យោងតាមមន្ទីរកិច្ចការជនជាតិនិងសាសនាខេត្ត ដុងណាយ បច្ចុប្បន្នមូលដ្ឋានមានចំនួនប្រជាជនច្រើនលំដាប់ទី ៥ ទូទាំងប្រទេស ក្នុងនោះបងប្អូនជនជាតិភាគតិចមានចំនួនជិត ១០% ដោយមានប្រជាជនជាង ៤២១.០០០ នាក់ចំណុះ ៣៧ ក្រុមជនជាតិរស់នៅរួមគ្នាដោយសាមគ្គីភាព និងសុខដុមរមនា។
ក្នុងរយៈពេលប៉ុន្មានឆ្នាំកន្លងហើយ ខេត្ត ដុងណាយ តែងតែយកចិត្តទុកដាក់បញ្ជាណែនាំការអនុវត្តព្រមៗ គ្នារាល់កម្មវិធី គម្រោងការសម្រាប់អភិវឌ្ឍសេដ្ឋកិច្ចនិងសង្គមនៅតំបន់បងប្អូនជនជាតិភាគតិច ការមើលថែជីវភាពខាងសម្ភារៈ ស្មារតី បង្កើនឱកាសរៀនសូត្រ ផលិតកម្ម ធ្វើអាជីវកម្មសម្រាប់បងប្អូនជនជាតិភាគតិច។ ជាពិសេស ចាប់ពីចលនាប្រឡងប្រណាំងស្នេហាជាតិ មានជាច្រើនគំរូបងប្អូនជនជាតិភាគតិចបានងើបឡើងជម្នះការលំបាក មានភាពច្នៃប្រតិដ្ឋក្នុងពលកម្ម ផលិតកម្ម ការសិក្សា ការថែរក្សាអត្តសញ្ញាណវប្បធម៌ និងចូលរួមវិភាគទានយ៉ាងសកម្មសម្រាប់សហគមន៍។
ក្នុងកិច្ចប្រជុំ ប្រតិភូទាំងឡាយជាគំរូតួយ៉ាងក្នុងតំបន់បងប្អូនជនជាតិភាគតិចបានបង្ហាញវិធីល្អៗ និងភាពច្នៃប្រតិដ្ឋក្នុងពលកម្ម ផលិតកម្ម ចូលរួមក្នុងរាល់ចលនាប្រឡងប្រណាំងស្នេហាជាតិ។
លោក ឌៀវត្វា អ្នកមានកិត្យានុភាពជនជាតិ ចើ រ៉ នៅអនុសង្កាត់ ទិនងៀ សង្កាត់ ប៊ិញឡុក ខេត្ត ដុងណាយ មានប្រសាសន៍ថា លោកតែងតែខិតខំអស់ពីចិត្តពីថ្លើមសម្រាប់ការថែរក្សាអត្តសញ្ញាណវប្បធម៌ជនជាតិ។ ក្នុងបរិបទនៃការអភិវឌ្ឍសង្គមយ៉ាងឆាប់រហ័សនោះ លោកតែងតែព្យាយាមផ្សព្វផ្សាយ និងចលនាប្រជាជនឱ្យថែរក្សាភាសា អក្សរសរសេរ ពិធីបុណ្យ និងពិធីកិច្ចដាច់ដោយឡែករបស់ជនជាតិ ចើ រ៉។
លោកព្យាយាមប្រមូលឯកសារភាសាទាំងឡាយរបស់ជនជាតិ បើកថ្នាក់បង្រៀនកុមារអំពីរបៀបប្រកបនិងសរសេរអក្សរ ចើ រ៉ ដើម្បីថែរក្សាភាសាកំណើត។ ដោយមើលឃើញលក្ខណៈវប្បធម៌ជាច្រើនកំពុងបាត់បង់ជាបណ្តើរៗ រយៈពេលកន្លង លោកបានបង្កើតក្រុមគងឃ្មោះ បង្រៀនចង្វាក់រាំ បទចម្រៀង និងបទភ្លេងក្នុងពិធីបុណ្យ Sayangva ប្រមូលឧបករណ៍ភ្លេង និងឧបករណ៍ប្រពៃណីប្រើប្រាស់ក្នុងពលកម្ម និងផលិតកម្ម។
អាស្រ័យដោយការលះបង់អស់ពីកម្លាំងកាយកម្លាំងចិត្តរបស់លោក ជីវភាពវប្បធម៌ក្នុងសហគមន៍ត្រូវបានស្តារឡើងវិញ និងរីកសាយភាយ បងប្អូនមាមីងកាន់តែមានទំនាក់ទំនង និងមានមោទនភាពអំពីប្រភពដើម។ បច្ចុប្បន្ននេះ តំបន់បងប្អូនជនជាតិ ចើ រ៉ កន្លែងលោក ឌៀវត្វា រស់នៅមានជីវភាពស្ថិរភាពហើយ ប្រជាជនជឿទុកចិត្តលើគោលការណ៍ គោលនយោបាយរបស់បក្ស រដ្ឋ និងពង្រីកផ្សព្វផ្សាយវប្បធម៌ប្រពៃណី។
លោកស្រី ង្វៀន ធីហ្វាង អនុប្រធានគណៈកម្មាធិការប្រជាជនខេត្ត ដុងណាយ បញ្ជាក់ថា ខេត្ត ដុងណាយ ជាដែនដីមូលមីរបងប្អូនជនជាតិជាច្រើនរស់នៅរួមគ្នា រួមវិភាគទានដល់ការអភិវឌ្ឍរួមរបស់មូលដ្ឋាន។ រយៈពេលកន្លង ខេត្តបានដាក់ដំណើរការព្រមៗ គ្នារាល់កម្មវិធីអភិវឌ្ឍន៍សេដ្ឋកិច្ចនិងសង្គមនៅតំបន់បងប្អូនជនជាតិភាគតិច ផ្តោតលើការលើកកម្ពស់ជីវភាពរស់នៅ បង្កើតលក្ខខណ្ឌសម្រាប់ការសិក្សា ពលកម្ម ផលិតកម្មជូនប្រជាជន។
លោកស្រីបានស្នើថា នាពេលខាងមុខ ក្រសួង ផ្នែក មូលដ្ឋាននានាបន្តបញ្ជ្រាបការយល់ដឹងសេចក្តីសម្រេចចិត្ត កំណត់ការងារជនជាតិជាភារកិច្ចប្រចាំ យូរអង្វែង មានសារៈសំខាន់ជាយុទ្ធសាស្ត្រសម្រាប់ស្ថិរភាព និងការអភិវឌ្ឍរបស់ខេត្ត ពង្រឹងការរកឃើញ ការបំប៉ន ការសរសើរនិងជូនរង្វាន់គំរូតួយ៉ាង អនុវត្តរាល់កម្មវិធីគោលដៅជាតិប្រកបដោយប្រសិទ្ធភាព យកចិត្តទុកដាក់ចំពោះការរស់នៅរបស់ប្រជាជននៅតំបន់លំបាក និងពង្រីកតួនាទីគំរូភ្លឺថ្លារបស់បុគ្គលគំរូក្នុងការអភិវឌ្ឍសេដ្ឋកិច្ច ការកសាងធ្លុងមហាសាមគ្គី។
ក្នុងឱកាសនេះ គណៈកម្មាធិការប្រជាជនខេត្ត ដុងណាយ បានប្រគល់ជូនប័ណ្ណសរសើរជូនបុគ្គលចំនួន ៣៥ នាក់ មន្ទីរកិច្ចការជនជាតិនិងសាសនាក៏បានកត់សម្គាល់គំរូតួយ៉ាងចំនួន ១២៣ នាក់ក្នុងចំណោមបងប្អូនជនជាតិភាគតិចដំណាក់កាលឆ្នាំ ២០២២ - ២០២៥ ដែលមានសមិទ្ធផលជាច្រើនក្នុងពលកម្ម ផលិតកម្ម និងការចូលរួមរាល់ការចលនាប្រឡងប្រណាំងស្នេហាជាតិ៕
អត្ថបទ និងរូបថត៖ ឡេស៊ន់
ប្រែសម្រួល៖ អៀងថាន់
