អញ្ជើញចូលរួមក្នុងពិធីរួមមានលោក ឡឹម ហ្វាងម៉ូវ នាយកមន្ទីរជនជាតិនិងសាសនាទីក្រុងកឹនធើ លោក យ៉ាញ់ ហ្វាង ង្វៀន នាយករងមន្ទីរអប់រំ និងបណ្តុះបណ្តាលទីក្រុងកឹនធើ លោក ថាច់ សុង នាយកសាលាមធ្យមសិក្សាបំពេញវិជ្ជា បាលី ណាមបូ លោក ឡឹម សៅរ៍ អនុប្រធានសមាគមជំរុញការសិក្សាទីក្រុងកឹនធើ រួមជាមួយព្រះចៅអធិការព្រះឧបជ្ឈាយ៍នៃសមាគមព្រះសង្ឃសាមគ្គីស្នេហាជាតិទីក្រុង កឹនធើ សមណសិស្ស និងពុទ្ធបរិស័ទចំណុះជើងវត្តផ្សេងៗ។
និមន្តសង្ឃដីកានៅក្នុងពិធីប្រកាសលទ្ធផលប្រឡង ព្រះឧបជ្ឈាយ៍ តាំង ណូ ប្រធានសមាគមព្រះសង្ឃសាមគ្គីស្នេហាជាតិទីក្រុង កឹនធើ និមន្តសង្កត់ធ្ងន់ថា៖ ការរៀបចំប្រឡងបាលីរងមិនត្រឹមតែគោលបំណងវាយតម្លៃចំណេះដឹងប៉ុណ្ណោះទេ ថែមទាំងជាភារកិច្ចស្នូលក្នុងការងារថែរក្សា “ព្រលឹងវិញ្ញាណ” ជនជាតិ ខ្មែរ ទៀតផង។
ព្រះឧបជ្ឈាយ៍លើកសរសើរស្មារតីការខិតខំប្រឹងប្រែងរៀនសូត្ររបស់សមណសិស្ស រួមជាមួយការឧបត្ថម្ភយ៉ាងសកម្មពីវត្តអារាមទាំងឡាយ ព្រមទាំងសម្តែងក្តីសង្ឃឹមថាព្រះសង្ឃទាំងឡាយនឹងបន្តបណ្តុះគុណធម៌ ផ្លាស់ប្តូរចំណេះដឹងដើម្បីរួមចំណែកជាក់ស្តែងដល់ព្រះពុទ្ធសាសនា និងប្រជាជាតិ។
ក្រោមការយល់ដឹងនិងចំណេះជំនាញ លោកគ្រូ យ៉ាញ់ មេន គ្រូបង្រៀននៅសាលាមធ្យមសិក្សាបំពេញវិជ្ជា បាលី ណាមបូ សមាជិកក្រុមប្រឹក្សាប្រឡង សង្កេតឃើញថា គុណភាពនៃការប្រឡងឆ្នាំនេះមានវឌ្ឍនភាពយ៉ាងច្បាស់ក្រឡែតអំពីវេយ្យាករណ៍ និងបំណិនបកប្រែ។ “លទ្ធផលនេះបង្ហាញថា ការងារបង្រៀននៅតាមវត្តអារាមកំពុងដើរត្រូវទិសដៅ ត្រូវបានវិនិយោគទៅតាមវិធីសាស្រ្ត។ សាលារៀនក៏ត្រៀមរួចជាស្រេចក្នុងការទទួលយក បណ្តុះបណ្តាលបញ្ញាវន្តឆ្នើមទាំងឡាយពីការប្រឡងនេះគោលបំណងបណ្តុះបណ្តាលព្រះសង្ឃបន្តវេនជំនាន់ថ្មីមានបុគ្គលិកលក្ខណៈនិងសមត្ថភាពគ្រប់គ្រាន់” លោកគ្រូ មេន ចែករំលែក។
យោងតាមលោកគ្រូ មេន ការប្រឡងឆ្នាំនេះមានព្រះសង្ឃចំនួន ៩២ អង្គមកពីវត្តចំនួន ៦ លើភូមិសាស្រ្តទីក្រុង កឹនធើ ចំនួនកើនបើប្រៀបធៀបទៅនឹងឆ្នាំមុនៗ។ ខ្លឹមសារនៃការប្រឡងរួមមាន បកប្រែ និងវេយ្យាករណ៍ភាសាបាលី អក្ខរាវិរុទ្ធនិងវេយ្យាករណ៍ខេមរភាសា និងពុទ្ធប្រវត្តិ។ នេះគឺជាសកម្មភាពប្រចាំឆ្នាំប្រារព្ធឡើងបន្ទាប់ពីបញ្ចប់ឆ្នាំសិក្សាគោលបំណងវាយតម្លៃជំនាញភាសាបាលី សមត្ថភាពក្នុងការបកប្រែគម្ពីរព្រះពុទ្ធសាសនា និងកម្រិតនៃការយល់ដឹងអំពីធម្មវិន័យព្រះពុទ្ធសាសនារបស់សមណសិស្សខ្មែរ។
នៅក្នុងពិធី គណៈកម្មការប្រគេនវិញ្ញាបនបត្របញ្ជាក់និងរង្វាន់ដ៏មានអត្ថន័យដល់សមណសិស្សទទួលបានលទ្ធផលឆ្នើមក្នុងការប្រឡង។ ភាពរីករាយរបស់សមណសិស្សនៅពេលទទួលរង្វាន់កាន់ក្នុងដៃគឺជាភស្តុតាងសម្រាប់ភាពជោគជ័យនៃការប្រឡង ស្របពេលរីកសាយភាយទឹកចិត្តយ៉ាងខ្លាំងក្លាក្នុងការរៀនសូត្រនៅក្នុងសហគមន៍។
ការប្រារព្ធពិធីប្រឡង និងប្រគេនរង្វាន់នៅវត្ត សិរីតាម៉ឺន បង្កើតជាលំហវប្បធម៌ដ៏មានអត្ថន័យ ផ្សារភ្ជាប់ស្មារតីសាមគ្គីភាពរវាងព្រះសង្ឃ និងពុទ្ធបរិស័ទនៅមូលដ្ឋាន។ ព្រឹត្តិការណ៍បានបញ្ចប់ដោយភាពរីករាយ បញ្ជាក់ពីតួនាទីដ៏សំខាន់របស់សមាគមព្រះសង្ឃសាមគ្គីស្នេហាជាតិទីក្រុង កឹនធើ ក្នុងការអភិរក្ស និងពង្រីកអត្តសញ្ញាណវប្បធម៌ អក្សរភាសា ខ្មែរ ក្នុងយុគសម័យថ្មី៕
ផលិតដោយ៖ សឺន ហេង
