ការអភិរក្សអត្តសញ្ញាណវប្បធម៌
ជារៀងរាល់ថ្ងៃឲ្យតែវេលាម៉ោង ១៩ (លើកលែងតែថ្ងៃព្រហស្បតិ៍) ថ្នាក់រៀនភាសា ចាម នៅព្រះវិហារឥស្លាម Jamia Al Sa’adah (សង្កាត់ ប៊ិញទៀន) ក៏គគ្រឹកគគ្រេង កងរំពងសំឡេងសូត្រព្រះគម្ពីរ គួរអាន របស់កុមារៗ ជនជាតិ ចាម។ មិនឆ្ងាយជាប៉ុន្មានពីទីនោះ នៅព្រះវិហារ ឥស្លាម Jamiul Anwar (សង្កាត់ ចាញ់ហ៊ឹង) ក៏មានថ្នាក់រៀនភាសា ចាម ដោយឥត គិតថ្លៃផងដែរ។ មិនមានក្ដារខៀន មិនមានម៉ាស៊ីនបញ្ចាំងស្លាយ ប៉ុន្តែថ្នាក់រៀនទាំងនេះមានតួនាទីសំខាន់ក្នុងការអប់រំ ហើយបង្កបង្កើតអត្តសញ្ញាណវប្បធម៌សម្រាប់ជនជាតិ ចាម ជាច្រើនជំនាន់។
លោក Mohamad Zen ប្រធានគណៈកម្មការព្រះវិហារ ឥស្លាម Jamia Al Sa’adah ឲ្យដឹងថា សហគមន៍ជនជាតិ ចាម "ផេ្ទរបន្តភ្នក់ភ្លើង" ឱ្យយុវជនជំនាន់ក្រោយឆ្លងតាមរយៈការបង្រៀនអក្សរ ការរក្សាភាសានិងវប្បធម៌ប្រពៃណីឥតឈប់ឈរ។
ចំពោះបងប្អូនជនជាតិ ខ្មែរ នៅទីក្រុង ហូ ជីមិញ ពុទ្ធសាសនាទក្ខិណនិកាយគឺជាផ្នែកមួយមិនអាចខ្វះបានក្នុងជីវភាពស្មារតី មនោវិញ្ញាណដោយមានមជ្ឈមណ្ឌលសាសនាសំខាន់ពីរគឺវត្ត ចន្ទរង្សី (សង្កាត់ ស៊ន់ហ្វា) និងវត្ត ពោធិវង្ស (សង្កាត់ បៃហៀន)។
វត្ត ខ្មែរ ទាំងឡាយមិនត្រឹមតែជាចំណុចតភ្ជាប់វប្បធម៌ ណែនាំបងប្អូនជនជាតិបួសរៀនប៉ុននោះទេ ថែមទាំងជាកន្លែងរៀបចំបណ្តាថ្នាក់បង្ហាត់បង្រៀនភាសា ខ្មែរ ដោយឥតគិតថ្លៃ ទទួលយកទំនុកបម្រុងកន្លែងឆាន់បរិភោគ ស្នាក់អាស្រ័យសម្រាប់ព្រះសង្ឃ និស្សិតច្រើនអង្គនិងរូប ឬក៏រៀបចំបណ្តាសកម្មភាពពិធីកិច្ចបុណ្យទានដូចជាបុណ្យចូលឆ្នាំថ្មី បុណ្យសែនដូនតាជាដើម។ វត្តអារាមនិងព្រះសង្ឃ រួមចំណែកយ៉ាងសកម្មចូលក្នុងការអភិរក្ស ផេ្ទរណែនាំជនជាតិ ខ្មែរ គ្រប់ជំនាន់លើកតម្កើងឱ្យតម្លៃវប្បធម៌ប្រពៃណី កសាងសហគមន៍ រួមជាមួយបណ្តាជនជាតិ សាសនាដទៃទៀតកសាងទីក្រុងនិងប្រទេសជាតិជាមួយគ្នា។
ជនជាតិ ចិន គឺជាសហគមន៍មានចំនួនប្រជាជនច្រើនលំដាប់លេខមួយក្នុងចំណោមជនជាតិភាគតិចនៅក្នុងទីក្រុង ហូ ជីមិញ។ រួមជាមួយនឹងការថែរក្សាបណ្តាលក្ខណៈវប្បធម៌ពិសេសដាច់ដោយឡែក ស្ថាបត្យកម្មទាំងឡាយ គំរូសាលសមាគមរាប់រយឆ្នាំ ។ល។ សហគមន៍ជនជាតិ ចិន តែងតែសាមគ្គីអនុវត្តល្អមាគ៌ា គោលការណ៍របស់បក្ស គោលនយោបាយ ច្បាប់របស់រដ្ឋ សកម្មក្នុងការកសាងសហគមន៍ប្រជានិវេសន៍វប្បធម៌។
បណ្តាសហគមន៍ស្វាហាប់
លោក ឡឹម មិញហ៊ុយ ប្រធានគណៈកម្មការសាលសមាគម ហាយណាម សង្កាត់ ចើលើន ឲ្យដឹងថា៖ សហគមន៍ជនជាតិ ចិន ចូលរួមយ៉ាងសកម្មបណ្តាសកម្មភាពធ្វើអាជីវកម្ម ពាណិជ្ជកម្ម រួមចំណែកបង្កើតបានទិដ្ឋភាពកុះករអ៊ូអរ ស្វាហាប់របស់ទីក្រុង ហូ ជីមិញ។ មាមីងបងប្អូនថែមទាំងធ្វើសប្បុរសធម៌ស្ម័គ្រចិត្តយ៉ាងសកម្ម ឧបត្ថម្ភសហគមន៍ចូលរួមសកម្មភាពសុខុមាលភាពសង្គម រួមចំណែកកសាងសាមគ្គីភាពជនជាតិទៀតផង។
សហគមន៍ជនជាតិ ចាម កាន់សាសនា ឥស្លាម នៅទីក្រុង ហូ ជីមិញ ភាគច្រើនរស់នៅសង្កាត់ ចាញ់ហ៊ឹង ប៊ិញទៀន ញៀវឡុក ភូញាន់ យ៉ាឌិញ ជាដើម។ លោក Ab-Dohalim អនុប្រធានគណៈកម្មការព្រះវិហារ Jamiul Anwar ឲ្យដឹងបន្ថែមថា សហគមន៍ជនជាតិ ចាម ចូលរួមក្នុងវិស័យពាណិជ្ជកម្ម សេវាកម្ម ការអប់រំយ៉ាងសកម្ម។ មនុស្សជាច្រើននាក់ចូលរួមយ៉ាងវិជ្ជមានក្នុងការអភិវឌ្ឍរួមនៃទីក្រុង។
លោកស្រី ទ្រឿង ធីប៊ិចហាញ់ អនុប្រធានអចិន្ត្រៃយ៍នៃគណៈកម្មាធិការរណសិរ្សមាតុភូមិវៀតណាម ទីក្រុង ហូ ជីមិញ រៀបរាប់ថា៖ សហគមន៍ជនជាតិភាគតិចនៅទីក្រុង ហូ ជីមិញ តែងតែសាមគ្គី ថែរក្សាវប្បធម៌ប្រពៃណី សាយភាយប្រការល្អប្រសើរនានា រួមជាមួយទីក្រុងអភិវឌ្ឍពីមួយថ្ងៃទៅមួយថ្ងៃ។
ទីក្រុង ហូ ជីមិញ តែងតែកត់សម្គាល់ និងឲ្យតម្លៃដល់ការចូលរួមទាំងឡាយរបស់សហគមន៍បណ្តាជនជាតិភាគតិចនៅលើវិស័យជាច្រើន។ ការឧស្សាហ៍ព្យាយាម ច្នៃប្រតិដ្ឋនិងស្មារតីសាមគ្គីរបស់មាមីងបងប្អូនគឺជាប្រភពកម្លាំងដ៏មានតម្លៃដើម្បីកសាងទីក្រុង "អរិយធម៌ ទំនើប គុណធម៌"។ "នេះពិតជាមូលដ្ឋានគ្រឹះដ៏រឹងមាំដើម្បីទីក្រុងបន្តពង្រីកតួនាទីមជ្ឈមណ្ឌលស្វាហាប់កន្លែងប្រមូលផ្តុំនិងរីកសាយភាយកម្លាំងចម្រុះនៃសហគមន៍បងប្អូនបណ្តាជនជាតិ" - លោកស្រី ទ្រឿង ធីប៊ិចហាញ់ បញ្ជាក់ដូច្នេះ៕
អត្ថបទនិងរូបថត៖ អានហៀវ
បញ្ចូលទិន្នន័យ៖ រាជិនី
