ធ្វើបមាណីយកម្មកងជួរកម្មាភិបាលពីមួយជំហានទៅមួយជំហាន
ក្នុងរយៈពេលកន្លង កងជួរកម្មាភិបាល បុគ្គលិករដ្ឋការសាធារណៈ បុគ្គលិករដ្ឋការស៊ីវិលជាបងប្អូនជនជាតិនៅលើភូមិសាស្រ្តខេត្ត កាម៉ៅ ត្រូវបានពង្រឹង អភិវឌ្ឍទាំងបរិមាណ និងគុណភាពពីមួយជំហានទៅមួយជំហាន រួមចំណែកយ៉ាងសំខាន់ក្នុងកិច្ចការគ្រប់គ្រងរដ្ឋ អភិវឌ្ឍសេដ្ឋកិច្ច - សង្គម រក្សាខ្ជាប់ខ្ជួនការការពារជាតិ សន្តិសុខនិងពង្រឹងធ្លុងមហាសាមគ្គីប្រជាជាតិទាំងមូល។ បច្ចុប្បន្ននេះ ប្លុកអាជ្ញាធរមានកម្មាភិបាល បុគ្គលិករដ្ឋការសាធារណៈ បុគ្គលិករដ្ឋការស៊ីវិលជាបងប្អូនជនជាតិមានសរុបចំនួន ១.២៣៨ នាក់ក្នុងចំណោម ៣២.៩៥៩ នាក់ ស្មើនឹង ៣,៧៦% នៃចំនួនកម្មាភិបាល បុគ្គលិករដ្ឋការសាធារណៈ បុគ្គលិករដ្ឋការស៊ីវិលទូទាំងខេត្ត។
ក៏ប៉ុន្តែ យោងតាមគណៈកម្មាធិការប្រជាជនខេត្ត កាម៉ៅ បានឱ្យដឹងថា អត្រាកម្មាភិបាល បុគ្គលិករដ្ឋការសាធារណៈ បុគ្គលិករដ្ឋការស៊ីវិលជាបងប្អូនជនជាតិនៅតាមស្ថាប័ន មូលដ្ឋានមួយចំនួននៅមិនទាន់សមស្របពិតប្រាកដនឹងរចនាសម្ព័ន្ធចំនួនប្រជាជនក្នុងភូមិសាស្រ្តនៅឡើយ។ អត្រាកម្មាភិបាលជាបងប្អូនជនជាតិកាន់តំណែងដឹកនាំ គ្រប់គ្រងនៅមានកម្រិត ដោយមានមនុស្សចំនួន ៨៥ នាក់ (ស្មើត្រឹមតែ ៦,៨៧% នៃចំនួនកម្មាភិបាលជាបងប្អូនជនជាតិសរុប)។ ភាពកង្វះខាតនេះ បណ្តាលមកពីប្រភពកម្មាភិបាលនៅមូលដ្ឋានមួយចំនួននៅមានកម្រិត ខណៈការងាររៀបចំគម្រោងការ បង្កើតប្រភពធនធាន និងរៀបចំបណ្តុះបណ្តាលនៅតាមអង្គភាពមួយចំនួនមិនទាន់ឆ្លើយតបទាន់ពេលវេលានឹងតម្រូវការជាក់ស្តែងក្នុងសភាពការណ៍ថ្មី។
ដើម្បីដោះស្រាយចំណុចខ្វះខាត ខេត្ត កាម៉ៅ ដាក់គោលដៅបមាណីយកម្មឯកទេសវិជ្ជាជីវៈ និងលទ្ធភាពគ្រប់គ្រងទំនើបសម្រាប់ដំណាក់កាលរហូតដល់ឆ្នាំ ២០៣០។ គោលដៅរបស់ខេត្តគឺបង្កើតកងជួរកម្មាភិបាល បុគ្គលិករដ្ឋការសាធារណៈ បុគ្គលិករដ្ឋការស៊ីវិលជាបងប្អូនជនជាតិមានសមត្ថភាពនយោបាយរឹងមាំ មានសីលធម៌ល្អប្រសើរ ឯកទេសវិជ្ជាជីវៈ និងលទ្ធភាពអនុវត្តជាក់ស្តែងកិច្ចការសាធារណៈឆ្លើយតបតម្រូវការក្នុងសភាពការណ៍ថ្មី ដោយធានាអភិវឌ្ឍយ៉ាងសមស្របទាំងបរិមាណ គុណភាព រចនាសម្ព័ន្ធជនជាតិ ភេទ អាយុ និងវិស័យបំពេញការងារ ស្របតាមលក្ខណៈប្រជានិវេសន៍របស់មូលដ្ឋាន។ ទន្ទឹមនោះ បង្កើនអត្រាកម្មាភិបាលជាបងប្អូនជនជាតិចូលរួមដឹកនាំ គ្រប់គ្រងគ្រប់លំដាប់ថ្នាក់ជាបណ្តើរៗ រួមចំណែកកសាងប្រព័ន្ធនយោបាយរឹងមាំ និងជំរុញការអភិវឌ្ឍសេដ្ឋកិច្ច - សង្គមនៅតំបន់បងប្អូនជនជាតិ។
ដល់ឆ្នាំ ២០៣០ ខេត្ត កាម៉ៅ ប្រឹងប្រែង ១០០% កម្មាភិបាល បុគ្គលិករដ្ឋការសាធារណៈជាបងប្អូនជនជាតិមានកម្រិតមហាវិទ្យាល័យឡើងទៅ ក្នុងនោះយ៉ាងហោចណាស់ ១០% មានកម្រិតអនុបណ្ឌិតឡើងទៅ។ ខេត្តក៏បានដាក់គោលដៅ ១០០% កម្មាភិបាលដឹកនាំ គ្រប់គ្រងជាបងប្អូនជនជាតិបានបំប៉នចំណេះដឹងស្តីអំពីបរិវត្តកម្មឌីជីថល កែទម្រង់រដ្ឋបាល និងជំនាញគ្រប់គ្រងទំនើប។ ជារៀងរាល់ឆ្នាំ យ៉ាងហោចណាស់ ១៥% កម្មាភិបាល បុគ្គលិករដ្ឋការសាធារណៈ បុគ្គលិករដ្ឋការស៊ីវិលជាបងប្អូនជនជាតិត្រូវបានចាត់បញ្ជូនទៅបណ្តុះបណ្តាល បំប៉នបង្កើនទ្រឹស្តីនយោបាយ ជំនាញវិជ្ជាជីវៈ ឬជំនាញផ្នែកដឹកនាំ។
ក្នុងកិច្ចការរៀបចំ ប្រើការកម្មាភិបាល ខេត្តធានាការចាត់ចែងកម្មាភិបាល បុគ្គលិករដ្ឋការសាធារណៈ បុគ្គលិករដ្ឋការជាបងប្អូនជនជាតិឱ្យស្របនឹងឯកទេសវិជ្ជាជីវៈ លទ្ធភាព ទេពកោសល្យ មុខតំណែង ព្រមទាំងបង្កើនការផ្ទេរការងារ ចាត់និងបញ្ជូនកម្មាភិបាលទៅបំពេញការងារបណ្តោះអាសន្នក្នុងក្របខណ្ឌរៀបចំគម្រោងការសម្រាប់លត់ដំជាក់ស្តែង បង្កើតប្រភពធនធានកម្មាភិបាលជាអ្នកដឹកនាំ គ្រប់គ្រង។
ចំពោះភូមិសាស្រ្តមានបងប្អូនជនជាតិរស់នៅច្រើនកុះករ ខេត្ត កាម៉ៅ ប្រឹងប្រែងឱ្យមានមុខតំណែងដឹកនាំ គ្រប់គ្រងស្នូលមានយ៉ាងហោចណាស់កម្មាភិបាលជនជាតិភាគតិចម្នាក់ក្នុងគម្រោងការបន្តវេន ព្រមទាំងផ្តល់អាទិភាពបង្កើនសមាមាត្រកម្មាភិបាលវ័យក្មេង និងកម្មាភិបាលជានារី។
បង្កើតប្រភពធនធានកម្មាភិបាលសម្រាប់ដំណាក់កាលថ្មី
ដើម្បីសម្រេចគោលដៅបានកំណត់ហើយ គណៈកម្មាធិការប្រជាជនខេត្ត កាម៉ៅ កំណត់អនុវត្តន៍វិធានការចាប់ពីបង្កើតប្រភពធនធាន បណ្តុះបណ្តាល រៀបចំគម្រោងការរហូតដល់ចាត់ចែង ប្រើការកម្មាភិបាលជនជាតិភាគតិច ភ្ជាប់ជាមួយនឹងការអភិវឌ្ឍសេដ្ឋកិច្ច - សង្គមនៅតំបន់បងប្អូនជនជាតិភាគតិច។
តាមរយៈនោះ ខេត្តនឹងអនុវត្តក្រុមភារកិច្ច វិធានការគន្លឹះចំនួន ៥។ នៅចំពោះមុខ ក្នុងឆ្នាំ ២០២៦ ខេត្ត កាម៉ៅ ពិនិត្យ បែងចែកកងជួរកម្មាភិបាលជនជាតិភាគតិចដើម្បីវាយតម្លៃសមត្ថភាព និងសក្តានុភាពអភិវឌ្ឍន៍ ព្រមទាំងកសាងមូលដ្ឋានទិន្នន័យឌីជីថលសម្រាប់បម្រើការងារគ្រប់គ្រង។ ស្របពេលនោះដែរគឺធ្វើនវានុវត្តន៍ការងាររៀបចំគម្រោងការតាមទិសដៅធានាការបន្តវេន ផ្តល់អាទិភាពដល់កម្មាភិបាលដែលយល់ដឹងអំពីប្រពៃណី ទំនៀមទម្លាប់ និងអាចប្រើប្រាស់ភាសាជនជាតិបាន បង្កើនការផ្ទេរ ចាត់ បញ្ជូនកម្មាភិបាលស្ថិតក្នុងក្របខ័ណ្ឌគម្រោងការចុះមកមូលដ្ឋានដើម្បីលត់ដំជាក់ស្តែង។
ខេត្តក៏ជំរុញការចងសម្ព័ន្ធជាមួយគ្រឹះស្ថានអប់រំដើម្បីរកឃើញ បំប៉នសិស្ស និស្សិត ជនជាតិភាគតិចមានស្នាដៃឆ្នើម ព្រមទាំងអនុវត្តគោលនយោបាយទាក់ទាញធនធានមនុស្សគុណភាពខ្ពស់ឱ្យមកបំពេញការងារនៅមូលដ្ឋានវិញ។
យោងតាមលោកស្រី ង្វៀន ធូទឺ នាយិកាមន្ទីរជនជាតិ និងសាសនាខេត្ត កាម៉ៅ លើកឡើងថា ក្នុងរយៈពេលប៉ុន្មានឆ្នាំកន្លងហើយ តំបន់បងប្អូនជានជាតិក្នុងភូមិសាស្រ្តខេត្តមានការផ្លាស់ប្ដូរយ៉ាងវិជ្ជមានជាច្រើន។ ក្នុងដំណាក់កាលឆ្នាំ ២០១០ - ២០២៥ ជាង ៣.២០០ ពាន់លានដុងត្រូវបានកៀរគរមកវិនិយោគសម្រាប់ការអភិវឌ្ឍហេដ្ឋារចនាសម្ព័ន្ធចរចរណ៍ សាលារៀន មូលដ្ឋានសុខាភិបាល គោលនយោបាយអំពីផ្នែកអប់រំ សុខាភិបាល សុខុមាលភាពសង្គម គំរូជាច្រើនត្រូវបានអនុវត្តប្រកបដោយប្រសិទ្ធភាព និងពង្រីកទូលំទូលាយ រួមចំណែកបង្កើនប្រាក់ចំណូល កែលម្អជីវភាពរស់នៅទាំងផ្នែកសម្ភារៈ និងផ្នែកស្មារតីរបស់បងប្អូនជនជាតិ និងពង្រឹងធ្លុងមហាសាមគ្គីភាពប្រជាជាតិទាំងមូល។
លោក ង៉ូ វូថាំង អនុប្រធានគណៈកម្មាធិការប្រជាជនខេត្ត កាម៉ៅ បានសង្កត់ធ្ងន់ថា ការងារជនជាតិគឺជាបញ្ហាយុទ្ធសាស្ត្រក្នុងរយៈពេលវែង មានសារៈសំខាន់ជាពិសេសក្នុងការពង្រឹងធ្លុងមហាសាមគ្គីភាពប្រជាជាតិទាំងមូល និងរក្សាខ្ជាប់ខ្ជួននយោបាយ - សង្គម។ រយៈពេលកន្លង ខេត្តបានអនុវត្តទាន់ពេលវេលា ប្រកបដោយប្រសិទ្ធភាពរាល់កម្មវិធីគោលដៅជាតិ និងសេចក្តីសម្រេច ផែនការអភិវឌ្ឍន៍តំបន់បងប្អូនជនជាតិ រួមបញ្ចូលជាមួយគោលនយោបាយកាត់បន្ថយភាពក្រីក្រ ជួយឱ្យជីវភាពបងប្អូនបណ្តាជនជាតិ ជាពិសេសគឺបងប្អូនជនជាតិ ខ្មែរ មានការរីកចម្រើនវិជ្ជមានទាំងផ្នែកសម្ភារៈ និងស្មារតី។
ឈានចូលដំណាក់កាលអភិវឌ្ឍន៍ថ្មីជាមួយនឹងតម្រូវការកាន់តែខ្ពស់ អនុប្រធានគណៈកម្មាធិការប្រជាជនខេត្ត កាម៉ៅ សំណូមពរការងារជនជាតិរបស់ខេត្តត្រូវធ្វើនវានុវត្តន៍កាន់តែខ្លាំងក្លាថែមទៀតអំពីគំនិត វិធីសាស្ត្រ និងរបៀបអនុវត្ត។ នាពេលខាងមុខ ខេត្ត កាម៉ៅ បន្តបញ្ជ្រាបការយល់ដឹងឲ្យស៊ីជម្រៅនូវទស្សនៈរបស់បក្សស្តីពីការងារជនជាតិ លើកកម្ពស់គុណភាពធ្វើសេនាធិការ ធានារាល់គោលការណ៍ គោលនយោបាយត្រូវបានអនុវត្តប្រកបដោយសង្គតិភាព ច្បាមស្ថានភាពជាក់ស្តែង។ ខេត្តផ្តោតសំខាន់ការអនុវត្តល្អការងារអភិវឌ្ឍធនធានមនុស្ស បណ្តុះបណ្តាលវិជ្ជាជីវៈ ដោះស្រាយការងារធ្វើ លើកកម្ពស់គុណភាពអប់រំ និងថែទាំសុខភាពជូនបងប្អូនជនជាតិ។
ជាពិសេស ខេត្ត កាម៉ៅ នឹងផ្តោតលើការអភិវឌ្ឍកងជួរកម្មាភិបាល បុគ្គលិករដ្ឋការសាធារណៈ បុគ្គលិករដ្ឋការស៊ីវិលជាបងប្អូនជនជាតិភាគតិចធានាស្របតាមគោលដៅ សន្ទស្សន៍ក្នុងផែនការលេខ 229/KH-UBND ចុះថ្ងៃទី ២៤ ខែ មេសា ឆ្នាំ ២០២៦ របស់គណៈកម្មាធិការប្រជាជនខេត្តស្តីពីការអនុវត្តគម្រោងមេអភិវឌ្ឍកងជួរកម្មាភិបាល បុគ្គលិករដ្ឋការសាធារណៈ បុគ្គលិករដ្ឋការស៊ីវិលជាជនជាតិភាគតិចនៅក្នុងស្ថាប័នគ្រប់គ្រងរដ្ឋ អង្គភាពសេវាសាធារណៈ ដំណាក់កាលឆ្នាំ ២០២៦ - ២០៣៥។
ទន្ទឹមនោះ ខេត្តបន្តពង្រីកតួនាទីរបស់អ្នកមានកិត្យានុភាព សមណសក្តិសាសនា កម្មាភិបាលស្នូល សហការបំពេញល្អការងារអភិរក្ស លើកស្ទួយអត្តសញ្ញាណវប្បធម៌ប្រពៃណីរបស់បងប្អូនជនជាតិ ខ្មែរ ចិន និងជនជាតិផ្សេងៗ ផ្សារភ្ជាប់ជាមួយនឹងការអភិវឌ្ឍទេសចរណ៍ សេដ្ឋកិច្ច និងការកសាងជីវភាពវប្បធម៌នៅមូលដ្ឋាន៕
អត្ថបទ៖ ចិន្តា
ប្រែសម្រួល៖ ចន្ថា
