រៀងរាល់ថ្ងៃ នៅមជ្ឈមណ្ឌលរដ្ឋបាលសាធារណៈរបស់ឃុំ មានអ្នកស្ម័គ្រចិត្តពី ៥ ទៅ ៧ នាក់ប្រចាំការជួយប្រជាជន តាំងពីណែនាំប្រើប្រាស់សេវាសាធារណៈតាមប្រព័ន្ធអនឡាញ រហូតដល់ឌីជីថលរូបនីយកម្មឯកសារ។ល។ យោងតាមបង ង្វៀន ទន់អាញ់ លេខាសម្ពន្ធយុវជនឃុំ ឡាកយឿង ក្នុងកងជួរស្ម័គ្រចិត្តមានបណ្តាសមាជិកជាអ្នកក្នុងឃុំ បានជាងាយស្រួលយ៉ាងខ្លាំងក្នុងការជួយមាមីងបងប្អូន។
នៅមជ្ឈមណ្ឌលសេវារដ្ឋបាលសាធារណៈឃុំ ឡាកយឿង តែម្តង អ្នកស្រី អាយ៉ាត់ក្លេវើ អ្នកឯកទេសនៃគណៈកម្មាធិការរណសិរ្សមាតុភូមិ វៀតណាម ឃុំរួមជាមួយនឹងយុវជនស្ម័គ្រចិត្តទាំងឡាយតែងតែមានវត្តមានជាមុន ដើម្បីជួយប្រជាជនដែលអញ្ជើញមកធ្វើបែបបទ។ អ្នកស្រី អាយ៉ាត់ក្លេវើ ចែករំលែកថា៖ "ក្នុងនាមជាអ្នករស់នៅក្នុងឃុំ ខ្ញុំជាមួយនឹងកងកម្លាំងយុវជនស្ម័គ្រចិត្តពន្យល់ជាភាសាជនជាតិទើបមាមីងបងប្អូនកាន់តែងាយយល់ថែមទៀត ជាពិសេសគឺអ្នកមានវ័យចំណាស់ ស្ត្រីដែលមិនសូវភ្ជាប់ខ្លួនជាមួយនឹងបច្ចេកវិទ្យា"។
បងប្រុស លើមូហាមើយ នៅភូមិ ៣ បានឱ្យដឹងថា លើកដំបូងទៅចុះបញ្ជីកំណើតឱ្យកូន បងព្រួយបារម្ភ ព្រោះមិនសូវប្រសប់ចុចនៅលើកម្មវិធីអេឡិចត្រូនិច។ ដោយសារមានការជួយដោយសុទ្ធចិត្តរបស់យុវជនស្ម័គ្រចិត្ត បែបបទត្រូវបានធ្វើហើយរួចរាល់យ៉ាងឆាប់រហ័ស ត្រឹមត្រូវ។
ឃុំ ឡាកយឿង ត្រូវបានបង្កើតឡើងដោយផ្អែកលើមូលដ្ឋានរួមបញ្ចូលឃុំតំបន់ជ្រៅដាច់ស្រយាលចំនួនបីគឺ ដាសារ៍ ដាចាយស៍ និង ដាញីម នៃស្រុក ឡាកយឿង។ ចាប់ពីថ្ងៃទី ១ ខែ កក្កដា គណៈកម្មាធិការប្រជាជនឃុំ ឡាកយឿង បានដាក់គំរូអាជ្ញាធរពីរថ្នាក់ឱ្យដំណើរការជាផ្លូវការ។ លោក ប៊ូយ ក្វឹកហ៊ន់ ប្រធានគណៈកម្មាធិការប្រជាជនឃុំ ឡាកយឿង បានឲ្យដឹងថា តាំងពីដំបូងភ្លាម ឃុំបានសហការជាមួយនឹងសម្ពន្ធយុវជនរៀបចំកងកម្លាំងជំនួយនៅមជ្ឈមណ្ឌលដោយផ្ទាល់ គ្រោងទុកជាមុនថានឹងអូសបន្លាយក្នុងរយៈពេលមួយខែ ឬយូរជាងនេះទៀតអាស្រ័យតាមតម្រូវការជាក់ស្តែង។
លោក ហ៊ន់ មានប្រសាសន៍ថា "យើងខ្ញុំកំពុងកសាងផែនការបង្កើតក្រុមបច្ចេកវិទ្យា សហគមន៍ទាំងឡាយ ដើម្បីជួយហ្វឹកហ្វឺនបំណិនប្រើសេវាសាធារណៈជូនប្រជាជនបន្ត។ គោលដៅគឺដើម្បីជួយមាមីងបងប្អូនអាចម្ចាស់ការភ្ជាប់ខ្លួន និងប្រើប្រាស់អាជ្ញាធរឌីជីថល ប្រកបដោយប្រសិទ្ធភាពក្នុងរយៈពេលខាងមុខ"៕
អត្ថបទ និង រូបថត៖ ង្វៀនយុង
ប្រែសម្រួល និង បញ្ចូលទិន្នន័យ៖ អៀងថាន់
