អញ្ជើញចូលរួមក្នុងពិធីបិទវគ្គមានលោកវរសេនីយ៍ឯក ហា ហ៊ុយទ្រឿង អនុប្រធានអគ្គស្នងការនយោបាយនៃកងទ័ពការពារព្រំដែនទីក្រុង កឹនធើ លោក ឡឹមសៅរ៍ អនុប្រធានសមាគមជំរុញការសិក្សាទីក្រុងកឹនធើ តំណាងមន្ទីរជនជាតិនិងសាសនាទីក្រុង កឹនធើ តំណាងមន្ទីរអប់រំនិងបណ្តុះបណ្តាលទីក្រុងកឹនធើ និងព្រមទាំងលោកគ្រូ អ្នកគ្រូទាំងឡាយ។
ការងារបណ្តុះបណ្តាល លើកកម្ពស់សមត្ថភាពភាសាសម្រាប់កងទ័ពការពារព្រំដែនកំពុងត្រូវបានជំរុញយ៉ាងខ្លាំងក្លាក្នុងគោលបំណងបំពេញតម្រូវការនៃស្ថានភាពថ្មី និងអនុវត្តភារកិច្ចនៅមូលដ្ឋានតំបន់មានបងប្អូនជនជាតិខ្មែរច្រើនកុះករ។ ហេតុដូច្នេះហើយ សាលាមធ្យមសិក្សាបំពេញវិជ្ជា បាលី ណាមបូ សហការជាមួយគណៈបញ្ជាការកងទ័ពការពារព្រំដែនទីក្រុង កឹនធើ ផ្តួចផ្តើមបង្កើតវគ្គបំប៉នភាសា ខ្មែរ នៅឆ្នាំ ២០២៥។
វគ្គសិក្សាបានចាប់ផ្តើមបើកវគ្គចាប់ពីថ្ងៃទី១៨ ខែកក្កដា ហើយបញ្ចប់នៅថ្ងៃទី២៥ ខែតុលា ដោយមានសិក្ខាកាមចំនួន ២០ នាក់ សម្រេចជាស្ថាពរបង្រៀនរយៈពេល ២០០ ម៉ោង។ ក្នុងនោះផ្តោតសំខាន់លើបំណិនទាំងបួនគឺ បំណិនស្តាប់ បំណិននិយាយ បំណិនអាន និងបំណិនសរសេរ។
អញ្ជើញថ្លែងសុន្ទរកថានៅក្នុងពិធីបិទវគ្គ លោកគ្រូ ថាច់ សុង នាយកសាលាមធ្យមសិក្សាបំពេញវិជ្ជា បាលី ណាមបូ វាយតម្លៃខ្ពស់ការងាររៀបចំថ្នាក់រៀនក៏ដូចជាស្មារតីសិក្សាដ៏ម៉ឺងម៉ាត់ ទំនួលខុសត្រូវរបស់សិក្ខាកាមទាំងឡាយ ព្រមទាំងលើកសរសើរចំពោះការខិតខំប្រឹងប្រែង ប្តេជ្ញាចិត្តរបស់គ្រូបង្រៀន និងកម្មាភិបាលសាលាមធ្យមសិក្សាបំពេញវិជ្ជា បាលី ណាមបូ ក្នុងដំណើរការបង្រៀន និងរៀបចំវគ្គសិក្សា។
យោងតាមលោកគ្រូ ថាច់ សុង ភាពជោគជ័យនៃវគ្គបណ្តុះបណ្តាលមិនបញ្ចប់នៅត្រឹមប្រគល់វិញ្ញាបនបត្របញ្ជាក់ប៉ុណ្ណោះទេ ប៉ុន្តែសំខាន់ជាងនេះទៅទៀត គឺការជួយកម្មាភិបាល យុទ្ធជនលើកកម្ពស់សមត្ថភាពប្រើប្រាស់ភាសាខ្មែរក្នុងការអនុវត្តជាក់ស្តែង។ តាមរយៈនេះ កងកម្លាំងនៃកងទ័ពការពារព្រំដែនមានឱកាសកាន់តែជិតស្និទ្ធប្រជាជន យល់ដឹងកាន់តែច្បាស់ រួមចំណែកការអនុវត្តភារកិច្ចនយោបាយ និងសង្គមប្រកបដោយប្រសិទ្ធភាពនៅមូលដ្ឋាន។
ក្រោមការណែនាំរបស់កងជួរគ្រូបង្រៀនមានបទពិសោធន៍នៃផ្នែកសង្គម-ខ្មែរ-បាលីថ្នាក់រៀនបានដំណើរការយ៉ាងហ្មត់ចត់និងទាន់ពេលវេលាកំណត់។ យោងតាមការវាយតម្លៃរបស់សាលារៀន ទោះបីសិក្ខាកាមរៀនផង ធ្វើការងារផង ពេលខ្លះដោះស្រាយ ការងារបន្ទាន់នៅអង្គភាព ស្មារតីរៀនសូត្រនៅតែបន្តរក្សាខ្ពស់។ សិក្ខាកាមទាំងឡាយបានធ្វើអន្តរកម្មយ៉ាងសកម្ម ផ្លាស់ប្តូរគំនិត និងសាមគ្គី រួមគ្នាលើកកម្ពស់ចំណេះដឹង និងបំណិន។
លទ្ធផលនៃការប្រឡងបញ្ចប់វគ្គសិក្សានៅថ្ងៃទី០១ ខែវិច្ឆិកា ឆ្នាំ ២០២៥ បានបង្ហាញអោយឃើញថា សិក្ខាកាម ១០០% សម្រេចបំពេញតាមតម្រូវការ។ ក្នុងចំណោមនោះ មានសិក្ខាកាម ១៩ នាក់បានសម្រេចនិទ្ទេសពូកែ (៩៥%) និងសិក្ខាកាមម្នាក់ទទួលបាននិទ្ទេសល្អបង្គួរ។ តួលេខទាំងនេះបញ្ជាក់ពីកិច្ចខិតខំប្រឹងប្រែងឥតឈប់ឈររបស់សិក្ខាកាមទាំងឡាយព្រមទាំងគុណភាពបង្រៀនប្រកបដោយប្រសិទ្ធភាពរបស់សាលារៀន។
នេះគឺជាឆ្នាំទីពីរ សាលាមធ្យមសិក្សាបំពេញវិជ្ជា បាលី ណាមបូ សហការជាមួយគណៈបញ្ជាការកងទ័ពការពារព្រំដែនទីក្រុង កឹនធើ រៀបចំការបណ្តុះបណ្តាលភាសាខ្មែរ។ ចាប់ពីវគ្គដំបូងក្នុងឆ្នាំ ២០២៣ រហូតមកដល់បច្ចុប្បន្ន អង្គភាពទាំងពីរបានបំប៉នសិក្ខាកាមចំនួន ១០៨ នាក់ដោយជោគជ័យ។
នៅពេលខាងមុខសាលាមធ្យមសិក្សាបំពេញវិជ្ជា បាលី ណាមបូ នឹងបន្តរក្សាពង្រីកទូលាយកម្មវិធីបណ្តុះបណ្តាលសហការ រួមចំណែកកសាងកងជួរកម្មាភិបាលព្រំដែនដ៏ឆ្នើម យល់អំពីវប្បធម៌ទំនៀមទម្លាប់ប្រពៃណី រួមចំណែកនៃការអភិវឌ្ឍរួមរបស់ទីក្រុងកឹនធើកាន់តែល្អប្រសើរជាងទៀត៕
ដំណឹងនិងរូបថត៖ យ៉ាញ់មេន - សឺនហេង
