អនុលេខាសម្ព័ន្ធយុវជនកុម្មុយនីស្ត ហូ ជីមិញ ខេត្ត សុកត្រាំង លោក ហ្វ៊ិញ គ្វឹកហ៊ុយ មានប្រសាសន៍ថា គណៈកម្មាធិការអចិន្ត្រៃយ៍នៃសម្ព័ន្ធយុវជនកុម្មុយនីស្ត ហូ ជីមិញ ខេត្តបានអនុវត្តផែនការរៀបចំរាល់សកម្មភាពនារដូវវិស្សមកាល និងគាំទ្រខែសកម្មភាពសម្រាប់កុមារឆ្នាំ ២០២៥ ចាប់តាំងពីថ្ងៃទី ៣១ ខែ ឧសភា ដល់ថ្ងៃទី ៣១ ខែ សីហា ដោយមានកម្មវិធីនានាដូចជា៖ បុណ្យ “កុមាររដូវវិស្សមកាល” បរិយាកាសនៃការអានសៀវភៅ អន្តរកម្ម និងប្រជុំជីវភាពកងកុមារ សង្កេតមើលនិងដាក់ផ្លាកសញ្ញាព្រមានគ្រោះលង់ទឹក សាងសង់អាងហែលទឹកសិប្បនិម្មិត វគ្គសិក្សាផ្នែកប៉ូលិស វគ្គសិក្សាផ្នែកយោធាជាដើម។ សម្ព័ន្ធយុវជនកុម្មុយនីស្ត ហូ ជីមិញ ខេត្តផ្តល់អាទិភាពក្នុងការបែងចែកប្រភពកម្លាំងទាំងឡាយសម្រាប់ការអនុវត្តធានារាល់សកម្មភាពប្រព្រឹត្តទៅតាមការគ្រោងទុក ឆ្លើយតបបានល្អការថែទាំកុមារ។
នៅមជ្ឈមណ្ឌលហ្វឹកហាត់ និងបំប៉នវិជ្ជាជីវៈនគរបាល (នគរបាលខេត្ត) សម្ព័ន្ធយុវជនកុម្មុយនីស្ត ហូ ជីមិញ ខេត្ត សុកត្រាំង បានសហការជាមួយមន្ទីរអប់រំ និងបណ្តុះបណ្តាល នគរបាលខេត្តដើម្បីរៀបចំកម្មវិធីវគ្គសិក្សាផ្នែកនគរបាលឆ្នាំ ២០២៥។ កម្មវិធីនេះបានធ្វើឡើងចាប់តាំងពីថ្ងៃទី ៣ ដល់ថ្ងៃទី ១២ ខែ មិថុនា ប្អូនៗ នឹងបានចែករំលែកអំពីព័ត៌មានវិជ្ជាជីវៈមូលដ្ឋានពីយុទ្ធជននគរបាលប្រជាជន បំណិនសង្គម សមាហរណកម្មអន្តរជាតិ បង្ការ រារាំងការលង់ទឹក ការពារខ្លួនឯងពីព័ត៌មានមិនពិតនៅលើអ៊ីនធឺណិតជាដើម។
លេខាសម្ព័ន្ធយុវជនកុម្មុយនីស្ត ហូ ជីមិញ ខេត្ត សុកត្រាំង លោកស្រី ត្រៀវ ធីង៉ុកយីម មានប្រសាសន៍ថា កម្មវិធីវគ្គសិក្សាផ្នែកនគរបាលនឹងជួយប្អូនៗ យល់ដឹងយ៉ាងស៊ីជម្រៅអំពីប្រពៃណីបដិវត្តន៍របស់ប្រជាជាតិ ការលះបង់អាយុជីវិតរបស់អ្នកជំនាន់មុន សាយភាយស្មារតីមោទកភាពជាតិ។ កម្មវិធីក៏ជួយអោយប្អូនៗ ស្រាវជ្រាវដោយខ្លួនឯង ធ្វើការជាក្រុមតាមរយៈល្បែងជាក្រុម ការច្នៃប្រតិដ្ឋដើម្បីពង្រីកទេពកោសល្យ ភាពជឿជាក់លើខ្លួនឯងក្នុងគ្រប់កាលៈទេសៈ។
អនុប្រធានគណៈកម្មាធិការប្រជាជនខេត្ត សុកត្រាំង លោក ង្វៀន វ៉ាន់ខើយ ជូនដំណឹងថា ក្នុងប៉ុន្មានឆ្នាំកន្លង គណៈកម្មាធិការបក្សខេត្ត គណៈកម្មាធិការប្រជាជនខេត្តតែងតែយកចិត្តទុកដាក់បង្គាប់ណែនាំគ្រប់លំដាប់ថ្នាក់ គ្រប់ផ្នែកអនុវត្តប្រកបដោយប្រសិទ្ធភាពនូវគោលការណ៍របស់បក្ស គោលនយោបាយ ច្បាប់របស់រដ្ឋស្តីពីកុមារ។ ក្នុងខេត្តមានគំរូជាច្រើនសម្រាប់ប្អូនៗ ចូលរួមក្នុងរដូវវិស្សមកាលដូចជា៖ ថ្នាក់រៀនហែលទឹកតាមមូលដ្ឋាន បង្រៀនភាសា ខ្មែរ និងអក្សរ ខ្មែរ នៅតាមវត្ត គំរូនៃការឆ្លងកាត់បទពិសោធក្នុងវគ្គសិក្សាផ្នែកនគរបាល យោធា បំណិនជីវិត។ល។ តាមរយៈនោះជួយអោយប្អូនៗ នៅតំបន់ជនជាតិភាគតិចបានលេងកម្សាន្តសប្បាយ កាត់បន្ថយសម្ពាធក្រោយម៉ោងសិក្សា។
ខេត្តបន្តដាក់ដំណើរការច្បាប់កុមារដោយប្រសិទ្ធភាព បង្គាប់ណែនាំរបស់នាយករដ្ឋមន្ត្រីនៃរដ្ឋាភិបាលស្តីពីការពង្រឹងការថែទាំ ការអប់រំ និងការការពារកុមារឆ្លើយតបនឹងតម្រូវការអភិវឌ្ឍន៍ប្រទេសជាតិ ជាពិសេសក្នុងរដូវវិស្សមកាល។ ខេត្តផ្តោតលើការឃោសនាយ៉ាងយកចិត្តទុកដាក់ លើកកម្ពស់ការយល់ដឹង ការទទួលខុសត្រូវរបស់គ្រប់លំដាប់ថ្នាក់ ផ្នែក និងសង្គមទាំងមូលក្នុងការងារការពារកុមារ ផ្តល់អាទិភាពលើការបែងចែកប្រភពកម្លាំងដើម្បីអនុវត្តភារកិច្ច វិធានការអំពីការកសាងបរិស្ថានរស់នៅប្រកបដោយសុវត្ថិភាពសម្រាប់កុមារនៅតាមមូលដ្ឋាន៕
អត្ថបទនិងរូបថត៖ ទន់ភី
ប្រែសម្រួលនិងបញ្ចូលទិន្នន័យ៖ លឺ ធីអៀនថាញ់
