លោក ត្រឹន វ៉ាន់ហ៊ុង អនុលេខាគណៈកម្មាធិការបក្សឃុំ ជៅតៀន បានមានប្រសាសន៍ថា ចាប់តាំងពីកម្មវិធីកាត់បន្ថយភាពក្រីក្រភ្ជាប់ជាមួយនឹងបណ្តុះបណ្តាលវិជ្ជាជីវៈនិងជួយការងារធ្វើប្រកបដោយចីរភាពត្រូវបានដាក់ដំណើរការ ផ្នត់គំនិតរបស់ប្រជាជនបានផ្លាស់ប្តូយ៉ាងច្បាស់ក្រឡែត។ មាមីងបងប្អូនរៀនវិជ្ជាជីវៈ លើកកម្ពស់ទឹកដៃមុខជំនាញយ៉ាងសកម្ម មានជំនឿចិត្តឈោងឈានឡើងអភិវឌ្ឍសេដ្ឋកិច្ច។ ជាពិសេស គំរូចងសម្ពន្ធគ្នាបណ្តុះបណ្តាលវិជ្ជាជីវៈបានដោះស្រាយស្ថានភាពបណ្តុះបណ្តាលមិនផ្សារភ្ជាប់ជាមួយតម្រូវការទីផ្សារដូចពីមុននេះ ជួយពលករក្រោយពីរៀនវិជ្ជាជីវៈមានការងារធ្វើស្ថិរភាព។
ជាសិក្ខាកាមម្នាក់ក្នុងចំណោមសិក្ខាកាមចូលរួមថ្នាក់បណ្តុះបណ្តាលវិជ្ជាជីវៈ លោក វី វ៉ាន់ក្វេ (ភូមិ បាន) បានចែករំលែកថា ពីមុននេះរបរត្បាញបន្ទោះគ្រាន់តែជាការងារបន្ថែមក្នុងគ្រួសារប៉ុននោះ ប៉ុន្តែឥឡូវនេះ ទទួលបានការបណ្តុះបណ្តាលមានរបៀបរបប លោកយល់ខ្សែចង្វាក់បង្កើតផលិតផលពេញលេញកាន់តែច្បាស់ ជឿទុកចិត្តរបរត្បាញផ្តៅ ឫស្សីក្លាយជា “ដងសន្ទូចស្ទូចបាយ” ប្រកបដោយចីរភាពសម្រាប់ខ្លួននិងក្រុមគ្រួសារ។ បើតាមលោក គុណសម្បត្តិនៃរបរនេះគឺសមស្របជាមួយនឹងមនុស្សច្រើនវ័យអាយុ អ្នកណាក៏អាចចូលរួមបានដែរ ផ្តើមពីនោះរួមចំណែកផ្សារភ្ជាប់សហគមន៍ បង្កើតការងារធ្វើនៅស្រុកកំណើតតែម្តង។
ដោយសារដាក់ដំណើរការគោលនយោបាយឧបត្ថម្ភដ៏ស៊ីចង្វាក់នឹងគ្នា គួបផ្សំប្រកបដោយប្រសិទ្ធភាពរវាងអភិវឌ្ឍសេដ្ឋកិច្ចព្រៃ បណ្តុះបណ្តាលវិជ្ជាជីវៈនិងបង្កើតការងារធ្វើ ជីវភាពប្រជាជន ជៅតៀន បានមានការវិវឌ្ឍនៈទៅមុខជាវិជ្ជមានជាច្រើន។ ជារៀងរាល់ឆ្នាំឃុំបណ្តុះបណ្តាលវិជ្ជាជីវៈជូនពលករជាង ៥០០ នាក់ ឧទ្ទេសនាម ដោះស្រាយការងារធ្វើជូនពលករជិត ៣.០០០ នាក់ ផ្តល់អាទិភាពអ្នកស្ថិតក្នុងស្ថានភាពលំបាកលំបិន ចាញ់ប្រៀប។ ប្រាក់ចំណូលជាមធ្យមក្នុងមនុស្សម្នាក់កើនឡើងពី ២៧,២ លានដុងក្នុងមួយឆ្នាំនៅឆ្នាំ ២០២០ ឡើងចំនួន ៣១,៣២ លានដុងក្នុងមួយឆ្នាំនៅឆ្នាំ ២០២៥។ ដំណាក់កាល ២០២១ - ២០២៥ អត្រាក្រុមគ្រួសារក្រីក្រថយចុះជាមធ្យមចំនួន ២ ដល់ ៣% ក្នុងមួយឆ្នាំ៕
អត្ថបទនិងរូបថត៖ ទ្រិញ យុយហ៊ឹង - ទីភ្នាក់ងារព័ត៌មានវៀតណាម
ប្រែសម្រួលនិងបញ្ចូលទិន្នន័យ៖ យ័ញលើយ
