដៃគ្នាលុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោម” បាកលៀវ បានបង្កើតគណៈកម្មាធិការបង្គាប់ការ ៣ កម្រិត បែងចែកសន្ទស្សន៍ទៅកាន់មូលដ្ឋានជាក់លាក់និងត្រួតពិនិត្យ សង្កេតមើលជាប្រចាំដើម្បីផ្តល់ការណែនាំ ឧបត្ថម្ភទាន់ពេលវេលា។ ខេត្តបានស្នើដល់គ្រប់លំដាប់ថ្នាក់ គ្រប់ផ្នែក មូលដ្ឋាន ស្ថាប័ន អង្គភាពនានា អំពាវនាវដល់ប្រជាជន សហគ្រាសរួមកម្លាំងអនុវត្តចលនាមានអត្ថន័យមនុស្សសាស្រ្តនេះ។
គិតដំណាច់ខែ ឧសភា ខេត្ត បាកលៀវ បានសាងសង់និងសម្រេចរួចរាល់ជាស្ថពរផ្ទះចំនួន ១.៧៥៨ ក្នុងចំណោម ២.៥៣៧ ខ្នង។ ខេត្តនឹងខិតខំចលនាប្រភពកម្លាំងសាងសង់ផ្ទះចំនួន ៧៧៩ ខ្នងទៀតឱ្យរួចរាល់មុនថ្ងៃទី ១ ខែ កក្កដា ឆ្នាំ ២០២៥។
ប្រធានគណៈកម្មាធិការប្រជាជនខេត្ត បាកលៀវ លោក ផាម វ៉ាន់ធៀវ បានឲ្យដឹងថា រយៈពេលកន្លង ដើម្បីឆ្លើយតបនឹងចលនានេះ ខេត្តបានរៀបចំផែនការ បង្កើតគណៈកម្មាធិការបង្គាប់ការ ទន្ទឹមនឹងនោះ បានបង្កើតក្រុមការងារចលនាប្រភពកម្លាំង ដោយការប្ដេជ្ញាចិត្តថានឹងខិតខំសម្រេចជាស្ថាពរការលុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោមក្នុងភូមិសាស្រ្តក្នុងឆ្នាំ ២០២៥។
តាមរយៈការសង្កេតមើលតម្រូវការសាងសង់ផ្ទះលំនៅជូនមុខសញ្ញា បាកលៀវ មានផ្ទះចំនួន ២.៥៣៧ ខ្នងចាំបាច់ត្រូវការជំនួយសម្រាប់ការសាងសង់ ជួសជុលដោយចំណាយថវិកាសរុបជាង ១៤៦ ពាន់លានដុង។ ចំនួនថវិកានៃការវិនិយោគមានចំនួនច្រើន ខណៈពេលខេត្ត បាកលៀវ នៅតែជាខេត្តក្រីក្រ ទ្រង់ទ្រាយសេដ្ឋកិច្ចតូច ចំណូលថវិកាមិនគ្រប់គ្រាន់ក្នុងការចំណាយ។ ក្រៅពីនេះ ក្នុងភូមិសាស្រ្តគ្មានសម្ព័ន្ធក្រុមហ៊ុនធំដុំទេ ដូចនេះការចលនាប្រភពកម្លាំងសង្គមដើម្បីជួយដល់ប្រជាជនលុបបំបាត់ផ្ទះបណ្ដោះអាសន្ន ផ្ទះធ្លុះធ្លាយទ្រុឌទ្រោមនៅមានកម្រិតនៅឡើយ។ ក្នុងលក្ខខណ្ឌនោះ បាកលៀវ បានទទួលការយកចិត្តទុកដាក់បង្គាប់ការ ជួយឧបត្ថម្ភពីរដ្ឋាភិបាល ក្រសួង ផ្នែកមជ្ឈិម មូលដ្ឋាន សហគ្រាស សប្បុរសជនក្នុងនិងក្រៅខេត្តជួយឧបត្ថម្ភថវិកាសម្រាប់ដំណើរការកម្មវិធីលុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោម។
ប្រធានគណៈកម្មាធិការប្រជាជនខេត្ត បាកលៀវ លោក ផាម វ៉ាន់ធៀវ បានមានប្រសាសន៍ថា ការដាក់ដំណើរការកម្មវិធីលុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោមពីប្រភពចលនាឧបត្ថម្ភគ្រប់លំដាប់ថ្នាក់ ផ្នែក ជាពិសេសតួនាទីរបស់សមាជិកគណៈកម្មាធិការបង្គាប់ការអនុវត្តការលុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោមនៅគ្រប់លំដាប់ថ្នាក់ រួមជាមួយនឹងអាជ្ញាធរមូលដ្ឋានអនុវត្តការងារសុខុមាលភាពសង្គមប្រកបដោយប្រសិទ្ធភាពស្របតាមគោលការណ៍របស់បក្ស រដ្ឋ ពង្រឹងទំនុកចិត្តរបស់ប្រជាជនយ៉ាងរឹងមាំចំពោះគណៈកម្មាធិការបក្ស អាជ្ញាធរ។
កម្មវិធីលុបបំបាត់ផ្ទះបណ្តោះអាសន្ន ផ្ទះធ្លុះធ្លាយទ្រុឌទ្រោមមិនត្រឹមតែនាំមកជូននូវផ្ទះមាំទាំប៉ុណ្ណោះទេ ថែមទាំងបំភ្លឺជំនឿ និងក្តីសង្ឃឹមអំពីអនាគតដ៏ភ្លឺស្វាងរបស់ក្រុមគ្រួសារដែលនៅតែប្រឈមមុខនឹងការលំបាកជាច្រើនក្នុងជីវភាព។ ទន្ទឹមនឹងនោះ ក៏បញ្ជាក់សារជាថ្មីនូវស្មារតី “គ្មាននរណាម្នាក់ត្រូវទុកចោលនៅខាងក្រោយឡើយ” របស់ខេត្ត បាកលៀវ ក្នុងការនាំយកផ្ទះជូនជនក្រីក្រ ដើម្បីឱ្យពួកគាត់តាំងទីលំនៅ និងឆ្ពោះទៅរកជីវភាពកាន់តែប្រសើរឡើង៕
អត្ថបទនិងរូបថត៖ ចិន្តា
ប្រែសម្រួល៖ យ័ញ លើយ - លឺ ធីអៀនថាញ់
